Гондыр но адями

From Воршуд
Jump to navigationJump to search

Вашкала дыръя удмурт адями тэльын гондырен огазьын улэм. Бускелезлэсь киземзэ-арамзэ адӟыса, гондыр вожъяськыны кутскем.

— Уром,— шуэ со,— вай асьмеос валче кизём! Вераськиллям сяртчы кизьыны.

Адями юам:

— Гондыр уром, тон кытӥзэ карод? Соиз вера:

— Мон вылӥзэ каро. Адями шуэ:

— Мыным выжыез но яралоз.

Киземзы туж удалтэм. Тусьты быдӟаесь будӥллям сяртчыоссы. Куарез но туж ӟеч луэм. Муэз ик уг адскы.

Сизьыл вуыса, уромъёс сяртчыяло ини. Адями сяртчызэ ворттыса-ворттыса жадем. Гондыр уромез сяртчызэ веръям но – кӧш потэм. Кырым сиентэк гуаз толйыны выдэм. Кыкетӥ тулысаз соос сезьы кизьыны кенешиллям.

- Мон табере выжызэ каро – шуэ гондыр.

Адями соглаш луэм:

- Яралоз мыным йылыз но.

Верамзыя ик лэсьтӥллям. Туж чебер будэм сезьызы.

Зарни кадь ӵуж-ӵуж куарсам. Адями вылӥзэ октэм но гуртаз ворттэм. Уромез кӧс куро вылэ кылем. Со дырысен ю-нянь но, номыр мукет но кизьылымтэ ни гондыр.

Сяртчы кизьыкуз, гондыр оломар быдӟа сайкос сайкем.

Со сайкосэз огназ гырыны-кизьыны кутскыса, адями нянен но, бакча сиёнэн но тыр улыны кутскем[1].

Литература[edit]

  1. Чечыен нянь : удмурт калык мадёсъёс / люказ но тупатъяз П. К. Поздеев. - Ижевск : Удмуртия, 1984 (с. 24).