Кириллова Людмила Евгеньевна

Материал из Воршуда
Версия от 14:41, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Нимъёс пӧлын ним вань[править]

Кириллова Л. Е.

Та кышномурт ӝыны Удмуртиез пыдын пырпотэмын. Уно ёросъёсысь котькуд нюкез-гопез тодэ.

Гурт нимъёсты утён, удмурт инты нимъёслэсь чеберлыксэс усьтон ужпумъёслы Людмила Евгеньевна Кириллова быдэс улонзэ сӥзиз. Со кык монографилэн, топонимикая кыллюкамлэн но наукая 40-лэсь трос ужъёслэн авторзы. Кивалтэ Россиысь наукаосъя академилэн Урал люкетысьтыз историяя, кылъя но литературая Удмурт институтлэн кылтодонъя ёзэныз.

Финляндиысь М. А. Кастрен нимо огазеяськонлэн Удмурт Республикая координаторез луэ. Пусъемын Россиысь Наукаосъя Академилэн, Кун Кенешлэн Данъян грамотаосынызы. «Удмурт Республикаысь наука удысын сӥё-дано ужась» ним сётэмын.

Та нуналъёсы Людмила Евгеньевналы 50 арес тырме. Ӟечкыласьком! Нош лыдӟисьёсмес ӧтиськом Людмила Евгеньевнаен матэгес тодматскыны.

- Вордӥськи Завьял ёросысь Якшур гуртын. Анай-атае вань улонзэс колхозын ужазы. Семьяямы ньыль нылъёс вал. Мон – бадӟымез. Пиосмы ӧй вал бере, воргорон ужен но вырылӥм. Школаын киужъёслы рос-прос дышетӥсь ӧз сюры. Математикая дышетӥсьмы кутскылӥз ик но… ӝыны юбка вурыса но винегрет пӧраны дышыса гинэ вуим. Азьланяз труд урокъёсмы пиосын ӵош, мастерскойын ортчылӥзы.

Ма, мон пу вӧлыны, рейкаос лэсьяны пӧрмытӥсько ни вал. Пиос ик паймылӥзы. Мунчо но тятяен кыкнамы пуктӥм. Одӥг вакыт книга ӝажы кулэ луиз. Тятялэн дырыз уг тырмы. Вазь ӵукна уже кошке, бер ӝыт вуэ. Тазэ но аслым лэсьтоно луиз. Гараже пырисько, инструментъёс поттӥсько но - ну вырисько ук!

Пичи сузэръёсме утён но аслым ик усе вал. Бадӟымезлы котьку кыл кутоно луэ ни. Ма, али но озьыгес. Адямиос шуо, тон доры, пе, сузэръёсыд курег доры чипыос кадь вуо.

- Нош малы вуоно уждэс кылын герӟады?

- Классэнымы кивалтӥз вал удмурт кылъя но литературая дышетӥсь Григорий Карпович Перевозчиков (Татьяна Владыкина тодосчилэн атаез). Со милемыз олокытчы но нуллэ вал: пересьёс дортӥ кырӟанъёс бичаса, гуртлэсь историзэ люкаса. Ветлӥмы Азинлэн сюресъёстӥз но.

8-тӥ классын дышетскыкумы, уйзэ изьытэк ветлэммы вань. Поездэ пуксьыса, Кварса гуртозь мынӥм, собере пыдын - Чайковский городозь, пыдын ик сое отӥ-татӥ котыръям. Бӧрысь пуксим теплоходэ, вуимы Сарапулозь, отысен ини – доре.

Школаын мунё театрмы но вал. Асьмеос ик мунёос вуриськом, спектакль пуктӥськом. Атае пӧйшурась вал бере, мунёос куослэсь вурылӥ.

Удмурт кылъя дышетӥсьмы ик шаертодонъя музей но усьтӥз. Мон отын экскурсовод вал. Азьланяз сюрес бырйыкум, йырам одӥг гинэ малпан бергаз: удмурт филологияя факультетлэн удмурт люкетаз пыроно.

- Нош наукае вамыштэмды понна кинлы тау шуысалды?

- Валентин Кельмакович Кельмаковлы. Нырысетӥ курс бере удмурт кыллэн стилистикаезъя уж гожъяй. Кыкетӥ курсысен дышетӥсе дэмлаз: инты нимъёсты, пе, дышетэмды уг поты-а?

Мынам соку ономастика сярысь тодон-валанэ ӧй вал на бере, кышкатски. Куинетӥ курсысен Валентин Кельмакович ономастикая лекция лыдӟиз. Тунсыко потӥз. Мар со ономастика? Аснимъёсты эскерись наука. Солэн оглюкетэз – топонимика, инты нимъёсты дышетон.

Пумен мон ономастика борды сюлмыным бурми. Диплом ужме но куать гуртъя гожъяй: Якшур, Якшур починка, Тяма, Вуж но Выль Казьмас, Чемошур.

- Нош тодон-валандэс муромытон понна шонтӥды Москвае?

- Москваын Кылтодонъя институтлэн аспирантураяз дышетскон аръёсты туж шунытэн тодам ваисько. Матысь эшъёсы вал Коми, Марий Эл республикаосысь нылъёс. Тулыс Москва нюлэсъёсысь колыс бичаса, пельнянь, пирожки кутӥськом вал. Одӥг пол огъяулонниын сӥлен, кубистаен перепеч пыжимы. Оглюкетсэ висъетамы пыртӥм, кылемзэ, кастрюляен гур доры ик кельтӥм. Оломар куспын быдэс кастрюлязэ лушкаллям, ява. Удмурт перепеч кинэ ке туж гочатэм, лэся.

Москваын дышетскыкум, Удмуртиысь трос тодмо адямиос отын визьнод люказы. Мария Слесарева (али Глазовысь институтын кафедраен кивалтэ), Татьяна Зайцева (филология наукаосъя кандидат), Борис Каракулов (филология наукаосъя кандидат), Рево Разин (философия наукаосъя кандидат), Александр Яшин (физика но математика наукаосъя доктор) но мукетъёсыз. Пӧртэм вузъёсын дышетским ке но, ӵош возиськиськом вал.

- Топонимикая трос ужъёсты, книгаосты вань. Улонын соосты ӵем куто-а? Кылъёс сярысь законэз улонэ пыӵатыку, инты нимъёсты гожъяку, тӥледлы вазиськыло-а?

- Гурт нимъёсты эскерон ужъёс туж кулэ луо. Асьмелэн пӧртэм бичетъёсын пӧртэм гуртъёслэн официальной нимъёссы гинэ пусъемын. Нош калыкын вӧлмем нимъёс чылкак мукетэсь луыны быгато.

Али кема пукем йӧ вырӟиз. Завьял ёросысь гурт нимъёсты люказы, радъязы. Кыӵе ке юанъёс, валамтэос кылдо ке, милемлы но вазисько.

- Студентъёс инты нимъёсын тунсыкъясько, луоз? Асьтэлы воштӥсь дасяськоды-а?

- Егитъёслы кельше топонимикаен вырыны. Вань курсовой, диплом уж гожъясьёсы. Кӧня ке ар ӵоже лекциос лыдӟи географияя, удмурт филологияя факультетъёсын. Шӧдӥсько, дышетӥсьёс но мыло-кыдо ужало.

Студентъёсын экспедициосы ветлӥськом. Потон азямы верасько: сьӧрады басьтэ бигер колоша, куртка, шуныт дӥсь. Одно ик мазэс ке вунэтозы – возьдасько-а, мар-а. Одӥг арын озьы потӥм: куазь пӧсь, шунды пыже. Собере кутскизы зоръёс, салкымаз. Учкисько но, одӥгез нылмы басма босоножкиен гинэ. Кытчы сое кӧня ке километр кеме келялод на?

Ӵемысь, экспедицие потыкумы, ваньмы ӵош мынӥськом. Нош бертыкумы – кин кытчы бере кылемын ни, луть-лать вамышъяло, жадё. Тӥ, пе, Людмила Евгеньевна, турист луыса вордӥськиды, вылды, жадёнэз уд валаське.

- Кышкыт учыръёс но луо, дыр?

- Вавож ёросэтӥ ветлэмме тодӥсько на. Огнам. Гурезь-Пудгалась мыноно Яголудэ. Потоно бадӟым сьӧд нюлэс пыр. Кышкыт. Соин ик котыр гуртъёстӥ котырскыса мынӥ. Сыӵе жади.

Студентъёсын потакумы одӥг кутскемен 20 километрлэсь трос но ортчиськом. Ай эшшо юалляськоно на. Нунал пумын ым котыръёс ик жадё. Малпаськод ни: таизлы таӵе юанэз сётъяй ни-а, ӧй на-а? Ужез капчиятон понна, юанъёс сётъянъя нимысьтыз программа дасяй. Али со вылэ пыкъяськыса ужаськом.

- Нош экспедицие нырысьсэ потэмдэс тодӥськоды на-а?

- Туж умой. Даниил Яшинэн, Римма Чураковаен ӵош Алнаш ёросэ потамы. Быдэс группамы ветлӥз. Выж вылын кӧлаллям, огъя сиён пӧраллям. Бӧрысьгес ини кык-куинь адямиен гинэ но потаме вань. Али студентъёсын, аспирантъёсын тунсыко ветлӥськом.

Бабушелы 90 арес ини. Котькуд нунал солы жингыръясько, тазалыксэ эскерисько. Экспедициын дыръя Чем-Куюк гуртысен нокызьы жингыртэме уг луы, сотовой телефонэ уг куты. Мар кароно? Отысен но, татысен но жингыртыны выри – уг пӧрмы. Озьы нылпи садлэн азбараз пыриськеммы. Пеймыт. Потон пась ум шедьтӥське ни. Капказы но кортӵогамын, йылзэ кин ке тӥям. Нылъёс со вылтӥ тэтчазы. Мон но туби – оп! монэ фотое пуктӥзы. Егитъёсын ветлон сыӵегес ни.

Одӥг пол диктофонэ пересьёсты гожъяса пукиськом. Азбар кузя курка бызьылэ, курегъёсты уйылэ. Курегъёс ко-ко-ко! кесясько. Номыре кылыны уг ни луы. Нош пересь сокем тунсыко вераське. Куркаез улляно кариськи. Ну, сьӧраз бызьылӥсько ук, нош нылъёс – оп! нош ик фотое уськытӥзы.

- Котькуд адямиен кусып тупатыны быгатоно. Пересьёсын эшшо секытгес, дыр. Кызьы кылзэс пертчиськоды?

- Оломар но луэ. Игра ёросын вал кадь. Ми студентъёсын ӵош сюрес вожын шутэтскыса пукиськом. Пумитамы пересь лыктэ, магазинэ мынэ. Милемыз адӟиз но чабкиськиз:

- Кинъёс та таӵе лыктӥллям?

- Материал люканы вуим…

- Мар? Магазинэ материал вайиллям? Кыӵе дунын?

Куд-огезлэн пельыз сокем ляб, кесяськыса юалляськоно луэ.

- Университетын дышетскыкумы, гурт нимъёслэсь чеберлыксэс милемлы нырысьсэ усьтӥз, дыр, Владимир Владыкин. Учке ай, пе, кыӵе тунсыко кылӥське – Абдэс-Урдэс. Чылкак Аддис-Аббеба выллем. Удмуртъёслэн гинэ гурт нимъёссы сыӵе аспӧртэм, муспотон кылӥсько-а?

- Аспӧртэмлыкез котькудӥзлэн вань. Но ӟучъёсын ӵошатоно ке, удмуртъёслэн котькуд нюк, гоп кыӵе ке ним нуллэ. Али тросэз соос вунэмын ни. Нош вашкала дыръёсты учкыса паймоно. Шуом, Комак пиян нюк. Кытысь марысь адями адӟем ни, отчы комакъёс пияло шуыса. Яке, шуом, Юсь пиян.

- Озьыен, инты нимъёс калыклэсь огъя дунне шӧдонзэс, психологизэс но возьмато?

- Озьы. Улонэз адӟемзэс, чакласькись луэмзэс. Удмурт адями мае гинэ адӟе, соя ним сётэ. Мукетъёсызлэн син шоразы со ӧй но йӧтысал, дыр. Удмуртъёслэн нимаз писпуослэн но нимъёссы вань. Шуом, Сюан возьман кыз, Солдатэ келян кызьпу, Баблес кызьпу, Пӧртмаськись ньылпу. Сюмси ёросын гожтӥ вал таӵезэ: Инмар куштэм чаг возён кыз.

Уноез та нимъёс герӟаськемын удмурт калык сямъёсын-йылолъёсын. Сюан возьман кыз – со гурт пумысь кыз. Отчы мыно вылэм сюанчиосты пумитаны. Чыртыё кыз. Таизлэсь историзэ егитъёс уг ни тодо. Но азьвыл сыӵе кызъёс трос вал. Рекрутэ келяно мурт кыӵе ке кызэз быръе но солэн йылысьтыз кӧня ке вайзэ ӵоге. Сыӵе веран вал: кыз куасьмиз ке – егит пи уз берытскы ни. Аръёс ортчемъя, кыз будэмъя, ӵогем инты чырты выллем луэ. Соин ик – Чыртыё кыз.

- Сомында аръёс ӵоже топонимикаез эскерон уг акыльты-а?

- Уг. Шуом, грамматика, кылчиос йырзэс кур медаз каре, мӧзмытгес кадь потэ. Нош ономастика пӧртэм мукет наукаосын но герӟаське. Отын ик история, фольклористика, этнография. Ваньзэ сое тодоно, герӟаны быгатоно.

- Мынам тодэмея, кунгож сьӧрысь тодосчиос но удмурт инты нимъёсын тунсыкъясько.

- Озьы. Нырысь ик, финн-угоръёс. Венгриысь Жужа Шаланки тодосчи котькуд аре Удмуртие вуылэ. Соин ӵош экспедициосы потаськом. Удмурт кылэз со ӟеч тодэ, ачиз ик удмурт сямен пересьёслэсь юалляське но. Ярато вуылыны финн тодосчиос но.

- Людмила Евгеньевна, вуоно кузпалэныды но экспедицие потаса ик ӧд тодматске-а? - Кузпалы – Владислав Кириллов – удмурт поэт. Университетын дышетскыку, аслэсьтыд бадӟымгес студентъёсты тодоно, пичи курсъёсысьсэ –ӧвӧл. Нош «пичиос» «бадӟымъёсты» ӟеч тодо. Со нырысетӥ курсын вал, мон – витетӥын. Монэ синйылтэм ини. Матэгес тодматским Москваын Каракуловъёслэн сюаназы. Отчы Рашит Хайдаров, Анатолий Леонтьев (али ужа искусствоосъя факультетын) но Владислав Кириллов но эшъёсыныз вуизы. Москваысь аспирантураысь бертэме бере умойгес тодматским. Книгаос вӧлмытон удысын ужа вал бере, тужгес ӟеч книгаоссэ мыным ӵектылӥз.

- Бигер шаере нуон мылкыдыз ӧй вал-а?

- Кукмор палъёсаз бертон малпанэз ик ӧй вал кадь. Соку со «Дась лу!» газетын ужаз ни.

- Муспотон дыдыосты но бызьыны вуо ни. Вуоно эмеспиос но маза уг ни сёто, дыр?

- Нылъёсы кыкез но университетын дышетско. Бадӟымезлы – Светалы – гужем 20 арес тырмоз, пичиезлы – Айнолы – 18. Эшъёссы трос. Туэ ми кузпалэным Выль арез нырысьсэ ӵош гинэ пумитам, нылъёсмы турпоходэ кошкизы. Соослэн географияя факультетазы туризмъя клубзы вань. Тренировкаосы инкуазе ӵем потало.

- Тӥ туж бадӟым ужез нуиськоды на. Дас ар ӵоже ни Финляндиысь М. А. Кастрен нимо огазеяськонлэн республикамыя координаторез луиськоды. Кин кинэ шедьтӥз?

- Удмурт университетын лекциос лыдӟиз Финляндиысь тодосчи Сара Хянникяйнен. Соку ик Удмуртие вуылӥз Финляндиысь Турку городысь тодосчи Сиркка Сааринен. Сараен но Сирккаен кӧня ке пол пумиськылӥм. Сиркка кошкыкуз Саралы шуэм: мон табере тодӥсько, кинэ координатор кароно. Со монэн вераськыны Саралы оскем. Факс пуктӥзы – озьы луи координатор.

- Улонады ваньмыз ӟеч радъяськиз кадь. Тунсыко уж, семья. Озьы ке но, мар сярысь тужгес но жаляськоды?

- Куд-ог чаклам ужъёсме быдэстыны ӧй вутты. Оло, нылъёсы азьланьтозы. Данъяськисько книга поттыны быгатэменым. Вало, Калмез шур котыръёсты эскери. Али туж куро Иж шур котыръёсты эскерыны. Со бордын ужасько. Кӧня ке гуртъёс гинэ кылизы на. Малпасько, таиз но нимаз книга луоз.

Студент дыръям туж потэ вал гитараен шудыны дышеме. Чагыр малпанэ озьы ик кылиз. Нылъёсылы гитара басьтӥ. Соос шудыны дышетско, кырӟало. Ачим но сьӧразы нёръясько. Мылкыды ӧръяське…


Источник:

Кириллова Л. Е. Нимъёс пӧлын ним вань / Л. Е. Кириллова ; записала Е. Миннигараева // Удмурт дунне. - 2005. - 11 марта. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"