Галиханов Анатолий Шарифьянович

Материал из Воршуда
Перейти к: навигация, поиск

Быдӟым Вӧсясь: Инмар визь-нодзэ мед сётоз

Galihanov-300x208.jpg

Анатолий Галиханов — Башкириысь Алтау гуртысь эшшо одӥгез йӧно воргорон. Удмурт Элькунысьтымы тодмо суредасьлэн Касим Галихановлэн но дано артистлэн Кадим Галихановлэн вынзы. Миым «Удмурт кизилиос» рубрикамы улын гожъям на соослэн Свердловск улосын улӥсь сузэрзы Марина Ягуткина сярысь. Шэри выжыысь (кӧня ке ар талэсь азьло Галихановъёс аткайзылэн нимызъя сыӵе огазеяськон кылдытӥзы) тямыс сузэр-вынъёслэн малпамзыя, пӧлысьтызы тужгес кужмоез — соослэн покчи вынзы Анатолий.

- Шуркынмон пумын Тӥ зарнияськиды, шуо, Анатолий Шарифьянович?

— 50 арес тырмиз, сое зарни шуо-а? Но милям вордскем нуналъёсты сокем данъян сяммы ӧвӧл. Вылэгес пуктӥськом вӧсяськонэн герӟаськем праздникъёсты. Соин ик вордӥськем нуналме ӧй пусйы. Но Выль аре куно туж возьмасько. Ми тямыс нылпи бере, ваньмы пӧртэм интыын улӥськом, котькудӥзлэн аслаз ужез, нош праздник дыръя ваньмы гань-гань ӝӧк сьӧрын пуком, лабыртом.

Огазьын луон мон понна тужгес бадӟым кузьым. Ваньмы кузпалъёсынымы, нылпиосынымы куамынлэсь трос люкаськиськом. Ӝӧкез кузёмытытэк уз луы. Коркамы пичи ӧвӧл кадь, но ваньмы дэмен луиськом ке, выж вылын лёгиськыны инты уг лу ни — кругом кӧло.

Туннэ нуналлы тужгес бадӟым шумпотонэ — анкаймы улэ на. Али со таманлы Свердловск улосэ дыдыос (сузэръёс) доры кошкиз. Туж учко нылъёсыз сое отын, олокыӵе но эмъюртъёстӥ нулло, врачъёслы возьмато. Милям татын сыӵе луонлык ӧвӧл ук. 77 арес ни анкайлы, нош со ми понна ялан пиналъёс понна кадь сюлмаське. Мӧзме туж. Ма, ачим но агайёслэсь-дыдыослэсь туж мӧзмисько. Берто ке, шутэтскыны амал уг сётӥськы — изьыны-а мар-а бертӥды шуыса сайкатӥсько.

Мынам вераськеме потэ ук визьмо адямиосын. Касим тани мае но уг тоды, мар но солэн йыраз ӧвӧл. «Шэри» огазеяськонмес но со малпаз. Ваньмес ӝутка, творчествоен вырыны лӧпкытъя.

- Нош агайёсты Тӥледыз туж дунъяло?

- Озьы мед луоз инь со — ог-огмес дунъяса, ог-огмылэсь ужаммес гажаса вераны мед пӧрмытом. Палэнысен учконо ке, Касимен Кадимен тодмо-даногес, веранэз ӧвӧл. Соос асьсэды шедьтӥзы Удмурт шаерын. Нош мон ас гуртамы, атай юртамы кыли.

- Агайёсты сьӧры кыстӥськыны мылкыдды ӧй вал-а?

Егит дырыз

Кызьы ӧй вал — кӧня быгатӥ, весь соосъя. Дышетскон ласянь верасько. Школаын но туж тырши семьяез уськытонтэм вылысь. Касим, Новосибирскын архитекторе дышетскыкуз, доре бертылыкуз, ялан кыӵе ке книгаос-альбомъёс вае вал. Али сыӵе изданиосты учкиськод но, туж дуно сыло — 600-700 манет. Кытысь студент уксёзэ окмытэ вылэм. Но созэ чын верасько: со книгаос туж юрттӥзы мыным суреданэз валаны. Анатомия книгая дышетскемме тани али но тодӥсько. Огкылын вераса, армия бере мон, семьяысьтымы агайёсы сямен, кошки суредаськисе дышетскыны — Свердловск улосысь Краснотурьинске. Собере сьӧрам лыктӥз Марина сузэре.

Училищеын тунсыко потӥз, но городын ӝокасько вал. Мыным отын номыр ӧз яралля. Асфальт вылтӥ ветлыны пыдъёсы пумитъяськизы. Музъем вылтӥ вамышъян понна ялан сюрес урдсытӥ ветлылӥ. Куд-огез шорам паймыса учкылӥзы, нош мон аслым озьы гинэ буйган шедьтылӥ. Дышетскыны тырмоз шуи, лэся, институтэ пыронъёсын ӧй выры ни, мар ас поннам кулэ, басьтӥ, отӥыз тыршыса вуоз, малпай.

Озьы ик луиз кадь. Ас гуртам берытскеме, татчы кылеме — со мынам улонэн гожтэм шудэ. Инмар валаса озьы карем, дыр — покчи пиен вордытэм, шуисько. Удмуртъёслэн котьку озьы вал ук: атай юртэз возён, анкаез утён — покчиез вылын.

- Башкир удмуртъёслэн кен лушкан сямзы вань — тӥляд но шудды озьы капыртэмын-а?

— Ай кык пол лушкамын! Лилияен ми тодмо вал, но лушкан сярысь мон ӧй малпаськылы, со пинал вал ай, 17 арес. Нош туганъёсы (ӵыжы-выжыосы), шӧртчиос, кутскиллям но лушкаллям, аслым но вератэк. Гуртазы мотоен мынӥм вал. Сое, ыж пумитаны потэм муртэ, коляскаязы пуктӥллям но ми гуртэ нуиллям. Нош мон солэн гуртаз кыли, атаез кошкыны уг лэзьы, берыкты нылэз, шуэ, лекъяське. Ма тани мынам но али Диана нылылы 17 арес, аслым но ӧй кельшысал, пинал муртэ озьы карысалзы ке. Лилияез берыктытэк ӧйлась. Но ар ортчыса, со дышетсконзэ йылпумъяз, 18 арессэ тырмытӥз но, Выль ар азьын нош лушкай. Та рад семьяосыз ӧз куаретэ ни, сюанлы дасяськыны кутскизы.

Табере тани 24 ар улӥськом ни, кык пи но ныл будэтӥськом. Максиммы ужан арлыдаз ни, Артёммы Свердловскын лесотехничекой институтын дышетске, Диана туэ школазэ йылпумъя. Кузпалы туж лачмыт, ужась, анкаен но, туганъёсын но кыл шедьтэ. Куно пумитано ке, олокытысь-мар ӝӧк выл тыр пуктӥське.

Огез урод — гуртын уж быриз. Лилия тани али басьтӥськиз ай почта нуллыны, нош мон 23 ар школаын ужаме бере безработной луи. Гуртысьтымы школаез ворсазы. Макем мыло-кыдо ужаськом вал нылпиосын! Арлы быдэ сямен кыӵе ке конкурсъёсын вормись луылӥм, ог аре «Дышетӥсьлэн но дышетскисьлэн творчествозы» ёрос конкурсын вань интыосты милям школаысь нылпиос басьтӥзы! Али пудо сюдӥсь мон. Кык скал, ветыл вордӥськом, парсь, кролик, чипы-курег, ӟазег — лумбыт берганы тырме… Гужем муш котырын бергасько на, сад утялтӥсько.

- Ма, агайды верамъя, тӥ нянь но ас киыныды будэтыны быгатӥськоды…

Школаын дышетскон вакыт

— Дауртӥм ог аре. Колхоз музъем пай люкылӥз. Музъемез уд аналты ук, малпам ю-нянь кизьыны. Гырыны гинэ муртъёсты медъяй, отӥзэ весь ваньзэ асьмеос йыринтӥм: вашкалаос музэн, кудыысь пазяса, кизим-марам, нош гужем пумын чабеймес сюрлоен арам. Анкаймы но весь сьӧрамы ветлӥз, юрттӥськиз. Доре пичи машинаен ворттыса, тышкам-кутсам, юзэ шертыса, изӥм, пызь лэсьтӥм. Кык мешоклэсь трос луиз. Озьы ӝыны толзэ копак асьме киын будэтэм нянь сиим. Туж корел потӥз, базар пызен уд ӵошаты. Капчи уж ӧвӧл со, изъянэз но трос, но со понна мон тодӥсько: семьяе, нылпиосы котькуд учырысь потыны быгатозы, сютэм ноку уз быре. Соос ас вылазы шӧдӥзы-адӟизы няньлэсь дунзэ.

- Гуртпӧр вискын Тӥ вуттӥськоды на творчествоен вырыны: кылбуръёс вордыны, Интернетын Элен вӧсьлы сӥзем сайт нуыны, чебер киужъёс лэсьтыны…

— Инмарлэн шыкырез (бакелез) вань ке, котьмар вутсконо. Кылбур юромо уг гожъяськы, чуръёс лыкто Вӧсь ортчытэм, ӵыжы-выжыосын адӟиськем бере. Киужен вырон аткайлэсь выжемын. Туж кибашлы воргорон вал, со сярысь гожъяды ни. Кулытозяз адямиослы корка лэсьтӥз, пу вӧлӥз-чеберъяз.

Мон но ас пиосмурт ужме лэсьтӥ ни: аткай юртэ вӧзы выль корка ӝутӥ, но вуж юртмес утисько. Сэрттыны киы уг пыры, синпель кадь дуно потэ. Ма собере мастерскойлы туж усто. Киужъёсмес, асьмелы сяна, базаре но поттыны тырмытӥськом, коньдонтэк уг луы ук нокызьы, пиналъёсты дышетоно. Собере, со выжы йылол мед луоз ни, пиосы но песятайзылэсь мытэм ужзэ мед азинтозы.

- Тӥ бадӟым семьяын будэмын. Ӵошатылӥды-а асьтэды ӧжыт нылпиё семьяосын, ӧд вожъяськылэ-а тросгес преник сиемзылы? Мар тужгес но тодады кылиз пичи дырысьтыды?

— Ситэк будыса, табыдӟа ӧй луысал (серекъя). Мугорыным агайёсме но ортчи тани, соослэсь прениксэс сииськем, дыр. Так-то огпол сыӵе учыр вал: мултэс трос сиськемысьтым, песяе вышкые ворсалляз. Ма, лумбыт сютэм бызьылӥсько, дыр, но, ӝыт ӝӧк вылын маке вань, ваньзэ лӧпкатӥсько, нош собыдӟа семьяын ваньмызлы кӧттыр кулэ ук. Но ми ёрмыса ӧм улэ, аткай весь ужаз ук.

Тодам кылиз, кызьы, ту-уж бадӟым ӝӧк сьӧры пуксьыса ваньмы дэмен сиськиськом вал. Песятайлэн но аткайлэн интызы тӧр шорын. Соослэн ӝӧк дурзы шоры весь учкисько вал — тыкмач кораса, лусйиськемын.

Туж тодӥсько на Вӧсь йылолэз. Сое гажан мылкыд пичи дырысен пыӵатылӥськиз. Мын ай, лёга юнме дыръя Вӧсь лудэз — одно маке умойтэм луоз. Чорыганы мыныку но, палэнэгес кариськиськом вал — Вӧсь луд тонэ матысен медаз адӟы. Вераллязы, одӥг воргоронлэн мушъёсыз потыса Вӧсь лудысь писпуэ пуксиллям. Жаль ук кельтыны, со мушъёсыныз валче вайзэ вандыса дораз ваем. Но со учыр бере вань мушез бырем. Мукетыз воргорон Вӧсь лудысь веник тӥям — быдэс вылтыраз яра потэм. Кин ке серем каре ай: озьы укшаз. Но кӧня ар улӥсько ни, кӧня тодӥсько, Вӧсь луд сантэмамез уг чида. Отысь али ке но турынзэ но уг турнало, пудоез матаз но уг лэзё. Со котырын жоб вераськыны, кесяськыны но уг яра.

- Анатолий Шарифьянович, та палась удмурт гуртъёсын али ке но туж возисько вашкала учконъёс, улон сямъёс, йылол дӥньёс. Ваньмыз бӧлякъёслэн син азязы. Соин валче бадӟым дан, дыр, Тӥледлы оскемзы — Быдӟым Вӧсясь каремзы.

Элен вӧсь

— Соиз озьы — Инмар уж ук со. Выжыысьтымы мон нырысетӥез Куриськись ӧвӧл — та ужез ми пичи дыръя ай ог кык арзэ нуиз Чиндэр гуртын улӥсь ӵужаймы. Кышномуртъёслы куриськыны уг яра шуо, но пересь вӧсясьёс улонысь кошкизы, нош Вӧсь нуисьтэк нокызьы уг яра, соин амалыз ӧй вал.

Вуж корка интыын азбарамы но Вӧсь сэрег вал, сое туж утялтыса возизы. Отын аткай но писькай (песянай), зэмос вӧсь дӥсен пӧрмытскыса, вошъяськыса вӧсяськылӥзы. Нош ми, пичиос, со дыре ӝӧк котырын, вӧсям ӝук возьмаса, пукимы.

Алтау ноку Вӧсясьтэк ӧз улы. Берло аръёссэ мыным оскизы тани. Оскемзэс быдэстыны тыршисько. Асьмелэн осконмы аспӧртэм, визьнодо, чебер. Вашкала дырысен вань калыкъёс тыршизы асьсэ калыксэс огазе люканы. Та ужын туж бадӟым юрттэт сётӥз Инмарлы оскон. Асьмелэн осконмы вашкала вакытъёсы кылдэмын. Дунне вылын вань калыкъёс асьмелэн кадь оскон пыр ортчизы, собере гинэ выль осконъёс кылдылӥзы: христианство, ислам, буддизм но мукет. Асьмелэсь осконмес соос язычество, многобожие яке выль кылын политеизм шуыса нимазы. Уката тупа кадь пантеизм. Солэн пуштросэз: Инмар — Инкуазьын, тон пушкын, котькытын. Нош Инкуазь — Инмар пушкын.

- Данакез удмуртъёс черке пыртэмын, православной христианъёс луо. Тӥ улӥськоды мусульманъёсын артэ. Тӥ висъяськыса кылемын. Секыт ӧвӧл-а озьы? Тӥляд оскондылы дурбасьтӥсьёс трос ӧвӧл, нош ултӥян кылъёс чузъяськыло.

— Адямилэн котькыӵе осконэз мед луоз, со гажаны кулэ мукетсэ. Мукет Инмаръёсыз, Кылчинъёсыз сантэм карыны, серекъяны уг яра. Одно ик пунэмзэ берыктозы. Али вакытъёсы калык выльысь берытске Инкуазь пала, выльысь вырӟыто вашкала ӵыжы-выжыоссылэсь осконъёссэс, языческой огазеяськонъёссэс, конфессиоссэс. Нялтас вераса, милям Вӧсьмы регистрировать каремын религиозной огазеяськон сямен Башкортостанысь Юстиция министерствоын. Осконмы али выль кужымен ӝутскыса мынэ. Уноез вунэмын, уноез выльысь улӟытэмын. Шонер вераськоды, ваньмызлэн милемыз валамзы уг поты, тани учке ай, телевидение пыр православилы сӥзем нимысьтыз каналъёс вань, нош ми сярысь ог ивор но уд кылэ-адӟе, газетэ но туж шер гожто. Соин милям котькудӥз ас семьяяз валэктон уж нуэ, нылпи вӧсь сямъёсты валаса будыны кулэ.

Но артэ улӥсьёсын, мусульманъёсын, ми туж тупаськом. Аслэсьтыз осконзэ гажась адями уго мукетсэ но уг ултӥя. Нош соос туж чаклало сое. Тани милемлы Вӧсь ортчытон понна Башкириысь национально-культурной центр но коньдон висъя, артэ колхозысь бигер председатель така сётэ, пурты кузьма, айбат мед луоз шуэ. Кӧня ке ар талэсь азьло куазь туж кӧс улӥз, бигеръёс, ми доры лыктыса, куриськыны косӥзы: вӧсяське, пе, тӥляд куриськондылэн кужымез туж зол. Уд оскелэ, но зориз ук.

- Нош асьтэос мар малпаськоды?

— Озьы, шонер верало. Тани гуртысьтымы воргоронъёс но, мынам адӟемея, Вӧсе ветлэмзы бере чылкак воштӥсько, юыса ветлӥсьёс ӧвӧл ни та вие, син медаз усьы. Тамаксэс но пумен куштом, шуо кадь. Кудӥз-огез куштӥськиз ни.

- Оскондылэсь ӝутскемзэ зэмзэ но возьматэ Элен вӧсез улӟытэмды но. Отчы табере Удмуртиысь черке пыртэмъёс но мыло-кыдо пырисько. Вӧсь бадӟым праздниклы пӧрме.

— Озьы. Башкортостанысь но Удмурт шаерысь Камсьӧр удмуртъёслэн огазеяськонъёслэн ӵектэмзыя улӟытэмын со. Мон Элен вӧсьлэн вӧсяськисьёсыз быръемъя, та ужрадлэн тӧроез луисько. Тыршиськом, эсэпсэ санэ басьтыса, йылолмес туала дуннее вӧлмытыны.

Элен вӧсь — тужгес бадӟымез, чылкытэз праздник. Отчы котькудӥз пыриськыны кулэ. Миым Танып шур дурамы сюрслэсь трос адями люкаськиз. Лыктытэк кылё висисьёс но уж дурысьтызы мозмытскыны быгатӥсьтэмъёс гинэ. Но соослы но айбат медло шуыса, нимысьтыз адями соослы одно доразы вӧсям ӝук нуыса кельтэ. Мукетъёс понна, коть пичи тон, коть мӧйы, Вӧсе лыктытэк кылён — бадӟым сьӧлык.

Галиханов агай-вынъёс

Элен вӧсь ортчытон праздникмес мукет сямен верад ке — паломничество но шуыны луэ. Малы ке шуоно асьмеос мукет Вӧсь (Священной) интыосы куриськыны ветлӥськом. Дунне вылысь пӧртэм калыкъёс но ветло асьсэлэн осконзылэн Вӧсь интыосазы куриськыны, кыдёкын, мукет кунын ке но интыяськемын. Азьланяз малпаськом на «Удмурт Элен вӧсь» дэменлыклы юрт — Куала — ӝутыны.

— Мар сярысь нош куриськиськоды огсыр нуналъёсы?

— Инмармы мед юрттоз асьмелы ӟечсэ, умойзэ, выльзэ улонэ пыӵатыны. Мед сётоз асьмелы визь-нод, азинлык, татулык, шудбур, тазалык. Вордэм нылпиосмылы азинлык, йӧнлык мед сётоз, мед утёз-вордоз соосыз урод муртлэсь, кырыж сюреслэсь, юонлэсь. Ноку но медаз тодэ нылпиос ултӥямез. Ӟеч калыклы ярась мед луозы. Ӟеч малпам ужъёссэс пумаз-йылаз вуттыны мед быгатозы, Югыт Инмаре Кылчинэ!

Шэри выжылэн гимнэз

Анатолий Галиханов

Буре ваёме асьмелэсь выжымес.

Вералом. Кырӟалом. Данъялом ас дӥньмес.

Нимъёссэс соослэсь тодамы возёме.

Ушъяно ужъёссэс вылӥе ӝутоме.

Шэрилэн нылъёсыз, Шэрилэн пиосыз, Огкылысь, огымысь асьмеос уломе.

Асьмелэсь выжымес асьмеос утёме.

Шэрилэсь ӟеч данзэ улонэ вӧлдоме.

Жингыртӥсь куараен асьмеос кырӟалом.

Калыклэн сюлэмаз тылгизьы но пазьгом.

Буро ужъёсмес асьмеос быдэстом.

Осконо мылкыдъёс соослы пыӵатом.

Аръёс пыр ортчыса, туганъёс, улонын кельтоме ӟеч ужъёс.

Вордэм нылпиос сьӧрамы будозы, мытылэм ужъёсмес азьпала нуозы.

Весь тылэн мед гомӟоз асьмелэн сюлэммы.

Душесэн бурдъяськоз ужано мылкыдмы.

Инмармы мед утёз Шэрилэсь выжызэ.

Котырысь мед пазьгоз выжылэсь дышмонзэ!

Источник:

Галиханов, А. Ш. Быдӟым вӧсясь: Инмар визь-нодзэ мед сётоз / А. Ш. Галиханов ; записала З. Рябинина // Удмурт дунне. - 2012. - 14 дек. - С. 6, 11 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"