Бутолин Евгений Германович

Материал из Воршуда
Перейти к: навигация, поиск

Юрӟым наука уг луы

Butolin-249x300.jpg

Таиз героймы интыяз пукыны чик уг быгаты — солы ялан кытчы ке но мыноно-дыртоно. Секыт ныпъетсэ уг ик шӧды, кожалод — шутэтскыны вуо ай, шуэ. Евгений Германович Бутолин — Россия Федерациысь вылӥ школаысь сӥё-дано ужась, Удмурт Республикаысь наука удысысь дано ужась, профессор. 20 ар пала ни Ижысь медициная кун академиын дышетон ужпумъёсъя проректор луэ, уг кельты биохимияя яратоно кафедразэ но — 17-тӥ арзэ соин кивалтэ.

Песятае сьӧры уйиськи

— Вордски 1957-тӥ арын 19-тӥ сентябре Балезино ёросысь Юндаын. Тодӥськоды, отын уло бесерманъёс. Но мон соос выжыысь луисько шуыса вераны уг быгатӥськы, анае но, атае но — удмуртъёс.

Бен, Юндаын 1-тӥ классэ гинэ ветлӥ, собере семьямы выжиз Якшур-Бӧдья ёросысь Ӵошкытэ — анай-атайме отчы ужаны ыстӥзы. Соос кыксы но дышетӥсьёс вал. Анае немец кылъя урокъёс нуиз, жаляса верано, улонысь кошкиз ни. Атае историяя но обществознаниея визьнодаз. Мон бӧрсьы будӥз на кык ареслы пичигес сузэре, но со егитысен, сюрес вылын шуккиськыса, быриз. Школа аръёсы ноку вунонтэм. Классамы ог-огенымы туж эшъяськиськом вал. Дышетским но мыло-кыдо, ог-огмылэсь адӟем карыса. Озьы пӧлысьтымы ӝыныезлэсь ятырез визьнод басьтонзэс азинтӥзы, шаерысьтымы сяна, Москваысь но Питерысь вузъёсын. Анай-атае монэ но дышетӥзы бере, капчи ик ӧз йӧтылы — туж чурытэсь куронъёс азям пуктылӥзы. Покчи классъёсын дыръям ай юаме но вань, малы соос мыным «5»-ёс гинэ уг пуктыло. Лад-лад валэктӥзы: тон азе, пе, чурытэсь куронъёс ӧм пуктэ ке, кызьы мукетъёссэ пиналъёсты ӟеч дышетскыны куром на. Табере валасько ни, туж шонер лэсьто вылэм шуыса. Со понна кунгож сьӧры командировкае потӥсько ке, немец кылын али но эркын вераськисько.

Соку ик верало: школаез зарни медален ӧй йылпумъя. Аттестатам ӟуч кылъя «4» пуктэмын. Но аспирантъёсы янгышен гожъясько ке — туж воже потэ. Туж кельшо вал химияя но биологияя урокъёс. Та предметъёсъя олимпиадаосы но трос пыриськылӥ, вормон интыос басьтылӥ. Соин школаын дыръям ик оскисько вал: эмъясь одно луо, дышетскыны быгато!

Песятае, Николай Петрович Бутолин, военной фельдшер вылэм. Со Нырысетӥ но Кыкетӥ дунне, Граждан ожъёс пыр потэм. Японецъёсын нюръяськон дыръя секыт сӧсырмыны шедем. Соин но кема ӧз улы, вылды. Мон сое ӧй адӟы ни. Но малы ке со кадь луэме потылӥз. Бен, военной институтэ монэ уз кутэ шуыса, ачим но валай — 8-тӥ классын дышетскыкум, синме сӧсыртыны шедьтӥ. Озьы вамыштӥ Ижысь мединститутэ.

Востэм луыны быгатӥсько вылэм

— Востэм луэмез адямилы ӵем дыръя пайдаен гинэ берытске — тае умой-умой валай студент аръёсам. Мединститутын анкета гожъятӥзы, пусъёно, пе, маин тунсыкъяськи школаын. Мон дружиналэн советэныз кивалтӥ, собере комсомоллэн Якшур-Бӧдья ёрос комитетаз бырйылӥзы. Куасэн бызьылонъя но велосипедэн ворттылонъя спортысь мастере кандидат вал. Нош анкетае одӥг чурен гинэ гожтӥ: яратылӥ физкультура урокъёсты, разрядъёсме ӧй пусйы.

Кин школаысен ик общественной ужен но спортэн выремын — таӵеослы вузын маза ӧз сётылэ, институтлэсь данзэ утён понна пӧртэм ӵошатсконъёстӥ кысказы. Озьы куд-огез дышетсконзэс но, арлы-кыклы ӝегаса, йылпумъязы — наукаен вырыны дырзы ӧз кыльылы ни.

Мынам группаямы одӥг уже вал: физорг. Нош наукае 1-тӥ курсысен ик сюрес лёгыны ӧдъяй. Ветлӥ биохимияя кафедра бордын ужась кружоке. Отчы ӵектӥз дышетӥсьмы Людмила Александровна Воробьёва — туж визьмо, чурыт сямо со вал. Шӧдӥз, лэся, быгатонлыкъёсме, тодон-валан люкан мылкыдме ялан ӝутыны тыршиз.

Студент аръёсам ик научной ужъёс гожъяны кутски ни. Пыриськылӥ пӧртэм конференциосы, озьы вуылӥ Одессае, Москвае, Рязане. Со вакытэ та туж вылӥ дунъяськылӥз. Отӥяз — аспирантура. Жаляса верано, со вакытэ биохимияя кафедраын аспирантура ӧй вал на. Соин ик мон куриськи азьвыл ректор, нормальной физиологияя кафедраен кивалтӥсь Г. Данилов доры. Георгий Ефимович туж бурдъялляз монэ, трос тодон-валан сётӥз. Аспирантураме йылпумъяме бере, куинь ар ортчыса, ути кандидат диссертациме. Со вал 1984-тӥ арын. Кытчы мынон сярысь аспирантура бере но кема ӧй малпаськы — вамыштӥ яратоно кафедраям, ассистент луи. Одӥгаз группае монэ кураторе пуктӥзы на. Студентъёс али кадь, оло, визьмоесь но ӧй вал, но тодон-валан люканы мылкыдзы туж шӧдӥськылӥз. Соин ик соосты дышетскыны гинэ дышетоно вал. Ӧм вунэтылэ театръёсы, киное ветлон сярысь, трос поталлям походъёсы. Мон понна со бурдъяськон вакытъёс вал. Но доктор диссертация гожтон сярысь ӧй вунэты! 1993-тӥ арын сое ути. Мыным 36 арес вал. Шуоды, ваньмыз вӧй вылтӥ кадь кошкиз? Озьы но, дыр, мыным котьку удалтылӥз ӟеч дышетӥсьёсын. Быръем удысэ туж сюлэмыя — наукае вамыштэме сярысь огпол но жаляме ӧвӧл.

Академиын чоръяло атасъёс

— Бен, азе пуктэм ужпумъёсты быдэстон вылысь пӧсяно-тыршоно луэ. Кандидат диссертациез ӟеч гожтон понна отын ӝутэм ужпум аслыд но тунсыко мед луоз. Кулэ на ужез яратон. Мон аспирант дыръя компьютеръёс ӧй вал на — ваньзэ счётэн лыдъяно луылӥз. Куддыр кӧлалляй кафедраын ик. Угось трос экспериментъёс ортчытоно вал — тодыны выри, кыӵе суретъёс кызьы шӧдӥсько мугорын веществоослэн вошъяськемзы (обмен веществ) вылын. Шуом, кафедрае тон лыктӥськод занятиос бырем бере ог 3 часын. Эксперимент кыстӥське 6 час пала. Собере солы йылпумъянъёс лэсьтоно на, ваньзэ радъяно. Та вискын вуэ уй. Мар кароно? Мединститут пытсамын — отысь потыны уг лэзё. Дышетӥсьёс, студентъёс ӵукна вуэмлэсь вазьгес султӥськод, мисьтӥськиськод, собере калык рад мынӥськод занятиосы.

Доктор диссертациез гожтыны каньылгес ни. Табере уго ужад кыскыны луэ кафедраысь ужасьёсты но, студентъёсты но. Бен, дуно приборъёсты соослы уд оскы. Но со сяна но чыры-пыры ужъёс тырмыт. Экспериментъёсты ортчытъяськом комакъёс, шыръёс вылын. Вивариямы атасъёс, кроликъёс но вань, азьло возьылӥм на пуныосты но такаосты. Соку ик верасько: пудо-животъёсты жалян сярысь Хельсинкиын кутэм декларациез ми чакласьком. Соосты экспериментысь поттоно, кулытоно ке, уколэн изьытӥськом. Собере со животъёслэсь ёзвиоссэс туж-туж нельконо луэ на, лулпырыос (клеткаос) умой-умой мед висъяськозы-адӟиськозы шуыса. Та ужъёсты ик студентъёслы оскыны уг луы шат? Нялтас соос укол пуктылыны но дышетско. Адямиос вылын киез уд воляты ук!

Наука — туж тунсыко маке. Малпасько, котькуд студент солэсь шӧмзэ тодыны кулэ. Бен, тросэзлы со нырысь ик, оло, конял но потоз. Угось кыӵе ке пичи вормонъёс басьтон понна но трос чидан кулэ — тыршемедлэн емышез куддыр, 20-30 ар улыса гинэ, кисьмалоз. Но зымиськод ке та ӧре, ужедлэсь макем кулэзэ шӧдӥськод ке, отысь потэм уг луы ни, со ялан зыгатэ. Кылсярысь, ми эскериськом сакыр диабетэз: кызьы со пыӵа сэръёсы, лыосы но мукет ёзвиосы. Чакласьком: кыӵе суретъёс висёнлэсь вӧлмемзэ алыны быгато. Тросэзлы та уж мӧзмыт, юрӟым кадь потоз. Нош ми тодӥськом: тыршеммылы луыса бӧрысь уно адямиослэсь тазалыксэс, улонзэс утьыны быгатом.

Кин аспирантурае вамыштэ — таӵеосты туж дунъясько. Кивалтэме улсын 15 мурт кандидат диссертацизэ утиз ни, эшшо 3-ез гожтэ на сое. 1 мурт доктор ужзэ дася.

Тодматскисько котькуд студентэн

— Наука, егитъёсты дышетон, общественной уж ог-огенызы туж юн герӟаськемын. Нош проректорлэсь ужзэ ог 20 ар быдэсъясько ни. Солэсь азьло стоматологияя факультетлэн деканэз вал. Люкиськеме уг луы яратоно биохимияя кафедраелэсь — 1995-тӥ арысен соин кивалтӥсько. Трос ветлӥсько Россиысь медициная вузъёстӥ — эскерисько, кыӵе кадръёсты соос дасяло, быгато-а со учреждениос кун дипломъёс сётъяны…

Асьме медакадемиысь студентъёс таӵе эскеронъёс пыр котьку но ӟеч пото. Сюлмаськытэ мукетыз: кинъёс дышетско дорамы. Шуом, туэ 1-тӥ курсэ Татариысь но асьме шаерысь огмында студентъёс лыктӥзы. Эшшо трос на мукет улосъёсысь вуисьёс. Озьы Ижысь егитъёслы ог 15 процентэз сяна интыос уг кылё. Ярано, гуртоосты целевой направлениосъя кутӥськом на. Гуртысь потэм егитъёслы нырысетӥ кык араз туж секытэн сётӥсько физика, биология, химия. Но ми тодӥськом: 5-тӥ курсэ вуытозязы, тыршизы ке, соос городысь эшъёссэс сутозы, куддыр ӟечгес но тодон-валанъёссэс возьматозы ай.

Лек-а мон дышетӥсь, ӧвӧл-а? Академиын арлы быдэ ортчытъяськом анкетирование. Со возьматэ: студентъёслы милям кафедрамы туж кельше, мукетъёсыныз ӵошатыса, котьку но тросгес куараос люкаськом. Ӵош ужась эшъёсы но туж кужмоесь, быгатӥсесь. Бен, практической занятиосты нуыны дыры уггес тырмы ни. Нош лекциос лыдӟыны туж яратӥсько. Соослы али но дасяськисько — книгаосын, Интернетын бугыръяськисько. Эмъян удыс, наука интыязы уг сыло, отын ялан выльдӥськонъёс-воштӥськонъёс луо. Студентъёслы янгыш информация сётыны уг яра. Нош озьы пӧрмиз ни ке — дыраз тупатсконо, со юанэз выльысь сэрттоно-пертчоно.

Зачётъёсы котькуд группае ик ветлӥсько — котькуд студентэн тодматскыны тыршисько. Бен, син шорын котькугес луо тужгес ӟеч дышетскисьёсыз но бере кылисьёсыз. Но шоро-куспооссэ но 6 ар ӵоже тодманы кутскисько ни.

Кышное — одӥг, пиналъёсы — куинь

— Кышнояськи бер. Дышетскыса но ужаса ӧй ваньмы, лэся. Аспирантураез йылпумъяме бере кык арзэ гужембыт пукылӥ приёмной комиссиын. Соку но, берло но тодмоосме мурт интые дышетскыны пыртэме ӧвӧл! Туэ медакадемиез йылпумъяз матысь ӵыжы-выжые. Но дорамы дышетскыны пыремзэ валаса но вуттӥськымтэ. 1-тӥ курсэ лыктэмъёслэн списокысьтызы адӟи ни тодмо нимтулэз. Группазылэн кураторезлэсь юасько: кытысь? Кезысь, пе! Дорам мед пыралоз ай, шуисько.

Приёмной комиссиын пукисьёслы уждун ӧз тырылэ. Нош мон улӥсько на огъяулонниын — аслыд сэрег басьтыны коньдон кулэ. Барышнядэ мурт патере уд вайы ук! Озьы ректорлэн кабинетаз пыри но стройотрядэ куриськи. Нокыӵе ужлэсь уг кышкаськы, шуи. Кыкетӥ курсысен мон ветлӥ ни вал таӵе отрядэ — уйпал ёросъёстӥ ортчись узкоколейкаез тупатъям, собере Сьӧлта ёросын скал гид пуктонэ сюрылӥ на. Со азьын дышетскыса вуттӥ каменщиклы — дипломе киям. Стройотрядэ ветлӥсьтэм студентъёсты со аръёсы колхозэ картош бичаны поттало вал. Таос пӧлы но сюрылӥ, но ведраен бусы кузя ветлэме ӧвӧл — трактор руль сьӧры пуктылӥзы. Но аспирантураез йылпумъям муртэ студентъёсын оградэ пуктэмзы ӧз поты ни, лэся. Ыстӥзы монэ Молдавие, валтӥсь врач луыса. Удмуртиысь отчы студентъёслэн кӧня ке стройотрядъёссы поттэмын вал — 2 но ӝыны сюрс пала егитъёс. Котькуд отрядлы нимысьтыз эмъясь юнматэмын. Таосызлэсь ужзэс мон чаклай-радъяй ни. Озьы ортчиз 7 гужем. Ярано, нокыӵе кышкыт учыръёс ӧй вал: кин кынманы шедьылӥз, кин шуккиськыны йӧндырылӥз.

Али кадь тодӥсько на: стройотрядэ ветлыса, 11 сюрс 259 манет люкай. Со тырмиз кооперативной квартира басьтыны! Семьяе мынам тросэзлэн кадь ик: кышное — одӥг, пиналъёсы — куинь. Натальяен паръяськыкумы, мон стоматологияя факультетлэн деканэзлэн воштӥсез вал ни, кӧня ке толэзь ортчыса, декан луи. Ма, вуоно кузпалы но студент гинэ ӧй вал ни, со ординатураын тодон-валанзэ будэтӥз. Али со медакадемия бордысь пинь йӧнатонъя клиникаын начмед.

Бадӟымез нылмы, Ольга, Ижысь медакадемиез ик йылпумъяз. Со — син йӧнатӥсь, быземын ни, 1 нунокмы вань. Юлямы йылпумъяз УдГУ-ысь журналистикая факультетэз. Таизлы 24 арес, но бызьыны уг дырты на. Шонер лэсьтэ, малпасько. Пимы, Дима, туэ йылпумъя 11-тӥ классэз. Эмъясь уз луы. Кузпалыным валэктыны но турттӥм, эмъясьлэн ужез туж кулэ но тунсыко шуыса. Аслэсьтыз каре — компьютеръёсын туж тунсыкъяське, программаос но кылдытъя ни. Та удысэ ик вамышто, шуэ.

55 — пичи лыдпус

— Выжые юн. Атаелы 80 арес ни — кочон кадь поръя ай, удмурт кылын кылбуръёс но гожъя. Улэ Кез ёросысь ӵыжы-выжыосынымы. Иже квартира но басьтӥм вал — лыктыны пумит луиз. Чупчи дурын, пе, асме каньылгес шӧдӥсько. Адӟиськыны дораз ӵем вуылӥсько. Со туж умой кырӟа, балалайкаен, мандолинаен шудэ. Но мыным та огез но паласькымтэ. Тодӥсько: кырӟаны кутски ке, котырысьтым вань калык пегӟоз.

Атаелэн анаез 98 аресозь улэмын, 11 пинал вордэмын ке но. Эшшо улысал, вылды, но усьыса секыт шуккиськыны шедиз. Бен, юн выжы борды тазалыктэ чаклам но кулэ на. Аспирантураын дышетскыкум, куинь ар пала кыски тамак — ӵындӥсь эшъёсылэсь пӧртэмгес адӟиськеме ӧз поты, лэся. Ӟырдаса ик зол висеме вань, 4-тӥ курсын дышетскыкум гинэ — 3 нунал ӧй султылы. Ужатозям больничное ӧй поталля на. Ветлӥсько тренажёр залэ. Пыдын ветлыны пумит чик уг луиськы. Но руль сьӧры пуксисько ке, асме йӧн-йӧн воргоронэн шӧдӥсько. Ужея кытчы ке мыноно ке но, водителез туж ик кулэ уг кариськы. Автоматэн машина кулэ ӧвӧл — механика медло!

Сӥзьылзэ туж яратӥсько губияны. Уката но куазь шуныт, пыд улын ӵуж-горд куаръёс шалтырто ке. Мылкыд ик оломар луэ! Мӧйымон вакытам аслым уж шедьтӥ на — Дэри ёросэ корка пуктоно кариським. Туэ кыкетӥ арзэ отын тяпайтӥсько. Кирпич гинэ уг тыриськы — отӥзэ вань лэсьтӥськон ужъёсты ачим быгатӥсько. Мунчо но пуктӥ ни. Гуртысь потэм маке ук — атае монэ вань пиосмурт ужъёслы дышетӥз.

Шутэтскыны яратӥсько семьяеным. Толалтэосы котькуд суббота-арняе Кам яке Белая шур дуре чорыганы потаськом. Кутылӥськом судакъёсты гинэ. Каракулино ёросын дачае но вал — вузам. Нокинлы сое учкыны-утялтыны луиз — варманае улонысь кошкиз. Но отын вань милям тодмоосмы — доразы кожылӥськом.

Трос-а эшъёсы? Тодмоосы тачак, эшъёсы вить-куать, дыр. Тодӥсько: соослы мынэсьтым номыр кулэ ӧвӧл. Пӧлысьтызы куд-огез эмъян удысэн но чик герӟаськемын ӧвӧл.

Туж яратӥсько инкуазьын сӥль пыжыны. Азербайджанын куноын вал, отын монэ ыж сӥльлэсь туж ческыт шашлык лэсьтыны дышетӥзы. Котоно сое кефирын яке минерал вуын, туж-туж трос укроп, петрушка, базилик пононо. Котэм бере ыркыт интыын возёно — шунытэ кельтоно ӧвӧл. Та ужез мон, аслым сяна, нокинлы уг оскиськы.

Нош вордскем нуналъёсам котьку ик палэнэ кошкыны турттӥсько. Туэ но кузпалэным ӵошен Черногорьее вуылыны кенешим — отын тодмоосмы уло. Ӵап 19-тӥ сентябре Москвае вуом ни — именникме поездын пумиталом.

Дорын пукыны туж уг яратӥськы — ялан кытчы ке но мыноно, маке но ужано. Отпуске но огкутскемен 56 нуналлы уг потаськы. Кык арняен люкылӥсько. Одӥг пол ньыль арзэ шутэскыса утчай вал, собере уж дурысь ӝӧк вылам люкаськем бумагаос пӧлы йыромон калэ вуи. Асме шудоен лыдъясько. Трос лэсьтыса вуттӥ ни. Нош воргорон понна 55 арес — со туж ӧжыт на, иське, эшшо троссэ мед вормом ай.

Источник:

Бутолин, Е. Г. Юрӟым наука уг луы / Е. Г. Бутолин ; подгот. к публ. Э. Кумачева // Удмурт дунне. - 2012. - 14 сент. - С. 6, 11 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"