Инмар Шайтанэз ӵашъе

Одӥг адями муш возьманы ветлэм но, отысь бертыкуз, куазь туж пеймыт пильмаськыса зорыны кутскем. Со вакытэ ик Инмар чилектыса гудыртэм но, адями борды тыл вуыса, дӥсяськон бордытӥз ветлыны кутскем. Со адями паӥмыса кутскем кисыосысьтыз, пиысьтыз утчаськыны, но номыр шедьтымтэ. Собере пуртэссэ учкем но — пуртэсысьтыз чабак быжез адӟем. Со чабакез, быжтӥз кутыса, бордысьтыз сэрпалтэм. Тыл соку ик чабакез чашъем. Адямилэн буш пуртэсаз Шайтан чабак кариськыса пырем вылэм. Сое адями ой ке адӟысал, ассэ но Инмар чашйысал. Со адямилэн кылэмез вылэм: сыӵе тыл ветлыку, котырез утчаны кулэ. Соин уг лэзё буш песьтэр, буш пуртэс нуллыны. Пуртэсэд буш ке, пу поныны косо, куазь зорон дыръя. Та кыл зэм.