Загуляева Бибинур Шараповна

Материал из Воршуда
Версия от 14:41, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

КЫЛО-БУРО БИБИНУР[править]

Загуляева Б. Ш.

Бибинур Шараповна Загуляева – филология наукаосъя кандидат, кылчи. Быдэс улонзэ сӥзиз пӧртэм выжыысь калыкъёсты удмурт кыллы дышетонлы. Улӥз но ужаз Эстониын, Финляндиын, Швециын. Али студентъёсты визьма кунгож сьӧрысь но Россиысь кылъёсты вазь дышетон дидактикая кафедраын (Удмурт кун университет). Со сяна – удмурт кылэз ӝог дышетон амалъя курсъёслы дышетскон пособиос дася. Пыре Финн-угор огазеяськонэ (Хельсинки) но финн культуралы сӥзем М. А. Кастрен нимо огазеяськонэ (Хельсинки). Книгаосыз потэмын Тартуын, Хельсинкиын. Ижевскын.

- Туж тунсыко нимды – Бибинур. Мар шуэм со?

- Сыӵе ним песятае сётэм. Бибинур нимо бигер ныллы синмаськемын вылэм. Нимы перс-араб кыллэсь потэм. Бибинур – «ворекъясь госпожа» шуэм луэ. Куд-огез уг валало: «Биби» – со нимыд, «Нур» – атай нимыд-а? – юало.

Пинал дыръям нимы ӧз яралля. Мон гинэ – Бибинур…

Лыктӥ дышетскыны Удмурт шаере. Ваньзы бигер шуо. Нош мынам бигер кариськеме уг поты. Мон – удмурт!

Эстоние аспирантурае дышетскыны пыри. Соку нимы ваньмызлэсь чебер луиз ни. Ми отын куинь кузя удмуртъёс дышетским: Михаил Атаманов – сьӧд йырсиё, Татьяна Перевозчикова (Владыкина) – суд, мон – тӧдьы. Пауль Аристэ – тодмо финн-угор академик - милемыз возьматъяны яратэ вал: тани, пе, удмуртъёс. Нош монэ шуэ вал: таизлэн вашкала удмурт нимыз. Солы озьы кадь мед луоз потэ вал, дыр. Пумен ачим но нимылы синмаськи.

Песятаелэн но нимыз аспӧртэм вал – Нырок.

- Башкортостанлэн кудпал сэрегаз вордӥськиды?

- Янаул ёросысь Няняды удмурт гуртын. Анай-атае колхозын ужазы. Ми – куинь пиналъёс. Анае монэ туж бер вайиз ни. Агаелэсь мон 20 арлы пичи вал. Кенакелэн нылыныз ӵош будӥ. Улӥм бадӟым семьяын.

Пичи дырысеным удмурт кылын вераськыса будӥ, ӟучсэ но рос-прос ӧй валалля, нош бигер кылэз анай-атае гинэ тодӥзы. 7-тӥ классын дышетскыкум, анай-атае бигер гуртэ улыны кошкизы. Мон бигер пиналъёс пӧлы шеди. Школае ӵош ветлӥськом. Сыӵе вераськем потэ – уг быгатӥськы. Эшелы шуисько: мар ке янгыш верай ке, чепыльты. Бадӟым пиослэсь но возьдаськоно вал ни ук…

Бигер кыллы шаплы дыши. Бӧрысь туж трос бигер книгаос лыдӟи ни.

Классамы поръёс но вал, берлогес ӟучъёс вуизы. Пор нылашен одӥг кыл шедьтӥ. Со пыр пумен-пумен пор кыллы но дыши.

Али малпасько: ачиз улон инты дышетӥз монэ трос кылъёсты шӧдыны, валаны но ӵошатыны. Жалясько: удмурт сямен эктыны ӧй дышы, бигеръёс кадь бергасько.

- Дышетскыны одно ик Удмуртие лыктоно кариськиды. Малы?

- Нырысь Бирске малпасько вал. Но отын удмурт сямен уз вераське ук. Нош мынам туж потэ вал анай кылын вераськеме. Мынӥ Ижевске, Удмурт институтысь историяя-филологияя факультетэ.

Удмуртие лыктыкум ик малпасько вал: поездысь пото гинэ, эх, удмурт кылын верасько ни. Но… э-э кыӵе татын улон-вылон вылэм ай…

Дышетскыкум эшъёсы отӥгес карыны кутскизы. Соос литератураын кутӥськись удмурт кылын верасько, мынам диалектэ валантэмгес. Озьы пумен-пумен ӧдъяй чеберлыко удмурт кылэз дышетыны. Со мыным выль кыл кадь луиз.

Тодматски Алнаш ёросысь пияшен Илья Загуляевен. (Берло тодӥ: со тодмо артисткалэн Валентина Загуляевалэн выныз вылэм.) Удмурт сямен чебер вераське вал. Бызи. Картэ мыным улонэз валанын трос юрттӥз. Со – инженер-конструктор, котьмаин тунсыкъяськись адями. Финн-угор кылъёсты но дышетэмез вань. Книгае потэ ке, эскерыса, лыдӟыса пуке.

- Трос кылъёсты тодэмды ик наукае сюрес усьтӥз-а?

- Пинал дыръям одӥг нуналэн улӥ. Дышетсконме заочно йылпумъяй. Пиналы вал ни. Кӧня ке ужай огъяулонниын воспитатель луыса. Но шӧдтэк шорысь УдНИИ-ысь ивор вуттӥзы: кылъёсты тодӥсь ужась кулэ. Конкурс пыр ортчи, наука удысын покчи ужась луи. Нырысь туж кышкасько вал: татын сыӵе визьмо адямиос ужало…

Мыным калмез пал удмуртъёслэсь диалектъёссэс эскерыны сётӥзы. Туж трос гуртъёсы экспедициосы потай. Огнам но, нылыным но, кытӥяз картэным - машинаен но. Аслым нимысьтыз программа кылдытӥ. Удмурт диалектъёсты ӵошатыса лэсьтэм кыллюкам (словарь) поттыны чакласько вал. Ветлӥ, ветлӥ, ветлӥ… Но та уже озьы ик потытэк кылиз… Историяя, кылъя но литературая институтын али но со материалъёс кыллё. Со туж трос ужамлэн емышъёсыз. Мылкыды бордазы кылемын, но ку сое вуттом? Одӥген та ныпъетэз табере уд но вормы ни.

- Россилэн но Эстонилэн кусыпъёссы али туж ик синмаськымон ӧвӧл. Ас вакытаз тӥ Эстониысь Тарту городын аспирантураын дышетскиды…

- Эстоние вуи вазь-вазь ӵукна. Тарту кӧлэ на. Сыӵе чебер, (аспӧртэм) коркаос. Ой, малпасько, кыӵе паймымон дунне… Тартуын пумиськи Пауль Аристэ академикен. Сыӵе визьмо, дано адямиос но сокем огшорыесь вылӥллям – пайми.

Эстония монэ туж тросэзлы дышетӥз. Отын мон астэ шонер возён сярысь книга но юромо басьяй. Шуом, академик пукыку, тыныд сылыны яра-а? Яке кызьы кофе юоно?

Пауль Аристэ студентъёсты кофе юыны ӵемысь ӧтьылэ вал. Одӥг пол озьы мынӥм, мон кофеме юи, нош пичи булкаме, удмурт сямъя, кӧня ке кельтӥ. Аристэ шуэ: си, си. Мон шуисько: тырмиз. Со – си, одно ик си, шуэ. Ма, малпасько, серем каре та. Соку пор аспирантъёс визьмазы: палэс кельтыны чебер ӧвӧл, пе, одно ик сиыса быдтоно, татын со удмурт сямыдлэсь куштӥськы.

- Тартуын куинь ар ӵоже семьядылэсь ӧд мӧзме шат? Егит карттылы сокем-а оскиськоды вал?

- Мӧзмылӥ. Но картэлы туж оски. Со пиналмес садике но, школае но, крезьгуръя школае но нуллӥз. Дӥсь но миське, сиён но пӧра вал. Песянаймы вал на.

Тартуын дырме токма ӧй быдты. Наукая дышетӥсе Пауль Алвре туж кема Финляндиын улэм. Ойдо, пе, монэ удмурт кыллы дышеты, мон тонэ – финн кыллы. Арнялы огпол пумиськылӥськом, ог-огмес дышетӥськом вал.

- Удмуртие бертэмды потэ на вал-а?

- Зэм, Эстониын улонлы дыши: туж чылкыт, чебер, культуразы вылӥын. Удмуртие вуэме бере ӝожоми. Сомында кылъёс дышетӥ, нош татын соос кулэ но ӧвӧл кадь. Удмуртия соку ворсам республика вал ай. Монэ но кунгож сьӧры потаны ӧз лэзе ни. Нош кыл, ялан уд вераськиськы ке, вунэ.

Но одӥг пол Ижевске вуиз Финляндиысь тодосчи Пиркко Суйхконен. Кызьы, кыӵе амалъёсъя, ӧйтӧд. Но «ворсам» город понна со паймымон вал ни. Дорам жингыртӥзы, финн кылысь берыктӥсь кулэ шуыса. Бӧрысь Пирккоен чылкак эшъяським. Со монэ Финляндиысь финн кылэз дышетонъя курсъёсы ӧтчаз. Кӧня ке арзэ отчы ветлӥ. Выльдӥськон кутскем бере Удмуртие кунгож сьӧрысь адямиос но вуылыны кутскизы. Озьы мынам кыл тодэме кулэ луиз. Кунгож сьӧрысь адямиосты ӟуч, удмурт кылъёслы дышетӥ.

- Тӥ Швециын но ужаса вуттӥды ук. Отчы кызьы шедиды?

- Швециысь Уппсала городын финн-угор кылъёсты дышетонъя программазы вылэм. Дышетыны чаклаллям пор, удмурт, мордва кылъёсты. Монэ дышетӥсь интые ӧтчазы, ньыль толэзь ӵоже ужай.

Тазьы ветлэмелэн урод палыз но вал. Ӵабъяськисьёс сюрылӥзы: малы со мынэ, малы сое ӧтё?...

Удмурт кыллы дышетӥ финн-угор кафедраен кивалтӥсьёссэс. Со сяна, трос пӧртэм выжыосысь адямиос вал: Эстониысь, Венгриысь, Швециысь, Италиысь. Соос туж синмаськизы удмурт кыллы. Кыӵе, пе, чебер кыл – «бы-га-ты-ны». Ма, кытӥыз сокем чебер? «Ы» букваез трос ке шат. Нош ӟуч кылэз учкисько но – «уметь». Асьме сямен ик чебер кылӥське.

- Телевидениын «Ойдо, вераськом» передачаез но нуиды ук?

- Озьы. Туж сюлмаськи: кыӵе амалъёсын удмурт кыллы дышетоно? Кызьы астэ возёно?

Трос утчаськи, пӧртэм методикаосты эскери. Ужамы школаосын но, удмурт кыллы дышетонъя выль методикаосын тодматъям. Калыкез дышетонъя министерство но эскеронъёс ортчытъяз. Но тросэз дышетӥсьёс милемыз ӧз валалэ, ваньзы дышемын вал одӥг кабъя ужаны, вылезлэсь кышказы.

- Асьтэ методикадэс кызьы кылдытӥды?

- Финляндиын Пиркко Суйхконен тодосчиен быдэс нуналъёсын ужаськом вал. Со ӵукна султэ, компьютерез борды «бурме», монэ но ужатэ. Висказ бергамотэн чай гинэ юылыны маза сюре. Пиркко ик шуиз: сомында кылъёсты тодӥськод, нош англи кылэз – уд. Одно ик дышетскы.

Ӝыт курсъёсы мынӥ. Пырисько залэ. Отын трос адями пуке ни. Мон ваньзы бере интыяськи. Пыриз дышетӥсь – егит воргорон. Ӟечбуръяськиз англи кылын. Номыр ӧз вера, укно дуре интыяськиз но магнитофон лэзиз. Нимъёсмес англи кылын юа. Отын финн дыдыос кепыраса пуко, рос-прос вераны уг быгато. Ма, сямзыя со финнъёс воксё удмуртъёслы матын. Мон но кышкаса пукисько. Дышетӥсь «стэнд ап» шуэ. Адямиос султо, мон но сьӧразы. Бӧрысь валай: кылэз дышетонын пӧртэм амалъёс кутӥсько.

Швециын дыръям швед кыллы ӝог дышетонскон амалъя курсъёсы ветлӥ. Отын котькуд группаын 12 мурт, нимъёс – аслад ӧвӧл, рольёсъя, шуом, тон – Сара. Озьы адями эрикогес луэ. Ужало кыкен-кыкен. Дышетӥсь ветлэ, янгышъёсты тупатъя гинэ. Кутӥське крезьгур, магнитофон лентае гожъям кылъёс, ваче вераськонъёс. Та амалъёсты мон ас ужам кутӥсько.

- Ог интыяды лёгаськыны уд яратӥське, шӧдске. Али удмурт кыллы дышетонъя компьютер программа кылдытон бордын ужаськоды, шуо.

- Ужаськомы Ижевскысь гуманитарной лицейысь дышетӥсен Ангелина Решетниковаен ӵош. Мукет юрттӥсьёсмы но вань. Та компьютер курс туж кулэ луоз удмурт кылэз дышетыны малпась адямиослы, мукет калыкъёслы. Нош кӧня сыӵеос! Ӟучъёс но вазисько: удмурт кыллы дышетскеммы потэ вал, но дыр уг тырмы, оло, кыӵе ке программаос вань?

Али туж жалясько: программистэ нимысьтыз дышетскеме ӧвӧл. Дасяно курсмес сыӵе зол лэсьтоно вал – адямилэн, компьютере пырыса, берен потэмез медаз пот. Университетын кунгож сьӧрысь но Россиысь кылъёслы вазь дышетон дидактикая кафедраын ужасько на. Студентъёсты удмурт кыллы дышетӥсько, факультатив амалъя – финн кыллы.

Али садикын ужасьёс понна туж кулэ пичи гинэ пособиос. Нылыным ӵош «Кече-пеле» бичет лэсьтӥм ини. Отчы сценарийёс, выжыкылъёс пыро. Ӝоген книга потоз. Но та выллем ужъёс эшшо лэсьтоно луоз на.

- Котькуд тодосчи азьланяз доктор, профессор луыны чакла, дыр. Нош тӥ уд дыртӥське кадь…

- Мон – ӵужанай. Нылылэн кык пиналъёсыз ни. Мон соослы тодон-валанме пыӵатӥ ке, удмурт кыллэсь, сямъёслэсь чеберлыксэс усьтӥ ке, удмурт кыллы дышетӥ ке, улонын унолы тросгес лэсьто, дыр.

Нош доктор уж сярысь ке, со институтэ кылиз… Я, шуом, гожто мон сое. Нош мар со сётэ? Ним гинэ ке шат. Со интые мон лыдӟон но дышетскон книгаос потто, соосъя пиналъёсты дышетозы… Ма, кин тодэ, оло, доктор ужме но быдэсто ай.

Мынам уг поты кызьы ке дан поттыса улэме. Нырысь ик, мон кинлы ке кулэ мед луом, пайда мед ваём.

Шумпотӥсько: Оля нылы университетысь биологияя-химияя факультетэз йылпумъяз. Бӧрысь психологе дышетскиз на. Эмеспие, Сергей Смирнов, медицина наукаосъя кандидат.

- Кӧня кылэз тодӥськоды, лыдъямды вань-а?

- Удмурт, бигер, ӟуч, эстон, финн, швед. Немец кылэз школаын дышетӥ, но сое тодӥсько шуыны уг луы. Пор кылэз валанэ вань, мургес дышетысал на англи кылэз.

Мон шуысал, кылэз олокызьы но тодыны луэ. Финнъёс кыл тодэмез укмыс тубатъя чаклало. Укмысэтӥ тубатын тодон – со кылэз пӧртэм удысъёсын кутыны быгатон. Финн кылын чебер вераськоно ке, ой, кӧня соослэн синонимъёссы! Одӥг дыре таиз кутӥське, мукет дыръя – мукетыз.

- Финн мертэтъёсъя учконо ке, тросэз-а удмуртъёс асьсэ кылзэс укмысэтӥ тубатын тодо?

- Уг. Кытын ке куатетӥ-сизьыметӥ тубатын сыло, дыр. Асьмелэн удмурт кылэн пичи-пичи тодматско но – удмурт кылын вераськиськом шуо. Со нырысетӥ тубат гинэ ай. Озьы школаын англи, немец кылъёсты дышето, ог-огзэс валало, ма но со вераны быгато – кылэз тодӥськом шуо. Но со но кыл тодэм ӧвӧл на. Нылы но 5-тӥ-6-тӥ классъёсын дыръяз удмурт кылын вераськемысь дугдылӥз. Нош мон сое удмурт концертъёсы нуллыны ӧдъяй. Мылкыдыз пумен воштӥськиз. Али со удмурт луэменыз данъяське. Удмурт калыклэсь психологизэ туж вала.

Малы меда озьы луэ: куд-ог удмуртъёслэн тодон-валанзы но уггес тырмы, быгатонлыксы но ӧвӧл – нош азьпал радъёсы потыны, кивалтӥсь луыны тыршо. Мукетъёсыз туж визьмоесь, калыкез сьӧразы кыскыны быгатысалзы, но кивалтонлэсь палэнско.

- Оло, кышкало пыд пуктӥсьёслэсь?

- Соиз озьы. Асьмелэн кин ке ужпумез ӝутоз, мукетъёсыз но басьтӥськозы. Но бӧрысь ваньзы со ужлэсь куштӥськозы, адями огназ кылёз, номыр карыны уз быгаты ни. Оген кылёнлэсь кышкан вань. Башкириын озьы ӧвӧл. Отын огинэ кариськыса улыны тыршо.

Удмурт сям сярысь верано ке, городын будэм туж визьмо удмуртъёс но востэмесь луо. Соин ик мон шуысал: чылкак удмурт садикъёслэн, школаослэн ас понназы кариськемзы туж ик умой ӧвӧл. Адями пӧртэм калыкъёслэсь аспӧртэмлыкъёссэс валаны-шӧдыны кулэ. Тани бигеръёс «мон! мон!» шуо. Нош удмурт адями, тае адӟыса, «нош маин мон пӧртэм?» мед шуоз. Ӟеч вожвылъяськон луыны кулэ. Трос калык пӧлын улон адямилэсь дунневаланзэ паськытатэ. Ужаны кулэ анай-атайёсын но. Тани милям Машимы школаын удмурт но, ӟуч но кылын кылбуръёс туж чебер лыдӟе. Конкурсын нырысетӥ инты басьтӥз. Табере кин солы мар шуоз на? Со аслаз быгатэмезлы но оске, удмурт кылын вераськеменыз но данъяське.

- Удмурт кыллэн ӵуказе нуналэзлы оскиськоды-а?

- Оскисько. Куд-огез нёръя: ой, удмурт кыл быроз ни. Шуисько: мон улэп на бере, уз быры.

- Кытысь сомында лулпуш кужымды?

- Ой, кытысь меда, ачим паймисько. Кытӥяз сокем жадисько, но эшшо со кужымме кытысь ке поттӥсько. Ачим поттӥсько. Нуназе иземе ноку ӧвӧл. Ӵукна султӥ - одно ик мар ке лэсьтоно ни. Бон нуназе изись муртлы кӧт уг веська ук. Мон уйзэ но уг изьы, ай эшшо нунал ӵоже бызьылыса ветло. Зэм, али азьвыл сямен ӧвӧл ни, жадеме пичи-пичи шӧдӥське.

- Но тӥледлы ас арестэс нокин уз сёты!

- Егит луон потэ ачиз адями бордысь. 30 арескын но пересьмыны луэ, номыр карытэк, телевизор азьын кылльыса. Нош мон егитъёсын ужаны яратӥсько. Студентъёс доры лыктӥсько: тӥ татын, ой, кыӵе шумпотӥсько. Соос но мыным шумпото. Азьвыл, пе, дышетӥсьёс лыктозы но пыкылыны кутскозы вал: тӥ, ӟучъёс, сыӵеесь-таӵеесь, удмурт кылэз уд яратӥське, ултӥ кариськоды… Собере адямилэн удмурт кылэз дышетэмез потоз на шат?

Урок нуыкум, ноку уг пуксьылӥськы. Ветлӥсько, юан сётӥсько, шоразы учкисько. Адӟисько: одӥгезлэн синъёсыз чиляло. Вот, шуисько, тон валэктон тодӥськод, вера. Кызьы валатскиды? – пайме, юанэлы шонер валэктэ. Ма, студентъёс монэ «шаман» но шуо. Кытӥяз ачим паймисько. Тани та юанэлы таиз ряд одно ик вералоз - шуисько но доразы султӥсько. Одно ик кудзы ке валэктон шедьтыны быгато. Оло, мынам кужыме, ӟеч мылкыды соослы пыӵа.

- Тустыя тӥ удмуртлы но, бигерлы но уд кельшиське. Кытысь ке палэнысь вирды вань-а?

- Ма, вань выжымы – удмуртъёс. Картэлэн но йырсиез югыт. Соин, вылды, пичи дыръяз нылылэн нылыз сьӧд йырсиё муртъёслэсь кышка вал.

- Тӥледлы синмаськемзы сярысь ӵемысь-а верало?

- Кышномуртлы синмаськон кулэ, сотэк кызьы со улоз? Ӟеч кылъёс, ушъянъёс уг верало ни ке, соку тон кышномурт луэмысь но дугдӥськод, вылды.

- Улондылы кыӵе ке йылпумъянъёс лэсьтӥськоды-а?

- Соку улонад точка пуктэм кадь луоз, дыр. Со бӧрсьы номыр лэсьтэмед но, оло, уз пот. Нош улыны кулэ, ялан азьлань учкыса. 40-50 арес дыръям секыт вакытэ вал. Сюлмаськыны ӧдъяй: мар лэсьтӥ ни, мар лэсьтыса вутто на?

Али со сярысь уг малпаськы: огшоры ужасько, котькуд нуналэз ӟечен пумитасько. Йыр висегес ке, малпасько, ой, чай юи ке, ортчоз ай. Нош ик ужаны кутскисько…

Куддыръя малпасько: кӧня адямиез мон удмурт кыллы дышетӥ, анай кылылэсь чеберлыксэ пыӵатӥ ни! Со но мыным кужым сётэ.

За предоставление материала выражаем огромную благодарность редакции газеты "Удмурт дунне"

Источник:

Загуляева Б. Ш. Кыло-буро Бибинур / Б. Ш. Загуляева ; записала Е. Миннигараева // Удмурт дунне. - 2005. - 25 нояб. - С. 6, 11. - (Удмурт кизилиос).