Куинь сузэръёслэн вынзы

Одӥг адямилэн куинь нылыз но одӥг пиез вылэм. Бадӟым нылзэ со тылобурдо кузёлы сётэм, шоретӥзэ — пӧйшур кузёлы, покчизэ — тӧлперилы. Улыса-вылыса ачиз со кулэм. Пиез чоркак огназ кылем. Потэм со калыкетӥ ветлыны. "Апайёсы доры но вуыло ай", — малпам.

Мынэ со бусыетӥ, солань-талань утчаське. Тани пияш лиспу бордысь пурӟем мушъёс доры учырам. Соосты тарканы, пазяны кутскем.

— Сыл ай тон, пияш, милемды эн тарка, — шуиллям мушъёс, — куке но ми тыныд яралом.

Кылзӥськем пияш, азьлань вамыштэм. Мынон сяменыз адӟе, пе: сюрес дурысь сисьмем кыпы вылын Куака нырзэ сузяса пуке. Пияш гавылдэ тэтчем но Куакаез кутэм.

— Эн курадӟыты монэ, лэзь, — шуэм Куака. — Мон куке но тыныд ярало.

Нош ик кылзӥськем пияш, вӧсь карымтэ, лэзем.

Мыныса-мыныса со сике вуэм. Кыз улысь кузьыли карез синйылтэм. Матэ кариськем но ньӧрын бугыръяны шӧтам: кинъёс-маръёс, пе, таос? Кузьылиос огыр-бугыр вырӟиллям.

— Эн пазя милемды, — шуиллям соос, — ми куке но тыныд яралом.

Кошкем пияш, ӧвӧл ни исам.

Ветлыса-ветлыса бадӟым апаезлэн капка азяз вуэм, азбараз пырем.

— Кытысь, ма сямен вуид, выны? — мусояса пумитам апаез.

Пияш викышъяны кутскем:

— Мынам, апие, туж сиеме потэ...

— Сюдо ай. Нош али ӝогак гулбече пыр. Кырсиед тылобурдо кузё ук, кокчалоз, ӵабъялоз со тонэ.

Пияш гулбече ватскем, ӝоген кырсиез но бертэм, тылобурдо куараен кеськем:

— Кытысь ке но адями зын кылӥське!

Соку апаез картэзлэсь тазьы юам:

— Мынам семьяе асьме доры лыктӥз ке, кудзэсты яратод: бубыме-а, вынме-а?

— Бубид вуиз ке, синъёссэ кокчало, — верам картэз. — Выныд лыктӥз ке, сюдо, утялто, валме сёто.

— Выны, ойдо пот! — косэм апаез.

Кырсиез сое сюдэм, утялтэм, вал кузьмаса лэзем.

Пияш шумпотыса вал вылын гонӟыртэ ини, пе. Шоретӥ апайзэ утчаны кошке. Шуак олокытысь азьпалаз чут ӟичы потэм. Та сое уйылыны кутскем. Уйылэм-уйылэм, ворттылэм-ворттылэм но, майыг шоры ӵогъялскыса, валэз пограм, султымтэ ни. Эхма! Шумпотон тӧлӟиз, куректэ пияш. Валзэ кельтыса, пыдын кошкем. Шоретӥ апайзэ мырдэм шедьтэм.

— Кытысь, кызьы вуид, выны? — вешаса пумитам апаез.

Соиз викышъяса ваньзэ мадем но шуэм:

— Мынам туж сиеме потэ...

— Азьло тон кытчы ке палэнскы ай, кырсиед пӧйшур кузё ук, оломар но кароз.

Ватскем пияш. Кырсиез бертэм но пӧйшур куараен вазем:

— Фу, ма таӵе адями зын?

Соку кышноез солэсь юам:

— Асьме доры лыктӥзы ке, бубыме-а, вынме-а умойгес пумиталод?

— Бубыдэ тузыса лэзё, вындэ сюдо, утялто, кузьым сёто.

— Пот, выны, пот! — косэм апаез.

Пияш ватскемысь потэм, кырсиез сое сюдэм, утялтэм. Таиз но вал кузьмаса лэзем.

Тани со вал вылын гонӟыртэ ини, пе. Покчи апайзэ утчаны мынэ. Нюлэскы вуыкуз, чутык-чутык бызьыса, азьлоез ик ӟичы потэм. Та сое уем, сутӥське вылэм ини но, валэз майыг шоры ӵогъялскыса пограм, султымтэ ни.

Нош ик куректон. Нюлэскытӥ бӧрдыса ветлэ ни та пи. Малпамтэ шорысь тӧлпери потэ но сое корказ пыртэ.

— Э, мусое, кытысь вуид меда татчы? — пумитам сое покчи апаез.

Выныз викышъяса-викышъяса ваньзэ мадем.

— Я, эн бӧрды. Мон яратӥсько тонэ, тани ук коркам пыртӥ, — буйгатэм кырсиез.

Сое мунчое пыртӥллям, сюдӥллям-утялтӥллям, небыт валес вылын кӧлтӥллям. Таиз но кырсиез солы сюрес вылэ вал кузьмам.

Тани со нюлэскытӥ вал вылын гонӟыртэ ни. Гуртаз бертэ. Пумитаз со ӧлексы ӟичы нош ик потэм. Пияш со сьӧры уиськем-уиськем но, валэз пограм, султымтэ ни.

Пияш шук-шук бӧрдыса сылэм но пыдын кошкем. Кема-а, ичи-а, ӝог-а, каллен-а мынэм — котрес куше вуэм. Кыӵе гинэ емышо писпуос ӧвӧл отын! Шораз ик бадӟым, чебер корка сылэ. Азбар ӵужись пиосмурт доры мыныса, пияш юам:

— Агай, кин улэ татын?

— Шайтан, — шуэм пиосмурт. — Кызьы дӥсьтӥськод татӥ ветлыны? Тани тонэ кутоз но пытсалоз, ужатыса жундоз. Кулӥд ке, мур нюке куштоз.

Соку корка пушкысь куаньгетӥсь куара кылӥськем:

— Со пиез мон доры пыртэ!

Шайтан пияшез горыса пумитам:

— Ха-ха-ха! Монэ кутыны турттӥськод вал но, ачид ки улам шедид ук. Тодӥськод на-а ӟичыез уйылэмдэ? Монэ ӟичы кожаса уйылӥд. Куинь валдэ быдтӥ мон тынэсьтыд. Э, пиёке, пиёке!.. Жаль потӥськод. Ойдо асьмеос тазьы вераськом: мынэсьтым куинь косэмме быдэстӥд ке, та коркаме сёто, ӧд ке, вань улытозяд мыным ужалод.

Пӧян амал шедьтӥ шуыса, Шайтан шумпотэм но киоссэ ик посыса горем. Пияш жӧломыса сылэм, чорк-чорк кариськыса юам:

— Кыӵеесь бен со ужъёсыд?

— Нырысез ик таӵе. Татысен огдасо иськемын, бусыын, мынам вуж кабанэ сылэ. Отысь ю тысьсэ тӧлэм кадь чылкыт, чебер люка. Кабанэз эн иса: эн но сэрттылы, эн но кутса. Ӵуказе ӵукнаозь дась медло.

Пияш йыр бордаз кутскыса малпаськем, малпаськем но кузьылиосты тодаз ваем, соосты юрттыны ӧтем.

— Эн сюлмаськы, лэсьтом, — оскытӥллям кузьылиос. Уйбыт ужаллям соос. Ӵукна Шайтан, ӟичы кариськыса, бусые шонтэм. Котыръяське, учке, зынъяське: ю тысь тӧлэм кадь чылк-чылк люкамын, кабан сэрттылэмын но, кутсамын но ӧвӧл.

— Адӟид-а? — шуэм пияш.— Табере мар косод?

Шайтанлэн серемез уг пот ни, пе. Нод-нод кариськыса верам:

— Кыкетӥез уж таӵе: тон туж егит на, кышноед ӧвӧл. Уйскын пинал шедьты, бинялты но татчы вай.

Пи кема ик малпаськымтэ, Куака доры мынэм но сое бинялтыса ваем.

— Пинал шедьтӥд-а? — юам Шайтан.

— Шедьтӥ, — Куакалэсь йырзэ пумен пачкатыса шуэм пияш.

Куака пинал бӧрдэм кадь вазьылэм: уак! уак!

Табере корка кузёлэн пальпотонэз но тӧлӟем. "Ма, нёшто куинетӥзэ но ужме быдэстоз?" — куалектыса малпам ни со. Корка вадьсысь мур нюк пала возьматыса верам:

— Та нюк вамен сюсь выж лэсьты. Куинетӥез косонэ сыӵе.

Пияш соку ик мушъёс доры бызем, куректонзэ вераса юрттыны чортэм.

— Ӵукнаозь выж дась луоз, — шуиллям мушъёс.

Уй куспын соос сюсь выж лэсьтӥллям. Шайтан абдраменыз кылтэм-ымтэм луэм. Чут ӟичы кариськыса, со выж вылтӥ воксёлы кошкем. Выль бадӟым корка та пилы кылем. Отын со али ке но улэ.