Визьмо кечтака

Пеймыт нюлэслэн самой пеймыт интыяз улӥз-вылӥз Кион. Югыт куазен со кар дораз кыллиз, нош уин сиён утчаны ветлӥз. Куддыр ма но со сюре, куддыр, вуж лы сяна, номыр но уг шедь.

Огпол нуназе куазен пӧйшураны потӥз. Луд кечез кутӥз. Солы Кион юн шумпотӥз. Соин ик тэтчаса-тэтчаса азьлань кошкиз. Нош азьпалан гу вал. Со сьӧрын Кеч жалем турынэз куаӵ! сие, кышкыт тушмонэз уг шӧдылы. Солы Кион шумпотӥз, гуэз ӟеч-ӟеч ӧз адӟы ни, ымдурзэ кылыныз нюлыштӥз но Кеч пала нюж кыстӥське. Ӧз но вала, кызьы гуэ усиз. Мур вылэм. Потыны эн но малпа. Ма кароно?

— Ау! — кеськиз Кион.

Кеч, солэсь куаразэ кылыса, каллен гинэ гу пала мынэ.

— Ма озьы лэсьтӥд, кузь быже? — юа Кеч.

— Тани ук, гуэ усьыны шедьтӥ но табере нокызьы но потыны уг быгатскы. Кече, юртты вал. Быронлэсь мозмыты, — бӧрдыса кадь вазиз Кион.

— Поттӥ ке, сиёд монэ, — пумит луиз Кеч.

— Уг, уг, Кече. Тау шуо но лэзё. Потты вал, а?

— Эх! Пӧяськод ведь, кузь быже.

Кион викыштӥз, собере ӟеч-ӟеч бӧрдыны ӧдъяз.

— Кеч уром, ӝут вал.

— Я, ӝуто, — жаляз Кеч, ачиз дыбыр кошкиз пуӵ понна. Сое гуэ лэзиз Кионлы. Кион со кузя тубиз но соку ик утисьсэ кутӥз:

— Ну, табере мон тонэ сиё.

— "Уг си" шуид ук, — куалекъя Кеч.

— Э, вакчи быже, кузь быжлы ӧвӧл осконо!

Кеч кесяськыны кутскиз, чир-р! поттэ. Кечтака сое кылӥз но ӝоггес кесяськем пала мынӥз.

— Ма луиз? Дисциплинаез тӥяськоды! — лек кеськиз со Кион шоры.

— Кионэз гуысь поттӥ, нош со сиыны медэ. Тау кар вал ӟеч лэсьтэме понна, собере кош вал, — урттылӥське Кеч.

Кечтака малпаськиз-малпаськиз но вераз:

— Вот ма. Кызьы ужады, озьы ик валэктэ мыным. Тон, Кион, кытын сылӥд? Мон кыдёкысен дыбыр лыкто но со гу вамен тэтчо, учко, паськыт-а, мур-а со.

Кион гу дуре мынӥз но сылон интызэ возьматӥз.

— Ага. Чаклалом. Тон, гу вамен тэтчытозям, отын ик сыл, ява. Кечтака кыдёке мынӥз. Кион шоры мертаськиз но пырак шораз сюрзэ пуктыса бызиз. Кионэз гуэ уськытӥз.

— Ну, табере кесяськы, — шуиз Кечтака, — кузь быж! Визьмыд ке ӧвӧл, кобыен йырад уд тыр. Кечен Кечтака кошкизы, собере пӧйшурась лыктӥз. Солы Кион шедиз.