Анайлэн нуналэныз ӟечкыланъёс
Мусо, дуно анае!
Вӧлак усьтыса сюлэмме
Кузьмасько мон тыныд кылбурме.
Тон котьку ик монэ валаськод,
Мынэсьтым мылкыдме шӧдӥськод.
Бӧрдӥсько – кӧтӝожме буйгатскод,
Шумпотон ке, одно ушъяськод.
Утиськод тон монэ, вордӥськод,
Ӟечезлы гинэ пыр дышетскод:
Та югыт дуннеын улыны,
Янгышъёс лэсьтытэк тыршыны.
Яратско мон тонэ, мусое,
Гажано но дуно анае!
Вера Горбушина // Ӟечбур! № 9. 2019-тӥ ар. 7-тӥ южтолэзь.
Мар понна яратско
Анайлэн киосыз
Мамык кадь небытэсь,
Анайлэн синъёсыз
Чагыр ин кадь лызэсь,
Анайлэн ымдурыз
Горд намер кадь яркыт,
Анайлэн сюлэмыз
Туж ӟырдыт но шуныт.
Мар понна мон туж зол
Яратско анайме?
Котьку ик чылкыт ук
Солэн коркаез,
Котьку миськемын ук
Солэн дӥськутэз.
Пӧртэм сяськаос
Вань укно дуръёсаз,
Пудо-животэз но
Солэн гид тыраз.
Пӧрам сиёнэз
Котьку ик туж ческыт,
Ӧтем кунозэ
Утялтэ туж шырыт.
Юлия Ившина // Ӟечбур! № 9. 2019-тӥ ар. 7-тӥ южтолэзь.
