Ильин Александр Валентинович

Кылбурась полковник

Ильин А. В.

Александр Валентинович Ильин – Удмурт Республикаысь югдурез утёнъя министрлэн воштӥсез, Следствиея управленилэн кивалтӥсез, юстициысь полковник.

Вордскиз: 1960-тӥ арын 18-тӥ августэ Алнаш черкогуртын.

Дышетскемез: 1978-тӥ-1982-тӥ – Пермь кун университетысь юридической факультетын, 1999-тӥ-2001-тӥ – Россиысь МВД-лэн Управлениезлэн академияз.

Будон тубатъёсыз: 1982-тӥ-94-тӥ – следователь, вылӥ следователь, Ижысь Ленин райисполкомлэн отделэзлэн кивалтӥсезлэн воштӥсез, Ленин райкомлэн инструкторез, Ленин РОВД-лэн кивалтӥсезлэн воштӥсез; 1994-тӥ-2004-тӥ – Следствиея управленилэн кивалтӥсезлэн воштӥсез, 2004-тӥ – Следствиея управленилэн кивалтӥсез, министрлэн воштӥсез. Дунъетъёсыз: «За отличие в службе» медальлэн I, II, III степеньёсыныз, «Россиысь МВД-лы 200 ар» медаль, Удмурт Республикалэн Данъян грамотаез, «Удмурт Республикаысь дано юрист» ним.

Семьяез: кышнояськемын, будэ кык пиез.

Утчаськись

- Вордски интеллигентъёслэн семьяязы, анае Римма Алексеевна но атае Валентин Андреевич – дышетӥсьёс. Дышетскон мыным капчиен сётӥськиз - 8-тӥ классозь «витьёс» гинэ басьялляй, но 10-тӥ классэз быдтытозь, 50 процентэз оценкаосы «ньылен» сураськизы.

Школаын мыным сюрес сӥзизы механической институтэ, озьы нимысьтыз дышетылӥ математикаез но физикаез. Но мылкыды вошъяськылӥз. Атаелэсь пӧйшуранъя вань книгаоосэ лыдӟи, сэре районной но школа библиотекаосысь ӝажыосты бугыръяй. Ӝужаз мукет малпанэ – калык хозяйствоя институтэ пырыны, сое йылпумъяса, кыдёкысь заповедникын яке заказникын егерьын ужаны. Соин, лэся, сюлэмы али но кыске инкуазе, гуртэ. Пыӵал но мыным кулэ ӧвӧл, нюлэс зынын кӧты тыре.

Но вань та бурдъяськем мылкыдъёсме пуменак ӵогиз одӥг учыр. Семьямес ӧтизы сюанэ Балезино ёросысь Пибаньшуре – анаелэн вордскем палъёсаз. Анае но атае мыныны ӧз быгатэ. Келязы монэ. 16 аресъем муртлы сётӥзы кузьымъёсын тырмытэм бадӟым сумка. Мон поездэ пукси. Пусъем интые вуытозь, одӥг станция гинэ кылиз на вал. Мон сумкаме тамбуре потти, ачим таманлы гинэ вагонэ пыри. Берен потӥсько но - тамбур усьтэмын, котыре ӧвӧл. Быдэс вокзалэз котыртӥ, оло кин ке но янгышен кутӥз-а сумкаме, оло адӟиз-а кин ке. Озьы сюанын юмшан мылкыды куашказ. Кӧня нунал мынӥз сюан - мон сомында ик Пибаньшур котырысь гуртъёстӥ утчаськи. Но «следствие» гуньдӥз…

- Малы одно Перме кошкиды, Ижысь юридической факультет ӧз кельшы-а?

- Монэ туж кышкатӥзы, юридической факультетэ пырыны туж секыт, отчы армия бере гинэ куто шуыса. Но мон ваньмызлы возьматыны малпай: быгато! Экзаменъёсме сётӥ Ижын, «ньыльлы» но «витьлы», мыным Перме направление висъязы. Озьы мон анай-атайлэн бурд улаз гинэ будэм мурт палэнэ потӥ. Пермьын мон соку ик аслым ужпум пуктӥ: тон пичи ӧвӧл ни, ваньмыз юрттӥсьёсыд кыдёке кылемын, нокинлы оскыны, ваньмыз только ачид киын. Дышетскон капчи ӧз йӧты. Сюри мон суро-пожо группае, татын тросэз пиос армия бере лыктэмын ни, нылъёс но ваньмыз сямен ужаса вуэмын. Мон провинциал рад потылӥ аслым, ар но ӝыны пала секытгес йӧтӥз, туж мӧзмылӥ, доре каникулъёсы гинэ вуылӥ.

Гужемъёсы стройотрядын ужалляй. Уждунме соку ик сберкнижкае тырылӥ. Со пичи стипендие вӧзы – 40 манет вал соку - быдэс ар улыны тырмылӥз, озьы мон анай-атаелэсь уксёзэс ӧй ни курылы.

- Нырысетӥ практикады тодады лыктэ на-а?

- Йырам кылемын Алнаш прокуратураын ужлы дышетскеме. Татын валэктӥзы, кызьы следствиез нуыны, экспертиза радъяны. Но следовательлэсь ӝуксэ рос-прос шӧмъяй ни 4-тӥ курс бере Ижысь Октябрь ёросын. Диплом гожтон азьын татын быдэс ужез нуи.

- Синтэм писейпиез вуэ куштэм сямен ӧз луы-а?

- Сокем ӧз. Ма секыт но ӧй вал со. Воргорон тышкам кышнозэ. Жугиськисез изоляторе пытсаллям. Мон, стажер, зэмзэ вераса, гражданской адями, наручниктэк-мартэк пыдын нуисько сое прокуратурае. Татын басьтӥсько изоляторе пытсан сярысь санкция, берен лать гинэ вамыштӥськом сизое. Со вакытэз тодэ вайисько ке, ачим но паймисько. Шуг вал меда пегӟыны мынэсьтым? Малпасько, йыртэмасьлэн мылкыдыз ке луысал, одно ик чальтчысал.

- Милициысь тросэз ужасьёс Совето Союз вакытэ ужам аръёссэс трослы шунытэнгес тодазы ваё…

- Конечно, Щелоков министр кивалтон вакытэз уродэн верало, но со шоры кык ласянь учкыны луэ. Щелоков быгатӥз ӝутыны милицилэсь данзэ, уждун будӥз, нимысьтыз льготаос милицаослы кылдытъязы, ужасьёслэсь тодон-валанзэс ӝутонлы саклык висъяськиз – со вакытэ кылдӥз академия.

Следователь

- Ноку но-а мылкыдды ӧй вал милициысь кошкыны, кылсярысь, адвокатурае?

- Ӧй. Дышетскыкум ик удысэ следствие нуон вал, татчыозь со кельше мыным.

- Маиныз сокем бордаз думиз следовательлэн ужез, солэн интыез но сокем шуныт ӧвӧл, нуналлы быдэ чечы но сюдыса уг возё.

- Ас удыстэ гажан. Туэ 24 ар луэ ни ужам стаже. 12 арзэ ортчытӥ Ленин ёросын. Нырысь лушкаськисьёсты но жугиськисьёсты уйылӥ. Кема ик татын ужаны ӧз сётэ, думизы экономикаен герӟаськем ужъёс борды. Таяз котькинлэн кутскемез уг поты, уго кулэ нимысьтыз дышетскем, тодон-валанэз нуналмысь ӝутоно. Но мыным уксёен герӟаськем йыружъёсты пертчон кельшиз.

Следователь понна со умой, йыружез огкутскемен оп! шуытозь сэрттыны быгатӥськод ке. Но вань на астэ профессионалэн шӧдон но. Одӥг сӥньыс бере мукет сӥньысэз адӟиськод ке, тугаськем бугорез сэрттыны пӧрмытӥськод ке. Азьвыл «Ижмаш» заводын трос луо вал мотоцикл ёзъёс поттылон учыръёс. Мон уг вераськы куртка улазы деталь нуллӥсьёс сярысь. Мынам йыртэмасьёсы визьмоесь но укыр дӥсьтӥсесь вал.

Сборкая цехын тросэн ышылӥзы поглянъёс. Соосты ӵап дасяллязы Ягулысь колониын. Отын питранъёсты машинаосы тыро, нош заводэ со уг вуы. «Ижмашын» производство со вакытэ шаплы мынэ вал, питранъёс складын ноку уг кыллё, соосты пӧсь нянез сямен весь сборкаын возьмало. Но погылянъёс тырмыт уг вуо складэ но, цехе но. Соос заводэ сюрес вылысь быдэс машинаосын «пырылӥзы» кинлэн ке азбараз, гаражаз. Бӧрысь та погылянъёс базаръёсын вузаськизы, Иранэ, Ираке, Азиысь мукет странаосы кошкылӥзы. Нош со цехын ваньбур понна кыл кутӥсе пуктӥллям быдэ вуымтэ муртэ. Валамон, пинал кладовщик номыре лыдъяса ӧз улы. Ай эшшо водительёс но цехлэн кивалтӥсезлэн воштӥсез сое визьмазы: тон накладнойёстэ али ик подписать кар, мар водительёс тонэ утчаса татӥ бызьылозы.

Табере уд ни вера, кӧня манетлы ыштон адӟиз завод, туала уксёе берыктыны но шуг луоз, дыр. Но ми йылысеныз-пумозяз шараяны быгатӥм 5-6 сыӵе учырез, 10 адями та группае огазеяськыса йыринтӥз. Ас кисыязы самой зол «ужамъёсты» судозь пытсэт сьӧры ворсазы. Следствие улэ кыскем воргоронъёс пӧлысь огезлэн ӵап соку кыкто нылыз вордскиз. Семьяосыз тельмыризы сое судозь лэзьыны, кытчы, пе, пегӟоз атай, со табере семьяеныз думемын ни. Сизьым пол мертаськыса, прокурорен кенешыса, лэзим сое. Уж вуиз Вылӥ судэ, нош воргоронмы –ӧз. Семьязэ кутыса, со шуныт палъёсы чальтчем. 6-7 ар ортчыса, соку мон следствиея управлениын ужасько вал ни, сводкаосты учкисько но долкасько – розыскын татычыозь улэм сыӵе-сыӵе адями кырмемын, пе. Ӵап со пегӟем воргоронэз кутӥллям. Солэн «эшъёсыз», кыл кутыса, эрике потӥзы. Нош таизлы выльысь вань со кижи-кожи сюресэз ортчоно. Юнме уг шуо, кыл кутонлэсь уд пегӟы.

Вань та учыръёсын, тодӥськоды-а, мар секытэз. Ну, келялод пытсэт сьӧры йыртэмасез – сюлэм вылад нӧкы вӧй кисьтэм кадь луоз, шуо. Туала дыре лушкан-а, адями сӧсыртон-а медло, но йыртэмасьёсын вӧсь карем адями понна тужгес кулэез ваньбурезлэсь дунзэ берыктон. Нош пытсэт сьӧры ворсам мурт ку сое тыроз? Йыртэмасьёсын вӧсь каремъёс аръёсын витё, ку лушкам ваньбурзылэсь дунзэ берыктозы.

Кивалтӥсь

- Огшоры следовательын ужаны тӥледлы кема ӧз кылды, карьера лэсьтыны ӧдъяды, озьыен тунсыко следователь ужлэсь палэнскиды. Собере райкомын инструктор вал, мукет тубатъёс… Мӧзмыт ӧвӧл-а кивалтыны?

- Мӧзмон вал, но шуизы: кулэ. Косо бере лэсьтоно. Следствиея управление лэземзы бере но огшоры следовательын ужаны мылкыды кылемын вал на. Но мон уг жаляськы кивалтон тубатъёслы быдтэм дырме. Партийной уж трос кужым сётӥз юнманлы, будонлы. Али учконо ке, тросэз туала кивалтӥсьёс таӵегес ик тубатъёс пыр потэмын, партиын будэмын.

- Следствиея управление – Югдурез утёнъя министерстволэн огез бадӟым ваез…

- Милям аппаратамы 700 мурт пала ужа шуи ке, трослы уг алда. Уго зэмос лыдпусэз шараяны ум быгатӥське. Кылсярысь, следовательёс вань Прокуратураын, ФСБ-ын, Наркотикъёсты вӧлмытонэз чакланъя управлениын. Озьы ке республикаымы лэсьтэм 80 процентсэ йыружъёсты сэртто-пертчо следствиея управлениын ужасьёс.

- Берло дыре трос следовательёс – нылкышноос. Соос ужаны уг люкето-а?

- Азьвыл аръёсы но следствиын нылъёс вал, но соку сяськаос интыын гинэ. Соос ужмес но улонмес чебергес карылӥзы. Али 60 процентэз следовательёс - нылкышноос ини. Соослэн ненег пельпум вылазы милям службамылэн бадӟым люкетэз ныпъямын. Следствиын нылъёс туж ӝикытэсь, куд-ог пиосмуртъёслы соос сьӧры уйиськыны шуг. Куинь арлы огпол ӟечез следователь ним понна ӵошатскон ортчытъяськом, татын котьку но вормо нылкышноос. Но нылъёс – со нылъёс ӧвӧл ни… синкылиостэк. Нунал-арня уг ортчы, мынам кабинетам синкыли кисьтонъёс вуытытэк.

- ?!

- Ваньмыз, конечно, ужен герӟаськемын. Али собыдӟа воз куштэмын следователь вылэ – син шоры пуктыны ик кышкыт. Наукаен чакламын: следователь огдыре нуыны быгатэ 5 уголовной уж. Но учёнойёслэсь ӵектонъёссэс табере нокин лыдэ уг басьты. Али куд-ог следовательёс 30 уж но нуо. Та йыружъёсын шараямын ни янгыше уськытоно муртъёс. Со сяна, вӧзаз «лякисько» на толон-туннэ тупам ужъёс, таосыз 150 но люкасько.

Туж чурыт куронъёсыз уголовно-процессуальной праволэн. Со нимысьтыз дыр тупатэ одӥг ужез нуонлы. Солэсь азьло но, берло но уд выры ни. Коть кыместэ пиль – но одӥг уждэ 2 толэзьскын шарая. Ай со дыр ортчытозь, арнялы вазьгес ужез прокурор доры вуттоно. Озьы одӥг йыружез шараянлы одӥг нунал но быдэс уг сётӥськы. Туж керӟег ужез следовательлэн. Висказ дежурствоос вань на…

- Таӵе верамъёсты бере туала егитъёслэн дорады ужаны куриськемзы но уз поты.

- Зэм, туала следствиын ужало патриотъёс. Нош тодӥськоды-а, макем уждэ выльысь гажаны ӧдъяськод, тынад ваньмыз пӧрме ке. Ужлэсь кыӵе ке чыры-пыры люкетъёссэ шӧдыны кутскиськод ке, йыртэмасез шараяськод-кырмиськод ке - со ведь уждунлэсь но бадӟым шумпотон.

Огпол потӥм лушкаськон учыре, ӵап пӧсь пытьыосъя. Лушкаськисьёс пырам корка вӧзын мукет юрт ӝутӥське. Ойдо, шуисько эшелы, чаклалом отӥ, оло, кыдёке ӧз пегӟе на. Зэм но, кык адями ватӥськемын, лушкам арбериоссы но артэ, милемыз адӟыса, кыкетӥ этажысен тэтчыса кошкизы. Уйиським, кутӥм.

Али следовательёс мукетэсь ни. Ассэ но ужзэ возьматыса ӧз на вуы, нош куронъёссы! Милемлы сое сётоно, сыӵе льгота чаклано. Огласянь, со умой, дыр, милициын ужасьлэн ассэ гажанэз луыны кулэ, родина понна гинэ уд улы. Озьы ке но вань егитъёс пӧлын но ӟеч ужасьёс. Но следовательлэсь воззэ вормыны туж секыт. Умой специалист луон понна 2-3 ар ке но ужаны кулэ, нош милям, ар ортчыса, мукет азе выжо ни. Туала следовательлэн уждунэныз уго улыны секыт. Звание ке пичи, ужам аръёс ке люкаськымтэ, коньдон трос уд басьты. Соин нылкышноос чидась сямынызы кылё, воргоронъёс ӟечгес интыосы шупчо.

Лирик

- Кылбурась полковник, таӵезэ вамышлы быдэ уг пумиськы. Милициын ужамды кылбур гожъян мылкыд сётэ-а?

- Милям тросэз висё кылбуранэн, арлы быдэ 10-тӥ ноябрьлы нимысьтыз конкурс ортчыто. Туэ гожъямъёсме ыстӥ Россиысь МВД-е, но мынам - ваньмыз сямен лирика. Сэре мон огнам кылбур дуннее зымем маке ӧвӧл, азьвыл министрмы Щербаков но гожъялляз. Куинь-ньыль кылбуре МВД-лэн «Серебряная россыпь» сборниказ но пыремын.

- Тӥляд семьяды но быдэс герӟаськемын милициен. Кышноды министерствоын ик ужа, бадӟымез пиды - Нижний Новгородысь МВД-лэн академиезлэн Ижысь филиалэзлэн курсантэз. Марина кышное МВД-лэн финансово-экономической отделэзлэн кивалтӥсезлэн воштӥсез, подполковник.

Сергейлы 20 арес, Андрейлы – 14. Бадӟым пиелэн мылкыдыз вал УдГУ-ысь юридической факультетын дышетскыны. Но мон солы ӧй юртты, Сергей вылӥ оценкаос ӧз басьты. Нош академие со капчиен пыриз. Уго татын туж чаклало тазалыкез, нош Сергей - спортсмен, сэре анкетаосын анай-атайлэсь кин луэмзэ лыдэ басьто, милиция выжылы туж шумпото. Пичиез выйемын компьютере. Паймисько, ку со уроксэ дася. Но школаысь «ньыль»-«вить» нуллэ, озьыен компьютерлэн но маке-маке ӟеч палыз вань.

- Милицилэн нуналэзлы кузьым сётъясалзы ке, мар тӥледлы кулэ вал?

- Следовательёслэсь уждунзэс куаш-куаш мед будэтысалзы. Со самой бадӟым кузьым мон понна.

Источник:

Ильин А. В. Кылбурась полковник / А. В. Ильин ; записала А. Ионина // Удмурт дунне. - 2006. - 10 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"