Гондыръёслэн кылдэмзы

From Воршуд
Jump to navigationJump to search

Одӥг гуртын кык пересьёс, кышноен картэн, улӥллям. Нылпизы соослэн вылымтэ. Пересьмыса соос туж шуген, ёрмыса уло вылэм: куддыр шыд пӧзьтыны пузы вылымтэ, куддыр гур аратыны чагзы вылымтэ...

Огпол, ӵукна вазь султыса, кышноез картэзлы верам:

— Султы но тэле ветлы, пересь... Гур аратыны чаг но ӧвӧл — кыӵе ке беризез кораса вай али!

Картэз султэм но, тӥр кутыса, тэле кошкем. Ӧжыт гинэ тэле пырем но кыӵе ке но веськыт, чебер беризез адӟем.

— Туж чебер беризь сюриз ук! Кышноелы кыӵе ке но усто чаг луоз ини! — шуэм но беризь доры мынэм. Кияз тӥрзэ кутыса, беризез ӵогыны шоналскем но, оломар адями куара пельсьӧраз шуккиськем:

— Эн кора монэ, пересь, эн иса... Со понна мон тыныд, мар ке курид, котьмар сёто.

"Ма, кытысь таӵе куара кылӥське?" шуыса учкем пересь но, соин озьы беризь куаръёссэ каллен выретыса вераське вылэм. Туж кышкам пересь, туж куалектэм: тӥрез ик киысьтыз музэ усем. "Витьтон арес луытозь музъем вылын улӥ ни но — таӵе паймоно кадь ужез адӟеме ӧй вал на али" шуыса, пересь абдраса гуртаз бертэм.

— Малы-о чагпистэк бертӥськод? — шуэм кышноез но тышкаськыны кутскем.

— Эн тышкаськы, кышно. Мон чагпис корасал, дыр, но туж паймоно кадь уж шоры ӝими али. Тэльысь чебер беризь шедьтыса, кораны ӧдъясько вал ини но, беризь мыным адями кылын "эн кора монэ, пересь, эн иса, со понна мон тыныд, мар ке курид, котьмар сёто" шуыса вераз. Со беризез жаляса мон коратэк ик кельтӥ, — пересь верам кышноезлы.

— Э-э, визьтэм пуклёе, визьтэм пуклёе! Татын мон гур аратыны но чаглы ёрмыса улӥсько, со ке, беризь шедьтыса, тэльысь чагпистэк бертэм. Али ик со беризед доры мын но солэсь одӥг ке но чагпис кур, — шуэм кышноез но пересьсэ нош ик тэле улляса лэзем.

Нош ик, тӥр кутыса, тэле кошкем пересь. Ӧжыт гинэ тэле пырыса вуэм но азьло веськыт, чебер беризез адӟем.

— Беризе, чебер беризе, вождэ эн вайы мыным. Нош ик монэ кышное тэле улляз, тынэсьтыд одӥг ке но чагпис гур аратыны курыны косӥз, — шуэм пересь, беризьлы йыбырттыса.

— Гуртад берт, пересь, эн сюлмаськы: кызьы куриськод, озьы ик луоз, — куаръёсыныз ӵаштыртыса верам пересьлы беризь.

Пересь берытскем но гуртаз бертэм. Корказ пырем но... кышноез кыӵе ке но ӟеч чаг кесям.

— Э-э, визьтэм пуклёе, визьтэм пуклёе! Витьтон арес улӥськод ини но — визьмыд ӧвӧл на! Татын мон гур эстыны пулы ёрмыса улӥсько, со ке чылкак одӥг гинэ чагпис курыса берытскем. Али ик со беризед доры мын но солэсь гур эстыны пузэ кур! — шуэм кышноез но пересьсэ нош ик тэле улляса лэзем, коркась донгаса поттэм.

Нош ик, тӥр кутыса, тэле кошкем пересь. Ӧжыт гинэ тэле пырыса вуэм но азьло веськыт, чебер беризьзэ адӟем.

— Беризь, вождэ эн вайы мыным. Нош ик монэ кышное тэле улляз: тынэсьтыд гур эстыны пу курыны косӥз.

— Гуртад берт, пересь, эн сюлмаськы, кызьы куриськод, озьы ик луоз, — куаръёсыныз ӵаштыртыса верам беризь.

Пересь берытскем но нош ик гуртаз бертэм. Коркаез доры вуыны кутскем но — аслыз ачиз паймем: азбараз кыӵе ке но ӟеч пу вандылыса, пильылыса заборлэсь но ӝужыт тыремын. Пересез адӟыса, кышноез корка азяз гур суранэн бызьыса потэм.

— My пыр виян! Мушко йыр! Эгыр мешок! Витьтон ар музъем вылын улӥськод ини но, визьмыд кеньыр быдӟа но ӧвӧл на. Татын ке мон нянь пыжыны пызьлы ёрмыса улӥсько, со ке гур эстыны пу гинэ курыса берытскем. Уно-а пайдаез пулэн? Путэк но улэммы луысал! Али ик со беризед доры мын но нянь пыжыны пызь кур! — шуэм кышноез но пересьсэ нош ик тэле улляса лэзем, азбарысь донгаса поттэм, тыбыраз гур суранэн шуккем.

Нош ик, тӥр кутыса, тэле кошкем пересь. Ӧжыт гинэ тэле пырыса вуэм но азьло веськыт, чебер беризьзэ адӟем.

— Уно-а ма пайдаез пулэн? Путэк но милям улэммы луысал. Кышное тон доры пызь курыны косыса лэзиз. Ӧд ке сёты, куаръёстэ ыжпи сюдыны вениклы корало, шуэ! — беризьлы верам пересь.

— Гуртад берт, пересь, эн сюлмаськы! Кызьы куриськод, озьы ик луоз! — куаръёсыныз ӵаштыртыса верам беризь.

Пересь шумпотыса нош ик гуртаз бертэм. Азбараз пырем но, корказ пыратэк, пыр кеносаз мынэм. Кеносаз пырем но — паймыса мар вераны ик валамтэ: сусекъёсын, ларьёсын юг-юг мамык кадь пызь тыремын.

— Однако та беризез... однако та беризез... мар ке вера, озьы ик луэ, — пересь ас понназ шумпотыса вераськыны кутскем. Кышноез карнанэн бызьыса потэм коркась.

— Сӥньыс чырты, мушко йыр! Мар-о кариськод кенсын? Пыдыд сьӧрлань мед купырскоз вал!.. Уно-а пайдаез пызьлэн? Пызез сиёд но — быроз. Витьтон ар ӵоже дуннеын улӥськод ини но — мушко йырад визьмыд ӧвӧл на. Тон беризьлэсь кык сандык зарнизэ кур вал. Мар-о жалянэз сое! Али ик тэле мын но зарнизэ кур. Ӧз ке сёты, тӥрен ӵогыса, кораса кельто шуыса кышкаты! Кышноез пересьсэ нош ик тэле улляса лэзем, кеносысь донгаса поттэм, йыраз карнанэн шуккем.

Нош ик, тӥрзэ кутыса, тэле кошкем пересь. Ӧжыт гинэ тэле пырыса вуэм но азьло веськыт, чебер беризьзэ адӟем.

— Уно-а пайдаез пызьлэн? Пызез сиёд но — пызь быроз. Тон милемлы кык сандык зарни сёт: кулытозямы сюлмаськытэк, куректытэк мед уломы. Ӧд ке сёты, али ик тонэ тӥрен ӵогыса погырто! — беризь котыртӥ тӥреныз шоналляськыса ветлэм пересь.

— Гуртад берт, пересь, эн сюлмаськы: кызьы куриськод, озьы ик луоз! — куаръёсыныз ӵаштыртыса верам беризь.

Пересь шумпотыса нош ик гуртаз бертэм. Коркаез доры вуыны кутскем но — аслаз синъёсызлы оскымтэ: кышноез укно дураз пуке, зарниен жингыр но жильтыр гинэ, пе, шудэ. Корказ пырем но — синмыз ик мальдэм: кыказ сандыказ тросаз ик зарни чиляса улэ!

— Быгатӥм, лэся, асьмеос беризез пӧяны. Табере кулытозямы чик куректытэк, чик сюлмаськытэк улом ини, — ваче вераськиллям пересьёс. Сандыкъёссэс мурӝолазы пыртӥллям, бадӟым замокъёсын замокаллям, корказэс, ӟезьызэс ӵогаллям.

Нунал ортче, арня ортче... Пересьёс уин уйбыт изёнэз уг адӟо: тани кин ке лыктоз, корказы пыроз, пересьёсыз тӥрен коралоз, зарнизэс нуыса кошкоз шуыса сюлмасько. Сюлмаськон интыязы сиён но сиемысь дугдӥллям...

— Нош ик тэле беризед доры мын, пересь. Калык асьме доры пыраны мед кӧшкемалоз, кыдёкетӥ бызьыса мед кошкоз — озьы мед тупатоз беризед, — пересьлы верам кышноез.

Нош ик, тӥрзэ кутыса, тэле кошкем пересь. Ӧжыт гинэ тэле пырыса вуэм но азьло веськыт, чебер беризьзэ адӟем.

— Беризь, ми доры калык пыраны мед кышкалоз, милесьтым мед кӧшкемалоз — озьы тупаты. Уйбыт кышноеным ум изиське, воръёс лыктэмлэсь кышкаськом, — беризьлы верам пересь.

— Гуртад берт, пересь, эн сюлмаськы: кызьы куриськод, озьы ик луоз. Калыкъёс гинэ ӧвӧл, кионъёс но тӥлесьтыд кӧшкемалозы, — верам беризь.

Пересь берен гуртаз бертэм. "Мар-о таӵе паймоно кадь кылъёс вераз али беризь: малы милесьтым кионъёс но кӧшкеманы кутскозы?" — малпаськыса бертэм пересь.

Гуртаз вуэм, азбараз пырем. Корказ пырыны ӧссэ усьтэм но, со шоры кышноез омырскем но — соку ик мар ке быдӟа гондыр луэм. Пересь туж куалектэм, музэ усем но — ачиз но соку ик туж бадӟым шӧтэм гондыр луэм.

Озьы дунне вылэ гондыръёс кылдӥллям. [1]

Литература[edit]