Айтуганов Игорь Геннадьевич

Материал из Воршуда
Перейти к: навигация, поиск

Мынам яратонэ – следствие

И.Г. Айтуганов

Игорь Геннадьевич Айтуганов – Удмурт Республикаысь югдурез утёнъя министрлэн воштӥсез, Следствиея управленилэн кивалтӥсез.

Вордскемын Ижын

1968-тӥ арын 9-тӥ мартэ.

МВД-ын ужаны ӧдъяз 1988-тӥ арысен.

Уйпал Кавказын служба нуэмез понна 2002-тӥ арын пусъемын «За отличие в охране общественного порядка» медален.

2011-тӥ арын 10-тӥ сентябре юнматэмын министрлы воштӥсе.

- Игорь Геннадьевич, туала егитъёс нырысь ик университетэ-институтэ мыно, собере уж утчало. Тӥляд воксё мукет югдурды. Юридической тодон-валан басьтӥды ни, милициын ужакуды. - Талэн мугез одӥг вал – школа бере кытчы мыныны, кин луыны ӧй вала. Соин валлин пыри Ижысь 31-тӥ училищее – татын мувӧй кыскисьёсты дасяло вал. Училищеез йылпумъяй но, повестка сётӥзы. Армиын кык ар визьмаськи. Службаме ортчыса бертӥ – кытчы кариськоно, малпасько.

- Анай-атайды нодъяны чик ӧз выре шат?

- Ӧз, та понна берло мон туж шумпотӥ. Атае Геннадий Григорьевич но анае Ираида Ивановна огшоры ужасьёс вал. Буби вордскемын Нылга районысь Ӝыкъя гуртын, мамае Луӵегын. Ӵошен улонзэс мытӥзы Ижын, татын мон вордски ни, бӧрсям – сузэре. Атай вань улонзэ ужаз автозаводын, отын со плотник вал. Мамае азьло тыршиз лэсьтӥськон удысын, собере со но автозаводэ кариськиз. Та предприятиын соос пенсие потытозязы тыршизы.

Ӵапак Нылга палъёсысь вуэмын мынам чебер фамилие. Армиын таджик но узбек пиос асьсэлэн карыны выризы – соос палан таӵе ним, пе, ӵемысь сёто. Вашкала тюрк кылын «ай» возьматэ толэзь шуэмез, нош солэн пуштросэз герӟаськемын «чылкыт, чебер, визьмо» кылъёсын. Толэзь ӝужан вакытэ вордскись пиналлы, пе, «ай» приставкаен ним сёто вылэм. «Туган» – валамон ни, ӵыжы-выжы шуэмез возьматэ. Озьы Айтуган ним вера, толэзь кадь чылкыт пи вордскиз шуыса.

Анай-атаелы котьку тау карисько, улонын аслым сюрес бырйыны луонлык сётӥзы шуыса. Армиысь бертэме бере но ӧз дыртытэ, куасалтыны ӧз выре. Огез ӵыжы-выжымы Ленин ёросысь милициын вневедомственной охранаын ужа вал. Монэ но ӧтиз дораз. Службаын пыӵам огъя порядок йырысьтым соку ик ӧз тӧлӟы, лэся. Соин таӵе ӵектонэз туж кельшиз. Солэсь ортчыт мукетыз – ужан график – синмаськытӥз. Одӥг сутка, пе, ужано, куиньзэ – дорын. Армия бере шутэтскем но потӥз на, лэся. Собере дышетскыны пыри – Удмурт кун университетысь юридической факультетэ.

Улонме сэзъялтӥз, монэ вырӟытӥз Ленин райисполкомысь ОВД-лэн кивалтӥсез Рафис Каримов. Тырмоз, пе, возьмаськисьын ветлыны, улонын кыӵе ке рос-прос вамыш но лэсьтыны кулэ ни. Озьы 1991-тӥ арын следовательын ужаны кутски.

- Тодӥськоды на-а кыӵе ужез сэрттӥды-пертчиды нырысьёсыз радын?

- Пумозяз вуттӥ алимент тырисьтэм воргорон сярысь уголовной ужез. Нылпиезлы юрттӥсьтэм пиосмуртэ суд одӥг арлы пытсэт сьӧры келяз. Бӧрысь сэрттэм-пертчем ужъёс туж трос луизы, пӧлазы вал секытэз но, огшорыез но, тунсыкоез но. Котькуд следовательлэн сюлэмыз буйга, кыӵе ке быдэстэм йыружлы пум вуэ ке, суд йыртэмасьлы кыл кутон сётэ ке.

Следователь огазея МВД-ысь пӧртэм службаослэсь – оперативникъёслэсь, участковойёслэсь, экспертъёслэсь – ужзэс. Люкам фактъёс вылэ пыкиськыса, со кылдытэ вань доказательствоослэсь инъетсэс. Бӧрысь тае лыдэ басьтэ суд.

Нырысь аръёссэ ужакум, тупаз бадӟым уголовной уж. «Ижмашысь» запчастьёсты лушкан учыръёс. Адямиос соку сокем ортчемын вал – качам арбериосты заводысь машинаосын поттылӥзы. Со ужез пертчон бордын быдэс отдел ужаз. Огазеяськыса тыршись йыртэмасьёсты шараямы, ужез судэ келямы. Бӧрысь соосты янгышен лыдъязы но пытсэт сьӧры келязы. Тодӥськоды-а, макем шумпотоно следствие ӟеч радъямын ке. Соку йыртэмасьёс но кыл кутонлэсь пегӟыны уг быгато.

- 1990-тӥ аръёсы милициысь тросэз ужасьёс кошкизы. Нош тӥляд карьерады ӵапак та вакытэ кутскиз. Выль удысэ выжон мылкыдды ӧй вал-а?

- Со аръёсы странаез пачкатӥз йыртэман тулкым. Но йырдэ луое уд донгы ук – ужамы, йыружъёсты сэрттӥмы. Капчи ӧй вал котыр ласянь. Улон инты ӧз висъялэ – асьмелы сюлмаськоно. Кисыын тӧл шулаз – толэзьёсын уждун ӧз тыре. Ярам, сиён-юонэн кыӵе ке коть паёк сётъязы. Куд-огез ӵапак та вакытэ ужлэсь палэнскиз. Кинлы ужез кельше вал – соос кылизы. Мон валай, милиция мынам удысэ шуыса, соин отчы-татчы ӧй кыстаськы.

- Висъясько-а следовательёс пӧлын удмурт выжыысь потэм муртъёс? Тани удмурт студентъёсты туж ярато Медициная академиын, удмурт врачъёс, пе, быгато висисен ужаны, валало тупась диагноз пуктыны.

- Районъёсын удмурт следовательёс тросгес, городъёсын ӧжытгес. Милям удысмы – нырысь ик, адямиез кылон, солэсь шуг-секытъёссэ адӟон. Документъёс, пӧртэм бумагаос пыртӥ вазиськись мурт шоры учкыны уг яра. Уката ик полицилэн ужамезлы табере нырысетӥ дунъет сётӥсьёс луозы улӥсьёс. Следовательлы чидан кулэ. Асьмелэн, удмуртъёслэн, таӵе сяммы вал но, вань но. Соин ужын со уг люкеты.

Жаляса верано, та дыре 70 процентэз следовательёс – нылкышноос. Ог 5 ар талэсь азьло югдур воксё мукет вал ай – следствиын ужасьёс пӧлысь 30 процентэз апайёс вал. Тазьы вераса, нылъёслэсь кӧтсэс ӝож карем уг поты. Малы ке шуоно соос асьсэлэн пельпумъёссы вылын нуо следствилэсь бадӟым но секыт воззэ. Жаль мукетыз: та ужлэн аслаз принципъёсыз, куронъёсыз. Куддыръя семьяын кылдэм сямъёс тӥясько, кема возьмам-радъям ужрадъёс куашкало. Йыруж тупа но – следовательлы нылпиоссэ, кузпалзэ кельтыса, нуналлэн вакытэз шоры учкытэк, дорысьтыз кошконо. Нош нылкышно понна нырысь интыын семья, отын шуныт но яратон мылкыд кылдытон. Таӵе ужын сое чакланы уг луы.

МВД-ын реформа бере Следствиея управление кылиз 615 ужась. Штатмес 11 процентлы кулэстоно луиз. Табере вань полицейскойёсты сюдэ федерал бюджет, азьло сямен милемыз али уг ни люко. Малпасько, та туж шонер лэсьтэмын шуыса.

- Берло аръёсы республикаямы синӥз быдэстэм йыружъёслэн огъя лыдзы. Таин валче следовательёслэн капчигес шокчыны дырзы кылдӥз-а?

- Зэм, нагрузка усиз. Та умойлы, малпасько. Следовательёслы ужъёс 20 процентлы ичигес вуо. Огдыре одӥг муртлы нуыны сётэмын 3-5 уж. Соин соосты рос-просгес эскерыны луонлык вань. Ужъёсты пумозяз пертчыны быгатӥськом. Тани кылем арын 32 процентлы тросгес ужъёсты ворсанлэсь утимы. Со дыре ик следовательёс быгато ни ужез йылпумъяны уголовно-процессуальной законъёсъя пуктэм вакытэ. Ӧжытгес берытско ужъёс судысь но прокуратураысь выльысь расследование ортчытыны косонъёсын. Берло ар ӵоже вамышъямы тупатскон пала, но татын гань-гань кариськыны вазь на.

- Озьы ке но вань йыртэманъёсты шараяны огкадь уг пӧрмы ук. Мар тужгес секытэн сётске?

- Суредам коньдонэн герӟаськем учыръёслэсь йылзэ-пумзэ шедьтыны шуг. Уго уксё фальшивка шуыса ӵемгес шараяське банкын гинэ. Кытысь со вуиз, кин сое печатлаз – тазэ бугорез сэрттыны туж секыт.

- 2007-тӥ арын Россиын кылдӥз Следствиея комитет. Куддыръя калыклэн йырыз но сураське, дыр: полициын но следовательёс, Следствиея комитетын но. Оло, кемалась соос огъя бурд улын ужаны кулэ ни?

- Малпасько, луыны кулэ огазеям структура. Следствиея комитет но, МВД-ысь Следствиея департамент но быдэсъяло одӥг ужез. Полицилэн бурд улаз кельтыны луысал дознаниез гинэ. Шуом, кыӵе ке векчи йыртэманъёсты, кытын кулэ ӧвӧл трос экспертиза ортчытъяны, сотрудникъёсты командировкае ысъяны. Кылсярысь, полициын быгатысалзы эскерыны жугиськон учыръёсты, векчи лушкаськонъёсты.

- 2001-тӥ арын Чечняе командировкае ветлэмдэс пусйизы медален. Ма муген асьме пиос арлы быдэ Уйпал Кавказэ кошко? Вераськонъёс вал, отын ОМОН-ысь но СОБР-ысь воргоронъёс гинэ служба нуозы на шуыса.

- Зэм, озьы гинэ ӧз луы. Югдур капчи ӧвӧл. Огласянь со возьматэ, асьмелэн пиосмы ужан радлыкез валасесь, визьмоесь шуыса. Чечняын кылдӥсь шуг-секытъёсты соос шаплыгес сэрттыны быгато. Малпасько, ачим но туэ Кавказэ командировкае потало шуыса.

- МВД-ын реформа пумысен кыӵе мылкыдды кылиз?

- Ортчытӥзы бере – иське, кулэ луиз. Кытын дыртӥзы, золгес куасалтӥзы, мае рос-прос ӧз чаклалэ – тазэ возьматоз ни дыр. Озьы ке но оп! шуыса югдур уз воштӥськы. Со дырез, куке калык полиция шоры гажан мылкыдын учкыны кутскоз, кема возьмаломы на, дыр. Государство, кивалтӥсьёс нырысетӥ вамыш лэсьтӥзы – шӧдскымон йылӥз уждун. Тани егитъёслэн, дышетсконзэс йылпумъяса, уже куриськись лейтенантъёслэн ик, уж шоры учконзы мукет луыны кулэ. Соослы кунлэсь оскемзэ уж вылын возьматоно. Озьыен, полиция выльдӥськыны но кужмогес луыны кулэ.

- Верады, милицие ужаны мынӥды капчиятэм графиклы луыса. Валамон, следовательын ужаса, карьерадэс азинтыса, ваньмон дырды пумен ӧжытгес кылиз. Ужан нуналды кӧня часын йылпумъяське?

- Соиз озьы. Ӝыт 8 часлэсь вазь кошкыны уг быгатӥськы. Но семьяосы талы дышизы ни. Полициын ужасьёс понна тужгес дуноез – дорын валало, уг пыкыло ке. Кузпалы ужа Ижысь автовокзалын, со ивор сётонъя оператор луэ. Маргарита нылмы юристэ дышетске – 3-тӥ курсэ вуиз ни. Таӵе удыс быръе шуыса, огпол но пумит вераме ӧвӧл. Мылкыдзэ ноку ӧй зӥбы, аслыз бырйыны сюрес сётӥ.

Вис кылдэ ке, лыдӟиськыны яратӥсько. Адӟемпотостэм карисько боевикъёсты, уг чидаськы криминалэз адӟыны. Яратоно авторе – Валентин Пикуль. Со сяна, туж кельше историен герӟаськем литератураез лыдӟыны. Ваньмон дыры тупа ке, семьяосме шумпоттӥсько пӧраськыса – армиын мон сиён пӧзьтӥсь но вал. Тодмоосы уката ушъяло шыдъёсме.

- МВД-ысь вылӥ кивалтӥсьёслэн котькудзылэн вань юри чаклам калыкен пумиськон нуналъёссы. Кыӵе ужпумъёсын дорады адямиос вазисько?

- Приёме лыкто бускельёссы вылэ ӝожтӥськисьёс но, зэмос йыружез сэрттонэн герӟаськем муртъёс но. Котькудзэс кылоно, валэктоно. Юанъёс трос люкасько бере, калыкен пумиськонэз курисько пуктыны шутэтскон нуналлы, уго огшоры ужан нуналэ одно ик люкетӥсьёс шедё.

Ӵапак адямиосын пумиськонъёс дыръя кулэ луэ удмурт кылэз валаме но. Туала егитъёс ӟуч кылын вераны уг шугъясько ни, нош пересьёс куддыръя переводчиктэк мар карыны ёрмо. Огполаз приёме песянай пыриз, сьӧраз юрттӥсьсэ но ваем. Аслэсьтыз сюлмаськонзэ со удмурт кылын мадиз, вераськонмы пӧрмиз – со но монэ валаз, мон но сое.

- Кӧня уголовной ужъёсты министрлэн воштӥсез син шораз возе?

- Котьку чакласько югдурез. Син азям возисько бадӟым, шарае потэм йыружъёсты. Тани кылем гужем Кам дурын жугиськон тупаз. Шур дурын шутэтскисьёсты тышказы эрказмем пиос. Кӧня ке муртэ соос сӧсыртӥзы. Бӧрысь йыртэмасьёсты кырмимы, куд-огзэ розыске но ялоно луиз. Табере ваньмыз эрказмемъёс кутэмын. Уголовной уж йылаз-пумаз вуттэмын, судэ келямын.

- Полициын ужасьёслы мар юрттэ вормыны нуналмысь пумиськись секытэз?

- Пальпотыса улоно, сотэк котькыӵе ужын секыт потоз.

Источник:

Айтуганов И. Г. Мынам яратонэ – следствие / И. Г. Айтуганов ; записала А. Ионина // Удмурт дунне. - 2012. - 16 март. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"