Кадров Николай Васильевич

Материал из Воршуда
Перейти к: навигация, поиск

Йыраз - закон, сюлмаз - Есенин

Зарезьёстӥ уякуз, кивалтӥсьёс оско вал: та адями корабльлэн капитанэз луыны быгатоз. Заводын тыршыкуз, солы кужмысь сямен сётылӥзы пӧртэм тубатъёсысь кузёлэсь биньгозызэ. Нош ачиз Николай Кадров туж синмаськылӥз эмъясьлэн ужезлы. Но… Николай Васильевич Удмурт Республикаысь Вылӥ Судлэн кивалтӥсезлэн нырысетӥ воштӥсез, Россия Федерациысь Судьяослэн кенешсылэн ёзчиез, Россиысь дано юрист. Солэн тыршемез пусъемын медальёсын но грамотаосын.

- Пумиськонмы азьын тӥ пусйиды: эшъёсты трос ӧвӧл. Но судьялэн трос эшъёсыз луыны быгато меда?

- Зэмос эшъёс ноку но трос луыны уг быгато, дыр. Но соослы тон вань пуштэ усьтыны быгатӥськод. Соос кытӥяз ӵыжы-выжыосыдлэсь но матынгес. Мынам сыӵе эше кык гинэ. Соос пенсие потэмын ни, вань улонзэс заводын ужам огшоры адямиос. Судья-а тон, ӧвӧл-а - котькуд адями аслыз эшъёс ачиз быръе. Пичи дырысьтым эшъёсы ӧвӧл ни, уноез улонысь кошкемын. Ачим мон Дэри ёросысь Ожмос палась Коӵыш гуртын вордӥськи. Гуртэ но али ӧвӧл ни, сое 70-тӥ аръёсы быдтӥзы. Гуртэлэсь интызэ тодмасько на шурмылэн котыръяськись ярдуръёсызъя гинэ. Коӵышгуртэз быдтыкузы, отын улӥсьёс кошкизы городъёсы, мукет бадӟым гуртъёсы, кылсярысь, Ожмосэ. Мынам нэнэе но Ожмосэ выжиз. Ачим мон соку Ижын дышетскисько ни вал.

- Анай-атайды колхозын ужасьёс ик-а вал?

- Озьы. Но тятяме мон уг тодӥськы ни. Сое оже басьтыкузы, мыным 1 арес но 8 толэзь вылэм. Тятяе Сталинградын быремын. Солэн нимтулыз пыртэмын Мамаев курганысь мемориал комплексысь пантеонэ. Кылем арын мон отчы вуылӥ. Отын 200 пала флагъёс тӧласько, бырем солдатъёсты буре вайыто. Тятятэк ми кык вынъёс кылимы.Нэнэе вань улонзэ колхозын ужаз, фермаен но кивалтӥз. 1985-тӥ арын со улонысь кошкиз.

- Тӥ война кутскон азьын вордӥськиды. Озьыен, тодэ ваёнъёсады война вакыт яркыт кылемын. Со дыръёсысь мар нырысь ик син шорады пуксе?

- Секыт вал, туж секыт. Мон 1940-тӥ арын вордӥськи. Ми, атайёстэк кылем пиналъёс, ялан бусыын анайёсмы бордын вал, араны-а соос мыно, турын октыны-а. Быдэс гуртамы пиосмуртъёс пӧлысь кылемын вал мынам пересь дядяе но солэн выныз. Быдэ вуымтэос туж зол ужазы ни. Нош дӥсяны но, сиыны но немыр. Война бырем бере но ай улон секыт возиськиз. Атайтэк кылемын бере, будэмедъя ялан тросгес но тросгес ужъёсты быдэсъяно луылӥз. Куазь пелляське-а, зоре-а - пыдад кут кутчаськод но школае мынӥськод. Нош гужем шунды ӝужанысен шунды пуксёнозь ялан бусыын тыршиськод. Войнае кошкемъёс пӧлысь гуртамы бертӥз одӥг пиосмурт гинэ, но со но кема ӧз улы.

1955-тӥ арын мон Иже ремесленной училищее дышетскыны пыри. Кык ареслы бадӟым агае отын дышетске ни вал. Тодон-валан люкан вискам ужай машина лэсьтон заводын. Кык ар ӵоже озьы дышетскыса, ужаса вуттӥ - армие басьтӥзы. Шеди Тихий океанысь флотэ, лодкаослы пумит ожмаськись бадӟым корабле. Отын монэ боцман каризы.

- Боцман - со пичи кивалтӥсь выллем ук. Малы меда одно тӥледлы та интыез оскизы?

- Йӧно адями вал мон. Армие басьтэмзы бере Русский шормуӵын дышетӥзы радиометристэ. Радиометрист быгатыны кулэ ву вылын но, омырын но радиотулкымъёсын пӧртэм арбериосты «адӟыны-шараяны». Сэре монэ Сахалинэ вайизы. Татын шуизы, кораблямы радиометристъёсмы вань ини. Озьы боцман каризы. Одӥг ласянь ӝожоми: техникаен ужаны дасяськи вал ук, нош табере - палубаез чаклано, буяно, сузяно… Но мукет ласянь мынэсьтым но кема службазэс ортчись адямиослы боцман луыны ӧз оскылэ. Корабль уяны 3-4 толэзьлы кошкылӥз, мынэсьтым 2-3 ареслы бадӟымъёс но кылзӥськоно луылӥзы. Боцман - со корабльын хозяйствоен кивалтӥсь. Боцман бере офицеръёслэн гинэ составзы мынэ ни. Озьыен, потэ-а, уг-а - кылзӥськоно.

Боцман луэме сярысь ке верано на, мон соку ачим но ас быгатонлыкъёсме уг тодӥськы на вал, нош кивалтӥсьмы шӧдэм ни. Мон но ас бордам ужаны ӧдъяй. Дембельзы матэктэмъя пиос верасько вал, кин кытчы дышетскыны мыноз. Нош мынам дасэтӥ классэ но йылпумъямтэ на. Соин ик ас азям ужпум пуктӥ: армиысь бертӥ ке, одно ик школаын дышетсконме йылпумъяло. Тани матэктэ ни доре бертон нунал, корабльлэн командирез ӧте но шуэ:

- Кылзы ай, боцман, туннэ вуоз бригадалэн политотделэзлэн кивалтӥсез. Со - бадӟым адями. Кивалтӥсь тонэн вераськоз но службае кыльыны куроз, Макаров нимо вылӥ ожгар училищее интыялом шуоз. Та сярысь со мыным кӧня ке пол вералляз ни.

Я, политотделэ ӧтизы. Кивалтӥсь шуэ: одӥг арлы ке но службае кыль, сэре бригадаен кивалтӥсь луод, военной училищеын дышетскод. Нош мон шуисько: школае йылпумъямтэ на. Ма, мар, пе, со школа, али ик комбригаез ӧтё, подшефной школамы вань, куинь толэзьлы уяны кошкылэмед бере берытскод но школаез йылпумъям сярысь аттестатэд луоз ни. Училищеын дышетскытозяд, ваньзэ тодад ваёд ай. Кызьы но ӧз выры мылкыдме бурдъяны, мон пумит луи. Кык пол дораз ӧтчаз. Эх, шуэ, ӧз быдэсме осконъёсы. Бертэме бере ӝыт школае дышетскыны мынӥ, заводын ужаны ӧдъяй.

- Заводын ужды тӥледлы зэмзэ но яра вал, яке кулэ шуыса гинэ тыршиды-а?

- Вань ужез сюлмысь но ӟеч лэсьтыны тырши. Электромеханикая заводын тямыс толэзь гинэ ужаса вуттӥ - кивалтӥсьмы ӧтиз. Выль участок, пе, усьтоно, выль приборъёс бичано.

- Кылзы ай боцман, - шуэ кивалтӥсь, - тон мыным али боцман сямен ик кулэ луод. Мар тынад отын детальёс бичась луыса тыршемед? Со уждэ тон кемалась пӧрмытӥськод ни. Давай, кивалтыны дышетскы. Тынад тодӥськод-а кыӵе зол пӧрмоз, эн пумитъяськы гинэ!

Мон шуисько:

- Кӧня инженеръёс, техникумез йылпумъям адямиос, нош мон школаез но ӧй быдты на.

Нош кивалтӥсьлэн мугорыз гондыр быдӟа. Йырыз но чыртыез одӥг зӧкта. Ачиз со нюръяськонъя спортысь мастер вал. Шорам мыр-мыр учке но шуэ:

- Мон дорозь будӥд ке, дышод ай. Нош тон понна мон куинь инженерез сёто. Ӵуказе ик выль ужан интыяд пот! Документъёстэ мон кадръёсъя отделэ келяй ни. Укмыс толэзь ӵоже мастер луыса ужай. Цехын быръёнъёс нуналэ тылпу пуромиз, со кивалтӥсез куштӥзы, одӥгзэ валтӥсь мастерез цехен кивалтыны пуктӥзы. Табере таиз дораз ӧтиз но шуэ:

- Мон тонэ ас интыям валтӥсь мастере пуктӥсько.

- Уг мыны, мыным школаез йылпумъяно на. Ӝыт школае 11-тӥ классэ ветлӥсько, нош татын уен-нуналэн ужано луоз. Так но кӧня нуналзэ ни заводысь потатэк улӥсько!

- Кыӵе школа?! Жингырты отчы, вера: уг быгатӥськы ветлыны, озьы гинэ оценкаос мед пуктозы. Ачид ке ӧд, мон мыно но куро.

- Уг, сыӵе аттестат мыным кулэ ӧвӧл, ачим дышетско.

- Ярам, вай кидэ, ӵуказеысен тон - валтӥсь мастер. Дышетскондэ кызьы ке пӧрмытод.

- Нош асьтэлы адямиосын кивалтыны кельше-а вал?

- Мынам пересь дядяе эксэй армиын корнет луыса служить каремын. Гуртын шулдыръяськонъёс дыръя офицерлэсь формазэ дӥся вал. Вылаз - китель, пыдаз - сурон сапегъёс. Эх, эктэ вал дак пыдчиньыосыз вылын гинэ!

Дядяе зол кивалтӥсь, хозяйственник вал. Мынам кивалтыны, ужез радъяны быгатэме солэсь пыӵаса кылем. Со сямме, луонлыкъёсме шӧдытэк ӧз кыле, дыр, кивалтӥсьёс но. Соин ик монэ ялан ӝутыны, валтӥсь инты сётыны тыршизы.

- Нош кызьы заводын ужась адями шӧдтэк шорысь юрист луиз?

- Таизлы ваньзы паймо. Ма, озьы луиз ни, шуисько. Нош аслам пичи дырысеным туж-туж бадӟым мылкыды вал врач-хирург луыны. Малы? Нырысь ик, врач тӧдьы халатэн ветлэ. Мон малпасько вал эмъясьёс асьсэос ноку уг висё, котьку чебересь, чылкытэсь. Ожмосын вал мынэсьтым ог вить ареслы бадӟым пияш. Со мединститутэ дышетскыны пыриз, каникулъёсыз дыръя Ожмосысь медпунктын тӧдьы халат дӥсяса ужаз. Эх, со мынам сюлэмам пыӵаз ук! Но ачим та сюресъя мыныны ӧй быгаты.

Дышетскытозям ялан ужай заводын. Врач луон сярысь малпанъёсы йырысьтым ноку ӧз кошкылэ. Но мон валасько вал: мединститутын дышетскыны уг быгаты, заочно амалъя тодон-валан басьтыны отын уг луы. Кин монэ сюдоз-дӥсялоз?

Одӥгез эше Пермьысь университетэ юристъёсты дасясь факультетэ дышетскыны пырем, ачиз уголовной розыскын милициын ужа. Пумиськиськом ке, мар но уг вера вал! Книгаоссэ возьматъяз. Озьы мынам но мылкыды ӝутскиз, Казаньысь университетэ пыри, юрист луыны малпай. Кыӵе ке романтик мылкыдын отчы мынӥ.

- Та ик луиз-а заводэн люкиськонды?

- Ӧз ай. Дышетскытозям весь ужай мукетаз - электромеханикая - заводын. Нош витетӥ курсысен ӵектӥзы судья луыны. Мон дэйми. Ӧдъясько вал милициын ужаны, нош мыным шуо - судья луоно.

Ветлӥ судэ, тодматски отысь адямиосын. Соку республикаысь Вылӥ судэн кивалтӥз А. А. Корякин. Мон стажировкаме со дорын ортчи, со ик монэ дэмлам Ижысь Октябрь ёросэ судьялэн интыяз. Соку мон заводын цехен кивалтӥсьлэн воштӥсез вал ни. Тӥни озьы 30 аресме тырмытыса, быдэс ёрослы судья луи.

- Нош эмъясь луымтэды понна уд жаляське-а?

- Жалянэ ӧвӧл, но сюлмам маиз ке кылиз ик. Асме ачим кытӥяз хирурген адӟисько. Хирурглэн кадь сямы мынам: кышкась, юрдӥсь ӧвӧл. Операция лэсьтыку, киы ноку но ӧй куалекъясал.

Мон трос ветлэмын, адӟемын. Милям кулэм адямиосты кырылонъя стажировкамы но вал. Но чакласько ке, али уже туж яра. Мон та ужлы вордӥськи кадь потэ ни. Судья но калыкен ужано, солы юрттоно луэ ук. Врач мугорез эмъя, нош юристлы, тужгес но судьялы, адямилэсь лул-сюлэмзэ эмъяно луэ. Мон, хирург выллем, калык пӧлысь уродзэ шедьтыса, лек пыктосэз палэнтыны, пытсэт сьӧры келяны, кулэ.

- Тазьы учкыса, тӥ туж лякыт адями. Но судьяослэсь уноез кышкало. Тӥ со кышканэз шӧдӥськоды-а?

- Прокурорлэсь, судьялэсь кышкан - со Россиысь калыклэн аспӧртэмлыкез. Ма, оло, мукет азьын но со озьы. Университетын дышетсконме тодам ваисько ке, судья доры пырыны кепырасько вал. Кышкан но со ӧй вал кадь, но астэ чалмытгес возиськод. Адӟиськод: судья уг но серекъя, трос уг вераськы, шорад учкоз, бумага гожтоз но пытсэт сьӧры пуктоз кадь.

Судья луыса ужатозям ялан тырши асме ачим мурт интые пуктыса учкыны. Лякытгес вераськоно, весь чурыт, лек вырид ке, адями ассэ ватоз, судьялэсь со ӟечсэ уз ни, уродзэ гинэ витёз. Сыӵе дыръя тынэсьтыд нимтулдэ кылыса гинэ, адями кабинетад дыр куалекъяса пыроз, номыр верамез уз лу ни. Улонын мон оломае но адӟи, ачим но огшоры ужась адями вал. Котырысьтым адямиослэсь ӟечсэ ас пушкам пыӵатыны тырши. Соос монэ дышетӥзы. Соин ик 35 арлэсь кема судья луисько ни ке но, чурыт сюлэмо ӧй луы.

- Али судъёс мултэс лякытэсь, нош законъёсмы лябесь кадь уг поты-а?

- Ляб интыос вань. Улонмы шуак воштӥськиз. Азьвыл профсоюзъёс, пионер, комсомол адямилы кызьы ке юрттылӥзы. Нош собере пушкамы буш кылиз. Ми, мӧйыос, кызьы ке сое вормим. Нош пинал калык умойзэ ӧз адӟы ни. Гуртын улон туж урод луиз. Уноез дышетскыны ӧз быгаты, ужтэк кылизы. Сыӵеос ик али трос йыртэмало, нош законъёсмы лябомытэмын. Законъёс малпамын вал ӟеч улон вакытъёслы, туала дырлы соос уг тупало. Я, шуом, законэз ум кужмоятэ, но соку адямилы дышетскыны тросгес луонлыкъёс, огъясь идеология сётоно. Законэз гинэ лекомытыса, югдурез уд тупаты. Али йыртэман туж зол алямын. Егитъёсын ужанъя огъя политикамы ӧвӧл. Ми трос потаськом калык пӧлы, вераськиськом. Но тани али юазы ке, кыӵе обществоын асьмеос улӥськом, кытчы мынӥськом, кыӵе идеологимы, кыӵе со Родина но кызьы нимано татын улӥсь калыкез мон та юанъёслы умой валэктыны уг быгаты, дыр. Мукетъёс но озьы ик.

Мон берпуметӥ шокчытозям тау каро выльдӥськон дорозь вакытъёслы аслам ортчем сюресэ понна. Соку мон дышетски. Секыт улӥ, но бадӟым осконэн. Нош али? Ӝыт ужась школаос но ӧвӧл ни ук. Ӝоген огшоры школае но шедьыны секыт луоз. Дышетскон интыос ог-огзылэсь зол висъяськозы - таиз узыръёс понна, соиз - начаръёслы.

Узыр адями малпа: судьяез мон интыяз возисько. Со озьы ик луыны но быгатоз. Кыӵе ке олигархъёс пачкатозы но ваньмыз соосъя луоз.

- Бен, кызьы сыӵе югдурез воштоно?

- Адямиез уд ни вошты. Со малпа: мон дуннеын кузё. Шуиськом ай, иворъёс кивалто дуннеен. Но иворъёсты вӧлмытон ёзъёс но кинлэн ке бурд улаз, кырым пушказ ужало.

Мукет кунъёсын узыръёс калык сярысь сюлмаськогес. Асьмелэн озьы ӧвӧл. Малы? Милям узырмизы дырыз дыръя тросгес капыръям адямиос. Соослэн дышетскемзы, калыкен ужан опытсы ӧвӧл. Толон пытсэт сьӧрын пукиз - туннэ узырмиз. Сыӵе муртэ воштыны туж секыт.

- Николай Васильевич, судын ужам сяна, тӥ министр но вал ук.

- Нырысь мон Ижысь Октябрь ёросын 14 ар ӵоже судья вал, собере судлэн председателез луи. 1984-тӥ арысен юстицияя министрлэн воштӥсез луыса ужай, бӧрысь горисполкомлэн преседателезлэн воштӥсез вал. Собере гинэ юстицияя министр луи. Ужай обкомын эскеронъёсъя комитетын. Сэре обкомез быдтӥзы но, Министръёслэн кенешазы юристъёслэн отделэнызы кивалтӥ, нош 1993-тӥ арысен Ижысь Устинов ёросын судья луи. Кык ар ортчыса, Удмурт Республикаысь Вылӥ судьялэн воштӥсез каризы, нош ар улыса - нырысетӥ воштӥсез.

Со сяна, дас ар ӵоже мон пырисько ни Россиысь судьяослэн кенешазы но со дыре ик кивалтӥсько Удмуртиысь судьяослэн кенешенызы. Вань уже судэн герӟаськемын вал, ваньмыз тунсыко потылӥз. Туэ чакласько ни пенсие кошкыны.

- Улляло шат?

- Ма, кин монэ уллялоз? Судьяын 70 арес тырмытозь ужаны луэ. Но аслам шутэтскеме потэ ни. Мар ужало пенсие потыса - уг на тодӥськы, но туэ внуке школае мыныны кулэ, сое келяса-пумитаса уло, дыр. Нылпиосылы но юрттэм потэ ук.

- Романтик мылкыдды али но шӧдӥське. Зарезьын уясалды на-а?

- Зарезьёсын, океанъёсын мон аслэсьтым шудме ӧй шедьтысал. Улон сюресэ туж бугрес но тунсыко вал. Номыр сярысь но уг жаляськы. Кытын вордӥськи, отын ик кулэ луи. Со понна ӧпкелёд шат?

Источник:

Кадров Н. В. Йыраз - закон, сюлмаз - Есенин / Н. В. Кадров ; записала Е. Миннигараева // Удмурт дунне. - 2007. - 20 апр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"