Александров Владимир Алексеевич
Визь песьтэр[править]
Азьвыл аръёсы но вал ни нанотехнологиос, но выль усьтэм маослы ке сыӵе мудрон ним сётэмын ӧй вал. Тазьы шуэ физика но математика наукаосъя кандидат, конструктор но изобретатель Владимир Александров.
Владимир Алексеевичлэн 12 изобретениез ни. Самой золэныз лыдъя пьезоэлектродвигательзэ. Малпанъёсыз эшшо но тросгес. Уй-нунал кык-куинь часлы ке но кузьгес луысал ке, оло, унозэ улонэ но пыӵатысалыз ни. Но солы аспирантъёсты но дасяно на. Ужа со Россиысь Наукаосъя академилэн Урал ёзэзлэн прикладной механикая институтаз.
Инкуазь ӝуждалазэ жалям
Владимир Александров будэмын но кыдамын Пичи Пурга ёросысь Чокал гуртын. 1959-тӥ арлэн пумаз дунне вылэ потэм пияшез 1960-тӥ арын 2-тӥ январе вордскемен гожтӥзы. Мугорыз пичи вал уго. Анай-атаез озьы но лыдъязы: армие бергес сюриз ке, оло, сӥль-вир люкаса вуттоз ай.
Эшъёсыз но, котыр калык но солы Пичи Вови шуыса гинэ вазиськылӥзы. Но Вова талы йырзэ кур ӧз карылы. Инкуазь ӝуждалазэ жалям бере, мар карод на. Со понна киыз мынэ! Атаеныз но та ласянь гуртоос данъяськылӥзы. Механизаторын ужась воргорон малпаз ю тысез интыысь интые выжтӥсь транспортёр.
Вовалы но быгатонлыкез выжем, лэся. Эшъёсыз рогатка, пукыӵ лэсьто, нош со история книгаосысь суредъя арбалет пӧрмытэ. Вова кӧжыен ыбылӥськись пыӵал но лэсьяз. Юлтошъёсыз котыраз гожеръямысь ӧз дугдылэ, мыным но кулэ шуыса. Ваньзылы юрттылӥз. Пыӵалъёссы дась луо но, пиос нюлэскы дырто, разведчикен но шпионэн шудо.
Толалтэ но Александров паймытъямысь ӧз дугдылы. Бадярлэсь вӧлыны пӧрмытӥз коньки. Пу ӧз чигы, гылӟыны но гылӟиз. Отӥяз куас но ачиз ик лэсьтӥз.
Вова шудонъёс сярысь гинэ ӧз сюлмаськылы. Гуртазы нырысь ик соослэн семьязы басьтӥз телевизор. Ӵапак солэн пушказ учкемез потылӥз: кызьы ай та огшоры ящикысь суред но куара потэ? Уз но юа, кесялоз шуыса, шӧдӥзы, вылды, анай-атаез, телевизорез тунгон улэ кенсы ӵогаса кельтылӥзы. Соин гинэ арбери быдэс кылиз.
Зэм, дышетсконэз чутэгес вал. Оломар но лэсьтон борды кыстӥськемез ик маза ӧз сётылы, лэся. Кылсярысь, телевизор пыр азьвыл ӵем возьматъязы шахматэн шудон сярысь передачаос. Отысь фигураослы синмаськыса, Вова соосты картон вылэ суредаз но вандылӥз. Дуско лэсьтӥз. Сое школае валтылӥз, перемена вискын эшъёсыныз ӵошатскон радъялляз.
Ваньзы паймо вал та пияшлы. Куспазы вераськылӥзы: кин меда луоз ни таид. Нош со шуиз: математикаен дышетӥсь. Та предмет солы капчиен сётӥськылӥз уго. Собере, со удысъя факультетэ пырыку, нокыӵе сочинение гожъяно ӧвӧл – таиз Вовалэн ӧзгес пӧрмылы.
Бурдъёсты тӥясь кыл
Удмурт кун университетысь физикая но математикая факультетэ пырыны пыриз ик. Нош макем секыт вал таш-таш удмурт гуртысь потэм пилы бадӟым но мурт Иж городэ выжыяськыны – тазэ ачиз гинэ тодэ. Ӟуч кылэз тодымтэез юн шуккиз сое, лопырскем мылкыдзэ куашкатӥз. Калыклэсь мар вераськемзэ ваньзэ сямен вала, нош пумитазы ваземез уг пӧрмы. Нырысь предложениостэ йырад удмурт сямен бергаты, собере сое ваньзэ ӟуче берыкты ай – кинлэн кема малпаськись адямиез возьмамез потоз? Пумен дышетӥсьёс но пыкылыны кутскизы: кызьы тон школаын визь люкад, вераськыны гинэ но ке уд быгатӥськы. Одӥг кылын гинэ валэктон сётӥсь мурт шоры кырыж учкыло, таидлэн визьмыз ӧжытгес шуыса. Ӟуч кыл чик но куанер ӧвӧл – тазьы но пыкылӥсез сюрылӥз. Ӵапак таин сэрен ик визь люканэз туж секытэн мынӥз. Ма, мылкыд ӧвӧл дыръя дышетскемед но потоз на меда?
Озьы Владимир малпаз: армие ветлыса утчало ай. Отын кылме волято но дышетсконме выльысь азьланьто.
Сюриз со Москва вӧзысь Жуковский городысь военной часте. Татын лэсьто выль самолётъёс, соосты инме лэзён азьын олокызьы но эскеро.
Эх, пыриськы вал самолётэз бичанэ! Киыз мынэ шуыса, адӟо ук. Владимирлы оскизы музъем улэ радиосвязья быдэс кабинет лэсьтыны. Отын разведчикъёс лушкем кылзылӥзы пӧртэм кунъёслэсь куспазы вераськемзэс. Оло, самолёт пушкы но маке со выллем пӧрмытыны оскозы?
Таӵе малпанъёс пычей кадь портылӥзы Александровез. Со дыре ик валаз: татын ужало Москваысь авиация институтэз быдтэмъёс. Нош солэн конструктор луэмез сярысь нокыӵе дипломез но ӧвӧл. Озьыен, кин лэзёз сое самолёт котыре? Солдатъёслы татын оскемын соосты чакланы гинэ.
Зэм, отӥяз Александровлы олокӧня пол ӵектылӥзы: кыль армие. Татын, пе, тыныд квартираен кышно шедьтом. Но Владимир мыр-мыр пыкиськиз: луӵӵе гуртам берто, дышетсконме азьланьто. Малпаз, вылды, созэ но: сурон сапегзэ ӧз кушты ке, татын сое адӟись но уз луы. Нош Удмурт шаерын, оло, тодмо луоз, ӟуч кылыз но воляз ни. Собере, сурон сапег но солы татын мырдэм шедьто – тужгес лапегез но чиедэз уго. Ӝужыт но йӧно пиос шоры учкыса, мылкыдыз ик куашка.
Йыртӥян сэрттымтэ на
Удмурт кун университетэз йылпумъяса, распределениея сюриз СССР-ысь Наукаосъя академилэн Урал ёзэзлэн физикая но техникая институтаз. Татысь лабораториын ужаны кутскиз. Оскизы кортъёсты эскерыны. Со вакытэ «Ижсталь» завод татчы келялляз автомат ныд но ствол лэсьтонын кутӥськись кортъёсты. Александров учкылӥз, кыӵе учырын таос лябӟо но тӥясько, пырго яке юнмало. Вань со чакламъёссэ вералляз «Ижстальысь» кивалтӥсьёслы. Ужъёссы калык синъёслэсь ватэмын вал.
Но Александров татын кема берганы ӧз чида. Сое гочатӥз аспӧртэм кыл: сверхпроводимость. Куд-ог материалъёс, шуом, кремний, свинец, луло узвесь (олово), пыртӥзы ток кошкыку, быгато солэсь сопротивленизэ воксё быдтыны. Озьыен, уг кылды ни котыраз магнитной поле, соин валче шуныт уг поты. Но со сопротивление ыше -180 я -200 градус кезьытын гинэ. Нош мар кароно со сопротивлениез огшоры температураын быдтон понна? Кыӵе материалъёс отчы тупалозы? Та юанэз сэрттон-пертчон борды тросэз учёнойёс басьтӥськизы 1989-тӥ арын. Институтысь огез лаборатория но грант утӥз вал шедьтыны-кылдытыны тупась материал. Ӵапак со лабораторие ик кыскизы Александровез.
Пӧртэм арбериосты эскерылӥз Владимир Алексеевич. Составзэс, структуразэс но вошъяса утчаз. Трос ужаз керамикаен. Но усто материал таки шедьтэмез ӧз луы. Нялтас вераса, быдэс дуннеысь учёнойёс али ке но ӧз поттэ на сое. Туж кезьытын я юн пӧсьын ӟеч ужась макеос вань ик. Но таин гинэ буйганы уг луы – наука азьлань мыныны кулэ.
- Со йыртӥян мыным ӧз сётӥськы шуыса, али ке но жалясько, – лулӟе Владимир Александров. – Но мон уг жаляськы, со бордын ужай шуыса. Соку со модаын вал. Али тани модно лыдъяське нанотехнологиен вырыны. Наука мар борды гинэ медаз кутскы, сое нанотехнологиен герӟаны выро. Дыр ортче, но татын но сокем ик бадӟымесь азинсконъёс ӧвӧл. Ма, нанотехнологиос азьло но вал ни, но озьы нимамын ӧй вал соос. Но соку ик 100 нанометрлэсь пичи арбериос кылдытон бордын ужаллямы. Соку ик ваньзы тодо вал, арберилэсь элементной составзэ воштӥд ке, структуразэ мукетгес карид ке, со ассэ мукет сямен возьматыны кутскоз, свойствооссэ воштоз. Нош структураен шудон – со нанотехнология ни.
Эскеронъёс мултэсэсь, пе
Кин тодэ, Владимир Алексеевич, оло, йыртӥянзэ но сэрттысалыз-пертчысалыз ни, но лабораториын кема ӧз ӝега. Уждунэз ӧз кельшы. Огназзэ сюдыны со тырме вал ай, но татын со кышно вайиз. Озьыен, коньдон окмемысь дугдӥз. Собере, кузпалын одӥг азьын ужаны но умой ӧз поты. Дорын но, институтын но ӵош дыръя куспазы керетонъёс пуромемлэсь, ог-огзылэсь жадемлэсь кышказ. Соин ик Ижысь механикая заводэ кошкиз. Технолог-конструкторлы соку ик ужпум пуктӥзы: электронной производство бордын ужалод. Выль материалъёс лэсьтод, соосты эскерод, тупалозы милемлы я уз.
Озьы Владимир Александров нырысь ик кутскиз пачкатэм (плоский) нагревательной элементъёс кылдытыны. Гумы кадьёсыз малпамын ни вал мукет адямиосын солэсь азьло. Пачкатэм элементъёсыз понна патент но басьтӥз. Туннэ соос паськыт кутӥсько юртъер котырысь техникаын, машинаос лэсьтонын но мукет.
Таӵе вормонэз берегес ик Владимир Алексеевичлы оскизы эшшо одӥг бадӟым уж. Механикая завод поттэ пыӵал тӥрлык. Котькудзэ лэсьтэм бере одно эскероно: шонер ыбоз я уз? Сое чаклан понна котькуд пыӵаллы висъяське 8-ысен 10 патрон. Нош соос дуно сыло. Соин ик кивалтӥсьёс шуизы: оло, тон патронъёсты воштыны юрттӥсь кыӵе ке арбери малпаны быгатод? Эскеронын кутӥськись патронъёслэсь лыдзэс кык пол ке но кулэстоно, пе, вал.
Александров йырзэ кема ӧз тӥя – пыӵалысь мертаськонзэ тупатыны-шонертыны юрттӥсь арбери ӝог малпаз. Огкылын вераса, уже кутӥз огшоры синучконэз но втулкаез. Ӵапак со синучкон пыр адӟыны луэ, кырыж-а лобӟоз патрон яке уз. Мушка но прицел одӥг гожын шуыса адӟисько ке, озьыен, шонер ыбоз. Эскерыны ик кулэ ӧвӧл сое тирын. Таӵе дыръя одӥг патрон но кулэ ӧвӧл – кӧня коньдон шыръяськоз! Зэм, гладкоствольной пыӵалэз озьы эскерыны уг луы, нош мукетъёсыз понна кышканэз ӧвӧл.
Александровлэсь таӵе малпанзэ кивалтӥсьёс нырысь-валысь шумпотыса пумитазы. Нош отӥяз йырберзэс корманы ӧдъязы. Вань та кылэм-адӟемзэс документъёсын юнматӥзы ке, изобретенилы улон сётӥзы ке, эскеронлы висъяськись патронъёсты туж зол кулэстозы. Озьыен, мултэс кылемзэ вузаны уз луы ни. Таин валче Александровен малпам арбериез лушкем гинэ палэнэ понӥзы, куке-соку, пе, уже кутом ай.
Кин тодэ, кыӵе эшшо арбери малпасал на Владимир Алексеевич. Но механикая заводын отӥяз секыт луиз. Кивалтӥсьёс меӵак шуизы: конструкторъёс ужаны кулэ чылкак производство бордын гинэ, нокыӵе эскеронъёс (исследованиос) нуытэк. Валамон ни: адямиосты ужысь кулэстыны ӧдъязы. Соос пӧлы сюриз Александров но.
Машиналы – выль сурет
Киыз мынӥсь мурт ужтэк кема ӧз улы. Нырысь малпа вал дышетон удысэ кошкыны. Но со ас понназгес улӥсь адями, калыкен кивалтыны дӥсьтонэз уз тырмы. Озьыен, студентъёс но солэсь уз кылзӥське, дыр. Куараез но мырдэм кылӥськымон потэ. Собере тодӥз: прикладной механикая институт выре нанотехнологиос утчан, наноматериалъёс кылдытон бордын. Нош солэн малпанъёсыз-изобретениосыз ӵапак та удыслы ик сӥземын. Соосты ик кивалтӥсьёслы возьматӥз. Татын юн паймизы, сыӵе усточи вань шуыса. Владимир Алексеевич но выль ӧре капчиен пыриз. Выль юлтошъёсыз но ӝоген мылкыдзэ ӝутканы кутскизы: кандидат луон сярысь малпаськы, тынад пӧрмоз.
Пумен аслыз но та малпан маза ӧз сёты ни. Кандидат ужзэ сӥзиз пьезоэлектродвигательлы. Таӵеез уго дуннеын малпамтэ на вал. Зэм, пьезоэлементъёс кутӥсько кварц часын – куара сёто. Соос вылын ужало сирена сётӥсь арбериос. УЗИ лэсьтон аппаратъёсын но со элементъёс вань. Ву пыдэсэтӥ уясь лодкаын гидроакустической антеннаосын кутӥське. Но со элементъёс гинэ. Александров малпаз двигатель. Огшоры двигатель токен ужа, отын котыраз биням езэз но, магнитэз но вань. Нош пьезоэлектродвигательын номыр та мултэсэз ӧвӧл. Ма, со ачиз но пӧлы быдӟа гинэ. Зэм, сое туннэ учебной пособие чот гинэ куто. Со двигатель вылын ужась маке малпамтэ на. Но наука азинске бере, Александров но оске: изобретениезлы улон сюроз ай.
Эстонъёс синмаськизы ук мукет ужезлы – аспӧртэм распылителезлы. Таиз изобретениез туж кулэ маке ультразвуковой техникаын. Шуом, со туж векчи шапыкъёсын быгатэ пазяны пӧртэм эмъюмъёсты, вуэз, бензинэз, спиртэз но мукет. Стерженез мургес пыртӥд ке суретэ, поттыны луоз наночастицаосын герӟаськем суспензиос. Та понна электрокужым но трос уг кошкы, уксё но мултэс уг быры. Ӵапак со изобретенилы патентэз Эстониын адӟиллям. Ёртыны кутскизы: кузьма милемлы уждэ. Бензинэз вуэн сурамзы потэм. Ог-огзэс вылысьтыз вылаз кисьтыса гинэ, та кык пӧртэм арбериос нокызьы уг сурасько. Нош распылитель соосты сураны ворме. Адскисьтэм векчи шапыкъёсын пазяськыны быгатэ уго, соин валче пӧртэм арбериосты огинэ суралтэ. Озьыен, бензинэз вуэн суран ӟече гинэ вуттоз – эстӥськон шыръяськоз. Машина но сое капчиен ньылэ кадь. Но туннэ но тодмо ӧвӧл на, макем кема чидалоз сыӵе суретэн ворттылыны двигатель.
Со распылительзэ кутыны луысал промышленностьын но. Но со понна арбериез бадӟыматоно. Валамон ни: отчы кулэ уксё.
- Асьме кун коньдонзэ жаля бере, озьыен, солы туннэ сыӵе арбериос кулэ ӧвӧл на, – лулӟе Владимир Александров. – Но ВТО-е пыремен валче югдур ӟеч пала воштӥськыны быгатоз, дыр, ай. Али патентъёсмы Россиын гинэ кутӥсько ке, азьланяз соосын ужаны быгатозы мукет кунъёс но. Озьыен, тросэзлы изобретениослы выль улон кузьмась сюроз. Тодосчиос но ужаны бурдъяськозы.
Кужым сётэ Чокал
Владимир Алексеевичлэсь ӵемысь юало: ку доктор луод? Нош со кизэ гинэ шонтэ: мыным, пе, со чик кулэ ӧвӧл. Аслаз темаез но вань ни: распылительзэ эшшо золгес умоятон. Но мылкыдыз уг тырмы компьютер сьӧры пуксьыны. Школаын сочинение гожъяны яратымтэез татын но шӧдӥське, лэся. Собере, вань малпанъёстэ бумага вылэ кисьтыны, соосты огазеяны туж трос дыр кулэ ук. Нош солэн али со чик ӧвӧл.
- Совето вакытэ адями тодэ вал: кӧня ке ар ужалоз но кандидат уж гожтоз, отӥяз доктор луоз. Али нокин но наука удысын аслэсьтыз улонзэ часъёсын-аръёсын азьпала вераны уз тоды. Куинё ар талэсь азьло гинэ тодосчиослэн уждунзы туж пичи вал. Соин адямиос та ӧрен туж ик ӧз герӟаськылэ. Ма, семьядэ сюдод-а, коньдонэд шоры учкыса пукод-а? Кытын ке но улыны но кулэ на ук. Ма, аспирантурае али ке но туж мынэмзы уг поты, – шуэ Владимир Алексеевич.
Зэм, со дыре ик аслэсьтыз пизэ туж потэ кыскемез наукае. Димаез энергетиклы дышетске. Но атаезлэн мылкыдызлы мыр-мыр пыкиське. Солэсь ортчыт – куддыр пайме но: мар атаезлэн оломаин но выремез потэ меда? Ку ай, пе, изобретениосыз паськыт кутӥськозы? Наука шоры пиезлэн тазьы учкемез Александровлэсь кӧтсэ куддыр ӝож каре. Но отын ик ассэ буйгатэ: отӥяз Димаелэн йырыз, оло, берыктӥськоз ай.
Вордскем Чокал гуртаз но арнялы быдэ берта. Таид 1975-тӥ аръёсы воксё быриз ни вал. Но туннэ со пумен пушъе. Городэ кошкемъёс, ог-огзылэсь адӟем карыса, лэся, татчы юртъер пукто, бакча мертто. Владимир Алексеевич но Чокалын шедьтӥз юрт бервылзэ, отчы ӝутӥз корка. Котырзэ чеберъяз, сяськаос кизиз кузпалыз. Толалтэ но уг ӵыдо татысь. Вордскем палъёсыз ик солы выль кужым сёто.
Источник:
За предоставление материала выражаем огромную благодарность редакции газеты "Удмурт дунне"
