Инмар инбамез ӝутэм

Вашкала дыръя ин корка полоть кадь ик улын вылэм, ӝужыт адямиос киынызы но инме сузёзы вылэм. Огпол кышномурт кутскем но, нылпи кутэтэз ин вылэ куасьтыны куштэм. Инмар "та адями йырзэ вылэ понса, мар каремзэ но уг шӧд ни ук, мынэсьтым улон интыме но сапта ", — шуыса, лекъяськеменыз инэз туж вылэ ӝутэм.

Соку адямилэн нянез туж удалтоз вылэм: ужатэк весь куроез но, шепез но чисто нянь луоз вылэм. Та нянь тросэн адями няньлэсь сӥзэ-санзэ ик уг шӧд вылэм. Инэз ӝутэм бере, Инмар адямилэсь няньзэ но басьтэм.

—Э, Инмаре. Инмаре! — тэльмырем, тае адӟыса, адями. — Йылэз-шепез коть кельты, озьытэк мои куло ук.— Верамед сямен ик мед луоз! — шуэм Инмар, адямиез жаляса. Со тырысь табере адямилы куро йылын шепен гинэ потэ на.