Медведев Андрей Евстафьевич
Вормиз тушмонэз но, висёнэз но[править]
Андрей Евстафьевич Медведев – медицина службаысь майор. Афганистан оже пыриськемез понна данъямын «За боевые заслуги» медален. Пӧртэм военной частьёсысь ожгарчиослэсь тазалыксэс 10 ар пала чакласа возиз. Туннэ Андрей Евстафьевич ужа элькун военкоматын невролог луыса. Капчиен кыл шедьтэ удмуртэныз но, ӟученыз но солдатэн. Шумпотэ: туала арын пиослэн армия шоры учконзы воштӥськемын. Пӧлысьтызы тросэз шумпотыса сурон сапег дӥсяло.
Утиськись
– Вордӥськи мон Кизнер ёросысь Элекмувыр (Верхняя Муркозь) гуртын, – веранзэ мытӥз Андрей Евстафьевич. – Но туннэ сое карта вылысь уд адӟе ини: 7 ар талэсь азьло быриз. Нош пичи дыръям отын ог 40 корка сылӥз. Элекмувыр Кизнер черкогуртлэсь ог 60 иськемлы палэнэ пуксемын вал. Нырысь-валысь Киров улослэн лыдъяськылӥз. 1938-тӥ арын Кизнер район кылдӥз но, гуртмес отчы пыртӥзы.
Элекмувырмы туж шулдыр вал. Интыяськемын тэль пушкын, нюкъёс пӧлын. Чылк-чылк удмурт - одӥг ӟуч адямиез но ӧй вал. Мон 12 аресам гинэ ай ӟуч сямен маке со вераны дыши.
Улон-вылонмы туж секыт вал. Озьы ке но калык кудӟытӥсь юонъёсын ӧз эшъяськылы. Котькыӵе куноез, ӵошен кариськыса, арганэн шудыса-кырӟаса, пумиталляз.
Элекмувырын юн тазалыко калык улэм. Азьло дыръя трос нылпиос висьыса кулылӥзы. Бускель гуртъёсын ар куспын 6-8 нылпи быре, пе, вал. Нош Элекмувырын, мон будытозям, 2 гинэ сыӵе учыр кемдэм. Паймисько: кызьы анай-атаймы милемыз, 8 нылпиоссэс - 4 нылэз но 4 пиез, пыд выламы ӝутыны быгатӥзы! Кызьы гуртын калык улӥз меда медицинатэк?!
4-тӥ пинал ваемзы бӧрсьы мон, 9 ар ортчыса гинэ, вордскиськем. Бӧрсям ини анаен-атай эшшо 3 пинал ваёно кариськиллям. Озьы мынам «быжы» пачказ: ульчае шудыны потыны уг луы - яке сузэр-вынъёсты чаклано, яке турын октоно-калтоно, яке мушъёсты эскероно. Пудомы гид тыр вал угось: скал, кунян, 2-3 парсь, 25 йыр ыж, 30 ӵӧж, ӟазег, курег, 35 муш уморто... Милям гинэ озьы ӧй вал. Котькуд сямен юртын трос пудо вордылӥзы. Турын дасянэз малпасько ке - али но шугомисько. Сое утялтонлы кӧня кужым быриз! Котырак - тэльёс но нюкъёс гинэ, турнаськон интыос туж ичи.
Сузэр-вынъёсме котьку сак чаклалляй. Соин но, вылды, пичиысен сямы рос-прос вал: муми-буби мар ужаны косо, одно быдэстыны тыршылӥ.
Но огпол янгыше кыли ик. 10 арес дыръям гуртмес ӧжыт гинэ ӧм сутэ. Ульчаын - гужем, куазь верантэм пӧсь. Тэле шур дуре пиналъёсын шудыны мынӥмы. Пӧлысьтымы огез - атайтэк будэм пиёк - тамак лушкем пурккетылӥз. Кытысь ке тылпоттон шедьтэм. Олокытӥ-мар со гуждорез аратӥз. Анае шуэ, ярам, пе, дорын вал соку: бусыысь сиськыны бертӥллям. Г омась тэлез адӟыса, «горд атасэз» шаплы кысӥзы.
Огез эше ялан чортылэ вал лудӵӧжъёсты ыбылыны. Ой, кыӵе кельшылӥз соин тэльёстӥ, нюкъёстӥ ветлыны! Юлтошелэн пуныез ӧй вал. Соин ик со ӵӧжез ыбе но, мон, дӥсьме куштыса, нӧд вуэ пырисько. Ӵӧжен отысь, йырме урдыса ик, потӥсько ини.
Али но тодам на кылем даурысь 70-тӥ аръёс. Соку мон нырысьсэ учки телевизор. Со дырозь Элекмувырамы электричество ӧй вал. Калык гожъяськылӥз-лыдӟиськылӥз керосин лампа улын.
Утчаськись
– Анае Прасковья Михайловна Можга педколледжез йылпумъяз. Гуртысьтымы 3 классъем школаын 45 ар пала ужаз. Классаз трос гинэ пиналъёс люкаськылӥзы. Озьы ялан 2 сменаен ужано луылӥз, кыкетӥ дышетӥсь угось ӧз сётъяллялэ.
Мамае дышетскемын вал бере, нылпиосызлы но одно ик образование сётыны тыршиз. Сузэр-вынъёсы пыризы Асанысь совхоз-техникуме, Сарапулысь кооперативной техникуме, Ленинградысь пединститутэ... Кыкез вынъёсы - кибашлыос, пуэз вӧло. Огез сузэре Можга ёросысь Кибъя гуртысь нылпи садэн кивалтэ, мукетъёсыз агроном но вуз карись луыса ужало.
Папае Евстафий Андреевич колхозын тыршиз, атаез сямен ик. 1930-тӥ аръёсы песятае колхозын председатель вал - ёросамы нырысетӥез председатель. Но гуртэн кема кивалтыны кылдымтэ. 1937-тӥ арын кыӵе ке воргоронъёс лыктӥллям но сое нуыса кошкиллям. Нокин но ӧз тодылы, кытчы со чиптэм-чаптэм ышиз.
67 ар ортчыса гинэ, та учыр сярысь мон рос-просгес тодоно кариськи. ФСБ-е запрос ыстӥ. Отысь бумага вуиз: песятайды 58-тӥ статьяя (колхоз ужлы вредить карон, Совето Союзлы пумит мылкыдъёсты вӧлмытон, кышкыт луись огазеяськон кылдытон) репрессия улэ шедем. Та ужъя следствие 3 толэзь мынэм. Приговор сётэмзы бӧрсьы 3 нунал ортчыса, песятаймес Киров улосын ыбиллям. Солы соку 28 арес сяна ӧй вал, 2 нылпиосыз кылизы. Ярам, 1989-тӥ арын та ужез выльысь эскеризы но песятайме реабилитировать каризы.
Туннэ анае но, атае но улэпесь ӧвӧл ни. Аръёс ортчыса, юнгес валаны кутскиськод: кужым – семья бордын. Соин туннэ дыр шедьтыны тыршисько вынъёсыным, сузэръёсыным, ӵыжы-выжыосыным адскыны. Котькуд гужем одно ик вуылӥсько бырем гуртэлэн интыяз.
Дышетскись
– 4-тӥ классэ вамыштӥ Можгатлое (Муркозь-Омга). Улӥ отысь сузэре дорын. Шутэтскон нуналъёсты чидатэк витьылӥ. Гуртэ анае-атае доры бызьыса сямен бертӥсько вал. 10-тӥ классэз йылпумъяй ини Кизнер черкогуртысь 1 номеро школаын.
Малы эмъян удысэз бырйи? Элекмувырамы ноку но першалмы ӧй вал. Соин ик пичи дырысеным малпалляй: луо эмъясь. Капчиен пыри Ижысь мединститутэ. Капчиен дышетски. Тазалык пумысен тодон-валан люканъям таза улыны тырши. Курыт юонъёсын, кысконэн ӧй эшъяськылы. Параос вискын вутскылӥ боксъя кружоке ветлыны. Удмуртиын ортчылӥсь чемпионатъёсы ялан пыриськылӥ. Куасэз гажалляй. Лӧптыса ветлылӥ скалолазаниея секцие. Отын борддор кузя гинэ ӧм тубаллялэ. Эшъёсыным ӵош вуылӥмы Пермь, Свердловск котырысь гурезьёсы, Кавказэ, Памире.
Ижын 4 ар дышетскыса, кошки Томскысь военно-медицинской институтэ. Татын тодон-валан люкан эшшо но тунсыкогес потӥз. Книга, парта сьӧрын гинэ ӧм пукылэ. Занятиосмы ортчылӥзы бусыосын, пыӵалэн ыбылӥськыса, катьтэммытозь бызьылыса. Угось ми огшоры эмъясьёс ӧй вал – военной врачъёс. Озьы бере, адямиез йӧнатыны сяна, быгатоно зол нюръяськыны, ӟеч ыбылӥськыны. Дышетӥсьёсмы пырак вераллязы: тӥледыз войналы дасяськомы!
Ожмаськись
– 1985-тӥ арын дышетӥсьёсмылэн кылъёссы зэмазы: монэ Афганистанэ войнае келязы. Ожлэн соку тужгес пӧсь вакытэз вал. Сюрес вылысь ӧм ик пыраллялэ. Кушка шур дорысен Кандагар городозь сюресэз туннэ но кынем синмын тодо на, дыр. Автомобиль обозъёсын батальонъёслы эстӥськон, сиён-юон, ыбылӥськон тӥрлык, бомбаос, ву нуллӥськомы вал.
Сюресъёс – бетонлэсь, лынгыр-лонгыресь. Сюрес дуръёс но, нюкъёс но чакмемын ӝуам, таркам техникаен. Маиз но отын ӧвӧл: танкез но, БТР-ез но... Нырысь Афганистанын туж кышкыт потылӥз. Собере дыши, лэся. Гурезь улын – пӧсь, шоканы номырин. Гурезь вылын – кезьыт, солдатъёс бушлатъёсын ветло. Быдэс нуналъёс пыд вылын ортчылӥзы. Жадьыса кытчы усиськод, отын ик изиськод вал ини. Соин но 1 нунал служить кареммы понна 3 нунал пуктылӥзы.
Туннэ но паймисько: малы меда монэ гинэ «За боевые заслуги» медален данъязы? Мукет пиослы нокыӵе наградаос ӧз сётэ. Тыловой часть шуыса-а, мар-а. Но соослы но кӧня шуг-секытъёс пыр потоно луиз ук! Эмъян удысын кӧня ар ужасько ини, Афганистанын кадь секыт нокытын но ӧй вал. Войнаын кӧня пӧртэм сӧсырмонъёс луо – ваньзэ ас синмыным адӟи. Кӧшкемыт! Ваньзэ тае мыным чидано луиз 2 ар, 1 толэзь но 14 нунал.
Эмъясь
– Огпол Афганистанысен начальникмы дорам лыктӥз но шуэ: мын, пе, кишлакез эскерыса пот. Мон соку ик паймытски: малы? Бертон нуналозям 4 нунал гинэ кылемын на ук! Монэ воштыны лыктэм врачез но адӟи вал ини. Йыр тымиськемын дор но анай-атай сярысь малпанъёсын гинэ. Но мар карод – командир косӥз бере, «уг» уд шуы ук. Егит водителез, 3-тӥ курсысь студентэз – санинструкторез – кутыса, амалтэк вырӟимы кишлаке.
Солдатъёс шуо: войнае выльысен берытскон – уродлы. Юнме малпамын вылымтэ со. Кишлакез эскеримы но бертыны потӥмы. Сюресмы сюбег, ортче гурезьёс вискытӥ. Санитарной машинаен эх! ширтӥськом ук, дыртӥськом! Но витьымтэ шорысь тыпак дугдӥм – азямы «тойота» сылэ. Таӵе машинаос Совето Союзын ӧй вал на. Нош Афганистанын ворттылӥзы ини.
Пикапын таш-таш душманъёс пуко. Эх, малпасько, кытчы та сюриськиз! Машинаысьтымы милемыз ӵыжаса ик поттӥзы. Вот, шуо, тӥ, пе, милесьтым солдатмес сӧсыртӥды. Табере ми тӥледыз ыбыса куштомы. Тупаны но кулэ ук – одӥгмылэн но соку сьӧрамы автоматмы ӧй вал. Нош талэсь азьвыл ыбылӥськон тӥрлыкмес уй но, нунал но бордамы возьылӥмы.
Ярам, ӧй кышкатскы. Дӥсьмы бордысь врачъёслэсь кыен-ӵашаен пуссэс возьматыса, шуисько: ми – эмъясьёс. Адямиосты ум виылӥське – йӧнатӥськомы гинэ. Учкелэ, милям автоматъёсмы ик ӧвӧл. Душманъёс куспазы шыпыр-шыпыр кенешизы. Лек-лек шуизы: табере, пе, юрттэ сӧсырмем солдатмылы. Солэн улонэз табере тӥляд улонэныды герӟаськемын!
Солдатэз машинаямы ӝогак пыртыны косӥ. Бӧрсям ик туйнаськыса сямен вань душманъёс пырыны кутскизы. Мон тодӥсько: войнаын эмъясь котькинлэсь но, котьмарлэсь но дуно. Соин кышкатэк соослы ӝот-ӝот вази: кошке татысь! Огез кылиз ик – сӧсырмем воргоронлэн выныз вылэм. Душман вир пушкын: пуля, тыбыртӥз пырыса, кӧттӥз потэм. Бинтэн биняй сое. Ӝогак нуимы асьме часте операция лэсьтон интыямы. Операция бере ини ураме потӥ но, выныз шуэ: братэ, пе, кулӥз ке, та машинадэс сутомы. Водительдэ но, санинструктордэ но, тонэ но виёмы.
Ярам, душманлэсь улонзэ утимы. Рос-прос йӧнатскыны шуыса, госпиталямы келямы на. Озьы асьмеос но войнаысь улэп бертӥмы...
Юрттӥсь
– Афганистан бӧрсьы монэ келязы Украинаысь связья войскоосы. Отысен, 2 ар ортчыса, кошки Чехословакие. Татын 8 толэзь сяна ужаса ӧй вутты. Революция кутскиз. Эсьмаса, кунгожез эшелонэн 12 нунал потыны курадӟимы, ява. Чехословакиысь вуи Нижний Новгород улосысь Мулино каргуртысь часте. Татчы дышыса ӧй вуы – Киев котыре келязы. Отын ини 3 пӧртэм частьын ужай.
Лыдъяй: службае 10 ар кыстӥськытозь, 8 пол частьёсты вошъяськем. Вань тубатъёсты ортчи. Ужаны кутски автомобиль бригадалэн врачез луыса. Службаме йылпумъякум, связья соединениысь валтӥсь эмъясь вал ини. 12 батальонысь воргоронъёслэсь тазалыксэс эскерыса вози.
Украинаысен ик пумитай аслэсьтым яратонме – Светлана Николаевнаез. Вордӥськемын со Киевлэсь 14 иськемлы палэнысь военной городокын – атаез отын ужаз. Ӵапак мон но отысь ик медпунктын валтӥсь врач луыса тыршисько вал. Огпол Светлана дорам пыриз но шуэ: выны атаезлэсь, пе, адӟем каре – военной луэмез потэ. Но тазалыкез чутэгес. Кызьы ке, пе, солы училищее пырыны юрттоно вал. Визь-кенешен юрттӥ ик. Выныз ожгарчи луиз. Нош ассэ Светланаез кышно басьтӥ. Нылмы но пимы вордӥськизы.
Семьяеным Украинаын кема ӧм улэ. Дырыз сыӵе тупаз: Совето Союз куашказ, Варшавской договор сярысь кивалтӥсьёс вунэтӥзы. Ваньмыз огыр-бугыр луиз. Соин ик армиысь кошконо кариськи. Кышноме, нылпиосме кутыса, Удмуртие бертӥ.
Светланалы – зарезь дурын будэм муртлы – шаермы кельшиз. Киевысь вуз каронъя институтэз йылпумъяз вал. Озьы Ижын солы уж сюриз. Интыяськиз федерал казначействое. Удмурт кылэз дышетыны но мылкыдыз ӝутскылӥз. Но ӝог лапказ: ужын но, ульчаын но удмурт сямен лабыртыны нокинэн, пе.
Нылы но пие пыризы Удмурт кун университетэ. Нылы экономикая факультетэз йылпумъяз. Пиелэн чиданэз ӧзгес тырмы: дышетсконзэ куштыса, Екатеринбурге ужаны кошкиз.
Мыным но уж сюриз. Удмуртиын военной врачъёс уг тырмо вылэм. 70 нунал шутэтскыса вуттӥ гинэ – службае чортӥзы. Но гижысь-пиньысь тыршыны ӧз кылды. Кунамы реформаос но сокращениос кутскизы. Воштӥськиз Россиысь обороная министр. Со оборона удысын ужась ог 160 сюрс адямиез мозмытыны косӥз. Кивалтӥсьёс мынэсьтым но личной деломе бугыръязы. Шуизы: выслугады тырмыт ни, кошке запасэ. Озьы тӥни, азьвыл погонъёсын ужасько ке вал, али – соостэк.
Элькун военкоматын нырысь старший врач-специалист луыса тырши. Али – невролог. Чаклай ни: азьвыл аръёсы пиослэн армие мынэмзы уг поты вал. Военкоматын синвуаськыса пукылӥзы. Пӧлысьтызы удмуртсэ синйылтылыкум, удмурт сямен вераськыны тыршылӥ. Пияшлэн соку ик тусыз воштӥське вал, дор палъёсызлэсь мӧзмонэз но сылмылӥз. Туннэ армилэсь пегасьёсты шер пумиталод. Пиос куддыр куриськыса но сурон сапег дӥсяны дырто.
Чорыгась
– Дуннеез котыръяны яратон мылкыдмы, тэк пукыны чидасьтэм сяммы милемлы кузпалыным гань-гань улыны маза уг сёто. Кунгож сьӧры ӵем поталляськомы. Ас синъёсынымы адӟимы ини Грециез, Хорватиез, Черногориез, Испаниез, Кипрез, Крымез... Гужем вуэ ке, Ижын улыны ум чидаське – дыртӥськомы Сарапул ёросысь бакчаямы. Яке кошкиськомы Украинаысь Полтава городэ. Отын Светланалэн выныз улэ.
Шумпотӥсько: ӵош дышетскем эшъёсыным кусыпъёсмы туннэ но юнэсь. Ог-огмы доры куное ветлэмысь ум дугдӥське. Томскысь юлтошъёсы ческытазы ини – Кам шурамы чорыганы ярато.
Эшъёсытэк мон туннэ инвалид кыльысал. 3 ар талэсь азьло, Чекерилысь гурезьёстӥ куасэн нискылакум, туж зол уси – пыдъёсы ветлэмысь дугдӥзы. Операция лэсьтӥз эше Леонид Генрихович Шешко – шаерысьтымы тужгес устоез хирург. Ижысь медакадемиын дышетскыкумы, общежитиын соин ӵош 4 ар улӥмы. Леонид мыным койкаын вез-вез погылляськыны ӧз сёты. Эн кылльы, ялан поръя, ветлы, шуылӥз.
Кузпалыным бакчаямы мынӥмы но – ужаме уг луы, пыдъёсам кортъёс тыремын. Ма каром ини та картошен? Кема малпаськыса ӧй улы – ньыльпыдъяськыса мерттӥськыны кутски. Кышное, жалелы чидатэк, лэся, бӧрдыны ӧдъяз. Но синкылиосыз монэ ӧз дугдытэ. Сямы угось сыӵе – мытэм ужез йылозяз-пумозяз вуттоно. Бакчамес мерттӥмы. Висёнме но туннэ ворми ни – ульчаетӥ бодытэк ветлӥсько.
Источник:
За предоставление материала выражаем огромную благодарность редакции газеты "Удмурт дунне"
