Калинин Иван Григорьевич

Материал из Воршуда
Перейти к: навигация, поиск

«Удмурт дуннелэн» песятаез

И. Г. Калинин

Туала «Удмурт дунне» газет вордӥськиз 1915-тӥ арын «Войнаысь ивор» шуыса. Шаерысьтымы валтӥсь газет 96 ар ӵоже кӧня ке пол вошъяз нимзэ но редакторъёссэ. Нырысьёсыз радын вал Павел Глезденёв, Василий Крылов, Константин Яковлев, Трофим Борисов. «Удмурт дуннелэн» огез песятаез вал Иван Калинин но.

Иван Григорьевич Калинин – тодмо дышетӥсь, печать удысын тыршись, Удмуртиысь нырысетӥез дышетонъя калык комиссар – нарком, вордӥськиз 1900-тӥ арын Балезино ёросысь Наговицыно гурын. Калинин кузпалъёслэн семьяязы вал ини 4 пиналзы: 7 аресъем Николай, собере Ваня, Иосиф но 10 толэзьем Таня. Ӵап соку улонысь кошкиз Григорий Петровичлэн кузпалыз. Пиосмурт огназ уз улы, уката ик пичи нылпиосты будэтыны анай кулэ. Озьы воргорон кыкетӥзэ кышнояськиз. Таиз кузпалыз но солы нуны кузьмаз на. Озьы Калининъёслэн семьяязы 10 адями лыдъяськиз.

Николай Калининлэн Ижын улӥсь нылызлы Елена Ивановалы али 85 арес. Со туж ӵем тодаз вае пичи дырзэ:

- Песятаймы, Григорий Петрович, туж ӟеч адями вал. Ма, песянаймес но (атаелэсь сюранайзэ) урод уд шуы. Улӥм шоро-куспо. Кык скалмы вал, но нылпиос трос бере, озьы но йӧл ӧз тырмылы. Ми Ваня агаенымы (Иван Калининэн) туж валче улӥмы. Соос атаеным ӵем пумиськылӥзы. Ӝӧк сьӧры пуксёзы но оломар сярысь но кенешозы вал. Одӥг чарка вина понозы но сое но пумозяз уз юэ, быдэс уй но вераськылыса потылӥзы.

Ваня агай туж яратылӥз пиналъёсты. Ми асьмелэсь атаймес шер адӟылӥмы, ялан уж дурын вал, нош со милемыз кутоз но дораз васькытоз яке ваньмы ӵош гуртэ вырӟом. Мон тодӥсько на: школа бере со дышетскыны мынӥз Казане. Отын эшъяськиз мукет удмурт пиен, тодмо хирурген Семён Ворончихинэн. Собере агаймы тодон-валанзэ люказ на Москваын.

Вуоно кузпалзэ Иван Калинин пумитаз ай Глазовысен. Павла Александровна удмурт кышномурт, туж визьмо но юн сямо адями вал, ужаз школаын директорлэн воштӥсез луыса. Милемды, нылпиосты, со аслаз карылӥз. Малы ке шуоно атаймы куинь нылпиен дышетскиз. Ижын Потребсоюзын тыршиз, собере Ленинградын тодон-валан люкамез бере сое отчы ик кельтӥзы. Со Наркомземын агроном луыса ужаз, улӥмы пичи гинэ общежитиын. Сое Иже ӧтизы, квартираен гочатӥзы. Ӵыжы-выжыосыз Удмуртиын вал бере, соглаш кариськиз. Озьы ми бертӥмы Иже. Но милемлы нокин патер ӧз висъя. Соку йыгаськимы Ваня агай доры. Соос улӥзы Горький ульчаысь пу коркан. Урамысен ик пыроно вал кышнопала, вал эшшо одӥг висъетсы. Отын асьсэлы но ӟоскыт йӧтылӥз. Но Ваня агай, кышноез Паня апай одӥг пол но шорамы урод ӧз куаретэ, ӧз шуэлэ: люкетӥськоды милемлы.

Удмуртиысь писатель Николай Кузнецов верамъя, Иван Григорьевич Москваысен 1922-тӥ арын нырысьёсыз радын пыриз «Бӧляк» огазеяськонэ, эшшо кык но ӝыны ар ортчыса – ВКП(б)-е. Архивъёсын бугыръяськыса, Николай Спиридонович шедьтӥз Эрик Наговицынлэсь Иван Калинин сярысь тодэ ваёнъёссэ:

- Калинин Иван Григорьевичен мон тодматски 1928-тӥ арын, Глазов уездлэн «Выльгурт» нимо газетаз ужакум. Со соку редактор вал, мон – литсотрудник. 1928-тӥ арын ик Кузебай Герд Калининлы кык кылбурзэ лэзем, «Выльгуртын» печатланы курыса. Иван Григорьевич кылбуръёсты газетэ пуктӥз но шуиз: со бадӟым шумпотон асьме лыдӟисьёслы, газетамы сыӵе дано но адӟем карымон кылбурчи печатлаське шуыса. Со дырысен Гердлэн чуръёсыз милям газетамы ӵем пуксьылӥзы. Иван Калинин куриз на сое туспуктэмзэ лэзьыны, Герд дась клишезэ ыстӥз.

Глазов уездын ортчись удмурт культуралы сӥзем кенеш дыръя Герд Калининлы сётӥз выль удмурт кылъёсъя словарьзэ, куриз сое печатланы «Выльгурт» газетын. Выль кылъёсты сяна, Иван Григорьевич «Книга ӝажы» рубрика улсын печатлаз Кузебай Гердлэсь Москваын «Бӧляк» огазеяськонлэн юрттэмезъя поттэм книгаосызлэсь нимъёссэс но вакчияк пуштроссэс. Редакторын ужакуз ик, Калинин Глазовысь педтехникумын радъяз литературалы сӥзем кружок но поттӥз киын гожъям литературно-художественной журнал. Нош ар ортчыса, сӥзьылаз, сое ужаны ӧтизы Иже.

- 1929-тӥ арын Иван Калининэз пукто «Гудыри» газетлы редакторе. Ар ӵоже ужатозяз, со озьы ик мыло-кыдо печатла Гердэз. Ар ортчыса, ВКП(б)-лэн Удмурт обкомезлэсь ужамзэ курламез понна солы Обкомлэн бюроез лек выговор сётӥз. Иван Калинин дӥсьтӥсь адями но визьмо дышетӥсь вылэм. Соин ик сое 1933-тӥ арын Облоное (калыкез дышетонъя областной отделэ) кивалтӥсе пукто, нош 1935-тӥ арын просвещениея нарком каро. Но вуэ кышкыт 1937-тӥ ар. Со аре октябрь толэзе Калининэз коммунистъёслэн радысьтызы но наркомысь кушто. Бордаз ляко «буржуазной националист» ним. Мугез вал 1937-тӥ арын пытсэт сьӧры келям удмурт интеллигенциен – Макар Волковен, Прокопий Гороховен, Константин Ивановен, Кедра Митреен – эшъяськемез. Паймоно кадь, кызьы со ачиз Соловки шормуӵе ӧз шедьы, – вера Николай Кузнецов.

- 1937-тӥ аръёсы омырын ик кыӵе ке кышкытлык шӧдӥськиз, – тодаз вае Елена Николаевна. – Иван Николаевич туж прямой адями вал, котькыӵе собраниосын вераськылӥз. Атаеныз но агай-вынъёсыныз ӵем кенешылӥз. Со понна кышноезлэсь кыл кылылӥз. Уго Паня апаймы кышка вал, картсэ К. Гердэз но мукетъёссэ сямен кысканы кутскозы шуыса. Соос соку уло вал Ижысь Советской ульчаысь 3 комнатаем квартираын. Наркомысь куштэмзы бере соослэсь улон интызэс талазы но кыӵе ке пичи висъет гинэ сётӥзы. Патерзы туж ӟоскыт вал. Отчы ӝӧк но пукон сяна ӧз тэры, берытскыны интыез ик ӧй вал. Паня апаен Ванягай асьсэос выж вылэ выдо, нош Розалинда нылзэс ӝӧк вылын изьто вал.

Война дыръя Калининъёслэн ваньзы сямен пиоссы ожмаськыны кошкизы. Иосифсы Германиын, Семёнзы, Псков дорын ожмаськыкуз, быризы. Иван Калинин штабын гожъяськиз. Отысен почта открыткаысь тодмо нимтулэз адӟыса, гожтӥз вынызлы, соос Иосифен ог-огзылы матын ожмасько вылэм. Со ик нырысь тодӥз но гуртазы ивор лэзиз, Иосиф быриз шуыса. Коля агаез ожысь бертӥз 1946-тӥ арын, луло ик вуизы Андрей но Иван.

- Азьло мода сыӵе вал, аспӧртэм нимъёс тырыны. Мыным анае ним понэм Лена шуръя, нош Паня апай дыдызэ Розалинда шуиз. Соос Рихард Штрауслэн операяз ветлӥллям но, таӵе нимын героиняез адӟыса, озьы кенешиллям. Розалинда копак атаез кадь вал, сыӵе ик лякыт сямо, котьку ӟеч мылкыдо. Ми соин сузэръёс но матысь эшъёс вал. Кыкмы ик огбыдӟаесь, ӵош дышетским школаын, собере 1944-тӥ арын кыкмы ик пыримы Ижысь мединститутэ. Мон – бактериолог, со акушер-гинеколог луиз.

Жаляса верано, Розалинда Ивановна 1992-тӥ арын улонысь кошкиз. Солэн Игорь пиез улэ Ижын. Удмурт кун университетысь историяя факультетэз йылпумъяса, дышетскиз на Москваын. Лариса нылыз гурт хозяйствоя институтэз йылпумъяз, улэ Челябинскын.

Ванягай керетӥсь, копаськись адями ӧй вал. Урод мылкыдзэ но, сюлэмшугзэ но калыклы ӧз возьматъя, оло, соин но сюлмыз ӧз чида. Со кулӥз 1953-тӥ арын инфарктлэсь, картэз бере кема ӧз улы ни Паня апаймы но, – тодаз вае Елена Николаевна.

Источник:

Семенова, Г. Я. "Удмурт дуннелэн" песятаез [Текст] / Галина Семёнова // Удмурт дунне. - 2011. - 24 авг. - С. 5

За предоставление материала выражаем огромную благодарность редакции газеты "Удмурт дунне"