Инмар, шайтан но пуны

Шунды ӝужан пилась дуннеосын вылэм со. Инмар горд сюй вылэ адямилэсь туссэ гожтэм-суредам. Утись-вордӥсь со гож-суред шоры вир пазьгем. Святой Дух пельтэм но — Адями улӟем. Шоканы шока ик, пе, но, султэмез уг на луы на вылэм. Инмар адями дорысь палэнскем, бордаз пуныез кельтэм: Шайтанлэсь, пе, мед утёз-чаклалоз. Нош пунылэн, пе, соку гонэз вылымтэ на.

Инмар ӧвӧл дыръя, Шайтан лыктэм. Пунылэсь, пе, куре ини та, лэзь, пе, монэ, адямиез учкыны. Пуны, пе, уг лэзь. Шайтан тодэ вылэм: пуныез озьы гинэ уд пӧя. Соин ик солы вылтыраз гон ӵектэм. Кынмиськод, пе, ук тон. Нош со понна, пе, лэзь монэ адями доры матэгес кариськыны. Шуныт гонлы луыса, пуны Шайтанэз адями доры лэзем. Шайтан адями доры лык¬тэм но вылаз сялӟем, вылаз ик быдэс яраё-пасё карем на. Шайтанлэн дыльдыез адямиез йырысеныз пыдозяз шобыртэм.

Инмар берытскыса тае адӟем но, малы озьы карид шуыса, Шайтанлэсь юам. Шайтан, пе, тазьы верам: "Адямилэн та жобез-яраез пушказ пыроз но, дырын-дырын аляса, кыре потоз. Адямилэн висёнэн курадӟемез со луоз. Озьытэк со тонэ, Инмарез, вунэтоз. Висён вакытаз нош тыныд ӧпкелёз-вазиськоз". Соин, пе, адямилэн висёнэз-жобез пушказ улэ.