К 85-летию Удмуртского театра

Материал из Воршуда
Версия от 09:49, 26 марта 2020; FrolovaLV (обсуждение | вклад) (→‎Жингрес аръёс)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Жингрес аръёс[править]

Театр адямилэсь мылкыдзэ куашкатэ яке ӝутэ, пӧртэм юанъёслы валэктон сётэ яке эшшо тросгес юанъёс кылдытэ, учкисьлэсь пуш дуннезэ узырмытэ, малпаськыны ӧте. Асьмеос шудоесь, 85-тӥ арзэ ини луонлыкмы вань удмурт спектакльёсты учкыны.

Удмурт театр усьтӥськиз 1931-тӥ арын 7-тӥ тулыспалэ «Вало ӧр куашетэ» спектаклен. Пьесаез гожтӥз Москваысь театральной техникумлэн (бӧрысь со ГИТИС-лы пӧрмиз) 4-тӥ курсаз дышетскись Игнатий Гаврилов.

Удмурт театрысь литературая ёзэтэн азьвыл кивалтӥсь Анна Евсеева верамъя, асьме театрмылэн выжыосыз герӟаськемын Удмурт клубен.

— Отчы люкаськизы удмурт культураез пумтэм гажась адямиос, драмкружокен кивалтӥз Александр Сугатов. Со ачиз но быгатыса шудылӥз сцена вылын, кырӟаз-эктӥз, пьесаос но гожъялляз. Котыраз люканы быгатӥз удмурт усточиосты Игнатий Гавриловез, Кузьма Ложкинэз, Анастасия Волкова-Шкляеваез, Августа Будина-Конюховаез, Анатолий Саратовез. Бӧрысьгес лыктӥзы Григорий Овечкин, Вячеслав Волков, Клавдия Фанталова-Гаврилова, Александр Тугбаев, Филипп Бобров, Яков Перевощиков но мукетъёс. 1930-тӥ аръёсы, мынам малпамея, Удмурт театрлэн сяськаян дырыз вал. Огез бӧрсьы мукетыз вордскизы выль ужъёс, кылсярысь, М. Петровлэн «Тыл пыр», «Зӥбет зурка», М. Коноваловлэн «Вормись кужым», И. Гавриловлэн «Кезьыт ошмес», «Груня Тарасова», В. Садовниковлэн «Тыло вӧсь» спектакльёссы. Со вакытэ ик театр узырмиз быгатыса шудӥсь егит артистъёсын — вуизы Васса Виноградова, Анна Колесникова, Анатолий Колесников, Василий Садовников, Василий Гаврилов, Анна Чубукова но мукетъёсыз, — шуэ Анна Яковлевна.

Удмурт театрлэсь ортчем сюрессэ учконо ке, вал отын секыт вакытъёс но. 1940-тӥ аръёсы сое огазеязы Ӟуч театрен. Быдӟым ож кутскон азьын театрлэн ӟуч люкетэз Сарапулэ выжиз, нош удмурт артистъёс — 7 мурт (кивалтӥсьсы К. Ложкин вал) — Алнаш черкогуртэ ужаны лэземын вал. 1942-тӥ арын Удмурт театр выльысь улӟиз. Ужаз со Алнашын, ар ортчыса, выжиз Можгае, нош 1944-тӥ арын ини берытскиз Иже. 1940-тӥ аръёсысь тросэз спектакльёс сӥземын Быдӟым ожлы, вордӥськем шаердэ утёнлы, зэмлыкез утчанлы. Со аръёсысь тужгес яркытэсь ужъёс — И. Гавриловлэн «Камит Усманов», «Тулыс нуналъёс», В. Садовниковлэн «Шудо пумиськон», «Меӵ ярдурын» спектакльёссы.

1958-тӥ арын ортчиз эшшо одӥг воштӥськон — Удмурт театр луиз музыкально-драматической. Озьы, спектакльёс сяна, татын пуктэмын вал нырысетӥез удмурт опера — Г. Корепановлэн «Наталез» но нырысетӥез удмурт балет — Г. Корепанов-Камскийлэн «Италмасэз».

20-тӥ даурлэн 50-тӥ-80-тӥ аръёсаз Удмурт театрын тужгес яркыт спектакльёс пуктэмын вал. Учкисьёс яратыса ветлӥзы Т. Архиповлэн но В. Садовниковлэн «Ӵук лысву», Г. Красильниковлэн но Н. Куликовлэн «Вуж юрт», Е. Загребинлэн «Асьмелэн со одӥг» спектакльёсазы.

Театр сярысь вераку, пусйытэк кельтыны уг луы Удмуртиысь искусство удысысь дано ужасьлэсь Анатолий Григорьевлэсь творчествозэ. Солэн ужъёсыз туала гурт улонэз, адямиослэсь шуг-секытъёсты вормыны тыршемзэс возьмато, вашкалазэ но ализэ куддыр ваче пумит пукто, ӵошато. Котькуд учкисьлэсь сюлэмзэ берыктӥз, дыр, «Лысву сямен уг тӧлӟы синкыли» спектаклез, серекъятӥз «Атас Гири», малпаськытӥз «Пужмерен ӵуштаськем яратон».

1951-тӥ арысен кутскыса, котькуд 8-10 арлы быдэ, Уфаысь, Ленинградысь, Москваысь театр вузъёсты йылпумъяса, Удмурт театре лыкто выль артистъёс.

2013-тӥ арын, Москваысь Щепкин нимо вылӥ театр училищеез быдтыса, бертӥзы 18 егитъёс. Соос пӧлысь Никита Моисеев выльысен Москвае кошкиз, али со режиссёре дышетске. Туннэ нуналлы Удмурт театрын ужа 47 артист. 2014-тӥ арысен театрлэн валтӥсь режиссёрез луэ Удмуртиысь дано артист Алексей Ложкин.

Театр ӵем пота гастрольёсы. Кылсярысь, 2013-тӥ арын «Россиысь культура (2012-тӥ-2018-тӥ аръёсы)» федерал программая грант утыса, артистъёсмы Башкирие, Татарстанэ, Пермь крае, Марий Элэ но Киров улосэ вуылӥзы. Кылем арын В. Сигаревлэн «Ватос но гипноз» комедиеныз асьме артистъёс вуылӥзы Екатеринбургын ортчем «Коляда-Plays» калыккуспо фестивале. Удмурт театрлэн азьланезлы малпанъёсыз бадӟымесь, кылсярысь, туэ оштолэзе аслэсьтыз учкисьёссэ со шумпоттоз ини выль постановкаен. Валтӥсь режиссёр Алексей Ложкин выльысен пуктоз Пётр Захаровлэсь «Эбга» спектакльзэ.


Источник:

Семенова Г. Я. Жингрес аръёс / Галина Семёнова // Удмурт дунне. - 2016. - 5 февр. - С. 10, 15 : фот. - (Тӧр шорын)

За предоставление материала выражаем огромную благодарность редакции газеты "Удмурт дунне"