Лукин Леонид Лукич

Материал из Воршуда
Перейти к: навигация, поиск

Кортлэсь кылзэ тодӥсь

Лукин Л.Л.

Техника удысын вормонъёс басьтэм адямиос пӧлын удмуртъёс трос ӧвӧл, шуи ке, уг янгыша, вылды. Таӵеос пӧлысь тужгес но яркытэз – Леонид Лукич Лукин, алигес пусйиз 70 арес тырмонзэ. Солэсь вормонъёссэ, эсьма, вераса но уд быдты: техника наукаосъя кандидат, Ижысь техникая кун университетысь машина поттонъя но механизмъёсъя кафедраысь профессор, та кафедралэн ик кивалтӥсезлэн воштӥсез, «СССР-ысь изобретатель» но «Ӟеч ужамез понна» пусъёсын данъям адями, Россия Федерациысь вылӥ дышетон удысысь дано ужась, Удмурт Республикаысь промышленность удысысь дано ужась, М. Калашниковлэн премиезлэн лауреатэз. Со сяна, Леонид Лукич 12 изобретениослэн (соос ваньзы патентэн юнматэмын) но наукая 120 статьяослэн авторзы. Ижысь техникая кун университет кичӧлтэмъя 2007-тӥ арын потӥз Леонид Лукинлэн «Дипломное проектирование по технологии специального машиностроения» книгаез. Россия Федерациысь Дышетонъя но наукая министерство сое ӵектӥз Россиысь техникая вузъёсын уже кутыны. 15 ар ӵоже Леонид Лукин пыриськиз Ижысь техникая кун университетлэн профсоюзаз, берло 5 арзэ кивалтӥз правоосты утёнъя комиссиен. Та удысын ӟеч тыршемез понна со пусъемын Удмурт Республикаысь профсоюзъёслэн федерацизылэн, озьы ик Ижысь техникая кун университетлэн Данъян грамотаосыныз.

- Вордӥськи мон Пичи Пурга ёросысь Итэш гуртын. Семьямы палэнысь лыктэмын-мар ӧй вал, выжымы уно дауръёс ӵоже та гуртын ик юнмамын. Тятяе туж лякыт, котькуд кылзэ малпаса верась адями вал. Куаразэ зол карыса куаретэмзэ ноку но кылэме ӧвӧл. Тятяелэн кӧня ке класс дышетскемез вал. Со вие ик мемее – гурт калык солы Оринкапай шуыса вазиськылӥз – гожтэтэз чылкак ӧз тод. Но инкуазь солы визьзэ жалямтэ: эсьмаса, вузаськыны яке маке басьтыны ачиз ик базаре ветлылӥз. Гурт калык солы пӧртэм юанъёсын вазиськылӥз: ку Паска нунал тупа, потоно ни-а бакча емыш кизьыны яке витёно на? Таӵе нуналъёсты мемее ваньзэ йыраз возьылӥз. 1898-тӥ арын вордскем мемеелэн дышетскыны мылкыдыз туж бадӟым вылэм. Революцилэсь азьвыл солэн атаез туж бадӟым музъем возем. Кин отын ужалоз шуыса, нылзэ дышетскыны лэзьымтэ. Озьы мемее, тодон-валан басьтытэк ик, кылем. Пичи дыры война вакытэ тупаз. Тятяме Сарапулэ трудовой фронтэ басьтӥзы. Угось ож кутскем бере И. Сталин косӥз заводъёсты Урал гурезьёс сьӧры выжтыны. Ӵапак та ужез ас вылаз басьтӥз трудовой фронт. Но отысь вуыса, атае кема ӧз улы ни: 1947-тӥ арын улонысь кошкиз.

- Тӥ – война вылтӥ будэм адями. Ож вакыт калыкез эшшо но кужмо кариз, огазеяз, дыр…

- Кыӵе кӧт сюмаса ортчиз пичи дыры. Пудо вордӥмы, емыш будэтӥмы ке но, ваньзэ кунлы сётӥськомы вал, нош асьмелы номыр ӧз кыльылы ни. Гужем вуэмъя нюлэскын кӧттыр утчаськомы вал. Колхоз бусыысь ачим кадь ерпечкаосын кӧжы лушкаммы но вань. Сием потыку, мар но уд малпа вылэм! Итэшын улӥсь 1931-тӥ арын вордскем Зояпае ялан шуэ: турын вылын гинэ будӥд но, кызьы сыӵе визьмо луид!

- Кин нодъяз тӥледыз техника удысэ сюрес лёгыны?

- Пичи классъёсты йылпумъяй Итэшысь школаын, 7 классэз – Вуж Мӧньялан. Надяпае дышетӥсь вал бере, мынам но та удысъя ик мынэме потӥз. Можга педучилищее вамышты вылэм, мон со сярысь бер тодӥ. Куриськонэн гожтэтме ыстӥ Сарапулысь техникуме, нош соос нокыӵе ивор ӧз лэзе. Дыр ортче, дышетскыны пырон вакыт но йылпумъяське ини. Соку мон ӝутӥськи Ижысь индустриальной техникуме. Монэ отчы басьтӥзы, анае талы туж шумпотӥз. Али вераны шуг: ас мылкыд каремея меда мон та техникуме вамыштӥ? Но тодӥсько одӥгзэ: котькыӵе секыт вакытъёсы но мон тодон-валан дуннее кыстӥськылӥ. Со вие ик котьку ас азям курон пуктылӥ: уж борды кутскид ке, сое йылозяз-пумозяз быдэсты. Индустриальной техникумен но озьы ик: дышетскыны пыри бере, рос-прос басьтӥськи визь-нод люкан борды. Дышетскыны секыт вал ке но, «витьёс» гинэ басьялляй, ӟуч литератураен гинэ кӧня ке чутӥ – «ньыль» басьяй. Ма, малпаськисько вал угось удмурт кылын, ӟуче берыктыса вераны шуак ӧй быгатылы, лэся.

Парта сьӧрын пуки Клюкин эшеным. Мон Лукин, со Клюкин. Дышетӥсьмы кудмес ке доска доры ӧте ке, ну, ми ог-огмес гырпуменымы донгаськом ук. Клюкин шуэ: Лукинэз, пе, ӧтизы, нош мон аслэсьтым куасалтӥсько: ӧвӧл – Клюкинэз! Озьы кыкнамы ик доска доры вуиськом вал. Техникумын, стипендия басьтыса, дышетски, пӧртэм станокъёсын, арбериосын ужанъя быгатонлыкме волятӥ. Сиён-юонэн секытгес вал, но анае пичи сӥль, картошка ысъяны быгатылӥз ни.

Индустриальной техникумез йылпумъяса, мыным ӵектӥзы Ижысь «Редуктор» яке Воткаысь машина поттон заводысь инструментъёсъя цехе интыяськыны. Нырысетӥяз ӧз кельшы, заводлэн азбараз угось пырыны-потыны луонтэм дэри. Ширтӥ Воткаысь заводэ. Отын ужан условиоссы шӧдскымон ӟечгес потӥзы. Одӥг ар заводын ужаса, дышетсконме азьланьтоно кариськи. Тодӥ: Ижысь механикая институтлэн ёзэз Воткаын но усьтэмын. Озьы мон 1959-тӥ арысен 1965-тӥ арозь, нуназезэ ужаса, ӝытазезэ дышетски. Институтэз горд дипломен йылпумъяй. Дышетӥсьёсы ӵектӥзы Ижысь техникая институтлэн аспирантураяз пырыны. Соку усьтэмын вал ай кык гинэ факультет: приборостроение но машиностроение. Мон вамыштӥ кыкетӥяз, висъязы огъяулонниын инты.

Но аспирантураын шуг-секытэн пумиськоно луиз: диссертацилы тема бырйыны кема ӧй быгаты. Туала студентъёс тани нырысетӥ курсысен ик кыӵе ке юан борды басьтӥсько но сое диплом ужозь вутто, бӧрысь со ужпумез ик аспирантураын эскеро. Нош мынам озьы ӧз пӧрмы. Наукая кивалтӥсе, механикая институтлэн нырысетӥ директорез Владимир Павлович Остроумов, ар пала мыным тема сётыны ӧз быгаты, нош ӝоген Москвае улыны выжиз. Озьы мон одӥг ужпум вылысь мукетаз тэтчай, аслым кельшымонзэ утчаса. Озьы куке-соку басьтӥськи выль удыс борды: кортэз термомеханика амалэн юнматонэз эскери. Шуом, кортэз 850-950 градусозь ӵыжатӥськод, солы кыӵе ке вылтус сётӥськод но шуак кынтӥськод, со бӧрсьы, корт арбери пушкысь напряжение мед усёз шуыса, пичи температура вылын возиськод. Озьы со дыр ортчемъя юнма но юнма. Та амалэз усьтэме понна пусйизы СССР-лэн изобретателез нимен.

- Аспирантураын дышетскыса, диссертациен вырыса, ку бен семья но кылдытыны вуиды?

- Вуоно кузпалме мон пумитай, Воткаысь машина поттон заводын ужакум. Со но гуртын будэм адями, пичи дырыз ортчемын Вотка ёросысь одӥгаз гуртын. Тодматскимы эктон ӝытын, ог-огмылы соку ик синмаськимы. Тодам вайисько со вакытэз – кыӵе тунсыко ортчиз! Котькуд арнялы быдэ турпоходэ ветлылӥмы, куасэн, пыжен уяны поталлямы. Нуназе заводын ужалляй, ӝыт дышетски, одӥг минутме но тэк ӧй пукылы. Со вие ик огъяулонниысь эшъёсы, шунялтас (сема) куадаса, лумбыт кенер вӧзысь ӟус вылын пукылӥзы. Сыӵе мон адями: одӥг секундэ но юнме медаз ортчы кадь.

1965-тӥ арын ми сюан шудӥмы. Мыным 25 арес, кузпалэлы – 20. Механикая институтлэн аспирантураяз пыри бере, семьяеным улыны выжимы Ижкаре. Огъяулонние интыяськимы. Ӝоген нылы вордскиз.

- Семья кылдытон, нылпи вордон диссертацидэс утёнлы ӧз люкетэ-а? Оло нош улонысьтыды воштӥськонъёс выль инвисъёсы бурдъязы?

- Кандидат диссертациез куинь арскын гожтоно но утёно ке, мон та ужез сизьым ар ӵоже быдэстӥ. Нырысь тӥни тема утчан ласянь курадӟи. Собере наукая кивалтӥсьтэк кыли. 1978-тӥ арын диссертациме ути. Со бӧрсьы ик доктор диссертациме дасян борды басьтӥськи. Сое сӥзи пыӵал тӥрлыкез умоятонлы. Диссертацие бордын ужано луиз СССР-ысь Обороная министерстволэсь заказзэ быдэстон вакытэ. Но 1985-тӥ арын со заказэз пытсазы, коньдон висъямысь дугдӥзы. Нош эскеронме ортчытыны мыным радъяны кулэ вал дуно испытаниос. Озьы пыӵал тӥрлыкез умоятонлы сӥзем диссертациысьтым дэмланъёсы, улонэ пыӵатэк, эскерытэк кылизы. Ма, ачим но янгыш: пумен-пумен палэнски доктор диссертациелэсь, басьтӥськи кафедраелэсь наукая но методикая литературазэ узырмытон борды. Диссертацие озьы ик йылаз-пумаз вуттытэк кылиз.

Институтысьтымы машина но механизмъёс бичанъя кафедраысь наукая кенеш пуктэмъя мыным профессор ним сётӥзы. Зэмзэ вераса, таӵе нимен пусъё докторъёсты гинэ, эшшо ке кыклэсь ятыр аспирант дасямын ке. Но соос мынам вить кузя ини, тани эшшо одӥгез дышетэм пияше июль толэзе диссертацизэ утьыны чакла.

- Оло, али но бер ӧвӧл на доктор диссертацидэс утьыны?

- Котькыӵе уж борды басьтӥськоно но йылпумъяно дыраз. Сое утьыны тазалык но, мылкыд но кулэ. Соин ик таӵе арлыдам со борды басьтӥськыны секыт ини. Куддыр малпаськонэ усисько: берыкты вал на егит дырез – ужме утьытэк ӧй кельтысал ни.

- Тӥ 12 изобретениослэн авторзы. Малы соос сӥземын?

- Соос пӧлысь висъясал пыӵал тӥрлыклы сӥземзэ. Котькуд ыбылӥськон тӥрлыклэн самой ненег люкетэз – гумы. Угось дыр ортчемъя со пӧсьтэ. Мар кароно солэсь ужан дырзэ кузёмытон понна? Уже кутыны луэ пӧртэм амалъёсты. Шуом, пыӵаллэн гумыезлэсь кортсэ юнматыны, пушказ маке пуктыны но мукет. Кудӥз амал тупалоз ож тӥрлыклэсь ӟечлыксэ юнматыны, тае тодыны луэ, испытаниос ортчытыса гинэ. Но со понна автоматэз быдэсак выльдоно, собере ыбылӥськоно но ыбылӥськоно – гумыез пӧсьтытозь. Талы туж трос дыр кошке. Озьы гинэ тодмо луэ кыӵе ке амаллэн пайдаез. Нош мон ӵектӥсько мукет сямен ужаны. Пыӵал тӥрлыклэн гумыезлэсь одӥг люкетсэ гинэ кужмо материаллэсь бичаны. Эскеронъёсты но мукет амалъя ортчыны ӵектӥсько. Ыбылӥськытэк-маратэк, технологияя оборудованиез уже кутыса – пыӵал тӥрлыкез отчы пуктыса. Но со понна оборудованиын кылдытоно ыбылӥськонын кадь условиос. Шуом, гумыын кулэ луись температура мед возиськоз, пуляослэн лобӟыса потэмзы дыръя кадь условиос мед кылдозы. Озьы мон усьтӥ пыӵал гумылэсь кужымзэ эскеронъя выль амал.

Мукетъёсыз усьтонъёсы герӟаськемын кортэз умоятонэн. Кылсярысь, сое термомеханика амалэн кыдатонэн, озьы ик пӧртэм материалъёслэсь ӟечлыксэс химия ласянь эскеронэн. Тросэз наукая ужъёсы ожгар ракетаослы сӥземын. Та удысэн тунсыкъяськыны кутски ай, Воткаысь заводын ужакум.

- Дорады но, вылды, асьтэ киыныды лэсьтэм арбериосты вань? Оло, тодады ваёды на нырысетӥ изобретенидэс?

- Тодӥсько на пичи дыръям шудон лэсьтэмме – питранъёс вылын ширтӥсь пичи уробо вал со. Сое эшеным ӵош олокӧня дасямы, эсьмаса, шудонъёсмес базаре вузаны поттӥмы.

Туала вакыт сярысь ке верано, сад-бакчаям сылӥсь коркае бордысь одӥг тунгонэз но уд адӟе. Малпалоды, иське, ӧсэз капчиен усьтыны луоз?! Со чик но озьы ӧвӧл. Мынам отын быдэс система. Коркаелэн урдэсысьтыз борддораз пичи пасез вань. Отчы резьбаен болт пуктӥсько но сое бергатӥсько. Озьы борддор сьӧрысь стерженез ужатӥсько но, ӧс усьтӥське. Лушкаськисьёс пыраллям вылэм бакчаям. Корка ӧсэз усьтыны быгатӥллямтэ, узырмытэк кошкиллям.

- Наукалы тӥ быдэс улондэс сӥзиды. Ӵошатыны быгатӥськоды, макем бадӟым саклык висъяськиз наукалы совето аръёсы но туала вакытэ… - Азьло наукалэн котькуд удысэз азинскиз, одӥгез но интыяз ӧз лёгаськы. Наукая институтъёс юн кусып возизы пӧртэм заводъёсын. Усьтонъёсты соку ик заводын эскерыны луонлык кылдытэмын вал. Но со вакытэ сомында изобретениос вал, соосты улонэ пыӵатыны тодосчиос ӧз ик вуттылэ. Огъя вераса, наукаен вырисьёслы ужаны ӟечесь условиос кылдытэмын вал.

Нош туала вакытэ заводъёс тыро-пыдо уг ужало, соос люкылэмын пичи огазеяськонъёслы. Наукалэн удысъёсыз но уксё ӧвӧлэн уг азинско ни. Табере чылкак мукет суред кылдӥз наукаын: улонэ пыӵатыны луонлыкъёс кылдытэмын, нош эскеронъёс бордын ужасьёс ӧвӧл. Россиысь автопромез вылласянь, кивалтӥсьёс пыр, ӝутоно. Пичи предприятиослы люкылэм заводъёсты огазеяно, соосты герӟаны юрттысалзы обороная заказъёс. Со сяна, машина но пыӵал тӥрлык поттон, ракета лэсьтон удысъёслэсь данзэс ӝутоно, егитъёс та уже мыло-кыдо мед пыриськозы.

Тани басьтом машинаосты но механизмъёсты поттонъя факультетмес. Егитъёслэн та удысъя чик но мынэмзы уг поты. Ми доры лыкто ни мукет факультетъёсы сюрымтэос. Валамон, наука сюресъя мыныны соослэн мылкыдзы уг кылды. Одӥг ласянь, мон соосты валасько но кадь. Удысмы угось секыт. Пыӵал тӥрлыклы проектъёс кылдытоно, соосты бичаны дышетсконо. Та ласянь студентъёс ужало азьвыл лэсьтэм автоматъёс вылын, шуом, Калашниковлэн, Никоновлэн пыӵал тӥрлыксы вылын. Нош выльзэ усьтыны-кылдытыны туж кема дыр кулэ. Соин но, лэся, егитъёс удысамы уг кыстӥсько. Удмуртъёс сярысь веранэз ик ӧвӧл, удмурт гуртъёсысь вуэ одӥгез-кыкез.

- Озьыен, туала студентъёс чылкак висъясько тӥ вакытысь егитъёслэсь?

- Котьма ке но ми турттӥськом вал улонмес одӥг удысъя радъяны. Та ласянь бадӟым пайда сётылӥз распределение. Институтэз быдтӥсьёс тодо вал, соосты кыӵе ке заводын возьмало, нош наукаен вырисьёс эскеронзэс азьланьтозы шуыса. Нош туала студентъёс мукет малпанъёсын уло-выло. Соос ужаны, коньдон поттыны тыршо. Заводэ мынэмзы уг поты, уждунэз угось туж ичи – 6 сюрс манет мында. Озьы егитъёс кин вуз каронэ, мукетыз ужбергатонэ кошке.

- Мон тодэмъя, кузпалды дышетскемезъя но, ужам удысэзъя но наукалэсь кыдёкын. Куспады огкыл шедьтыны быгатӥськоды-а?

- Кузпалы быдэс улонзэ сӥзиз пиналъёслы, нылпи садын воспитатель луыса тыршиз. Али пенсиын шутэтске ини. Валамтэос куспамы куд-ог дыръя кылдыло ик. Угось мон быдэсъясько на машина но механизмъёс поттонъя кафедраен кивалтӥсезлэн воштӥсезлэсь ужзэ. Студентъёсты дышетэм сяна, быдэсак мон вылын документъёсын вырон, дышетӥсьёслы часъёс люкылон. Соин ик ваньмон дыр чик но уг кыльы ни. Выль дышетскон аре та ужлэсь куштӥськыны малпасько, но ӵош ужась эшъёсы, ум лэзе, шуо.

- Кызьы радъяськоды ваньмон дырдэс? Наука сярысь малпанъёс, утчаськонъёс шутэтскыны сёто-а?

- Туж яратӥсько волейболэн шудыны, институтысь дышетӥсьёслэн командаязы пырисько. Кужым басьтӥсько мунчое пыронлэсь. Эсьмаса, часъёсын кызьпу веникен кокаськыны дась. Сыӵе мон адями: шоро-куспо температураез мугоры уг вала. Мед луоз яке туж пӧсь, яке туж кезьыт.

Шутэтскон нуналъёсы дорамы вуо внукъёсы. Тазьы адскон сямамы пыӵамын ини. Нылылэн одӥг пиналыз, пиелэн – кык. Нылы «Волгателеком» огазеяськонын тырше, пиелэн аслаз фирмаез вань – отын соос дасяло компьютер программаос.

- Тӥ алигес пусйиды 70 арес тырмондэс. Ортчем сюресты шоры учкыса, вань малпанъёстэс улонэ пыӵатыны пӧрмытӥды кадь-а?

- Шуи вал ни: доктор диссертациме одно ик утьысал. Но, зэмзэ вераса, та юан туж философской. Нунал вордске – кылдэ малпан, сое быдэстытэк кельтэм уг поты. Аслым мон котьку шуисько: мар борды басьтӥськид, сое, сюлэмдэ-мылкыддэ сётыса, йылозяз-пумозяз быдэстоно. Лусйиськоно ке – вольыт, кортӵог шукконо ке – чебер.

Источник:

Лукин Л. Л. Кортлэсь кылзэ тодӥсь / Л. Л. Лукин ; записала Е. Никитина // Удмурт дунне. - 2011. - 12 июля. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"