Кыен коӵышен

From Воршуд
Jump to navigationJump to search

Сӥзьыл куазен одӥг адями нюлэсканы потэм. Ветлон сяменыз шутэтскыны пуксем но пурты быдӟа пукись вуэз адзем. Султыса со ву доры мынэм но — отын кый сэрпалляське. Куазь кезьыт вылэм ини — кыйлэн быжыз кынмем. Адямиез адӟыса со адями сямен вераськыны кутскем:

— Адями уром! Монэ татысь потты вал, бырисько ни. Адями сое жалям. Кус пулсысьтыз тӥрзэ басьтыса, йӧэз ури-бери корам, кыез поттэм.

— Укыр кынмисько,— собере верам кый.— Пияд поныса ӧжытак шунты на вал, туж тау карысал.

— Мар бен, кынмем муртэ шунтытэк уз луы.

Кыез кутэм но пияз понэм. Кый ӝог шунам. Тау карем интые, адямиез сиыны малпам.

— Адями уром, мон тонэ сиё.

Кыйлэсь сыӵе «ӟеч» кылзэ кылыса, адями мар карыны ик ёрмем.

— Сиёд ке сиёд, вылды, ини, мар карод на. Только сиемедлэсь азьло пумитамы сюрем куинь муртъёслэсь юалом. Соос мар шуозы. Собере адӟом ини,— валэктэм адями.

Соос, шыпыт кариськыса, сюрес кузя кошкиллям. Кыдёке ик вуиллямтэ, валэн пумиськиллям.

— Чырткем-а, вал уром!— адямилэн пиысьтыз йырзэ мычыса вазем кый.

— Умой!— шуэм вал.

— Вера-ай, мон та адямиез сиём-а, ум-а?

— Си, си, луло эн кельты. Со монэ гид азбарын ӟег куроен сюдыса возе, турынэз, сезьыез зынъяны но уг сётъя. Нюлэскы ке мыноно, аслэсьтым но ӝужытгес пу тыре. Пу вылэ ачиз пуксе на. Нуыны уг ке вормиськы, монэ ик жуге.

— Кылӥд-а, вал ма шуиз. Сиё ини мон тонэ,—шумпотэ кый.

— Сыл-ай, эшшо кык муртлэсь юалом на,— шуэм адямн. Соос азьпала кошкиллям. Кӧня ке мыныса, скалэн пумиськиллям.

— Чырткем-а, скал уром!— адямилэн пиысьтыз йырзэ мычыса вазем кый.

— Умой!—-шуэм скал.

— Вера-ай, мон та адямиез сиём-а, ум-а?

— Си, си, луло эн кельты. Со мынэсьтым йӧлме юыса улэ, асме ӟег куро вылын возе. Кунянэ ке вордске, йӧлме, кунянлы кельтытэк, ваньзэ ачиз сие.

- Кылӥд-а, скал ма шуиз. Табере сиё ке сиё ни мон тонэ - шумпотэм кый.

- Сыл-ай, одӥг муртлэсь юалом на, соиз ма вералоз-шуэм адями.

Соос нош ик азьпала кошкиллям. Трос-а, ӧжыт-а, кыдёке-а, матэ-а мынӥллям — ӝужыт бадьпуысь коӵышез адӟиллям. Кый туж шумпотэм. Адямилэн пиысьтыз йырзэ кузь мычыса, со вазем:

- Чырткем-а, коӵыш уром!

Коӵыш, синзэ кыньыртыса, йырзэ мыкыртыса, пумитаз вазем.

- М-ма? Матэгес лыктыса вера. Уг валаськы, пересьми ни, пельы секыт луиз.

- Та адямиез сием-а шуыса юасько!— туж зол кеськем кый.

— М-ма?— нош ик вазем коӵыш,— матэгес лыкты, уг валаськы, олома вераськод, пельы туж секыт. Кый уката юнгес кеськыса юам на:

— Та адямиез сиём-а, пӧй?

— Эн ик дӥсьты. Таӵе умой муртэ дунне пыдсысь но уд шедьты! Ӟеч куноез лыктэ ке, ческыт пӧрам сиёнзэ нырысь ик мыным веръятэ. Тӧро сэрегысь миндэр вылаз мон пукисько. Кезьыт толалтэ солэн шуныт гур вылаз мон кыллисько. Тани сёто мон тыныд сое сиыны!

Коӵыш, гижыоссэ кузь поттыса, кыйлэн йыр вылаз тэтчем но куажырак карыса вием.

Адями коӵышез пельпумаз пуктэм, гуртаз куное нуэм. Али но со отын кунояське, шуо[1].

Литература[edit]

  1. Вуюись : покчи нылпиослы хрестоматия. - Устинов : Удмуртия, 1985 (с. 94-95).