Краснова Татьяна Александровна
Музъемез шӧдӥсь, лобаны быгатӥсь[править]
Татьяна Александровна Краснова – филология наукаосъя кандидат, доцент. Вордӥськемын Можга ёросысь Пычас посёлокын. 1981-тӥ арын йылпумъяз Удмурт кун университетысь романо-германской филологияя факультетэз, собере дышетскыны пыриз Ленинградысь Л. В. Щерба нимо университетысь кунсьӧр кылъёсын фонетикаез но методикаез дышетонъя кафедраысь аспирантурае. 1985-тӥ арын Татьяна Краснова «Просодическая интерференция при обучении иностранному языку в условиях удмуртско-русского двуязычия» нимо диссертацизэ утиз. Отын со дэмланъёс сётӥз удмурт но ӟуч кылъёсты тодӥсь муртъёслэн кунсьӧр кылъёсты дышетыкузы кылдэм янгышъёссы бордын кызьы ужаны, эскериз кылъёслэсь грамматика но интонация ласянь герӟаськемзэс-пӧртэмлыксэс, кунсьӧр кылысь берыктон ужпумъёсты но мукет.
1986-тӥ арысен Татьяна Краснова ужаны кутске Удмурт кун университетысь англи кыллэн лексикологияя но фонетикая кафедраяз доцент луыса, нош 2003-тӥ арысен герман кылъёсъя кафедраен кивалтэ.
Тодосчилэн куатьтон котырын ужъёсыз потэмын, со пыриськиз финн-угроведъёслэн Дебреценын, Ювяскюляын ортчем калыккуспо конгрессъёсазы, Оулуын, Москваын ортчем симпозиумъёсы.
Трос кыл тодод – сизьым шур йылэ но вуод
- Татьяна Александровна, тӥ удмурто-ӟучо посёлокын будэмын ке но, удмурт кылын ӟеч вераськиськоды.
- Анай-атае удмуртъёс ук, семьяямы удмурт кылын гинэ вераськимы. Собере соос посёлокысь кошкизы, Ижысь «Удмуртгеологие» ужаны интыяськизы. Мон анайкаен (папалэсь анайзэ озьы шуисько) но дедушен кыли, начальной классэз Пычас школаын йылпумъяй. Мамалэсь но папалэсь туж мӧзмылӥ. Собере монэ городэ доразы басьтӥзы. Гурт бере городын дышетскыны секыт вал, пиналъёс куд-огез серекъяны но выризы. Но ваньмыз интыяз пуксиз, шор ёзо школаез ӟеч йылпумъяй.
Дуннеез паськытгес адӟыны юрттӥз машинамы но. Папае милемыз пӧртэм шаеръёсы нуллӥз, оломае но возьматъяз.
- Кык кыл тодӥськоды ни вал бере, мукетъёссэ но тодэмды потӥз, соин ик Удмурт кун университетысь романо-германской филологияя факультетэз бырйиды, луоз?
- Нырысь мон химияя факультетэ пырыны дасяськисько вал. Дасэтӥ классын дышетскыкум, мамаелэн двоюродной сузэрез дорамы лыктӥз но мыным англи кылын трос книгаос вайиз. Соку солэн картэз Алексей Михайлович Акмаров Удмурт кун университетысь романо-германской филологияя факультетэн кивалтӥз. Мон со книгаосын тодматски, англи кылэз ӟечгес дышетыны тырши. Школаос куспын англи кылъя ортчылӥсь олимпиадаосын вормылӥ, элькун ӵошатсконын но одӥг пол куинетӥ инты басьтӥ. Озьы малпанэ вуи: мыным романо-германской филологияя факультетын дышетскыны умой луоз. Конкурс туж бадӟым вал ке но, пырыны быгатӥ. Дышетскон мыным тунсыко потӥз, олокыӵе но общественной ужъёсы пыриськылӥ, огвакытэ Ижевск городысь комсомоллэн обкомезлэн бюроезлэн членэз но вал. Дышетӥсьёсмы туж золэсь вал. Котьку но тау шуисько Инна Игнатьева Трубачевалы но Раиса Павловна Кайшевалы. Нош тужгес но тау карисько Алексей Михайлович Акмаровлы. Тодосчиос пӧлысь со нырысьсэ эскериз удмурт но англи кылъёслэсь огкадь луэмзэс но пӧртэмлыксэс. Мыным ӵектӥз та удысэз мургес эскерыны, англи кылэз яратыны, соин ужаны дышетӥз. Собере, аспирантураез йылпумъяме бере, Алексей Михайлович мыным аслэсьтыз интызэ дэмлаз. Солы соку 68 арес пала вал ини.
- Диссертацидылэн пуштросэз туж аспӧртэмлыко: удмурт но англи кылъёсты эскерон. Солы материал люканы секыт вал, дыр, ук?
- Ми доры дышетскыны лыкто шаерысьтымы пӧртэм сэрегъёсысь удмуртъёс. Соослэсь удмурт, ӟуч, англи кылын вераськемъёссэс магнитофонэ гожтӥ, собере та бордын рос-прос ужай, янгышъёссэс чаклай-эскери.
- Асьтэос нош кӧня кылэз тодӥськоды?
- Удмурт, ӟуч, англи кылъёсыз сяна, финн кылэз. Немец кылэз вунэтӥськогес ини, но вераськемез валасько. Латынь кылэз кӧня ке тодӥсько, куддыръя соя лекциос но лыдӟоно луэ. Берло аръёсы финн кылын нокинэн вераськыны луиз, сое вунэтэмелэсь кышкасько.
- Финн кылэз нош кытысь сыӵе ӟеч тодӥськоды?
- Финляндиын Турку но Хельсинки университетъёсын стажировкаын вал. Али но отчы ветлӥсько, доктор диссертациме гожтыны материал дасясько. Та диссертациям эскерыны малпасько удмурт кылын пӧртэм диалектъёсын вераськисьёслэсь англи кылын вераськемзэс. Тау шуисько Валентин Кельмакович Кельмаков профессорлы. Со мыным дэмлаз тазьы ужаны, тодматӥз Турку университетысь Калеви Виик профессорен. Профессор мыным туж юрттэ, аслаз лабораторияз ужаны луонлык сётӥз.
- Мукет кыӵе-о кунъёсы вуылӥды на?
- Америкае, Швецие, Венгрие, Голландие.
Возьыт
- Кык кылэз тодӥсь мурт куинетӥзэ капчиенгес дыше ини, шуо.
- Озьы. Ми дорын со туж ӟеч адӟиське. Нырысь пал ӟучъёс дышетсконын зол мыно: кунсьӧр кылэз школаын дышетэмзы юрттэ. Собере соос бере кыльыны кутско, бигеръёс но удмуртъёс азьпалто. Мон паймисько куд-ог анай-атайёслэн нылпиоссэс удмурт кыллэсь люкемзылы. Асьмелэн кылъя кутэм законмы шонер ӧвӧл, со удмурт калыклэсь азьлань улонзэ шугомытоз гинэ. Татарстанын улӥсь вань калык одно ик бигер кылэз дышетэ ук, нош асьмелэн удмурт кылэз – мылкыдызъя.
- Тросаз школаосын удмурт кыллы кулэезъя саклык уг висъяло ни бере, удмурт кылъя факультетэ пырисьёс но пумен кулэсмозы.
- Со али ик шӧдӥське ни. Соин ик удмурт кылъя факультетын табере менеджментлы, делопроизводстволы но дышетыны кутскизы ни. Собере соизлы но паймоно: удмурт факультетэ пырем студентъёс арысь аре «ӟучомо», куспазы ӟуч кылын верасько, нош мукет ласянь, ӟучъёс кунсьӧр кылъёсты асьсэлы укыргес матын карыны кутскизы. Удмуртиын улӥськом шуиськом, нош городысь, ма, гуртъёсысь но уд адӟы удмурт кылын гожтэмъёсты. Городъёсын тросгес пишто англи букваос.
Алигес учкыса потӥ «Феномен Удмуртии» книгаез. Отын верамын удмурт кылын кӧня книга, учебник поттон сярысь. Лыдпусъёс чебересь. Нош умой-умой чаклано ке, уж вылын со кӧняез гинэ быдэстэмын ай.
Ми доры ӵемысь кунсьӧрысь тодосчиос вуыло. Финляндиысь тодосчи Пиркко Суихконен, дорамы нырысетӥзэ ветлыкуз, шуиз: возьматэ ай, пе, мыным Удмурт театрдэс. Мон сое нуи. «Таӵе-а тӥляд театрды?! – паймиз. – Мон малпасал: со кыӵе ке столовой яке учреждение». Театр дорысь удмурт кылын ялонъёсыз адӟыса гинэ валаз, мон сое зэмзэ но театре вайи шуыса. Учкисько но, Пиркко Суихконенлэн синвуосыз потӥзы: сыӵе, пе, ваньмыз куанер адӟиське. Возьыт.
2008-тӥ арын Удмуртилэн Россиен герӟаськемезлы 450 ар тырмоз. Сыӵе бадӟым праздникез пусйыны Москва пумит ӧвӧл коньдон висъяны. Малы нош со коньдонэн уг луы меда зэмос Удмурт театр пуктыны, удмурт чеберлыко произведениосты поттыны?
Ӟечез но уродэз - ӵош
- Улонады тӧдьы-а, сьӧд-а вакытъёсыз тросгес вал кадь потэ?
- Тӧдьыез тросгес, дыр. Ваньмызлы уг удалты школа бере ик университетэ пырыны, собере аспирантураын дышетскыны, диссертация утьыны.
- Сьӧд вакытады кин борды кариськиськоды?
- Секыт малпаськон дыръям мон огнамгес кариськисько, малпаськисько. Куректонме нокинэн но люкыны уг тыршиськы. Адямиослэн асьсэлэн но сюлмаськонъёссы тырмо. Но куддыръя мамаеным кенешисько. Со визьмо, кужмо кышномурт, семьямы со вылын возиське. Мамалэн милемлы ноку но урод кылъёс верамез ӧвӧл, папаелы но со ас вакытаз туж юрттӥз. Нош шумпотонмес быдэс семьяен люкиськом.
Уг яратӥськы коркан трос адями люкаськемез. Чалмытэз, ганез-ганез яратӥсько. Ужын но калыкен жадёно ук.
- Кыӵе сямдылэсь куштӥськемды потэ?
- Куддыръя вог сямы потылэ: мамалэсь но папалэсь кылӟиськытэк, ас сяменым лэсьтӥсько. Собере янгышамме валасько но ӧпкелисько. Уж пӧлы йырыным ик выйисько но юмоке сюрылӥсько. Одӥг ӝыт ужысь гуртэ бертыны дасяськисько. Шкафез усьтӥсько но, отын норка шубае ӧвӧл. Кытчы луэм? Кин басьтэм? Эшъёсы но паймизы. Милициез шат ӧтёно? Куректыса пукыкум, француз филологияя кафедраысь лаборантка кияз норка шубаен лыктэ. Кабинетме, пе, пытсаме уг луы, дорамы кин ке шубазэ кельтэм, оло, тӥ тодӥськоды. Мыным сыӵе возьыт вал. Француз филологияя кафедраын кылиськиськем но со сярысь вунэтӥськем.
- Матысь эшъёсты вань-а?
- Вань. Ижевскын школаын ӵош дышетскем ӟуч эшъёсы. Кыкеныз али но кусыпмы ышемын ӧвӧл, ог-огенымы пумиськылӥськом. Нош удмуртсэ ке верано, со – Нина Григорьевна Чернышева, врач, наукаосъя кандидат, тодмо докторлэн Анатолий Максимович Корепановлэн кенэз. Нина Григорьевналы мон лул-сюлэмме чепыллясь сюлмаськонъёсме но оскисько.
- Кыӵе сямо адямиос сюлэмдыя?
- Меӵак, котыръятэк вераськись муртъёс. Ӵок, одӥг пол вӧсь каризы ке но. Нош чеберъяськись муртлэсь кыӵезэ валаны шуг. Кельшо на зӥб-зӥб, мукетсэ кылзыны быгатӥсь муртъёс.
За предоставление материала выражаем огромную благодарность редакции газеты "Удмурт дунне"
Источник:
Краснова Т. А. Музъемозь шӧдӥсь, лобаны быгатӥсь / Т. А. Краснова ; записала Галина Романова // Удмурт дунне. - 2005. - 23 дек. - С. 6, 11. - (Удмурт кизилиос).
