Песни сосватанных девушек
Ой, тӧл тӧла, тӧл тӧла но,
Пинал пи валзэ люкта.
Пинал пи валзэ люкта но
Яратонзэ со малпа.
"Ӵок, уг тубы гурезь йылэ,
Отчы валме уг думы.
Со ке монэ яратсалыз,
Малпанэз но ӧй луысал.
"Усьты, усьты, ой, мемие,
Усьты, усьты, дядие.
Сизьым пӧлысь одӥг нылды,
Со но лишной луиз-а?
Усьты, усьты, ой, кенаке,
Усьты, усьты, ой, братэ.
Сокем ик-а зол кӧлӥды -
Усьтыны но уд шӧдке?
Усьты, усьты, ой, сузэре,
Усьты, усьты, ой, братэ.
Берло уйзэ уло шуса,
Мон тӥ доры бертӥ вал.
Ӵукна султоз, ой, мемие,
Гидаз потоз мемие,
Соку адӟоз гозы йылысь
Вордэм нылзэ, ой, татын.
Кулэм шӧйме шедьтӥды ке,
Ошмес вуэн миськелэ.
Ошмес вуэн миськелэ но
Вож дэремме дӥсялэ.
Вож дэремме дӥсялэ но
Горд кышетме керттэлэ.
Ӵужо-вожо, ой, лентаме
Кирос бордам думелэ.
Чиньыысьтым, ой, зундэсме
Яратонме басьтытэ.
Шайгу вылам ветлыкуды,
Та гурен ик кырӟалэ.
Гожтэмын Пичи Пурга ёросысь Улын Кечон гуртын. Печатламын 1990 арын В.Кельмаковлэн ужаз
Азбар капкаме усьтыса пыри но,
Быратэ азбарзэ, ой, ӵуже.
Коргид ӧсъёсме усьтыса пыри но,
Ӵуж чукдор ужпие, ой, гырдалтӥз.
Корказь ӧсъёсме усьтыса пыри но,
Кенаке корказьзэ, ой, ӵуже.
Корка ӧсъёсме усьтыса пыри но,
Сузэре корказэ, ой, ӵуже.
Гуразь палъёсам, ой, учки но,
Мемие няньёссэ, ой, пыже.
Ӝӧксьӧр палъёсы, ой, учки но,
Дядие уксёзэ, ой, лыдӟе.
"Марлы укдёдэ лыдӟиськод?" - шуи но,
"Уксёе уг тырмы", - со шуиз.
"Уксёе уг тырмы", - со шуиз но, -
"Тонэ вузало", - со шуиз. -
Гожтэмын Можга ёросысь Пазял гуртын. Печатламын 1990 арын В.Кельмаковлэн ужаз.
Туж тырос, туж тырос
Вало дурын писпуос -
Вань меда, вань меда кызьпулэсь тӧдьыез?
Туж тырос, туж тырос Вало дурын писпуос —
Вань меда, вань меда ньылпулэсь лысоез?
Туж тырос, туж тырос Вало дурын писпуос -
Вань меда, вань меда пужымлэсь сироез?
Туж тырос вордылэм мемилэн нылпиез -
Вань меда, вань меда мынэсьтым шудтэмез?
Вордылымтэ мемилэн вералъям кылъёсыз -
Шур дуре потылэм сьӧд пушнер, ой, кадь ик.
Вордылэм мемилэн вералъям кылъёсыз -
Ӝӧк вылэ пуктылэм шунтэм вӧй, ой, кадь ик.
Сюдылымтэ дядяйлэн вералъям кылъёсыз -
Нюр дуре потылэм кыйбоды, ой, кадь ик.
Сюдылэм дядяйлэн вералъям кылъёсыз -
Ӝӧк вылэ пуктылэмын муш чечы, ой, кадь ик.
Гожтэмын Ува ёросысь Бадӟым Жужгес гурытн. Печатламын 1990 арын В.Кельмаковлэн ужаз
Мемейлэн верам кылъёсыз
Ӝӧк вылэ пуктэм вӧй тэркы кадь.
Дядяйлэн верам кылъёсыз
Дуз пыдсы кылем вуж чечы кадь.
Киям понэмын лемлет куӵо пӧзе,
Ярдуре потэм инвожо кадь.
Пыдам понэмын чиборо сапеге,
Ярдуре потэм вожо кадь.
Вылам дӥсямын лыз пустол дӥсе,
Корка йылын пуксись лыз дыдык кадь!
Гожтӥз К.Герд Малмыж уездысь Волипельга гуртын. Печатламын 1927 арын
Бакчаям потӥ, убоме ури,
Убоме ури, ой, кырӟаса.
Возь вылэ васьки, сяська ишкалтӥ,
Сяська ишкалтӥ, ой, бӧрдыса.
Сяськалэсь бамзэ пӧсь шунды басьтӥз -
Мынэсьтым даурме, ой, тон быдтӥд.
Тонтэк но вал, дыр, ой, чебер пи,
Монтэк но вал, дыр, ой, чебер ныл.
Бусые потӥ - тюрагай чирдэ,
Тюрагай чирдэ, ой, эсэпен.
Бусые потӥ - тюрагай чирдэ,
Мон нош бӧрдӥсько, ой, кӧтӝожен.
Гожтэмын Ува ёросысь Бадӟым Жужгес гуртын. Печатламын 1990 арын В.Кельмаковлэн ужаз[1].
Тӧдьы кышетме керттӥ но...
Тӧдьы кышетме керттӥ но,
Шорыз пась ни, шуизы.
Калык пӧлы мон потӥ но,
Дырыд ортчем, шуизы.
Льӧмпу сяська, ой, тӧлӟыку,
Лымы усе, мон кожай.
Пинал дауре ортчыку,
Сяська тӧлӟе, мон кожай.
Ӵуж кышетэ ӵуж пужыё,
Пукси италмас пӧлы.
Шудтэм ке но пинал йыры,
Потӥ эшъёсы пӧлы.
Ымыз кырӟа, шуо, дыр, но,
Сюлмыз каньыл, шуо, дыр.
Ымы кырӟа-вера ке но,
Кӧт ӝожъёсы сюлэм тыр.
Ми базаре мынон дыръя
Буртчин дунтэм медло вал.
Милям йыръёс пинал дыръя
Аръёс капчи медло вал[2].
