Корепанов Сергей Арсентьевич

Материал из Воршуда
Версия от 11:58, 16 апреля 2015; Sveta.Bat (обсуждение | вклад)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Мурт шаерлэн кузь иськемъёсыз[править]

Снимок2.JPG

Ошмесо шаермы дано луэ кужмо спортсменъёсын. Одӥгез соос пӧлысь - ӝог ветлӥсь Сергей Арсентьевич КОРЕПАНОВ, со 3 Олимпиадае пыриськемын. Эгра ёросысь Мазьги гуртын вордскем но быдэ вуэм муртлы бадӟым спортэ вамыштыны юрттӥз мурт шаер. Ма вуттӥз сое Казахстанэ?

Чилясь гурезьёс, волятэм нюкъёс

- Пичи дыры вунонтэм кылемын, - веранзэ мытэ Сергей Корепанов. - 4 пинал пӧлысь мон куинетӥез луисько, нылпи садэ ӧй ветлы, пересь мамаенымы но сестраосыным пуки. 8 классъем школамы кык этажъем пу юртын вал, спортзалын шудэм сяна, школа котыртӥ но нюкъёс кузя бызьылӥмы. Озьы ӵем дыръя ёрос ӵошатсконъёсы пыриськылӥ. Тросэз пиосмы куасэн, пыдын бызьылӥзы, баскетболэн, волейболэн, хоккеен шудӥзы. Пӧлазы мон но котьку вал. Туж ӝог бызьылыны тыршимы ке но, вормонъёс дорозь сузьтӥськыны ӧз кылдылы.

Бадӟым спортэн эшьяськонме мытӥ, шуыны луоз, 8-тӥ классысен. Сӥзьыл кросс дыръя малпамтэ шорысь классысьтымы Володя Корепановен ӵош районын вылӥ интыос басьтӥмы. Со гужем эшъёсынымы ӵош трос бызьылӥмы, пыдтышъёсмы йырберамы вуытозь. Гуртмы котырысь нюкъёсты, гурезьёсты волятыса возимы ыж пастуханы ветлонъямы. Шудон но ужан сямен ик мугормес кыдатӥмы, луоз. Со гинэ мар, ульчаысьтымы пиосын ӵош Кечвыре быдэс стадион лэсьтӥмы. Пила пызь нуллӥмы, кык юбо пуктӥмы выллане тэтчаны, 200 метр кузьда круг лэсьтӥмы. Отын ик бызьылӥмы, кузьдалае, выллане тэтчамы. Али сыӵе стадионъёсыз многофункциональной шуо. Быдэс гужеммес сыӵе стадионын бызьылыса, тэтчаса ик сӥзьыллы ӟечгес кыдаськеммы, дыр.

Со вормонмы бере Эграысь нылпи спортшколалэн директорез дорамы лыктӥз но юаз: Эграын дышетскемды потэ-а? Тросгес тренироваться кариськоды, интернатын улоды. Валамон, ёрос центрын мугор кыдатыны луонлыкъёс тросгес вал бере, малпаськытэк эшеным ӵош Эграла кошкимы.

8 ар школаын дышетскытозям, одӥг пол но куасэн бызьылонъя ӵошатсконъёсын вормонъёс ӧй басьтылы вал.

9-тӥ классысен Владимир Ефимович Никитин бызьылон техникалы дышетӥз. Пайдаез нырысетӥ ӵошатсконысен ик шӧдӥськиз: ёросысь ас ёзо эшъёсы пӧлын вормисе ӧй поты ке но, Мазьги школаын ӵош дышетскем эшъёсме, кинъёс мынэсьтым та дырозь шаплыгес бызьылӥзы, кыдёке кельтӥ.

Тӧлатскон

- Спортэн эшъяськон дышетскыны ӧз люкеты. Школаме умой йылпумъяй. Володя Корепановен УдГУ-ысь мугор кыдатон факультетэ пырыны дасяськимы. Студент луыны одӥгмылы но ӧз удалты: баллъёсмы ӧз окме. Ма карыны паймемысьтымы, вамыштӥмы спортъя «Нефтемаш» клубе. Толалтэзэ куасэн бызьылӥмы, 1-тӥ разрядэн спортсменъёслэсь куронзэс быдэстӥмы, нош тулысаз атлетикае выжимы. Кыкетӥ араз Володя дышетскыны ӧз мыны ни, армие, пе, ветло. Озьы ӵош будэм эшеным нырысьсэ кемалы люкиськимы.

Озьы пӧрмиз: одӥг Корепановез ыштӥ, со интые мукетсэ шедьтӥ. УдГУ-э дышетскыны пыри гинэ но Балезино ёросысь Анатолий Корепановен эшъяськи. Фамилимы одӥг кадь шуыса, лэся, улыны но милемыз общежитиысь одӥг комнатае интыязы. Школаын дышетскыкумы, ми соин гожтэт пыр кусып возьылӥмы, ӵошатсконъёс дыръя пумиськылӥмы но вал. Соин кыкнамы ик капчи атлетикае гожтӥськимы.

Студентлэн улонэзлы дышыны ӧдъяй гинэ, 1-тӥ курс йылпумъян азьын группаысьтымы пиосмес армие басьтонэн кышкатӥзы. Дышетскимы ӝог, экзаменъёсмес вазьгес сётӥмы но, милемыз дорамы лэзизы: ӧтён вуоз, вите. Быдэс гужемзэ вень вылын кадь улӥ, нош повестка ӧз ву. 30 мурт пӧлысь биатлонэн вырись 5-6 пиосмес спортротае басьтӥллям ик.

Университетын нуналлы быдэ тренировкаосы потамы. Бызьылон вискын футбол шудӥмы. Одӥг пол уси, пыдесылэсь вӧсь луэмзэ соку ӧй шӧды кадь, но со дырысен зол бызьылэме ӧйлась. Соин но, дыр, тренере армие ветлыны, тӧлатӥськыны ӵектӥз.

Армие басьтӥзы 2-тӥ курсысен октябрь толэзе. Машина нуллыны правое вал бере, автомобильной войскоосы кутӥзы. Озьы ми Удмуртиысь 6 мурт Хабаровске шедимы. Ӵапак со вакытэ округын куасэн бызьылонъя ӵошатсконъёс луыны кулэ вал. Физподготовкая начальник дорам лыктӥз но куасэн бызьылӥ ик-а шуыса, юалляськыны кутскиз. Ватсаз на, тросэзлы пиослы документ лэсьто, нош асьсэлэн куас вылэ султылэмзы но ӧвӧл. - Пие сярысь юалляськыса, мыным но гожтэт ыстылӥзы, - вераськонамы итӥськиз Сергей Корепановлэн анаез Люсьетта Изосимовна. - Кыӵе пиды, кыӵе тазалыкез вал, ӧз висьылы-а шуыса. Пиелэн одӥг пол но тамак кыскемез, вина шӧмъямез ӧвӧл шуыса, армие гожтэт лэзи.

- 15 пала солдатъёс куспын ӵошатскон ортчытӥзы, - веранзэ азьланьтэ спортсмен. - Мыным пу куас сётӥзы ке но, кыкетӥ инты басьтӥ. Кужмоосыз пӧлы шедьыса, Дальневосточный округысь ӵошатсконэ пыриськыны луонлык кылдӥз. Благовещенскын гуртысьтымы ӵош будэм эшме Володя Корепановез пумитай. Ми соин быдэс ар ӧм адскылэ, службазэ ортче вылэм Комсомольск-на-Амуре городын. Со ӵошатсконын милям полкмы вормись луиз. Мукет араз Володя гуртэ бертӥз, нош монэ Южно-Сахалинске ыстӥзы.

Армиысь бертыса ӧй вутты, висись пыдесы ачиз сярысь тодаз вайытӥз. Бызьылэм зол уг луы бере, ас поннам мукет удыс утчан сярысь малпаськыны ӧдъяй. Тазьы курадӟемме адӟыса, бызьылыны мылкыдме шӧдыса, армиысен одӥгез эше матысьгес тодматӥз ӝог ветлонэн.

Мылкыдлы пумит

- 1-тӥ курсын дышетскыкум, группаысьтымы пиос - Можгаысь Герман Истомин но Ижысь Олег Садков - ӝог ветлонэ пыриськылӥзы, сьӧразы монэ но бызьылыны ӧтьылӥзы, мыным со амал соку ӧз кельшылы. Олег юниоръёс пӧлын СССР-ысь чемпион, спортъя мастер вал ни, нош Герман ӧжытак лябгес бызьылӥз. Армиын дыръя эшъёсы гожтэт пыр ивортӥзы, Герман, пе, спортъя мастерлэсь куронзэ быдэстӥз. Тае кылыса, спортысь кошкон мылкыды чутрак воштӥськиз: мон Германлэсь маин пӧртэм? Бызьыло, мастерозь будо.

Озьы, армиысь бертыса, 21 аресам спортысь выль амаллы дышетскыны кутски.

Университетэз йылпумъятозям, мон но спортъя мастерлэсь куронзэ быдэстӥ. Монэ ужаны кельтӥзы физвоспитаниея кафедрае. Городэ кылемелы нырысь ачим но шумпотӥ, мугорме кыдатыны луонлыке тросгес луоз кожаса. Янгышаськем. Кафедраын бумагаосын, студентъёсын на лыдпусъёсме умоятыны, спортъя калыккуспо классъем мастерлэсь куронзэ быдэстӥ.

1989-тӥ аръёсы секыт вакытъёс кутскизы. Уждун ичи, сьӧрло сборъёсы ум потаське. Валамон, пичи стадионэтӥ, сюрес кузя бызьылыса гинэ, нимо-дано спортсменъёс пӧлын вормон уд басьты. Нош 1991-тӥ арысен монэ бырйыны косӥзы: уж яке бызьылон, кема малпаськеме бере кыкетӥзэ бырйи.

Юрттӥськон

- Ужысь кошкон мылкыдын улӥ бере, гужемзэ тросгес бызьылӥ. Удмуртиысь пӧртэм интыосы, тренерелы, юрттэт курыса, вазиськи, ньӧмыз понна кыӵе ке уже мед интыясалзы но сборъёсы потаны луонлык мед сётысалзы шуыса. Монэ валась адямиос Удмуртиын ӧз шеде. 1991-тӥ арын Россилэн чемпионатэз Сочиын ортчиз, солань-талань шонаськись мылкыдме синйылтэм Казахстанысь тренер. 50 иськеме ходокмы, пе, ӧвӧл, оло, ми понна бызьылод. Соку ик ватсаз, машина яке квартира сётыны ум быгатӥське, но военной званиед вань бере, прапорщике уже интыяломы, пичильтык уждун сётомы, уже ветлытэк, бызьылыны быгатод. Мынам соку ик Олимпиада сярысь малпанъёсы чилектӥзы.

1991-тӥ арын гужем вылтӥ Казахстанысь командаен бызьылыны кутски. Шуныт палъёсын тренировкаос ортчытъян пайдаен берытскиз. Уд но оске, сӥзьылаз ик СССР-лэн кубокез понна ӵошатсконын 4-тӥ инты басьтӥ, мон понна со вераны луонтэм шумпотон вал. Мукет араз 2-тӥ луи, жаляса верано, со вормонъёс нокыӵе бадӟым ӵошатсконъёсы пыриськыны, СССР-лэн сборной командаяз шедьыны луонлык ӧз сётэ.

1992-тӥ арын апрель толэзе СНГ-лэн чемпионатаз пыриськи, соку спортсменъёслы луонлык сётӥзы 2 страна понна бызьылыны, мон Россия но Казахстан понна очко люкай. Со чемпионатын вормисьёс дорозь сузьтӥськыны ӧз кылды. 50 иськемын 10 кужмоез пӧлы гинэ шеди. Мукет араз Казахстанысь тренеръёс шуизы, 2 страна понна, пе, бызьылыны уг яра ни, нош ик бырйыны косӥзы: ми пала кылиськод яке дорад бертӥськод. Кузпалъяськемын, нылпиосмы вал ни ке но, мон спортэз - мурт шаерез - бырйи.

Выль 1993-тӥ арез Удмуртиын пумитаммы бере, январьлэн нырысетӥ нуналъёсаз семьяеным ӵош Казахстанэ, сьӧрамы туж кулэ арбериос гинэ кутыса, кошкимы. Милемыз вӧен-нянен ӧз пумиталэ ке но, тренере юрттӥз пиналъёсмес нылпи садэ но школае интыяны. Ӵуказе нуналаз ик мон сборъёсы кошки, вань секытсэ чидано луиз кузпалы Людмила Анатольевна.

Ӝутскон

- Вормонъёс дорам пумен вуыны кутскизы. Германиын ортчоно дуннелэн чемпионатаз шедён понна 1993-тӥ арын гужем ортчиз ӵошатскон. Мон кыкетӥ луи. Вот соку Москваысь кивалтӥсьёс, Иже жингыртыса, юаллям, малы, пе, тӥляд воргоронды мурт страна понна бызьылэ? Шаерысьтымы кивалтӥсьёс валэктӥллям, квартира, пе, куриз. Улонинты сётыны луонлыкмы ӧй вал. Озьы тӥни мон ик янгыше кыли. Сыӵе вераськонъёс монэ туж паймытӥзы, соку гинэ валай, малы шаерысьтымы но Россиысь тросэз спортсменъёс кунгож сьӧры кӧчоно луо.

1993-тӥ арын дуннелэн чемпионатэз Германиысь Штутгарт городын ортчиз. Удмуртиысь отын вал мон, Герман Скурыгин, Марина Азябина но солэн тренерез. Эшшо ядро зыръясь Сергей Рубцов, Глазовын вордскем, Алма-Атаын службазэ ортчем но отчы ик улыны кылем пияш. Та чемпионатын мон 10 кужмоез пӧлы шеди, со сяна, Казахстанлэсь рекордзэ выльдӥ, кудӥз 1976-тӥ арысен возиське вылэм. Нош октябрь толэзе, Словакие ветлыса, 50 иськемез котькинлэсь ӝог ортчи.

Тужгес дуноез луэ 1993-тӥ арын декабрь толэзе Филиппиныын ортчем Азилэн чемпионатаз басьтэм туй медале. 20 иськемез сокем ӧй гажа ке но, медальлы шумпотӥ. Отӥяз вормонъёсы уноязы гинэ. 1994-тӥ арын, Азиатской шудонъёсы пыриськыса, 50 иськемез котькинлэсь ӝог ортчи. Со вормонме Казахстанын туж вылӥ дунъязы, служебной квартира висъязы.

Олимпиадае мынон понна котькуд стартын 10 кужмоез пӧлы шедёно вал. 1995-тӥ арын Пекинын ортчем дуннелэн кубокез понна ӵошатсконын 8-тӥ инты басьтӥ, Швециын ортчем дуннелэн чемпионатаз 9-тӥ луи. 1996-тӥ арын ортчоно гужем Олимпиадае шедёнме тодӥсько вал ини ке но, апрель толэзе Германиысь Гран-при ӵошатсконэ мынӥ, 8-тӥ инты басьтӥ, озьы вань куронъёсты быдэстӥ.

Казахстанэ улыны кошки вал, 1996-тӥ арын Олимпиадае ветлытозь гинэ. Олимпиада ортчиз США-ысь Атлантаын, мон, 50 иськемез 3 час 38 минут но 42 секунд куспын ортчыса, 8-тӥ инты басьтӥ. Отысь бертыса, вуоноез Олимпиада сярысь малпаськыны кутски. Аслым шуи: кужыме вань дыръя, бызьыло. Озьы ик лэсьтӥ, бӧрсьысь бӧрсе 3 Олимпиадае пыриськи. Тужгес ӟеч лыдпус возьматыны удалтӥз нырысетӥяз, соку егитгес вылӥськем, лэся, нош собере 15-тӥ, 20-тӥ луи.

Мӧзмон

- 2008-тӥ арын бадӟым спортысь кошки, шуыны луоз, но ас поннам туннэ но мугорме кыдатӥсько. Тамак уг кыскиськы, вина уг юиськы. Казахстанын бадӟым саклык висъяло спортивной ориентированилы, арлы быдэ со ӵошатсконэ пыриськисько. Бызьылэм сяна, великен ворттылӥсько, кылем арын гужем ас ёзо эшъёсы пӧлын куинетӥ инты басьтӥ.

Кылем ар мон понна кемалы вунонтэм кылёз. 50 арес тырмиз, декабрь толэзе пенсие потӥ, вордскем палъёсам бертылӥ. Выль арысен табере выль ужан удысэ выжыны малпасько - нылпи тренере. Кин тодэ, оло, дасо аръёс ортчыса, Казахстанын выль чемпионъёс кылдозы.

Удмурт шаерез, пичи дырме тодам вайисько ке, толалтэлэсь мӧзмисько. Алматыын лымы ичи, куазь лапак сульпаське. Шаермылэн палэназ улыса но, кузпалэным ӵош удмурт сямен вераськиськомы. 20 ар ӵоже казах кыллы дышыса ӧй вутты. Ужаны кутскеме бере кун кылэз тодыны кулэ шуыса веразы вал. Ярам коть, вань документъёсты со вакытэ ӟуч кылын гожъяны лэзё вал, нимысьтыз переводчикъёс ужазы, нош табере сыӵе луонлыкъёс ӧвӧл ни.

Семьяе сярысь но шуныт кылъёс верасал. Вормон басьтыны соостэк ӧй быгатысал. Кузпалы Дэри ёросысь Сентек гуртысь, Костя но Катя нылпиосмы вань. Школаын дышетскыкузы, кыкназы ик спортэн эшъяськизы. Бадӟым будыса, сюрестӥм одӥгзы но ӧз вамыштэ. Пенсие потыса, вордскем палъёсамы бертыны мылкыдъёсмы вал, табере Казахстанэ выжы лэзиськомы ни кадь. Нылмы бызиз, внукмы вань. Кемалась ик ӧвӧл бакча басьтӥмы. Гуртын будэм адями чидалоз шат, музъемын бугыръяськытэк? Сад котырын берганы, лыдӟиськыны яратӥсько.

Источник:

С.А. Мурт шаерлэн кузь иськемъёсыз / С. А. Корепанов; записала В. Еемельянова // Удмурт дунне. – 2015. – 16 января – №3 - С. 10, 15. - (Удмурт кизилос).

За предоставление материала выражаем огромную благодарность редакции газеты "Удмурт дунне"