Вашкалаослэн Инмарлы вазиськон-куриськонзы
Остэ,Инмаре, остэ. Вылысь бадӟым мусо Инмаре, вылысь югыт-тӧдьые, Кылчинэ, Инэ-вуэ, Воршудэ!
Кызьы ке тыр пальккаськись котыресэн, тыр шыдэн-нянен мон тыныд куриськисько, озьы ик уть-ворды, тушмонлы-аманлы эн кушты!
Кизем юме-няньме узыдэ-борыдэ сямен кисьматы-мульыяты. Куамын ке выжыё кар, дас кык ке ёзо кар, сюрс ке тысё кар, азвесь ке шепо кар, зарни ке тысё кар! Пӧйшур доры мыныкум, пуныме узатон дыръя, пыдын ӵабтон, нырын сузьмон вылэ вутты! Тэле мыныкум, чаркме-налькме туго быжо вылэ вутты! Ныро пыженыд гылӟыса ваем сямен вутты, Инмаре!
Ӟечтэ сёт! Шунды ӝужантӥысь нимаса-данаса шунды пуксёнтӥозь кылӥсьлы кылымон, адӟисьлы адӟымон кар! Азбарад сётэм нылыдлы-пиедлы зоро пӧськыед сямен ӟибыль-ӟабыль карыса улыны-вылыны ӟеч шуддэ-бурдэ сёт! Тупала сизьым сётэмзэ ныло-пие кар, тапала укмыс басьтэмзэ кено-менё кар! Вазь адскем кузэн-палэн ачид уть, вазь вордскем нылын-пиен ачид уть! [1].
