Бекче

From Воршуд
Jump to navigationJump to search

Сокем кыдёкын но, сокем матын но ӧвӧл, одӥг пичигес гуртын улӥллям-вылӥллям кышномурт но солэн азьтэм картэз. Азьтэмлэн бен мар ваньбурез — начар улӥллям таос. Огпол кышномурт кеносысьтызы туж йыркурен пырем но валес вылын вӧш-вӧш кыллись картсэ кузгатэ, пе:

— Ньылонэд ньылон, кӧтыд кӧт! Али ик султы но вукое мын — пызьмы быриз, туннэ ик нянь котыны номырин.

Соиз гембыр-р султэм, валзэ кыткем, уробое одӥг мушко ӟег пуктыса, вукое кошкем. Ӟегзэ чаль изӥллям. Шумпотэм-а, мар-а, вылды: валзэ шачыръяса, ворттыса бертэм. Тыро мушкозэ чик эскерымтэ. Кышноез ӟезьы усьтыса пумитам. Азбарысен уробоязы учкиллям но — мушкозы тырттэм, пызьзэс тӧл пурӟытыса быдтэм. Кышномурт картсэ нош ик туздыре, пе:

— Ньылонэд ньылон, кӧтыд кӧт! Мае сиёд табере? Мын утча пызьдэ!

Пиосмурт йырберзэ кормаса сылэм но пызьзэ утчаны потоно луэм. Мынэм, мынэм но нюлэс доры вуэм. Писпу йылъёслэсь шонаськемзэс учкыса, тӧллэсь кудлань пельтэмзэ валам но со сьӧры шонтэм. Мынонъяз куазьлэсь ӝытомемзэ но шӧдылымтэ. Соку со нюлэс кушысь пичи коркаез адӟем но отчы пырем. Отын огназ пересь кышномурт пуке, пе.

— Кӧлыны лэзёд-а? — юам солэсь пырем мурт.

— Кин-мар адями тон? Map муген татӥ ветлӥськод? — юам пересь.

— Отысь-отысь воргорон мон, — валэктэм пырем мурт, — вукое ветлӥ но, бертыкум тӧл пызьме нуиз, со пызьме утчаса ветлӥсько.

Пересь солэсь кылзэм но тазьы верам:

— Эн сюлмаськы, ваньмыз шедёз. Тӧл — со мынам пие. Тани со бертоз. Тон али кӧлыны выд.

Пиосмурт кӧлыны выдэм. Пересьлэн тӧл пиез бертыса корка пырем бере, педлон шыпыт луэм, нюлэс шаугетэмысь дугдэм. Мумиз пиезлэсь юам:

— Малы воргоронэз озьы таркад? Со тани пызьзэ утчаны лыктэм.

— Ачиз виноват со — мушкоез пытсамтэ вал, — верам тӧл пиез.

— Озьы ке но, тон юртты солы, потты ёрмонысь, — косэм мумиз.

Ӵуказеяз ӵукна пересьлэн пиез та пиосмуртлы дас кык эгесо бекче кузьмам но шуэм:

— Тон талы тазьы сипырты:

Бекче-бече, усьтӥськы,

Куронме тон быдэсты!

Соку та тыныд котькыӵе сиён-юон сётоз.

Воргорон бертыны вырӟем. Сокем кыдёке ик мынымтэ, ӟигарыз бырыны кутскем. Сюрес урдсы кожыса, лабрес беризь улэ пуксем, бекчезэ вӧзаз интыям но сипыртэм:

Бекче-бече, усьтӥськы,

Куронме тон быдэсты!

Мынам кӧты сюма, сюэ куасьме, сюд-секта монэ.

Бекче шалтрак усьтӥськем но отысь пужыё ӝӧккышет вӧлдӥськем, котькыӵе сиён-юонъёс потӥллям. Таӵеоссэ солэн даураз но адӟылэмез вылымтэ. Кӧтсэ тырыса, со бекчезэ пельпумаз ваментэм но гурт палаз вамыштэм. Туж дыртыса мынэ, нош аслыз дыг вамышъясько кадь потэ, пе.

Дораз вуыса, кышноез азьын со бекчезэ тӧро сэреге пуктэм но сипыртэм:

Бекче-бече, усьтӥськы,

Куронме тон быдэсты!

Милям кӧтмы сюма, утялты ваньместы.

Бекче шалтрак усьтӥськем но отысь пужыё ӝӧккышет вӧлдӥськем, со вылэ олокыӵе но сиён-юонъёс потӥллям. Таосты адӟыса, кышномуртлэн синъёсыз ик питырскиллям, о-о-о! кеськем со. Кема сиыса-юыса пукемзы бере, пужыё ӝӧккышет пужалскем но вань тусьты-пуньыен валче бекче пушкы ышем. Озьы нуналысь нуналэ, арняысь арняе. Кузпалъёслэн улонзы майбыр луэм. Чик уг ужало, ческыт сиё-юо. Бератаз таӵе улэмзэс муртъёслы но возьматэмзы потэм.

Одӥг нуналэ укно ултӥзы тройкаен ортчись луэм. Соос, сое дугдытыса, корказы куноятыны пыртӥллям. Воргорон бекчеезлы сипыртэм:

Бекче-бече, усьтӥськы,

Куронме тон быдэсты!

Куномы лыктӥз, сюд-секта сое.

Бекче шалтрак усьтӥськем но отысь пужыё ӝӧккышетэн валче лачак сиён-юон потэм, ӝӧк вылэ пуксем — таӵе узыр кунозы но чылкак абдрам, вожъяськыса куалекъясь луэм. Ӝӧк сьӧрысь султыса, со куре, пе, ини:

— Сётэ та бекчедэс.

Кузпалъёс мыр-мыр пумит луиллям. Соку узыр куно, кусказ ошем сабляез борды кутскыса, таосты кышкатэм:

— Тае адӟемды вань-а?! Ӧд ке сётэ, кыкнадэсты ик корало!

Кузпалъёслэн бекчезэс сётытэк амалзы луымтэ ни. Собере таослэн улон-вылонзы нош ик начармем. Кышноез азьвыллэсь но лекгес луэм, картсэ сизьдэ но сизьдэ, пе:

— Ньылонэд ньылон, кӧтыд кӧт! Мае сиыса улод табере? Мын со пересед доры, юрттыны кур!

Пиосмурт йырберзэ кормаса сылэм но сюрес вылэ потэм. Мыныса-мыныса нюлэс кушысь пичи корка доры вуэм, отын пукись пересь кышнолы йыбырттэм:

— Бекчемес узыр кузё таласа кошкиз. Ми кышноеным нош ик сютэм кылимы. Жаля милемды, юртты.

— Тани пие вуиз ке, юрттоз, — кӧсытак гинэ вазем пересь.

Ӝоген солэн тӧл пиез бертэм но воргоронлы мукетсэ бекче сётэм, пал кыл но верамтэ. Воргорон, бекчеез пельпумаз ваментыса, гурт палаз вамыштэм. Куазь пилемо кариськем. Пыд йылысь погыртымон лек тӧл ӝутскем. Пиосмурт бекчезэ гуртаз мырдэм вуттэм, кышноезлы сётыкуз шуэм, пе:

— Me, малы ке ортчыт секыт та, пельпумме ик чигтэ вал ини.

Тӧро сэреге пуктэмзы бере ик, таос бекчелэсь сиён-юон куриллям. Отысь кык бадӟым пиос потӥллям но кузпалъёсты тышканы кутскиллям. Мыжгакузы тазьы верало, пе:

— Дасьсэ витьыса эн пуке ни. Та тӥледлы визь медло.

Собере та кузпалъёс ушъяськемысь но дугдӥллям, кӧттыр но ужаса шедьтыны кутскиллям. Бекче нюлэскы питыраз, мадёнмы вуиз пумаз. [1]

Литература[edit]