Воргорон но туриос

Одӥг воргоронлэн кӧжы муэз вылэ туриос дышиллям. Ма карыны ёрмыса, та адями ведра вина басьтэм, му вылаз нуэм но тусе понэм. Ачиз тэле турнан инты сайкыны пырем.

Ӝоген туриос лыктӥллям. Кӧжы му вылтӥ котырскиллям — нокин ӧвӧл. Тусьысь вина гинэ укно пияла кадь чиля. Пуксиллям. Быдэн кӧжы но кокчалтытэк, сюзэс юзматыны шӧталлям.

Кӧня ке улыса, воргорон адӟе: витёно куноосыз лыктӥллям. Мынэ. Дугдэ. Мынэ. Нош ик дугдэ. Туриос пичи но уг кӧберало. Кудӟиллям. Сыло, номыре валатэк.

Адямилэн е пулсаз нинэз вылэм. Тыбыр кузяз тупатыса, туриосты кукъёстӥзы бордаз керттылэм. Нуэ ини вордымтэ тылобурдоосэ, кезьыт ныръёссэс дырын-дырын маялля: «Вот паймыто ке паймыто гурт калыкез!»

Мынон сямен туриос сайкаллям но лобӟыса кошкыны кутскиллям. Адямиез но сьӧразы ӝутӥллям. Зыраськыса-зыраськыса нин чигем. Адями сыръясь интые нюре усем. Кунулозяз выем. Потэмез ик луымтэ. Малпамтэ шорысь отчы вуэм ӟичы. Лӥял кожаса, адями котыртӥ зынъяськыса берганы ӧдъям. Воргорон солэн быжаз кырмиськем. Ӟичы лулыз потымон кышкам, тэтчем но адямиез ӝутэм. Адями со ӟичылы али ке но тау каре, пе.

Литература

.