Кизилиос сярысь веран

Вашкала дыръя дуннеын улэм-вылэм одӥг пичи ныл. Сизьым-тямыс арес луэм бераз, солэн анаез-атаез кулэм но, со копак ураме кылем: сое сюдӥсь-вордӥсь но, дӥсясь но, шунтӥсь но вылымтэ. Алама дӥсез но алама кышетэз сяна, солэн номыриз но вылымтэ. Тазьы кылем бераз, кураськыса ветлыкуз, солы кыӵе ке но ӟеч мурт одӥг шорем нянь сётэм. Пичи ныл со дорысь потэм но, пумитаз сютэм кураськись ӝимем.

— Нылы, вай няньдэ, мынам сиеме потэ!— шуыса курыны кутскем та пичи ныллэсь няньзэ кураськись. Пичи ныл вань няньзэ солы сётэм но «Си, песятаӥ, тазалыкад!» — шуэм. Кошкиз, пе, нош ик та ныл: мынэ, мынэ, пе, ӝыт но, пе, луэ ини. Солэн пумитаз пинал пи лыктэ.

— Вай мардэ ке йырме шобыртыны, мынам йыры кынме! — шуэм со пи. Пичи ныл йырысьтыз берпум кышетсэ сётэм но кошкем.

Тазьы мыныкуз, со вылэ шуак инмысь кизилиос, пе, усьылыны кутскизы но усем беразы ик азвесь уксё луизы. Ныл, туж шумпотыса, со уксёез бичаны кутскем.