Максимова Анна Георгиевна

Материал из Воршуда
Перейти к: навигация, поиск

Укмыстон аресме одӥг пол дас укмыс карысал

Максимова А. Г.

Анна Георгиевна Максимовалы 23-тӥ декабре 90 арес тырме. Ас вакытаз сое республикаямы туж умой тодылӥзы. Солэн мадиськемез - историлэсь улэп куаразэ кылэм кадь. Маин паймымон та кышномурт? Нырысь ик, кортӵог кадь зол луэменыз. Улонысьтыз 10 арзэ со сётӥз Ярлы, 10 арзэ - Глазкарлы, 10 арзэ - КПСС-лэн Удмурт обкомезлы, татын со идеология ужпумъёсъя секретарь вал. Республикамы понна сюлмысь тыршемез пусъемын Ужысь Горд Знамя орденэн, кык Данъян орденэн но уно медальёсын. Даур кузьда улонысь номыр но, нокин но вунымтэ.

Кӧня бугор черсӥд, нылы?

Пинал дырысьтым али но син азям пуксё вордскем гуртэ, мумие, тятине (тятяе), дышетскеме.

Вордӥськи Балезино ёросысь Чуйялуд гуртын, 87 куа пӧлысь кыказ гинэ ӟучъёс улӥзы, отӥосыз ваньзы удмуртъёс. Гурт калык ог-огзэ юн гажаса улӥз.

Граждан ожысь бертыса, тятине, Георгий Иванович, музъем ужен вырылӥз, тӥрен но ялан ужалляз. Колхоз кылдэм бере со коргидъёс пуктылӥз - киосыз зарниесь вал. Муми, Антонина Ивановна, колхоз пудоез утялтылӥз: парсь сюдӥз, ыж возьмаз, кунян будэтӥз. Анаелэн 13 нылпиез вал - кӧня Инмар сётӥз, ваньзэ вордӥз. Но 7-ез гинэ быдэ вуиз, отӥосыз пичиысен кулӥзы.

Школае дышетскыны мынӥ 1928-тӥ арын. Арнянуналъёсы доре бертылыкум, муми котьку но юалляз: кызьы дышетскид, кӧня бугор черсӥд? Черсон - со ныллэн нырысетӥ ужез лыдъяськылӥз. Собыдӟа семьялы котьку но трос пумо дэра кулэ луылӥз: дэремлы, штанилы, ӵушконлы, ыштырлы. Бӧрысьгес тятине мыным черсон машина басьтӥз. Али но жаляса тодам вайисько со бадӟым питранэн пыдын бергатон машинаез.

Узяысь школаын 7-тӥ классозь дышетски. Берло кык арзэ монэ школаысь учкомлы тӧрое бырйылӥзы. Дышетӥсьёсмы юн сюлмаськылӥзы милемлы музъемез яратон мылкыд пыӵатыны. Школа бакчаын олокыӵе но эскеронъёс ортчытылӥм.

Озьы пичи дырысеным ик мон музъем вылын но корка пушкын ужанлы дышетэмын. Колхоз кылдэмлэсь азьло ик валэн усыялляй ни. Нош 1930-тӥ арын гуртамы колхоз луэм бере дышетскон вискам ялан ужалляй трудодень понна. Семьяез сюдӥсь вал соку трудодень. Сюлмысь тыршеме понна огпол премия сётӥзы - пинь сузян щётка но порошок. Берлогес Каменной Заделье черкогуртысь пионерлагере путёвка сётӥзы. Но отын мон одӥг арня сяна ӧй чида, ужлэсь мӧзмыны кутски. Огпол возь вылэ турнаны мынӥсь гуртоосме адӟыса, лагерьысь пегӟи но соосын турнаны кошки.

Школаез йылпумъяса, Глазкарысь педтехникуме дышетскыны мынӥ.


«Говори по-русски»

Глазовез со аръёсы ваньмыз кар шуылӥзы. Узялан вань предметъёсты удмурт кылынгес дышетылӥзы, педучилищеын - ӟуч сямен. Удмуртъёслы со ласянь секыт йӧтылӥз. Но али малпаса сыӵе политикаез шонерен но, дыр, лыдъяно. Ӟуч кылэз тодытэк, удмуртъёслы калыке потыны сюрес кема ӧй усьтӥськысал на. Алексей Константинович Поздеев историкмы шуылӥз: малпандэс ӟуч кылын ӧд ке вералэ, «кык» пукто. Тросэз дышетӥсьёс милемлы шуылӥзы: говори по-русски. Ӟуч кыллы туж умой дышетӥз Нина Павловна Созонтова, берпуметӥ курсын диктантъёс дыръя мон одӥг янгыш но ӧй лэсьтылы ни.

Собере озьы тупаз: училищеез йылпумъяса, монэ ӟуч кыллы дышетыны Яр ёросысь Тараспи гуртысь школае ыстӥзы. Озьы удмурт нылпиосты аслым но ӟуч кыллы дышетоно луиз. Но дышетӥсьын куинь ар сяна ужаны ӧз кылды. Война кутскиз.

Париж коммуна нуналэ...

Война кутскон азьын мон бызьыны вуи. Яратон уг юа вылэм, ку тон доры лыктоно.

Вуоно картэным тодматскеме выжыкылын кадь пӧрмиз. Озьы луиз: Тараспи школаын одӥг ар ужаме бере вордскем гуртам кошки - Чуйялуд котырлы матысьгес школаын ужаны малпай. Гужемзэ озьы ик колхозын тырши. Выль дышетскон ар кутскон азьын, документъёсме басьтыны шуыса, Яре потӥ. Пыри ронолэн кивалтӥсез Данил Агафонович Перевощиков доры. Документъёсме со уг сёты: нокытчы но, пе, уд кошкы, ёросын дышетӥсьёс уг тырмо. Ужаны келяз Вортча гуртэ, собере Байдагуртэ. Собере Перевощиков роноысь кошкиз, Байдагуртысь школае директоре кариськиз. Монэ синйылтыса, лэся, со сыӵе вамыш лэсьтӥз.

Озьы кылдӥз семьямы. Со вал 1941-тӥ арын 18-тӥ мартэ - Париж коммуналэн нуналаз. Ми соин ӧм гожтӥське, мон пырак ныл фамилиеным улэмын. 13 ар ортчыса гинэ, вордӥськиз кема возьмам пиналмы. Но Лена нылмылэсь быдэ вуэмзэ картэ ӧз ни адӟы - 1953-тӥ арын 8-тӥ толшоре со бырыны шедиз. Гурезь улэ валэз зол ворттыса, Данил дӧдьыысь усьыны шедем. Нылмылы 4 толэзь гинэ вал.

Секыт ивор

Быдӟым ож кутскон нуналэ мон Чуйялудын вал. Вань каникулъёсме но отпускъёсме колхозын ужалляй. Со шимес нуналэ калык турнаны мынӥз. Турнан вискамы шутэтскыны пуксимы. Адӟиськом Ваня бригадирмылэсь урод мылкыдын лыктэмзэ. Мон тӥледлы туж секыт ивор вайи, шуиз со. Германия война ӝутэм. Калык номыр ӧз шуы. Кусоосмес кутӥмы но дорамы бертӥмы. Со нуналэ нокин ӧз ужа ни. Со сӥзьылэз дышетӥсьёс колхозын ужазы. Война кутскон аре нянь удалтымтэ вал, сезьы но нир-няр гинэ будӥз, сюрло улысь пештылӥз. Бусыез октэм-калтэм бере хлебозаготовка шуон кутскиз. Вань будэтэмез нуоно вал заготконторае. Мыным туж яраз валэн ужаны, сое чупрес кыткылӥ, юскылӥ. Колхозын одӥг гинэ ужпизы вал, соин заготконторае ю-нянез нуллыны мыным оскизы - воргоронъёс гуртын ӧй ни вал.

Собере Данилэз райкоме ужаны басьтӥзы, монэ - Ярысь газетэ. Тазалыкез лябен, картме фронтэ ӧз кутэ. Озьы 1941-тӥ арын октябрь толэзьысен газетын ужаны ӧдъяй. Мыным соку 22 арес вал.

Азьлань!

Война вакытэ «уг» кылэз нокин ӧз поттылы. «Азьлань!» газетэз лэсьтылӥм райкомлэн юртаз. Мон сяна, газетын ужазы счетовод, кык наборщик, одӥг печатник но возьмаськись - ваньмыз-ӧвӧлэз 6 кузя. Материалъёс утчаса, мон Яр ёросэз кечат-вамат пыдын ортчемын. Нырысь арзэ ужакум, газетлэсь пуштроссэ эскерылӥз но котькуд номере кинюртэмзэ пуктылӥз отделлэн кивалтӥсез Иван Петрович Владыкин.

Мынам али но ӝоже потэ, шуо ке: коммунистъёс, пе, кужмысь калыкез ужатылӥзы, партилэсь олокыӵе но косонъёссэ быдэсъяны ӝуткаллязы. Со чик но шонер ӧвӧл, со аръёсы асьме калыклэн сокем вылӥын вал патриотизм мылкыдыз, сое кыӵе ке ужъёслы ӧтьыса-сюлворыса улонэз ик ӧй вал. Ӧйтӧд, сыӵе кайгу дыръя косъяськыны но дӥсьтод на меда? Адями ачиз берпуметӥ дӥськутсэ, коньдонзэ - маиз вань - фронтлы сётылӥз. Секыт югдуре калыкен вераськыны небыт кылъёс гинэ шедьтыны быгатоно вал. Сыӵе лякыт сямо, калыкез буйгатыны быгатӥсь вал Иван Петрович но. Йӧно кивалтӥсь бордын ужаса, аслад но со кадь ик луэм потылӥз. Мон котьку но кыстӥськылӥ адӟем карымон, кужмо адямиос сьӧры. 1942-тӥ арын монэ партие пырыны кандидатэ дэмлазы, ӟеч тыршемме адӟыса, вылды. Мон шумпотӥсько: секыт война аръёсы партия кивалтон серметсэ кияз зол возиз. Сотэк Быдӟым Вормонмы но луысал меда?

Собере монэ партие кутӥзы, 1943-тӥ арын газетлы редакторе юнматӥзы. Вань война аръёсы газетын ужай. Туж секыт йӧтылӥз война кутскон арын: юн сюлмаськоно вал газетэз калыклы дыраз вуттон, гурт калыклэсь но котькуд адямилэсь мылкыдзэ ӟеч тодон сярысь. Ярам, редакцилы пулэсь юрт пуктӥзы, кирпичлэсь гур лякизы. Но война аръёсы толъёс туж кезьытэсь вал. Кезьыт коркан ужаны тужгес но секыт йӧтылӥз наборщикъёслы: котькуд букваез соос киын тырылӥзы, газет печатлан машинаез но киын бергатылӥмы. Газет печатлан краскаез шунтыны ялан пу кулэ вал. Толалтэ ми, нылкышноос, Каганович нимо колхозысь вал курыса, ветлӥмы Пудэме мынӥсь сюрес дурысь сисьмем кызьпуосты погыръяны. Соосты вандылыса, дӧдьыен типографие вайылӥм. Ӵуказеяз со кот кызьпуэн гурмес эстылӥм.

Мар сярысь гожъяллямы газетын? Кызьы калык фронт мышкын юрттэ тушмонэз вормыны. «Ваньзэ - вормонлы, ваньзэ - фронтлы» - та валтӥсь ӧтён улсын, уйёссэ кӧлытэк, тыршиз калык. Мукет ӧтёнъёс но кылдылӥзы.

Ферапонт Головатыйлэн киӵолтонэз быдэс странае вӧлмиз - самолёт эскадрильялы коньдон бичано. Удмуртиысь но «Выль гурт» колхозлэн председателез Данилов эш самолётъёс лэсьтонэ 100 сюрс манет сётӥз. Солэсь адӟем карыны ӧтьылӥмы газет бамъёсамы. Солдатъёслы фронтын шуныт мед луоз, сютэм медаз улэ. Ми татын чидалом, музъем пыд уламы уг зурка - со сярысь сюлмаськылӥз фронт мышкын тыршись калык.

Арняяз огпол 2 часэ уйин Москва газетъёслы нимысьтыз иворъёс сётылӥз. «Совинформбюро» ивортэ - таӵе рубрика улын печатламы соосты газетэ. Москваысь ивор басьтон понна мыным чугун сюрес сьӧры радиоузел доры мыноно вал. Приёмник вал со радиоузелын гинэ. Собере отын ик иворъёсты удмурт кылэ берыктылӥ - 6 часэ ӵукна соосты радио пыр быдэс районлы ивортылӥ.

Шумпотыса бӧрдон

Ӵукна уже мыныны дасяськисько, семьяе кӧлэ на. Репродукторме усьтӥ, кылӥсько: война дугдэм. «Султэлэ, война бырем, война бырем!» - сайкатӥсько семьяме. Чаляк дӥсяським но ульчае потӥм. Посёлок соку кызьпуос пӧлы выемын вал, тани-тани пучыос усьтӥськозы. Котькуд коркась адямиос ульчае потӥллям ни. Собере Ярысь вочак калык вокзал доры люкаськиз. Ярысь чугун сюрес кузя трос поездъёс кошкылӥзы. Пумтэм трос составъёс Дальний Восток пала кошко ни вал япон милитаристъёсты пазьгыны. Озьы ке но асьме солдатъёс вормонлы туж шумпотэмын! Милем горд флагъёсын шонало. Ми но соослы киосынымы шонаськомы, кин серекъя, кин эктэ. Бӧрдон но трос вал.

Мынам кыкез братэ войнаын быриз. Бадӟымез Миша, война кутскыку, армиын вал, Ленинград котыртэмын ивортэк быриз. Виталий братме 1942-тӥ арын Глазкарысь пехотной училищее басьтӥзы, Ярысен ми сое фронтэ келямы. Ватэмын Калининград дорысь шайвылын.

Кызьы обкоме вуи

Монэ но Данилэз кык арлы дышетскыны келязы областьысь вылӥ партийной школае. Сое 1948-тӥ арын йылпумъяммы бере ужаны ыстӥзы Эграла, партилэн райкомаз. Монэ юнматӥзы кадръёсъя секретаре, Данилэз - пропагандая но агитацияя отделэн кивалтӥсе. Но озьы улыны трос ӧз кылды. Мынам нылы вордӥськиз, Данил быриз, монэ Москвае Вылӥ партийной школае дышетскыны келязы. Пичи пиналын кошки дышетскыны. Мыным туж секыт йӧтӥз, но 1954-тӥ арын дышетсконме йылпумъяй.

Ужаны ыстӥзы партилэн Ижысь горкомаз, пропагандая но агитацияя отделэ. Городын улэме ноку ӧй вал бере, туж куриськисько вал районэ ужаны. Но мылкыдме соку лыдэ ӧз басьтэ.

Озьы ке но со арын ик ыстӥзы Глазове - луи партилэн горкомезлэн нырысетӥ секретарез. Та карын мон ужай 10 ар. Ужай горкомын, райкомын, райисполкомын. Пӧртэм ужъёсы выжылэме герӟаськемын вал Никита Хрущёвлэн олокыӵе но воштӥськонъёсыныз. Огпол монэ телефон доры ӧтизы. Удмурт обкомлэн нырысетӥ секретарез Валерий Константинович Марисов шуэ: аскы, пе, тыныд документэн конверт ваёзы, соин тыныд Москвае мыноно, конвертэз ЦК-е нуоно. Мар документ со, - ӧз валэктэ. Мон но юаны ӧй дӥсьты.

ЦК-ын Удмуртилэн кураторез вал Людмила Петровна Данилюк, со усьтӥз конвертэз но шуиз: туж умой, туж умой, тӥледыз партилэн Удмурт обкомезлы секретаре ӵекто. Мон интыысьтым пограсько ни вал. Ма, кызьы озьы, монэн со сярысь нокин но ӧз вераськы ук. Зэм, Глазовын ужан дыръям Марисов кык пол дораз ӧтчалляз, монэ со туж вырылӥз республикаысьтымы кудаз ке но райкоме нырысетӥ секретаре пуктыны. Мон котьку но пумит кариськылӥ - вирам туж зол удмурт сям пыӵамын вал. Аслам кужымелы ӧй оскылы. Людмила Петровна дорын бӧрдытозь ик пумитъяськыны выри. Со шуиз: озьы астэ возьыны чебер ӧвӧл ни, ЦК-е асьтэос ик документъёстэс вайиды бере, соглаш луоно.

Нуизы тодматыны Егор Кузьмич Лигачёвен, ЦК-лэн идеология ужпумъёсъя секретареныз. Собере вал партилэн областной конференциез, отын мынэсьтым кандидатураме юнматӥзы. Озьы ачим но ӧй вала, кызьы луи обкомлэн идеологияя секретарез. Со вакытэ обкомын вить секретарь вал, мон сяна, ваньзы ик воргоронъёс.

Идеология ужъёсын вырон сяна, мыным оскизы на медицинаез, правоез утён удысъёсты. Обкомын 10 ар пала ужано луиз. Пенсие потон дыры вуэм бере одӥг нунал но ӧй ни ужа.

Кин луысал?

Соиз но вань: Марисовен ужаны нокинлы но капчи ӧй вал. Нош туала синмын учкыса, со туж шонер лэсьтылӥз кадь потэ. Со кивалтыку - 1963-тӥ-1985-тӥ аръёсы - калык но, кивалтӥсьёс но али кадь азгынмемын ӧй вал. Со туж чурыт сямо, дисциплина понна зол кылэз юась адями вал.

Партилэн обкомезлэн нырысетӥ секретарезлэн уждуныз 500 манет вал, нокыӵе кузьмаськонэз, «коррупция» кылэз ӧм тодылэ. Вань улытозям самой троссэ уждун басьтылӥ, обкомын ужакум - 400 манет. Муми но, буби но дорам улӥзы, колхозникъёслы соку пенсия ӧз тырылэ на. Кулэмезлэсь азьло гинэ тятине куинь ар пенсия басьтыса вуттӥз на - 34 манет. Узыр ӧм улэ, но коньдонмы сиськыны но дӥсяськыны тырмылӥз.

Куддыръя мынэсьтым юало: кин тӥ луысалды партилэн кадръёсыз пӧлы ке ӧй сюрысалды? Мон шуисько: скал кыскись луэме туж потэ вал.

Но шонерзэ вераса, школаын ик ужасал, дыр, директорозь но, оло, будысал.

Шудме шедьтӥ на

* * *

Анна Георгиевна али улэ Лена нылызлэн семьяеныз, ваньзы солы мусо кылъёсын гинэ вазисько. Туала улон пумысен со дырын-дырын мур лулскылэ. Малы сокем ӟучомиллям яръёс, удмурт газетэз но басьтэмзы уг поты? Малы гурт семьяос ӧжыт пудо вордыны кутскиллям? Али малпало кык скал вордэм понна республикалэн бюджетысьтыз 5 сюрс манет сётыны. Солы-а уд паймы. Туала улон пумысен Анна Георгиевналэн юанъёсыз трос ке но, нокыӵе куронъёсыз-ӝожтӥськонъёсыз ӧвӧл. Ма, со востэм удмурт нылкышно ук. Шуэ: егит дырме берыктыны луысал ке, мон нош ик коммунистъёслэн партиязы пырысал.


Источник:

Максимова А. Г. Укмыстон аресме одӥг пол дас укмыс карысал / А. Г. Максимова ; записала Т. Банникова // Удмурт дунне. - 2009. - 18 дек. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"