Винокурова Светлана Михайловна

Материал из Воршуда
Перейти к: навигация, поиск

Усисько но выльысь султӥсько!

С. М. Винокурова

Светлана Винокуроваез пичи дыръяз муш мумыен ӵошато вал – быдэс ульчаысь пиналъёсты котыраз люкаса возиз. Сямыз ӧз воштӥськы аръёсыз йылэмъя но. Табере со котыраз биньыны быгатӥз Ижысь вань удмурт кылъя визьнодасьёсты. Туннэ со шаерысьтымы одӥгез адӟем карымонэз дышетӥсь, «Дышетон» нацпроектлэн конкурсаз вормисе потэмын. Ужез пусъемын уно данъян грамотаосын.

- Кыӵе музъем вылын вордскем сыӵе ӟырдыт нылкышно?

- Пичи Пурга ёросысь Иваново-Самарскысь луисько. 4-тӥ классозь дышетски асьме гуртын ик, собере ветлӥ ни Норьяла. Отын улӥм интернатын. Соку ик, малпасько, дышетсконо луиз ачид понна нюръяськыны. Ӧжыт гинэ лябдэ возьматод – бырод.

Атае но анае быдэс улонзэс колхозын ортчытэмын. Атаелэн, Михаил Афанасьевичлэн, киосыз зарни – котьма ужез шудыса кадь лэсьтэ. Тракторист но вал, бухгалтерын но пукемын.

Анае но, Елизавета Михайловна, нокыӵе ужлэсь уг кышка. Семьяямы ньыль пинал будӥм: кык ныл, кык пи. Мон – кыкетӥез. Апаеным милемлы золгес йӧтэ вал. Кызьы асме тодӥсько, ялан анаеным ӵош фермае ветлӥ. Будэмъямы асьме коже но пудоез утялтӥм ни. Покчи классъёсын дышетскыкумы ай, кунян сюдыны ветлӥ. Турынэз парон понна бадӟым пуртыысь пӧсь ву омыръяно луылӥз. Кызьы меда отчы ӧм усьылэ? 5-тӥ-7-тӥ классъёсын дышетскыку, скал кыским. Одӥгез Мунё нимо скалмы туж ӵыжаськись вал, куддыр сое киын но кысконо луылӥз. Ӵыже, уськытэ, мон султӥсько, нош ик улаз мерскисько. Али скал котыре монэ лэзь ай – юзыр-кезьыр луисько. Бадӟым классъёсын дышетскыкумы, ош сюдӥм. Районамы потӥсь «Маяк» газетэ но гожъязы: Жданов нимо колхозысь Елизавета Решетниковалэн пудоез котькинлэсь зол куаем, пе. Анае интые монэ гожтоно вал шуыса, серекъяме но вань. Тодӥськоды-а, мар быдӟаесь вал ошъёс? Сюръёссы нош кыӵеесь! Али ведь соосты 300-400 килограммозь гинэ будэто на, азьло соос тоннаозь вуо вал. Мертаны кулэ ке, ваньзэс лэзиськом, собере, думылыны турттыса, ёрмоно – киос чыртыосазы уг сузё. Анаелэсь али юасько, уд кышкаськы-а вал милемыз со ошъёс пӧлы лэзьыны? Йырын но ӧй вал, шуэ. Озьы ук гуртын: ужез лэсьтоно, секыт-а, кышкыт-а – та сярысь чик малпаськоно ӧвӧл.

Зэмзэ вераса, анае ой-ёй-ёй лек вал! Ачиз фермае кошке ке, дорын милемлы тачак уж кельтэ. Одӥгзэ коть эн лэсьты ай – бадьпу ньӧрез котьку дась. Соизлы но али тау шуисько – ужаны дышетӥз. Эшъёсы но туж кышкало вал анаелэсь. Нош шудэм потэ бере, нош ик дорамы лыкто. Сыӵе но учыр вал. Мылкыд ульчае куриське, нош анае олома мында уж кельтӥз. Апаелэн йыраз шуккиз: тӥ, пе, пичиос, картошка палалэ, корка котырын утялтӥське, нош мон со вискын сиён пӧрало, ӝӧк дасяло. Пуктӥз сиён, эсьма, юонзэ но вунэтымтэ – анайлэсь настойказэ шедьтэм. Ма, юим ми сое, кудӟытозямы…

Туж яратылӥ лыдӟиськыны, но солы дыры чик ӧй вал, лушкаськем кадь, книгаез кутылӥ. Вал лушкем интые – лапас йылын. Отын одӥг-ог шыпытак пукылӥ. Пичигес гинэ сандыке но вал, отчы вашкала арбериосты тырылӥ. Тужгес «пересез» вал 1870-тӥ арысь кылем бутылка. Арез бордаз ик гожтэмын. Нырыз тэшкамын ке но вал ини, мон сое туж ути, ялан маялляй, миськылӥ. Соку малпасько вал: будӥ ке, вашкала арбериосын музей усьто. Эшшо дышетӥсь луо но одно бызё гуртысь трактористлы. Таиз кытысь малпанэ потӥз – чик валантэм.

- Но малы ке городэ кошкиллямды, заводэ интыяськиллямды…

- Школаез йылпумъян аре апае бызиз. Быдэс гужем, лэся, сюанлы дасяськиськеммы. Сентябрь вуиз но – мон нокытчы дышетскыны пыремын ӧвӧл. Анае шуиз: мын, заводэ ветлыса, эскеры. Озьы вуи Иже. Одӥгаз заводэ мынӥсько – уг куто, мукетаз куриськисько – уг басьто. Ма, 16 арес сяна мыным ӧвӧл! Я, «Ижмашын» шуизы: комплектовщик луод. Марзэ-созэ уг валаськы ай, бертӥ но атаелэн уж дураз мынӥ, отысь кортъёсты кутылыса, шуисько: таӵеез вань мынам уж дурам, таӵеез вань. Атае шуэ: ма, нылы, тон кладовщик-а, мар-а. Комплектовщик со сыӵе ик кладовщик вылэм!

Нош дышетӥсь луон мылкыдме быдэстӥ ук! Заводын ужакум ик, заочно амалэн дышетскыны кутски УдГУ-ысь филологияя факультетын. Удмурт кыллы, удмурт сям-йылолъёслы яратон мылкыд пыӵатӥз Зинаида Борисовна Вознякова. Со историен урокъёсты туж лад-лад, паймымон тунсыко ортчытъяз. Висказ нуиз на удмурт фольклорлы сӥзем факультатив. Нош математикалы дышетӥз Галина Матвеевна Шарипова – таиз но нылпиосын огкыл шедьтыны туж быгатэ вал, классэн кивалтӥсь туж ӟеч вал. Озьы школаын 17 ар ужасько ни, но яратоно дышетӥсьёсылэсь манеръёссэс син азям али но возисько, соослэсь адӟем карыны тыршисько.

Ижысь 17-тӥ школае но мон адями кадь ӧй лыкты ук. Заводын ужасько на вал, одӥгез тодмое шуэ: милям школаямы, пе, ӟуч кылъя но литературая дышетӥсь кулэ. Сётӥз телефон номер. Жингыртӥ – лыктыны косӥзы. Ӵуказеяз ик дыртӥд-вуттӥд пырисько ни ай директорлэн кабинетаз, шуисько: тӥледлы толон жингыръяй вал… Нокин мыным ӧз жингыръя, директор лек-лек вазиз пумитам. Таза кышномурт вал со, сямыз туж урод. Но ужзэ пыр-поч, быгатыса быдэсъяз. 17 номеро ӝыт дышетскон школае жингыръяськем вылэм. Но директор монэ кылзӥз ик, юалляськиз: быземын-а? Быземын. Нылпиед вань-а? Вань. Улон интылы уд ёрмиськы-а? Уг. Собере ӝот-ӝот шуиз: кутӥсько! Завуч паймиз ик вал: малы, пе, дышетӥсез кутоно на, буш часъёс но ӧвӧл ни.

Сётӥзы мыным туж секыт 9-тӥ классэз, шуизы: вормид ке та ныпъетэз – тон дышетӥсь. Доразы туж кышкаса пырисько вал, укыр укылтэмесь. Одӥгез адями вием понна суд улэ но кыскамын. Классысь ӧсэз усьтон азьын ик ымнырам лек маска дӥсялляй, ӧжытак серекты ай – урок сураськоз-пожаськоз. Пуксьылыны, ганяк кариськылыны чик ӧй дӥсьтылы…

- Иське, тӥ туж лек дышетӥсь, дыр…

- Школазэс йылпумъяса но, тросэз пиналъёсы дорам вуыло. Али соос шуо ни: тӥледыз, пе, туж лек кожаськом вал. Нош тӥ урод ӧвӧл, зэмлыко вылӥллямды. Пӧяськемды но уг луы, шуо. Зэмзэ но, маке шонертэмзэ вераса, эскерисько ик ке, быдэсак ӵыж-ӵыж луисько, тыбыры гинэ но гордэктэ.

Одӥг оценкаез но адямия пуктэме ӧвӧл. Вал одӥгаз классам туж ӟеч дышетскись нылаше. Уроклы дасяськымтэ. Шораз учки – ма каром? Марина, вождэ эн потты, «кык» пуктӥсько, шуисько. Озьы ке ӧй карысал, быдэс класслэн мыным осконэз бырысал ук. Нош Маринае, э-э, оло бӧрдыны, оло серекъяны кутскиз – мон, пе, нырысьсэ таӵе оценка басьтӥсько. Одӥгез пияше, али со йӧн-йӧн воргорон ини, туж урод дышетске вал. Шуэ: тодӥсько на, тодӥсько, кызьы тӥ мыным «вить» пуктӥды. Мар понна, паймисько? Одӥг кыл гинэ верай вал.

Сямы туж йӧспӧртэм, меӵак вератэк, лэсьтытэк уг чидаськы – атаелэсь со паласькем. Малы меда удмуртъёслэн «-мъяське-» суффиксы вань? Лыдӟиськемъяське, шутэтскемъяське… Мон шутэтскисько ке – шутэтскисько, яратӥсько ке – яратӥсько, ужасько ке – ужасько…

Вал сыӵе учыр: нимо-дано дышетӥсь мынам классысьтым пиналъёсын уроксэ нуэ. Мон учконо-пуконо кариськи. Классам мумы-бубытэк кылем пияш вал, сиён-юонэз но умой-умой ӧвӧл. Дышетӥсь сое доска доры поттӥз. Собере шораз кесяськыны кутскиз ук! Пияше чидаз-чидаз но, шораз мать карыса лэзиз, ява! Ӧс сьӧры валтӥ, ӝот-ӝот вераськи, валэктыны выри: тросэзлы капчи ӧвӧл, но, номыр шоры учкытэк, тыныд адями луоно… Улонэз бон вӧй вылтӥ кадь уг ортчы, но, дорам одӥг-ог пыралля, сюлмаськонъёссэ вера, визь-кенеш куре.

Малы меда куд-огез нимо-дано адямиос но ужзэс тыро-пыдо быдэсъяны уг вормо? Нош мукетъёсыз, нокыӵе нимъёссы ӧвӧл ке но, вань секытсэ ас вылазы басьто… Школаысьтымы ик тросэзлэсь дышетӥсьёслэсь кылӥсько: ой, кыӵе акыльтӥзы ни та пиналъёс, кыӵе жади ни ужаса. Ма, малы соку тон школае лыктӥд? Уждэ уд яратӥськы ке, мар татын кариськод? Ой, мон ужам котьку но туж шумпотыса вамыштӥсько!

- Огвакытэ кӧня ке уже вутскиськоды вал кадь.

- Урокъёсты нуэм сяна, Ижысь удмурт кылъя дышетӥсьёслэн методобъединениенызы кивалтӥ, Удмурт драмтеатрлэсь билетъёссэ вӧлмытъяй, школаысьтымы музеен кивалтӥ… Ма, али но озьы ик пӧрме.

Пичи дырысь одӥгез малпанэ быдэсмиз: музей кылдытӥ! Отысь троссэ вашкала арбериосты гуртысьтым ик вайылӥ, пиналъёсын ӵош экспедициосы но поталлям. Иж город администрация арлы быдэ сямен конкурс радъялля: кин кызьы ортчытэ гужем каникулъёссэ. Ми, асьмелэсь проектмес отчы ыстыса, одӥг араз 8 сюрс манет басьтӥм вал, берлозэ 3 сюрс манет сётӥзы. Музеймы узыр. Удмурт пиналъёсын мылысь-кыдысь ужасал, но, жаляса верано, городын сыӵе нылпиос ӧвӧл. Соин ик буйгатскисько ни, лэся, удмурт кылъя факультативъёсты музейын ортчытъяса – туж тунсыко. Факультативъёс дыръя мон пиналъёс пӧлы сылмемын. Куддыр кылме-куараме но уг поттӥськы, мышказы кылисько. Но шуисько: пиналъёсы, татын мон небыт ке, урокъёсын лекъяськыны но быгатӥсько. Доре ужъёссэс лэсьтытэк ветлӥсьёсты туж уг яратӥськы. Но ваньзэс одӥг мажесэн сынаны но уг яра. Ӵемысь соку ик верасько: кин «куинь» басьтыны соглаш, таӵе-таӵе ужез дорады гожъяса вайыны быгатӥськоды, «ньыль» кулэ ке, ватсаса юанъёсылы верано луоды на. Нош «вить» пукто соослы гинэ, кин аслэсьтыз малпанъёссэ-мылкыдъёссэс шара вераны-утьыны быгатоз. Эшшо куаретылӥсько: «витьёслы» гинэ дышетскисьёсты уг гажа, соос киязы ӵужон, мучоло возьыны ӧз быгатэ ке. Адями улонын котьмарлы дась луыны кулэ. Луыло ӵемтылонъёс, но султыны быгатоно, дӥсьтоно – мон ачим сыӵе. Одӥг мурт монэ пыкылӥз но вал: султоно медаз луы шуыса, усьылоно ӧвӧл, пе. Но одӥг нылпи но усьылытэк уг буды ук!

- Ӝожомылон вакытъёсты, иське, тӥляд но вал?

- Сыӵе дыръёсам бордам котьку но луо оскымон эшъёсы. Соос юртто визь-кенешен но, шорем нянен но. 40 арескам вуыса, огнам йырыным улон инты басьтоно луи на. Азьлозэ кельтӥ нылылы. Кредит мед сётозы шуыса, поручитель школа директормы кариськиз – туж бадӟым тау. Бакчаямы созэ, тазэ лэсьтыны юрттӥсько аслам ик дышетэм нылпиосы. Визь-кенешен котьку но юрттэ азьвыл бускеле Софья Николаевна Кручинина. Со но быдэс улонзэ школаын дышетэмын, туж йӧно нылкышно, табере 90 ареслэсь ортчемын ни. Урокъёслы но дасяськыкум, маке уггес пӧрмытӥськы ке, дораз йыгаськисько вал. Дӥсея но вераллямез вань: таиз уггес тупа тыныд, созэ мерта ай… Картэным люкиськыкум но, буйгатылӥз, аслым оскон кужым пыӵатылӥз.


- Иське, пинал дырысь одӥгез малпанды – гуртысь трактористлы бызёнды – татчыозь ӧзгес быдэсмы на?

- Сучыр-сачыргес бызи вал. Толэзь пала сяна ӧм пумиськылэ, кузпалъяськоно кариським. Со ӟуч интеллигент семьяысь, городысь, нош мон гуртысь потэмын. Анай-атаез бордын ик улӥм – соос туж чурытэсь вал. Лыдъяса возизы: кӧня ми коньдон вайим таяз толэзе, кӧнязэ быдтӥм – юромо тетраде гожъяллязы. Отчы медаз пусъе шуыса, подъезд азьын, нянь йырйыса, сылылэме но вань. Картэ туж кышка вал анай-атаезлэсь – соослы пумит ноку ӧз вералля. Люкиськонмы туж кема кыстӥськиз. Но улонын номыр юнме уг луы – таизлы оскисько. Картэным люкиськыны выронъям ик, эсьма, Парижез но адӟи. Зэм, зэм! Туж секыт луиз но, нырысь ик Волгоградэ шонтӥ. Отысь бертӥ гинэ – Францие путёвка басьтӥ. Со аре ик вуылӥ на Анапае. Коньдонэ но тырмиз, ява. Ма сомында ужай-ужай, йӧназ ӧй сиськылы… Кузпалэным одӥг ныл будэтӥм – солэн аслаз семьяез кылдӥз ни.

Табере бордам пие – ньыль арес солы. Бубиныз тодматским Интернет пыр, Башкириысь вал. Кема ик улыса ӧм вуттэ, тӧлпери сямме ӧз чида, вылды. Мон вӧзын ведь тэк уд пукы. Но со воргоронлы туж тау карисько, пие вань шуыса. Улонам кыӵе гинэ адямиос ӧз пумиськылэ, ваньзылы тау карисько – соослы луыса мон марлы ке но дыши, кужмогес, визьмогес луи. Пинал ваёно луэме бере кӧня пол меда вералляй, аслым мед кельшоз шуыса. Ма, кисьтэм-басьтэм ачим кадь ук! Кулэ дыръяз буйгатыны но вала ни, кытӥ-отӥ интыям но пуктылэ. Пиелы ним но – Сергей – понӥ, аслэсьтым яратонме малпаса.

- ???

- Бадӟымез Сергей пинал дырысен сюлэмме талаз. Одӥг пол гинэ дорозям келяз – вунонтэм луиз. Армиысь гожтэтъёс гожъяз ик вал, но шӧдӥз, лэся, укыр яратэмме, кышкатскиз. Одӥгаз пятница нуналэ гожтэтсэ басьтӥ, отын шуэм: бертӥ ке, мынам калтыртэме потоз ай, мукет нылъёсын но дусымъясько, тон монэ эн возьма, бызь… Быдэс уез бӧрдыса потӥ. Нош понедельниказ городэ кошки но, со ӝытэ ик мукетсэ келяны лэзи. Со вал вуоно картэ.

Сергеен ми али эшъёс кылемын, солэн аслаз семьяез вань. Люкеме уг поты соосты – сьӧлык, асме адӟемпотостэм карыны кутско. Но солы луыса мон кылбуръёс гожъясько. Лэзьымтэ гожтэтъёсы быдэс тетрадь тыр люкаськемын. Гожтӥсько но, буйгатскисько – соос монэ азьлань валто.

Но туннэ мон мукетыныз улӥсько, мон – анай. Шудолэсь но шудо! Гужембыт ӵошен бакчаямы ужаськом-шутэтскиськом. Ой, макем кельше мыным отын – лулы-сюлмы бордаз бурмемын. 11 ар талэсь азьло дасьсэ басьтӥ вал, но монъя сое выльдӥз-тупатъяз ни атае. Зэм, квартира басьтон азям, коньдонэ тырмымтэысь, атае ик сое вузаны ӵектӥз вал. Номырись соглаш ӧй кариськы. Отын мон тырмыт мерттӥськисько, шутэтскисько.

Бӧрдылӥсько на, зор усьыку гинэ, – соку синкылиос уг адӟисько. Лыдӟемды вань-а Степан Широбоковлэсь «Полынь» кылбурзэ? Одӥг пол монэ куризы: Дэбесын ортчоз Степан Широбоковлы сӥзем ужрад, кылбуръёсызъя усьтэм урок радъяно, пе. Соку ик «Полынь» син шорам йӧтӥз, сюлэмме бугыртӥз – воксё мон сярысь гожтэмын ук. Ма, мон сярысь гинэ ӧвӧл, котькуд адямилэн улонэзлы тупа – озьы мон сое адӟи. Соя ик усьтэм урок дасяй: котькуд адямилэн улоназ пичи дырыз, егит дырыз, кын корт куртчон вакытэз но пересьмонэз луэ. Котькудаз со вакытын вань шумпотонъёсыз, но одно сюре полынез но. Со секыт вакытъёсты адями уг чида ке, чиге, куасьме. Соку валай: Степан Широбоков туж кужмо, улонэз валась адями вылэм. Усьтэм урокме учкизы шаерысьтымы тодмо тодосчиос, университетын монэ дышетэм муртъёс, шуизы: «Зол!». Иське, визь-нодасьёсылы яраз ке уроке, мон понна со вылӥ дунъет ни.

Мон кын корт куртчон вакытам вуэмын, татысь но вань секытъёссэ чидай ни, малпасько – иське, азьлань вамыштоно. Но мон туннэ нуналэн улыны дышемын. Толлозэ, тетрадь листэз кадь, берыктӥсько, вуоноез сярысь уг малпаськы. Мон – туннэен улӥсько! Уг улэмъяськиськы.

Источник:

Винокурова С. М. Усисько но выльысь султӥсько! / С. М. Винокурова ; записала Э. Кумачева // Удмурт дунне. - 2013. - 9 августа. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"