Бухарев Александр Прохорович
Дор, яратон но инбам[править]
Грак ёросын вордӥськем удмурт лётчик-истребитель подполковник Александр Бухарев 27 ар ӵоже 6 сюрс пол инме ӝутъяськемын, 3 сюрс часлэсь трос «МиГ» самолётэн лобамын. 1976-тӥ арын Совето Союзысь устоез лётчик-снайпер луэмын. Александр Прохорович кемалась улэ ни Казахстанын. Но вордӥськем палъёсаз бертатэк уг чида: дор, яратон сямен ик, сюлэмысь уг поты, шуэ подполковник.
Урод адӟисько, пе
— Мон вордӥськи 1932-тӥ арын, Грак ёросысь Вильгуртын (Мишкино) улӥ 16 аресозь, — шуэ Александр Бухарев. — 7-тӥ классэз йылпумъяса, мынӥ Елабугае. Со вакытэ отчы трос егитъёс кыстӥськизы, малы ке шуоно Алабгоын пӧртэм училищеос вал, гуртмылэсь но кыдёкын ӧвӧл. Мон кадьёс туж трос люкаськиллям. Конкурс бадӟым вал. Мыным шуизы, синмыд, пе, ляб адӟе. Мон ӧй шӧдылы, урод адӟисько шуыса, но озьы веразы бере, бертытэк ӧйлась. Бӧрысь, лётчике дышетскыны кутэмзы бере, валай ини, Елабугаын монэ пӧяллям шуыса.
Мамае кулӥз мыным 7 арес дыръя, бубилэн но тазалыкез ляб вал, соин ик сое Ижысь пыӵал поттон заводысь но комиссовать каризы. Заводын ужакуз, ми сое туж шер адӟылӥмы, бӧрысь буби но кулӥз. Мынам кык апайёсы вылӥллям, но соос вордскемзы бере ик кулӥллям, соин ик огнам будӥ. Озьы монэ пыд йылам султытӥз ӵужае Татьяна Семёновна. Нялтас вераса, ӵужатае, монэ чукыныны нуыкуз, эмеспиезлэсь, мынам бубиелэсь, фамилизэ вунэтэм но аслэсьтыз гожтэм. Озьы мон Баскаков интые Бухарев луиськем.
Пичи дырме тодам вайисько ке, мон асме сиротаен ӧй шӧдылы, оло бӧлякмы бадӟымен, оло уж тросэн мултэс малпаськыны дыр ӧз сюрылы. Но одно ик тодам вайисько гуртысьтымы Педось апаез (Федосья Обуховаез). Солэн ӟеченыз мыным 14 арескам медаль сётӥзы. «За доблестный труд в Великой Отечественной войне» медалез сётыны кулэ вылэм бускельмылы Педось апайлы. Нош со шуэм: малы мыным медаль, ӝоген куло ни, эсьма, данъялэ Бухарев Санькаез. Со пичиысен колхоз ужын, сузэр-вынъёсыз ӧвӧл, воштыны нокинлы, песяез уз мыны ук интыяз ужаны. Тӥни озьы шӧдтэк шорысь мыным медаль сётӥзы. 1948-тӥ арын песяйме ӵыжы-выжыез татчы, городэ, вайиз, ар ортчыса, мон но Иже вуи. Кин дорын улӥмы, бӧлякъёсмы, кыксы ик дышетӥсьёс вал. Соос ик индылӥзы: одно ик дышетсконо.
Малпай, лэсьтӥськись котьку кулэ луоз, та удыс мыным тунсыко йӧтэ вал. Вамыштӥ коммунально-строительной техникуме. 4 ар дышетски, техникумез горд дипломен йылпумъяй. Соку отметкаос уг вузасько вал ай, али сямен. Но студент аръёс котьку сямен ик туж тунсыкоесь вал. Ми эшъёсыным мыло-кыдо ветлӥмы Завьяловоысь аэродроме. Нылъёс но пиос ар тэтчамы парашютэн, собере пиосты дышетыны кутскизы лобаны. Мыным потӥз: парашютэн тэтчаны кышкытгес. Милемды Иж тымет вылэ куязы, отын номыр но ӧвӧл ук, котырак йӧ. Но тэтчыны трос визь кулэ ӧвӧл, лэзиськыны быгатоно. Тӧл одно ик тыбырад мед пельтоз. Со пумит лыктӥз ке, берлань усёд но йырдэ пильыны быгатод. Техникумез но, самолётэн лобанъя курсъёсты но огвакытэ йылпумъяй. Огпол дорамы военной формаен пиосмурт лыктӥз но шуиз: тӥ ваньды мыноды военной лётной училищее, страналы кулэ лётчикъёс. Озьы мон лэсьтӥськисьын нунал но ӧй ужа. Но чик уг жаляськы, улонэ инбамен герӟаськиз шуыса.
Ӝутскыны капчи — пуксьыны секыт
— Мон йылпумъяй Сталинградысь военной авиацияя училищеез (азьвыл сямен Качинской училище). 1954-тӥ арын лётчик-истребитель луи.
Кин со сыӵе, веранэз ӧвӧл, дыр. Туж кышкыт, секыт лётчиклэн ужез. Мон лобай «МиГ» самолётъёсын, берло аръёсаз — «МиГ-21» истребителен. Самолётын тон огнад, соин ик ваньмыз понна ачид кыл кутӥськод. Инме ӝутӥськыны капчигес, пуксёнэн ӵошатыса. Посадочной полоса — 300 метр, тон отчы, капкае сямен, пырыны но пусъем интые дугдыны кулэ. Ӧд ке вутты, эшшо одӥг котыр сётыса, нош ик пуксьыны тыршод. Но истребительёсын топливо 300 литр гинэ, со, ӝог лобыку, 30 минутлы тырме. Соин ик пуксьыны тыршоно нырысетӥяз ик. «МиГ» самолёт сярысь верано ке, со асьме историысь тужгес тодмоез военной самолёт, дуннеысь 60 пала кунъёсын соин лобало, куд-огез сое «лобась Калашников» но шуо. Корт тылобурдо 14 метрлэсь кузьгес, 4 метрлэсь ӝужытгес. Буш самолёт (ракетаостэк) 5 тонналэсь секытгес. Инбамын со час куспын 2 сюрс 230 иськемез ортче.
Училище бере монэ ыстӥзы Туркмение. Гарнизонмы кунгож дорын ик вал. Кунгожез тӥян учыръёс туж ӵем луылӥзы. Нырысь инме ӝутӥськылӥзы фотоаппаратэн воздушной шаръёс, бӧрысь Америкаысь самолётъёс котыртӥмы гожеръязы, соослы тунсыко вал, кыӵе милям истребительёсмы. Озьы ми нуналаз кӧня ке пол инме «тубаллямы» ӧтьымтэ куноосты уллян понна. Но шпионъёс но кескичесьгес луылӥзы. Тодӥськоды, дыр, 1960-тӥ арын луэм учырез. Куке Америкаысь лётчик Пауэрс Пакистанысен «У-2» самолётэныз асьме страна вадьсытӥ лобаз. Та самолётын вань фото- но радиоаппаратураез, магнитофонэз. Солэн валтӥсь ужпумез вал Уралысь военной заводъёсты туспуктыны. Пауэрсэз уськытӥзы Свердловск дорысен. Нялтас вераса, инме асьме «МиГ»-ёс ӝутскем бере асьме адямиос (алекмеменызы, кодъёсты воштыны вунэтыса) шпион самолётэз пуштытыны чаклам ракетаосты лэзизы асьме самолётъёс шоры. Кык «МиГ» озьы пуштытэмын вал.
Та выллем учыръёс дыръя, странамылы инбамын кышкытлык кылдыку, милемлы шуо вал: «Готовность №1». Соку тон самолёт пушкын пукиськод ини (дежурной звено — 4 самолёт). Команда сётӥзы ке, соку ик лобӟыны дась. Туркмениын 50 градус пӧсь, адямиос ураме пото вал ӝомал усем бере гинэ. Нош тон самолёт пушкын нимысьтыз костюмен, гермошлемен. Сыӵе пӧсьын 1 час сяна чиданы уг луы вал, соин ик эшъёсынымы вошъяськылӥмы. Нялтас вераса, мон 27 ар лобаме бере но вӧталляй, команда сёто, нош мынам «тревожной» чемоданэ доре кылемын шуыса. Со чемоданын — документъёс, ву, воштос дӥсь, эмъюм но мукет чыры-пыры.
1960-тӥ арын Фрунзеысь военной лётной училищее 10 реактивной самолётъёсты вуттоно вал. Отчы лобӟыкумы, пуксьылӥмы Казахстанысь Чимкентэ. Туркмениысь пустыняос, барханъёс бере тюльпанъёсын пиштӥсь аэродромлы мон синмаськи. Инкуазь чебер, куазез сутӥсь пӧсь ӧвӧл. Кузпалылы секыт вал Туркмениын, озьы мон рапорт гожтӥ но куриськи Казахстанэ. Чебер, шуныт сяна, инкуазь узырлыкъёсъя но татын Менделеевлэн быдэс таблицаез вал, дыр. Озьы Казахстан музъем мыным кыкетӥ дор луиз, 56-тӥ арзэ улӥсько ини Шымкентын (Чимкентын).
Лётчик янгыша огпол
Лётчикъёс одӥг семья кадь куспазы уло. Мон туж шумпотӥсько вал, Удмуртиысь адямиосты пумитасько ке, соос мыным бӧлякъёсы кадь потылӥзы. Тани Туркмениын ож тӥрлыкъя инженермы Пичи Пургалась воргорон вал. Лётчикъёс пӧлын — Ижысь эшъёсы ик: горд йырсиё удмурт Гера Мошкин, бигер Альберт Валеев, ӟуч Георгий Любомиров. Мукетсэ эшме, удмурт пияшез Фёдор Христолюбовез (этнографлэн, история наукаосъя кандидатлэн Людмила Христолюбовалэн агаез), дышетскеммы бере Крыме лэзизы. Сыӵе югыт адями, ӧз юы, ӧз кыскы, но нырысетӥ араз ик бырыны шедиз.
Топливоез шыръян вылысь, инме огпол ӝутскемен, кык заданиез быдэсъяны косо вал. Со нуналэ Федя эшеныз омырын — музъемлэсь 4 сюрс метр вылӥын — учебной бой ортчытӥллям, собере маршрутной полёт луыны кулэ вылэм. Таиз ортче ини 4 сюрс метрлэсь вылӥын, стратосфераын. Отын омыр ӧвӧл, соин ик лётчик дӥсяны кулэ кислород маска. Нош Федя сое дӥсяны вунэтэм, валамон ини, йырсазьзэ ыштэм, самолёт музъем вылэ усьытозь, Федя сайкиськымтэ ни. Бӧрысь Христолюбовлэн кышноез шуиз: Федя, пе, урод мылкыдын штурвал сьӧры пуксиз, кузпалъёс керетӥллям вылэм.
Авиацияя училищеын милемыз дышетӥзы музъем вылысь шонер ӝутскыны, ӝог пуксьыны, инметӥ пӧртэм сямен лобаны, тушмонэз пӧяны, ыбылыны. Ялан шуылӥзы: штурвал сьӧрын кышканы, малпаськыны, алекмыны дыр ӧвӧл. Нош гарнизонын милям командиръёсмы лобан азьын кышноосынымы гинэ но артэ изьыны ӧз лэзьылэ. Лётчик штурвал сьӧры, номыр сярысь малпаськытэк, сюлмаськытэк но жадьытэк пуксьыны кулэ. Тужгес но секыт лобаны бус дыръя яке зол зорыку-лымыяку. Уйин лобанэз но нуназе инме ӝутсконэн озьы ик уд ӵошаты. Пеймыт куазен пилемъёс пӧлтӥ лобӟыку, инмез но музъемез сураны луэ, малы ке шуоно номыр уг адӟиськы. Сыӵе дыръя лётчиклы юрттэ техника, вань авиагоризонт нимаськись прибор.
Макем тросгес лобаськод, сокем золгес волятӥськод быгатонлыкъёстэ. Мон инбаме 27 ар ӵоже лобатозям 6 сюрслэсь трос пол ӝутскылэмын, 1-тӥ классъем лётчик вал ини, нош 1976-тӥ арын военной лётчиклэсь вылӥ квалификацизэ басьтӥ — лётчик-снайпер луи. Со понна, котькыӵе куазен усто лобаны быгатэм сяна, СССР-ын лётчик-истребительёс куспын ортчем ӵошатсконъёсын вормисе потоно вал. Мыным кылдӥз соос пӧлын чемпион луыны. Таӵе вормонэ бере мыным полковник звание сётыны кулэ вал. Но полкмылэн командирез ачиз подполковник вал. Кыӵе-о подполковник приказ гожтоз, подчинённоезлы полковник звание мед сётозы шуыса. Шонерзэ вераса, ним-дан понна мон ӧй лоба. Бен, тыршемме пусйытэк ӧз кельтэ: 14 медале, уно таукаронъёсы. Тужгес но дуно 3 наградае. Одӥгзэ верай ини, война вакытэ ужаме понна сётэмын. Кыкетӥез — «За боевые заслуги» медаль, куинетӥез — «За службу Родине в Вооружённых Силах СССР» орден.
Уйвӧтам лобасько
— Огпол инме ӝутскиськод ке, лобатэк улыны уг луы ни. Со мылкыдэз кылын уд вера. Кызьы уг быгаты адями яратонтэк улыны, озьы ик лётчиклы кулэ инбам, тылобурдолы сямен. Ми дышемын вал самолётлэн зуэтыса ӝутскемезлы. Семьяосмылы но со куара кырӟан выллем вал. Аэродром гужетэ, зуэтэ ке, озьыен, ваньмыз умой, нош шыпыт ке, иське, маке луэмын. Кузпалы Нина Фоминична, котькуд лобакум, сюлмаське вал, но мон тодӥсько, со данъяське но вал, картэз лётчик шуыса.
Кышное Грак ёросысь ик бускель гуртын будэмын. Солэн но нимтулыз огшоры ӧй вал. Чукыныны мынӥллям но Нина нимын пылатӥллям, нош вордӥськем сярысь свидетельствояз Людмила гожтӥллям. Но мон сое Нина шуисько вал.
Ми тодматским 2-тӥ классысен. Мыным 10 арес, солы — 9. Пичи дыр — зол синмаськон вакыт ӧвӧл кадь. Но мон нырысьсэ адӟеме бере ик валай: яратӥсько, мукет нылъёс шоры уг учкы ини, сокем со мынам сюлмам пыриз. Кузпалъяськимы 1955-тӥ арын, мон офицер вал ини. Нош 1955-тӥ арозь ог-огмылы гожъямы, сомында гожтэтъёс нокин ӧз ысъя, дыр. Со дышетскыны пыриз Елабугае, мон Иже кошки, пумиськылӥмы каникулъёс дыръя гинэ. Училищеез быдтытозям, ньыль толэзь гинэ кылиз на вал, шуак дугдӥзы гожтэтъёс вуэмысь. Малпай: бызиз, дыр, кылӥськиз вал, кураны огпол гинэ ӧз ветлэ шуыса…
Бертӥ, кузьым басьтӥ солы. Пумиським. Со шуэ: кыӵе мон тыныд кышно луо, пинал ваеме ке ӧз луы. Со пичи дыръяз тифен висемын. Вылаз ик, Елабугаын дышетскыкуз, тулыс зор улэ шедьыса, зол черлаз. Больницаын врачъёс, пе, верасько, пенициллинмы луысал ке, та нылэз кемалась йӧнатысалмы ини. Асьме доры соку та эмъюм вуымтэ на вылэм. Со кынмамез бере Ниналэн сюлмыз висись кылиз. Куд-ог ӟеч адямиос шуыны шедьтӥллям, Саша, пе, висись муртэ кышно уз басьты. Соин ик Нина мыным гожъямысь но дугдэм.
Мон шуи: та гинэ ке мугез, со кык яратӥсь адямиослы люкиськыны муг ӧвӧл на. Огазеяськимы, кык пиналмы вордӥськиз, Виктор пимы но Ольга нылмы. Соослэн асьсэлэн семьяоссы ини. Нинаен ми туж шудо улӥмы. Шара но зол ӧм вералэ яратонмы сярысь, но кыкмы ик шӧдӥськомы вал: со мынам улонам валтӥсь адями, мон — солэназ. Али но одӥг нуналы но уг ортчы, сое малпатэк. 77 аресаз Нина Фоминична кошкиз та дуннеысь. Кузпалы шуиз: тынад яратонэд монэ та дырозь возиз, тонтэк мон кемалась ӧй луысал ни.
2010-тӥ арын мон огнам кыли, куректон пачкатыны ӧдъяз. Кытчы пырон инты шедьтытэк, арлы быдэ берталляй вордӥськем гуртам. Гольык пыд бызьылэм интыос сюлэм яраме буйгатыны юрттӥзы. Мон тау карисько Казахстан музъемлы, монэ мурт ӧз кары шуыса. Котькытын сямен ик, отын но ӟеч адямиос трос. Но вордскем гуртэз, дорез сюлэм уг вунэты. Адӟем потэ тодмо интыосты, ӵыжы-выжыосты, эшъёсты. Кылсярысь, мынам али но огшоры гинэ ортчеме уг луы Пероггуртысь аэродром дортӥ. Кемалась ӧй адскылы ини школаын ӵош дышетскем эшеным — Михаил Ильич Габитовен. Со али Камбаркаын улэ. Толэзьлы гуртэ бертӥсько ке, котькуд нунал сямен кин ке доры ветлӥсько, ӵыжы-выжыосыным адӟиськисько, куноясько. Вордӥськем палъёсылэсь, удмуртъёслэсь, бӧлякъёсылэсь мӧзмонэ нош ик арлы мед басылскоз шуыса. Валлян гинэ жингыртӥз ӵыжы-выжые Владимир Стрижов. Со но лётчик, мон военной лётчик вал, со гражданской. Мон Гракын шуыса тодэмез бере шуэ: малы, пе, азьлапал ӧд вера бертэмдэ, мон но, вис шедьтыса, тонэн адскыны вуылысал. Шуисько: ойдо ук берт, кыдёкын-а али? Нью-Йоркын, пе. Тӥни озьы, пуксьылытэк сямен лоба. Нош мон уйвӧтам гинэ лобасько на…
Источник:
За предоставление материала выражаем огромную благодарность редакции газеты "Удмурт дунне"
