Коӵыш но шыръёс

From Воршуд
Jump to navigationJump to search

Песянай мусур дасям. Туж удалтэм мусурез. Сое сюй горшоке понэм но питрес пулэн шобыртэм. Кыдэз медаз берты шуыса, шобрет пумъёссэ нянь пушкесэн наш-наш зырам. Горшоксэ гур сьӧры самой пеймыт интые пуктэм.

Сэргысь одӥгез кор пум сисьмыса гыркомемын вылэм.Отын улӥллям шыръёс. Соос нянь зынэз шӧдыса потӥллям но горшок дурысь нянямзэ сииллям. Няне мусур шӧм пыӵам вылэм ини. Шыръёс тяп-тяп кудӟиллям. Бергало горшок котыртӥ, уг валало кытчы мыныны, ма карыны.

Огез шыр выж шоры потэм но черектэм: «Эшъёс, ойдолэ коӵышез виём! Соку асьмеос кузё луом та коркан». Шыръёслы та кылъёс кельшиллям. «Виём!»— шуиллям но гыж но кал тубиллям валесысь чагыр-чагыр сяськаё небыт миндэр вылэ. Самой сэзез шыр коӵышлэн гульым котыраз вуттӥськем. Коӵыш сайкам но ӝабырак кырмем сое.

«Пиик! пиик! — вазем кудӟем шыр. — У-у-ром, у-у-ром, м-м-мар-о турттӥськод, ш-ш-шубаме, шубаме кесёд!..»

Озьы кудӟем шыръёс та нуналэ асьсэлы асьсэос эзель шедьтӥллям[1].

Литература[edit]

  1. Чечыен нянь : удмурт калык мадёсъёс / люказ но тупатъяз П. К. Поздеев. - Ижевск : Удмуртия, 1984 (с. 28).