Бимакова Ольга Петровна
Бадӟым семья – «Айкай»[править]
Ольга Бимакова – Удмуртиысь дано артистка. Ольга Петровна 25 арлэсь кема шумпоттэ калык кырӟанъя но эктонъя «Айкай» театрлэсь учкисьёссэ. Соос огкадь пӧсь кичабонъёсын пумитало Ольга Бимаковалэсь дуэтъёсын но, нимаз но кырӟамзэ.
Ӝож кинолы сюжет
Верасалзы ке, ӟучо-украин семьяын вордскем Оля Гершун удмурт ансамбльын артистка луоз, удмурт кылын шатыр поттыса вераськоз шуыса, талы оскись ик ӧй луысал. Но улонын сётэм адӟонлэсь нокытчы уд кариськы. Оля Гершунлэн пичи дырыз сярысь кино лэсьтыны луысал, но солэн бадӟым люкетэз ӝож пӧрмысал, дыр.
Олялэн ӵужатаез (анаез ласянь песятаез) семьяеныз ик Удмуртие вуиз торф поттыны – Ижевск вӧзысь Позимь посёлокез соку Торфянка нималлязы, татын гыбед дасянъя бадӟым предприятие ужаз. Егит Зоя тодматскиз Ижын службазэ ортчись Пётр Гершунэн. Армия бере пинал пи дор палъёсаз – Украинае – ӧз ни берты, татчы ик кылиз. Егит кузпалъёслэн Сергей пизы но Оля нылзы вордскизы.
Но семьялэн шудэз кемалы вылымтэ – 29 аресъем нылкышнолэсь улонзэ уретӥз лек пыктос. Егит атай кылиз 8 аресъем пиеныз но 6 аресъем нылыныз.
– Агайме но монэ атай сётӥз интернатэ. Малы озьы кариз – та сярысь юаны ноку ӧй дӥсьты. Пичи дыръям кышкай, дыр. Бадӟым будыса, кусыпъёсмы матын ӧй вал ни. Нош 24 арес дыръям атае кулӥз.
1 арзэ мон интернатын улӥ. Собере атай ӵош кариськиз удмурт кышномуртэн – Нина Афанасьевна Иванковаен. Солэн аслаз Руслан пиез вал,– тодаз вае Ольга Бимакова.
Кузпалызлэн интернатэ кельтэм нылпиосыз сярысь тодыса, кышномуртлэн сюлэмыз тарс! кариз. Ӵектӥз Петялы пиналъёссэ бордазы басьтыны – соку семья Дэри ёросысь Тяма гуртын улэ вал. Анайлэсь мӧзмем нылаш бубизлэсь выль кышнозэ «мама» шуыны кутскиз. Кышномурт но вань сюлэм шунытсэ кузьмаз сирота ныллы. Нош агаез эшшо ӝыны ар интернатын улӥз на – ӧз оскы, сое мукет семьяын возьмало шуыса.
Гужем каникулъёссэ Оля ортчытӥз выль анаезлэн вордскем палъёсаз – Вавож ёросысь Ӟамбай гуртын. Татын со кӧня ке толэзь куспын дышиз удмурт кыллы. Ӟамбае вуэм нылашлэн нырысь кӧтыз ӝож луылӥз, мукет нылпиосты уг вала шуыса. Но эшъяськон пыр тодмотэм кыл но аслаз кадь луиз.
– Гуртэ улыны ми быдэс семьяен бертӥм. Мамалэн Руслан пиез мыным вын луиз, агае но милемын артэ. 4-тӥ но 5-тӥ классъёсын дышетски Ӟамбайысь школаын. Классмы туж умой вал, пиналъёс лякытэсь. Туж матысь эшъяським Надя Бураковаен, та дырозь кусып возиськом соин. Надялэн анаез но атаез дышетӥсьёс вал, эшелэсь адӟем карыса, умой дышетски, кружокъёсы ветлӥ. Кырӟаны быгатонлыкме синйылтӥз крезьгуръя дышетӥсе Владимир Евгеньевич Елышев. Со монэ ёросын ортчылӥсь конкурсъёсы поттаз,– вера Ольга Петровна.
Ӟамбайын улон аръёс нылпиос понна шунытэсь вал ке но, Гершун атайзылы маке но ӧз тырмы. Нина Афанасьевнаен кусыпсэс уретыса, нылпиоссэ кутыса, со кошкиз вордскем палъёсаз – Украинаысь Ровно городэ. Татысь ӵыжы-выжыосыз доры ик гужемлы кельтӥз Сергеез но Оляез.
Воргорон висе вылэм, солы операция лэсьтоно луиз. Нош бӧрысь Гершунъёс нош ик Удмуртие бертӥзы – нылпиоссэ воргорон «Юськи» санаторие интыяз. Татын улыкуз, Оля «Дась лу!» газет пыр тодӥз: Ӟамбайысь эшъёсыз сое утчало. Озьы кусып тупатӥзы гожтэт пыр. Соку Олялэсь кытынзэ тодӥз выль анаез Нина Афанасьевна но.
– Собере 3 арзэ улӥ но дышетски Можга городын. Татын атай мукет кышномуртэн кушласькиз, соку мон валай: мурт нылпиосты ваньмыз уг ярато вылэм. Туж возьмай, ку 9-тӥ классэз йылпумъяло но кошко нимаз улыны. Агае соку Ижысь 17 номеро училищеын дышетскиз. Мон но отчы документъёсме нуи – аслым ачим кузё луоно, муртлэсь возьмано ӧвӧл.
Шуныт удмурт гурт
– Гужем каникулъёсы монэ кунояськыны дораз ӧтиз Нина Афанасьевна. Атай талы туж пумит вал, нош мон ӧч кари. Котырме бичай но дорысь пегӟи. Урамысь телефон автомат пыр жингыртӥ бускельёслы – атайме ӧтьыны кури но верай, мамае доры кошкисько шуыса,– маде Ольга Петровна.
Нылашез яратӥсь Нина Афанасьевна ӵектӥз: кыль мон доры, 10-тӥ-11-тӥ классэз татын дышетскод. Озьы Оля Гершун быдэ вуиз Ӟамбайын. –
Улонысьтым шудо пинал дыры герӟаськемын та гуртэн, Надя эшеным. Монэ юрт котырысь ужез валаны дышетӥз Нина Афанасьевна. Мамаелы юрттӥськыны фермае но, пекарняе но ветлылӥ. Али но тау карисько ӟамбай калыклы монэ аслаз каремез понна,– шуэ артистка.
Оля школаын но мыло-кыдо дышетскиз. Уката яратӥз ӟуч кылъя но литературая урокъёсты. Дышетӥсьсы Виктор Павлович Глухов туж кужмо педагог вал. Соин но, дыр, Оля пыроно кариськиз Удмурт кун университетысь ӟуч филологияя факультетэ. Татын дышетскон висказ тодӥз «Чипчирган» ансамбль сярысь. Тани кытын солэн лулыз-сюлмыз лопыръяськиз! «Чипчирганэ» соку ветло вал пӧртэм факультетъёсын дышетскись студентъёс: Светлана Пикулева, Андрей Прокопьев, Алёна но Эдуард Степановъёс, Лариса Дядькина, Пётр Данилов. Тросэз соос удмурт филологиын тодон-валан люказы. Вот кытын улон пӧзе, малпалляз Оля.
– 1 ар дышетски но выльысь Ӟамбае бертоно кариськи. Ижын 1990-тӥ аръёсы улыны секыт вал, уксё уг тырмы. Возьыт вал, кышкай, «дышетскыны пырыса, университетсэ куштэм» шуэмзылэсь. Озьы 1 арзэ колхозын ужай: рядовойын но, фермаын но, столовойын но, клубын но. Огпол гуртэ вуизы «Айкай» театрысь артистъёс. Клубмы соку ремонтын вал ай. Артистъёс школа коридорын концерт возьматӥзы. Кырӟамзэс-эктэмзэс тодам вайыса, мынам уйзэ но иземе ӧз луы. Вуоно гужемаз дышетскыны пыри культпросвет училищеысь дирижированиея но хоръя отделение,– тодаз вае Ольга Бимакова.
Татын но нылашлы удалтӥз визьмо, быгатӥсь дышетӥсьёс нодъям улсын ӟеч тодон-валан люканы. Мукет студентъёсын ӵош ветлӥз училищеысь «Инву гур» ансамбле. Дышетсконлы Оля вань мылкыдзэ но кужымзэ сётӥз – культпросветэз горд дипломен йылпумъяз.
Ужаны дышетӥзы
Ужаны интыяськон пумысен Ольга йырзэ мултэс ӧз тӥя – сюлмыз «Айкае» гинэ куриськылӥз. Эшеныз ӵош вуиз татчы. Выль лыктэмъёсты дунъязы зэмос кизилиос: Валентина но Евгений Серебренниковъёс, Михаил Ворончихин, Николай Прокопьев, Таисия но Геннадий Кузнецовъёс, Светлана Смагина. Егитъёслэн пыдес синъёссы ик шальтразы, озьы ке но кырӟазы но, эктӥзы но.
– Басьтӥськом, шуизы. Но 3 толэзь, пе, эскером на,– тодаз вае со вакытэз Ольга Петровна. – «Айкайысь» дано артистъёс шоры инмаръёс шоры кадь учкисько вал. Аслым ик осконтэм потылӥз: мон соосын артэ? Туж возьдаськылӥ. Али данъяськисько, сыӵе вылӥ быгатонлыкен адямиос вӧзын дышетскыны кылдӥз шуыса. Соос ведь артистъёс гинэ ӧй вал, котыр ласянь адӟем карымон адямиос. Тани Евгений Серебренников туж чебер суредаськылӥз, ачиз ик кылбураз но крезьгур гожъяз. Михаил Ворончихин – кыллы сыӵе усто, ваньзэсты пальпоттыны быгатэ. Геннадий Кузнецов но кырӟан гожъялля. Эшшо со милемыз эктыны дышетылӥз. Ой, сюре вал мыным. Удмуртъёслэн, пе, эктон выросъёссы виразы пыӵамын: гань-гань, лэйкыт, пыдъёстэ зол ӝуткатэк эктоно. Бӧрдылӥ но.
Евгений Серебренников монэ, пинал адямиез, Ольга Петровна шуыны кутскиз. Соя кариськыса, мукетъёс но озьы вазьыны ӧдъязы. Евгений Георгиевич котькуд артистлэсь быгатонлыксэ адӟе но, шӧдэ но вал.
Ас поннам малпалляй: мыным матынгес лирической кырӟанъёс. Нош худрукмы ӵошен частушка кырӟаны поттӥз, учкисьёс та номермес сыӵе зол пумиталлязы! Собере Светлана Смагинаен дуэтмы кылдӥз. Нырысь ӟуч кырӟанэз ӵошен быдэстӥм, собере – удмуртъёссэ. Туж жаль, Евгений Георгиевич улонысь сокем вазь кошкиз шуыса, та ыштон «Айкай» понна но, мон понна но номырин ӵошатонтэм.
Таӵе артистъёс 100 арлы 1 пол вордско, дыр. Соос ужазы, асьсэды жалятэк. Милемыз но озьы ик дышетӥзы. Температураед 39 градус? Таблетка юиськод но – азьлань, тонэ сцена вылын воштыны нокинлы.
Нырысетӥ арзэ ужакум ик, кунгож сьӧры – Венгрие – гастроле потам. Туж кельшизы венгер кырӟанъёс но эктонъёс. Со бӧрсьы кӧня пӧртэм кунъёсы, кыӵе гинэ городъёсы ӧм поталэ, но соку мында шумпотон ӧй ни басьтылы кадь.
Коллективен Пётр Данилов кивалтыны кутскем бере ми гужемлы быдэ кадь поталлямы кунгож сьӧры. Вераны кулэ: Пётр Павлович административной ужен гинэ уг выры, со мур выемын творчествое. Котькуд номер – со валаса огазеям кырӟан, эктон но калык дӥсь. Коллективмы уг люкиськы кивалтӥсьёслы но артистъёслы. Ми одӥг бадӟым семья кадь улӥськомы,– вера Ольга Петровна.
Зэмзэ но, сотэк ужасалзы-а «Айкайын» семьяос? Кема аръёс ӵоже огъя творчествое зымемын вал Серебренниковъёс, Кузнецовъёс, Прокопьевъёс, Камашевъёс. Прокопьевъёслэсь ӧрзэс азинтэ пизы – эктонъёс но обрядъёс пуктэ балетмейстер Андрей Николаевич. Та вакытэ коллективын тыршо Даниловъёс, Бимаковъёс, Антоновъёс.
Ольга Гершун но аслэсьтыз парзэ пумитаз татын.
– «Айкае» баянэн но арганэн шудӥсь утчало вал. Учкисько но – Олег Бимаков вуэм. Со кӧня ке курслы покчигес, оркестровой отделениын дышетскиз, ми тодмоесь вал. Нош татын Олег сьӧрам ветлыны кутскиз. Нырысь, конечно, сюлэмылы матэ ӧй лэзьы, аслым ачим бадӟымгес но йӧногес потӥ-а, мар-а. Нош со монэ 1-тӥ Май празднике Можга ёросысь Карашур гуртаз ӧтиз, семьяеныз тодматӥз, картошка мерттӥм. Собере анаез шуэ: гуртэ вайид бере, курано луоз, сотэк калык мар шуоз? Ачиз Олег, оло, ӧй но дӥсьтысал, ма, пиналгес но вал ай – 22 арес. Озьы Ӟамбае кураны ветлӥзы. Нош гужемаз Карашурын сыӵе шулдыр сюан карим. «Айкайёсын», гурт калыкен 7 корка юмшаса пырам. Ар ортчыса, Миша пимы вордскиз,– тодаз вае Ольга Петровна.
10 ар талэсь азьло улонысь кошкиз «Айкайлэн» чеберлыкъя кивалтӥсез Евгений Серебренников. Солэсь ужзэ азьланьтыны оскизы Олег Бимаковлы. – Оля, тыныд туж секыт луоз, но тон чида, котыр ласянь картэдлы юрттыны дась лу, малы ке шуоно кивалтӥсь луон – секыт уж,– визь-кенешен анай сямен вазиськиз соку Валентина Серебренникова.
Тупась куара
Ольга Бимакова Удмуртиысь дано артистка луэмын ни, озьы ке но данъямзылэсь кепыра кадь. – Мон асме солист уг шуиськы. Уго ансамбльын но кырӟаны быгатоно, эшъёстэ кылоно. Мон лыдъясько, солист луыса вордскыны кулэ. Тани Светлана Смагина, Михаил Ворончихин, Геннадий Кузнецов – соос солистъёс.
Милям театрамы пыӵамын ӧвӧл кадь «вай, мон кырӟало» шуыса курон. Репетиция дыръя Олег Николаевич шуоз: – Ну-ко, эскере ай кырӟаса…
Озьы куараосмы тупазы хормейстеренымы Яна Корепановаен. «Жестокий романс» ӟуч кырӟанэз вайиз артистмы Дмитрий Гильфанов, сое Казаньын дышетскыкуз кырӟало вылэм. Эшшо Янаен ик быдэстӥськом «Стёжки-дорожки» частушкаосты.
Светлана Смагинаен сцена вылэ ӵош потаськом «Яратон мылкыд», «Легезьпу-а, сирень-а», «Арган куара» кырӟанъёсын. Берлоез дуэтмы – «Покчи гужем» – таиз «Мынам Удмуртие» радиолэн «Арлэн кырӟанэз» вожвылъяськонын вормисьёс радын вал.
Директормы Пётр Павлович но вералля, сольной концерт дасяно ни шуыса. Мон ӧй на буды кадь потӥсько, но 50 арес юбилеелы кисьмало, дыр.
Шумпотӥсько, «Айкае» егитъёс лыкто ке. Ми соосын эшъяськиськом, мар ке но ласянь адӟем кариськом.
Концертъёс бере милемыз учкисьёсмылэн котьку куно каремзы потэ. Ӝӧк выл тыр – пыжиськемъёс. Ваньмыз та – бер ӝыт яке уйин. Мон сиён ласянь чакласькыны кутски, векчияй. Концерт костюмъёсме сюбегатъяно луиз. Огполаз концертэн потӥм но, юасьёс вань: Оля Бимаковады нош кытын? Татын, шуисько. Ой, кыӵе пичи кылемед, питырес дыръяд ик, пе, сыӵе чебер вал.
Кӧня ке ар талэсь азьло Ольга Петровна йылпумъяз Удмурт кун университетысь Искусствоосъя но дизайнъя факультетэз. Диплом ужзэ сӥзиз удмурт калык дӥсьлы.
– Эскерыса потӥ, кыӵе вашкала удмурт сямъёсты но йылолъёсты ужаз кутэ Пётр Данилов, сценалы костюмъёсты кылдытыкуз. Шуом, ог 25 ар талэсь азьло гинэ мар ми тодӥськомы вал удмурт дэрем сярысь? Нош али валанмы кылдэ: калык дӥсь – со зэмос узырлык. Пётр Павлович быгатэ огаз костюмын яркытгес пужы пуктыны, мукетсэ вурыны туала басмалэсь, но сое ваньзэ озьы быръе – вашкалаезлэсь висъяны шуг. Кивалтӥсьмы ачиз ик, куиськон станок сьӧры пуксьыса, дэра куэ, туала сӥньысъёсты ужаз кутэ ке но, солэсь быдэстэм ужъёссэ вашкала кожалод. Пётр Павлович милемыз но дышетэ: «полуфабрикат» сямен эн ветлэ. Котькуд артист тодэ, кыӵе дэрем дӥся, маин сое нуллоно, кызьы учкисьлы возьматоно, маиныз паймытоно.
Куддыръя концерт ӵоже ми 8-9 пол но дӥсьмес воштӥськом. Талы дыр туж ӧжыт – ог 7-8 минут куспын пӧрмытсконо луэ. Соку но валаны кулэ: мар бӧрсьы мар дӥсяно, кытчы мае юнматоно, янгышъёс медам луэ. Озьы театрын ужан пӧлэстӥське фольклорен, историен. Мон малпасько, «Айкай» шоры учкыса, котькуд учкисьмылэн удмурт дӥсь нуллэмез потыны кутске,– вера Ольга Бимакова.
Ольга Петровна – «Айкай-лэн» куараез. Кема аръёс ӵоже театрлэсь концертъёссэ нуиз Михаил Ворончихин. Табере та удыс оскемын Ольга Бимаковалы.
– Котькуд концертэз усьтон но ворсан – со бадӟым кыл кутон. Мон шӧдӥсько: бӧрсям быдэс коллектив. Нимзэс-фамилизэс верам сяна, янгышатэк ивортоно званиоссэс, ӟуч но удмурт кылын вераськоно. Сыӵе дыръя учкисьёсын огъя тулкыме зымиськод кадь, мылкыд бугырске но, шӧдӥськод: сцена – со мынам улонэ!
Источник:
Бимакова, Ольга Петровна. Бадӟым семья - "Айкай" / Ольга Бимакова ; [вераськиз] Елена Скворцова // Удмурт дунне. - 2024. - 1 февр.. - С. 10, 23 : фот. - (Тӧр шорын).
За предоставление материала выражаем огромную благодарность редакции газеты "Удмурт дунне"
