Мардан батыр

Мардан-батырлэн гурезьын аслаз бадӟым карез вылэм, шуо. Кӧня дыр улӥз со та гурезьын но ку отын улӥз, со сярысь нокин но уг тоды. Пересьёс но куд-огез гинэ тодо на. Мардан-батыр, пе, татчы улыны Малмыж городысь лыктэм. Удмурт выжыысь вылэм со. Солэн выжыысьтыз потэм калыкъёс кызь ньыль гуртын уло али. Милям пересьёсмы сое бубы шуылозы вылэм.

Мардан-батырлэн бӧляказ ик мукет батырзы но вылэм — Бия. Та кык батыръёс куспазы маке но весь керетылӥзы, пе. Тужгес но возьёс понна нур-нор поттылозы вылэм. Мардан-батыр шаплыгес вал Бия-батырлэсь. Со Бияез но, Бия калыкез но эрекчалляз. Кызьы ке огпол Бияысь пиосмуртъёс сое быдтыны малпало вылэм, но со, гондыр кариськыса, ваньзэ кир-пазь уллям. Одӥг пол асэныз но Бия-батырен ваче ымныр вуиллям. Бия-батыр Мардан-батырез виыны ӧдъя ни вылэм, нош соиз, тылобурдо кариськыса, турак! гинэ ӝутскем но лобӟыса кошкем.

Ог кӧня ке улыса, нош ик ӵош укшаллям таос. Мардан-батыр шуэм Бия-батырлы: «Малы асьмелы ог-огмес виыны кулэ? Вай, эсьмаса, ӵошатском: кин муӵез, пыдыныз ӵыжыса, Вало сьӧры поттӥз, со ик турнан возьёсын но кузёяськоз».Бия-батыр таӵе ӵектонэн соглаш луэм.

Амаллы Мардан-батыр аслэсьтыз ӵыжоно муӵсэ азьло ик вандыса дасям. Вало сьӧры туж кыдёке тэтчыса кошкем муӵез. Нош Бия-батырлэн ӵыжем муӵез шурлэн шор вадьсаз но вуымтэ, бульк! вуэ усем. Тӥни озьы Вало шур тупалась вань турнан возьёсты Мардан ас киулаз басьтэм.

Мардан-батыр аслаз эзеленыз ӧз кулы. Поръёс сое быдтӥзы. Куке но соосын тэронтэм калэ вуэм вылэм. Поръёс сое кемалась быдтыны вераськиллям вылэм ини. Нош со ялан яратоно палашеныз сюрес вылэ поталляз. Соин ик нокин но вормыны ӧз быгатылы. Мардан-батыр куать сюдос вал вордылӥз — куать уж вал. Валъёсыз туж визьмоесь вылӥллям, котьку соос ас кузёзэс утьылӥзы. Урод выж вылэ ноку но уз пыре вылэм. Куӵо вал но пӧлазы сюдэм-вордэм Мардан-батыр. Со куӵо вал ик быдтэм сое. Кытчы ке но ужен мыныкуз, Мардан-батыр куӵо валзэ кыткем. Бултыр кышноез уробояз палашсэ поныны вунэтэм. Марданлэн мыноно сюресысьтыз поръёс выж юбоосты кораса дасяллям. Уретымон корамын ӧвӧл вылэм. Куӵо валэз выж азе дугдымтэ но, Мардан-батыр валэныз валче выж улэ усем. Соку, пе, Мардан-батыр зол кеськыса верам:

- Куӵо вал валтэмлэсь гинэ вал, бултыр кышно кышнотэмлэсь гинэ кышно!

Озьы бырем Мардан-батыр.

Удмуртъёс сое кема буре вайса улӥзы, кема бубы нималлязы. Кулэм бераз солэн нимыныз вӧсяськон кылдытӥзы. Трос ар улыса, вал но скал виро ӵектылӥзы солы. .