Кустарников Геннадий Кузьмич

Материал из Воршуда
Перейти к: навигация, поиск

Пытьыосы кузя выльысь ортчысал

Г.К. Кустарников

Геннадий Кузьмич Кустарников ньыльдонлэсь ятыр арзэ сӥзиз ни паласькись висёнъёсын нюръяськонлы. Али со Ижысь медициная кун академиысь доцент, Удмурт Республикаысь сӥё-дано врач, вылӥ категориен эмъясь. Эмъян удыслы трос кужымзэ, тодон-валанзэ сётэмез понна пусъемын уно данъян грамотаосын. Соос пӧлысь тужгес вылӥез - Россиысь Тазалыкез утёнъя министерстволэн. Но Геннадий Кузьмич аслэсьтыз вормонъёссэ данъян пусъёсын уг чота. Дораз куке-соку йӧнатӥськемъёслэн ӟеч мылкыдзы - тӥни мар тужгес дуно солы.


- Выжыосы Якшур-Бӧдья ёросысь кыстӥсько. Анае монэ ньыльдон одӥг аресказ ваем ни. Мон - самой пичиез. Бадӟыменыз висмы - ог дас арес. Вордскеме бере толэзь гинэ ортчем - кутскем кышкыт тылож. Августэ дядяйме войнае басьтӥллям. Озьы нэнэе пичи пиналъёсын огназ кылем. Ярано, пересь нэнэмы бордамы улэ вылэм, со милемыз учкыны юрттэм ни.

Котькыӵе вакытъёсты чидано луи. Милям пот уг сиё вал, беризь сулэз картошка пӧлы тырылӥзы. Нырысьсэ нянез веръяй ай ог 12 арескам. Солэсь шӧмзэ, зынзэ али но тодӥсько! Сыӵе нянез, оло, ноку ӧй веръялля ни.

Школаысь кык часын бертӥськод гинэ - колхозэ ужаны потӥськод: я кыед поттӥськод, я уриськиськод. Но уката секыт йӧтӥз гужемъёссэ: турнаськоно, мажсаськоно. Техника тырмыт ӧй вал, соин ик валъёсын ужано луылӥз. Ай вал мед тырмоз шуыса, ӵукна куать часлэсь вазь ик потӥськод ни вал. Куддыр ӝыт шудэм бере ик уробое кӧлыны выдӥськод. Ми, егитъёс, ог-огенымы туж вожвылъяськиськом вал: уроботэк кылид ке, тон воргорон ик ӧвӧл! Соку коньдон уг сётъяло на вал, нылпиослэсь трудоденьёссэс мемей-дядяйёссы вылэ гожтылӥзы. Со понна куддыр сӥль, чечы сётылӥзы - солы туж шумпотылӥм.

Тодам лыктэ на таӵе учыр но: гуртысь мӧйыос пӧлын туж ӧжытэз лыдӟиськыны-гожъяськыны быгатылӥзы. Соин ик милемыз, школьникъёсты, косылӥзы соосты грамоталы дышетыны. Озьы ми ӝытъёсы мемей-дядяйёсынымы, бускельёсынымы лыдӟиськыса, чотаськыса пукылӥмы.

- Удмурт сямен туж чылкыт вераськиськоды, вордскем гуртты удмурт вал, дыр?

- Бен, Лынвайын уло вал удмуртъёс гинэ. Мон пичи дыръя отын ог сю юртъер вал, али куамын но кылемын ӧвӧл ни. Ньыль классозь дышетски асьме гуртын ик. Но татын покчиослы школа гинэ вал, 5-тӥе ветлоно луиськиз Тылое. Соку со ёрос центр вал ай. Вот соку курадӟонэ вуиськиз! Вань урокъёс ӟуч кылын ортчылӥзы. Ми Лынвайысь отчы 9 кузя мынӥмы. Огмы но ӟуч кылэз воксё ум тодӥське вал. Соин ик урокъёс бере, юри кельтылыса, дышетылӥзы милемыз: «вставайте, садитесь, идите, стойте…» Кызьы туала арын кунгожсьӧр кылъёсты дышето, ӵапак озьы ик. 9 пинал пӧлысь 2-сэ гинэ куатетӥ классэ поттӥзы, кылемзэ кыкетӥ арлы кельтӥзы.

Монэ кыкетӥ арлы ӧз кельтэ. Ӧжытак ке но ӟуч сямен вераськыны дыши, лэся. Угось витетӥ классэ потӥ но, монэ Шудьяла вордосэ басьтӥз анаелэн агаез. Бече шуисько вал сое. Отысь эшъёсы ӟучесь вал.

Бечее кузпалэныз ӵошен гинэ улӥзы. Кыксылэн но арлыдзы вал ни. Асьсэлэн одӥг гинэ пизы вал, со но войнае быриз. Нош мынам анае-атаелы соку секыт йӧтылӥз ньыль пиналэз будэтыны. Озьы монэ сётӥзы мурт семьяе. Отын коть юрттӥськись луод, шуизы, лэся - пу пильылыса, ву вайылыса.

- Эмъясь луон сярысь пичиысен ик малпаськылӥды, луоз?

- Ӟуч кылэз ляб тодэмысьтым, умой ӧй дышетскы. Сизьыметӥ классозь «куиньёсы» но ӧжыт ӧй вал. Бадӟымгес классъёсын «ньыльёс» вылэ потӥ ик ке но, усто дышетскисен асме ӧй лыдъялля. Соин ик инженер луэме потэ вал ке но, экзаменъёс пыр уг поты шуыса кышкай. Ӵош шудэм, дышетскем эшъёсы ваньзы сямен гуртэ ик кылизы. Мон зоотехник коть луо, малпай.

Ижысь гурт хозяйствоя институтын ӝыны арлэсь кемагес чидай. Соку ик валай: мылкыдыя ӧй бырйы удыс. Со сяна, кылӥ верамзэс: зоотехник, пе, 1-2 арзэ ас удысэзъя ужа, собере пудо возьмасе кыле.

Ижысь медициная кун институтын вал профессор Михаил Фёдорович Муравьёв. Со ми гуртысь, Лынвайысь, потэмын. Кытысь ке тодэм, зоотехнике дышетскисько шуыса. Одӥг пол дорам лыктӥз но юаз: эмъясь луэмед уг поты-а? Давай-ко, пе, анатомияя экзаменъёслы дасяськы. Медициная институтын дышетскон секытэн ӧз йӧты: татын тодон-валан басьтыны туж тунсыко потылӥз. Ӟеч дышетскисьёслы стипендия сёто вал - сотэк мон ноку ӧй кыльылы.

- Кылэме вань, Удмурт шаерез тӥ ӧжыт гинэ ӧд воштэ Пермь улосэн.

- Институт бере практикае одно келяло вал, троссэ - Удмуртилэн палэназ. Мон шеди Красновишенске, интыяськемын со Пермь улослэн уйпалаз. Отчы лыктэме бере ик шуизы: бырйы, пе, кыӵе удысъя специалист луод. Инфекционист кариськи. Ноку ӧй жалялля, пожалуй, али удыс бырйыны косысалзы ке, мылкыды ӧй воштӥськысал. Кудмында адямиос улозы, сомында ик луозы вирусъёс, бактериос но мукет улэп макеос. Соин ик инфекционистъёслы уж котьку тырмоз.

Красновишенскын мон семья кылдытӥ - пумитай Любаез. Пермь улосын ньыль ар ужаме бере Удмурт шаерлэсь мӧзмонэ вормиз. Бертоно кариськи, кузпалы пумит ӧз луы.

1970-тӥ арын вал со. Медициная институтысь паласькись висёнъёсъя кафедраен кивалтӥсь, профессор Анна Ивановна Чукавина ас дораз ӧтиз. Соглаш кариськи, аспирантурае пыри. Нимысьтыз басьтӥськи шырвисёнэз эскерон борды. Азям пуктэм ужме мыло-кыдо быдэстӥ. 8 ар ӵоже эскерыса вози 242 адямиез. Ваньзы - шырвисёнэн курадӟемъёс.

- Шонер ке валасько, тӥ 39 ар пала ужаськоды ни студентъёсын?

- Озьы пӧрме. Лыдъяны но луоз на меда, кӧня егитъёс мон пыртӥ ортчизы ни? Азьло студентъёсын туалаоссэ уд ӵошаты. Алиосыз асьсэлы оскисесьгес, йӧноесьгес. Соослы дышетскон но капчиенгес сётӥське кадь потэ. Азьло угось дышетскон пособиослы гинэ ёрмоно вал, али Интернет вань. Мар кулэ, отысь ваньзэ шедьтыны луэ, кожало.

Но мон студентъёсты гажасько. Соослэсь дышетскисько… туала модаез валаны. Туж тунсыко потэ, кызьы дӥсясько, кыӵе кылъёсын верасько. Сюлмаськытэ тани ма: гуртысь нылъёс но пиос пумен ӧжытгес но ӧжытгес пыро медициная вузъёсы. Лыктӥсьёсыз но - ёрос центръёсысь гинэ. Удмурт егитъёс пӧлысь ог 95 процентсэ нырысетӥ параосысен ик тодмасько. Соос ӟибытэсь, возьдаськисесь, ӟуч кылын но вольыт вераськыны уг быгато. Соин но, вылды, огъёзъёссылэсь ӧжыт лябесьгес адӟисько. Но лушкем ке но верало: удмурт пиналъёсты котьку жаляны турттӥсько, «кык» пуктыны соослы киы уг ӝутӥськы.

Бен, витетӥ курсозь вуытозязы, тросэз гуртысь потэмъёс тодмантэм воштӥсько ни. Удмуртъёс уга нокыӵе секытъёслэсь уг кышкало, уг аналско. Соослэсь пото синмаськымон врачъёс. Ӧжыт ӧвӧл эмъян удысысь доцентъёс, профессоръёс.

Жаляса верано, асьмеос ог-огмес бӧрсямы кыскыны ум быгатӥське. Пӧрмытысалмы ке, удмуртъёслэсь адӟем карымонгес адямиос ӧй луысалзы. Шумпотоно, берло дыре удмурт кылын дӥсьтыса вераськисьёс тросгес луо ни. Ужея шаерысьтымы пӧртэм больницаосы вуылӥсько, секыт калэ вуэмъёсты чакласько. Соку адӟисько ке, койкаын кыллись удмурт шуыса, одно вазиськисько анай кылын. Эсьма, мылкыдыз ик воштӥське, быдэсак усьтӥськыны дась. Оло, ӝоггес йӧнаны но кутске.

- Эмъясьлы котьмалэсь дуно, дыр, бурмем муртлэн тау каремез?

- Шонергес вераса, котьмалэсь дуно - висисьлэн катьяськемез. Куддыръя умме усьыны но шугъяськоно, секыт висись вань ке. Ялан малпаськиськод: кызьы эмъяса сое умойгес луоз? Но ма ватонэз, бурмем муртлэн шуныт кылыз, зэмен но, сюлэмез шунтэ. Луо учыръёс: дорам адямиос лыкто но юало, тодӥськоды на-а, Геннадий Кузьмич, тӥ монэ кулонлэсь утиды вал шуыса? Тодазы ваё дас-дас вить ар талэсь азьло луэм учыръёсты. Алигес одӥг воргорон республикаысьтымы паласькись висёнъёсъя больницае сюрылӥз. Отысь эмъясьёс мыным шуо: ялан, пе, Кустарников сярысь юаське, пумиськемез потэ тӥледын. Дорам куке-соку йӧнатӥськем ни вылэм.

Макем ӝоггес шонер диагноз пуктод, сокем капчиенгес адями катьяськоз. Нош висёнэз тодмамтэ дыръя адямиез котькӧня бурмытыны выр - пайдаез уз луы.

- Геннадий Кузьмич, тӥ кыӵе но висисьёсын уд пумиськылӥське. Чик кышканды ӧвӧл-а, асьтэос но черлалоды шуыса?

- Та сярысь малпан но йыре уг лыктылы. Ми ведь койкае сюрем муртлэсь маин висемзэ тодӥськом. Тодӥськом, кызьы со чер палаське. Соин ик куд-огъёссэ, маска дӥсяса гинэ, учкиськом, мукетъёсызлэсь воксё ум кӧбераське. Но одӥгзэ куронэз уйин сайкатэмзы бере но вераны быгатом: висисез котькуд учкем бере киосты майталэн тыро-пыдо миськоно. Со сяме пыӵамын ни. Киез гылтыны вунэтӥськод ке, сюлэм соку ик шуг луыны кутске: маке но ӧд кары на.

Мынам ноку, больницаын ужамысьтым, черламе ӧвӧл. Оло, со мугорлэн аспӧртэмлыкеныз но герӟаськемын. 1957-тӥ арын пыэдэн висисьёс трос вал, соку 10-тӥ классын дышетскисько ни вал. Одӥг нуналэ классысьтымы кык мурт гинэ дышетскыны лыктӥз - мон но эшшо одӥг нылаш. Дышетӥсьёс гинэ но висьыны усиллям. Кызьы асме тодӥсько, кызонэн-кизьнылонэн курадӟеме ӧвӧл. Тросэзлэн юамез потэ: Геннадий Кузьмич, кызьы тӥ висёнъёслы уд сётскиське? Валэктӥсько: таза улонэн егитысен эшъяськисько. Тамак уг кыскиськы. Мединститутын дышетскыкум ай, куасэн бызьылонъя вузлэн командаяз вал. Студент аръёсы ортчем бере но гурезьёстӥ ширъяй на. Но берло дыре эшъяськисько шахматэн. Таиныз но тунсыкъяськыны кутски мединститутысен ик. Но туннэ но пыриськылӥсько на пӧртэм ӵошатсконъёсы. Эмъян учреждениос пӧлын республикаысьтымы паласькись висёнъёсъя больницалэн командаез кужмоосыз пӧлы котьку шеде. Вузъёс куспын ӵошатсконъёсын ке, медакадемилэсь кужмогес луэ Ижысь техникая кун университет гинэ. Пыдын трос ветлӥсько. Уже улон интыелэсь ог кык-куинь остановка кемын. Малы транспортэ пуксьылонэз? Пиналъёсы кыдёкын уг уло - тожо пыдын гинэ ортчыны луоно.

- Кӧня кузя соос тӥляд?

- Куиньлэсь ӧжыт пинал вордӥсьёс вазен туж ичи вал. Милям но бере кылеммы ӧз поты: кузпалэным кык пи но одӥг ныл будэтӥм. Табере соослэн асьсэлэн семьяоссы. Нунокъёсмы сизьым кузя ни. Бадӟымез пимы, Сергей, вылӥ тодон-валан басьтыны малы ке ӧз тыршы, автодорожной техникум пыр потӥз. Улэ Москваын. Пичиез пимы, Славамы, мувӧй кыскон удысын тырше. Москваын семьяеныз ик кӧня ке улӥзы вал, но та вакытэ Иже огдырлы берытскизы. Мынэсьтым сюресме быръёно кариськиз Галинамы, мединститутэз йылпумъяз. Паласькись висёнъёсъя специалист ик луиз, ужа СПИД-эн нюръяськонъя центрын.

Кышноелы тау карисько нылпиосмес ӟеч будэтэмез понна.

- Улон сюрестэс выльысь мытыны луысал ке, мазэ отысь воштысалды?

- Пытьыосы кузя выльысь ортчысал. Чик номырзэ ӧй воштысал.

Источник:

Кустарников Г. Пытьыосы кузя выльысь ортчысал / Г. К. Кустарников ; записала Э. Кумачёва // Удмурт дунне. - 2009. - 11 дек. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"