Батыршин Расиф Зарифьянович

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Дэра но мон[править]

Батыршин Р.З.

Сиренез суреданы вань художникъёс уг быгато, малы ке шуоно со укыр векчи. Тулыс сяськаез дэра вылэ пуктон – экзамен выллем луэ усто кибашлыослы но. Та экзаменэз умой сётӥз, шуыны луэ, Удмуртиысь искусство удысысь дано ужась, Удмурт кун университетысь Дизайнъя но искусствоосъя институтысь живописья кафедраысь доцент, суредась Расиф Батыршин.

Расиф Зарифьяновичлэн суредъёсаз улӟо ненег сяськаос, паймымон инкуазь, арлэн вакытъёсыз, адямиос – вакчияк вераса, ачиз Улон.

- Расиф Зарифьянович, тӥляд фамилиды туж чебер, выжыяды удмурт яке бигер батыръёсты вал, дыр.

- Соглаш, фамилие чебер. Со понна тау кароно атаелэн песятаезлы. Гуртамы (Башкириысь Янаул ёросысь Максим гурт) сое Батыр шуо вылэм. Жаляса верано, атае быдэс дыръя выжымы сярысь ӧй юалляськы, али со пумысен ӧпкелисько. Уго анаелэсь выжызэ умой тодӥсько, атаелэсь туж ик уг. Анаелэн Сара Шаиховналэн но атаелэн Зариф Гарайшиновичлэн нимъёссы бигер, но соос чылк-чылк удмуртъёс. Мыным кык арес дыръя семьямы улыны выжем Иже. Талэсь мугъёссэ мон уг тодӥськы, но Удмурт шаерын улэмысьтым чик уг жаляськы.

- Башкир семьяез татын кин ке возьмаз-а?

- Ӧз, вань ӵыжы-выжыосмы кылизы Башкирие. Анае-атае Ижысь чугун сюрес вокзал пала пичигес корка басьтӥзы, улӥмы гуртын кадь ик. Собере выль корка пуктӥмы. Секыт вал, ваньмыз усиз анай-атайлэн пельпум вылазы, уго ми, куинь нылпиос, пичиесь на вал. Атае ужаз «Ижсталь» заводын, анае – Удмуртпотребсоюзын. Узыр ӧм улэ, но семьяямы ог-огдэ валан, гажан нырысетӥ интыын вал. Соос дышетӥзы милемыз ужез яратыны.

- Нош спортсмен луон сярысь ӧд малпаське-а?

- Туж потэ вал спортсмен луэме. Но спортфаке сюрес пытсаськиз отын химиез сётоно шуыса тодэме бере, та предметэн мон уг эшъяськиськы вал. Школаын дышетскыкум, инженерлэн ужез сярысь но малпаськи. Ачим йӧнала уг тодӥськы вал мар каре со, но кыӵе чебер кылӥське. 8-тӥ класс бере мынӥ монтажной техникуме, но баллъёсы ӧз тырме. Школае берытскыны возьыт потӥз. Соку Коля эше шуэ, ойдо кулинарияя техникуме. Дышетском, повар луом, огшап ужаса, столовоен кивалтӥсе пуктозы, кӧттыро улом. Свидетельствоям отметкаосы эшелэсь умоесьгес вал. Но приёмной комиссия характеристика куриз на. Классэн кивалтӥсь Галина Павловна, школаысь медам кошкы шуыса, гожтэм: Батыршин урокын тэк пукыны уг быгаты, ялан берга, вераське, саклыкез ӧвӧл. Комиссия сое лыдӟиз но ас кылзэ вераз: милемлы таӵе студент кулэ ӧвӧл. Кытчы пырод, школае ик мынӥськиз ини. Дышетсконме йылпумъяса, малпай Ижысь механикая университетэ пырыны. Зинира апае шуэ, малы одно ик инженер луэмед потэ? Ӵукнаысен ӝытозь заводын ужалод, нош худграфе мынӥд ке, суредась луод. Буёлъёсын эшъяськиськод ук, тынад умой пӧрме. Собере художниклэн дырыз трос, огкутскемен кӧня ке интыын ужамез луэ. Озьы мон, экзаменъёсме умой сётыса, Удмурт пединститутысь худграфе пыри.

- Отын ик кидэс волятӥды ини?

- Шонерзэ вераса, нырысетӥ-кыкетӥ курсъёсын йӧнала ӧй дышетскы, ваньмыз капчиен сётӥськиз. Коньдон уг тырмы вал бере, интыяськи «Ижсталь» заводэ художник-оформителе. Отын ужаме ӧз люкеты. Егит вакыт ук, уж бере эшъёсын пумиськылыны но вуттылӥ на. Оло, соин ик анае монэ эскероно кожам, зэмзэ ик-а мон институтын дышетскисько. Худграфе лыктэм но секретарьлэсь юам Батыршин студент сярысь. Секретарь сое ӧтем коридоре, нош отын «Устоосыз студентъёс» стендын мынам туспуктэме ошемын, пе. Анаелы возьыт луэм, лэся, озьы ветлэмысьтыз, мыным со сярысь ӧз поттылы. Та учыр сярысь берло гинэ тодӥ, секретарь вераз вал.

4-тӥ-5-тӥ курсъёсын лулысь-сюлмысь дышетски ини. Ӵапак соку ик худграфысь одӥг удмурт но ӟуч студентэз Москвае ыстыны малпало вал. Отчы мыныны кандидатъёс пӧлын мынам но нимтулы вылэм, но дышетӥсьёс бигер кожаллям. Та сярысь аслым ивортӥзы ини берло, мон удмурт шуыса тодэмзы бере. Киез волятон сярысь юанэз азьланьтыса ик… Дано испанец Сальвадор Дали вуоно суредасьёслы ас вакытаз шуиз вал: «Художник, суредаськы!», уго озьы гинэ зэмос мастер луод. Соин ик мон ялан, котькытын котьку суредаськи но али но суредаськисько.

- Нош пичи дыръяды суредась луон сярысь ӧд малпаське-а?

- Огпол сыӵе малпан йырам чилектӥз. 9-тӥ классын дышетскыкум, атай мыным ВЭФ приёмник ӧз басьты, солы люкам уксёен монэ Москвае Кремль ёлкае лэзиз. Соку нырысьсэ пырай Третьяков галереяе. Мукет дуннее зыми кадь. Тодмо суредъёсты журналъёсысь но учебникъёсысь гинэ адӟылӥ, нош татын соос маке быдӟаесь, йырдэ вылэ ӝутыса ик, учконо. Кылсярысь, синмаськи Иван Шишкинлэн ваньмызлы тодмо гондыръёсызлы («Утро в сосновом бору»), Исаак Левитанлэн зарни сӥзьылэзлы («Золотая осень»), Алексей Саврасовлэн сьӧд куакаосызлы («Грачи прилетели»), Виктор Васнецовлэн батыръёсызлы («Три богатыря»). Со чеберез адӟиськод но малпаськод: ведь сое адями киос быдэстэмын, луэ шат сокем усто суредаськыны? Озьы паймыса ветлонъям мон эшъёсылэсь кылиськем. Учкисько но, экскурсия йылпумъяськемын, монэн ӵош лыктэмъёс огзы но ӧвӧл. Галереяысь лобыса кадь потӥ, ульчаын но эшъёсы уг адско, соос Кремле Выль ар кыз котыртӥ берганы мынӥллям ини. Юалляськысал ке, Кремлез шедьтысал, но монэ суредъёс бордысьтызы ӧз лэзе. Выльысен пыри но галереялэн кыкетӥ этажаз туби, отын Андрей Рублёвлэн мудоръёсыз вылӥллям. Дорамы обросъёс ӧй вал, нош татын соос олокӧня пумо, син мальдэ. Третьяков галереяетӥ кӧттырымон поръяй, отысь потӥ сыӵе малпанэн: одно ик луо суредась. Валамон ини, картинаосты учкытозям, ёлка но бырем, общежитие вуыкумы, эшъёсы отын вал ни. Дышетӥсе бӧрдыса тышкаськиз, но кыл кылэме но, ёлкае мынымтэе но жаль ӧй вал, уго мон адӟи быдэс дуннелы тодмо художникъёслэсь ужъёссэс.

- Армиын, альбомъёс суредаса, улӥды, дыр?

- Плакатъёс, стендъёс дасялляй, суредъёсме печатлалляй Чита улосын потӥсь газетын. Госпитальын ӧс вылэ табличкаос гожъяй. Одӥг ар службазэс нуэм солдатъёслы туж ӧз кельшылы ас поннам ужаме. Армиын куд-ог командиръёслэн кык ымныро луэмзылы пайми, асьсэлэсь янгышъёссэс рядовойёс вылтӥ погыльто вал. Паймытӥз одӥг учыр. Частямы мастерской вал, мон отын суредаськылӥ. Пичи гинэ висъет. Борддорын ошемын ДВП вылэ суредам пейзаж. Огпол майор пыриз но мынэсьтым юа, нокыӵе фанераед ӧвӧл-а? Ӧвӧл, шуисько. Со ӧз оскы, котыр утчаськиз, син шораз йӧтӥз борддорысь суред. Нош та ДВП кадь ук? Мыным, пе, шкафлэсь мышсэ ӵоктано. Озьы шуиз но, суредэз нуыса, кошкиз. Мон понна воксё валантэм вал, кызьы шкаф берез суредэн ӵоктаны луэ, кин ке ведь сое малпаз, сюлмысь лэсьтӥз, нош ужамез кышъяськыны мынӥз.

- Тӥляд туж трос инкуазь суредъёсты. Дипломды но солы сӥземын вал-а?

- Диплом ужам суредай атайме, нимай сое «Чорыгасьлэн портретэз». Но инкуазь суредъёсы мынам зэмзэ но трос. Туж яратӥсько сяськаосты: сиренез, италмасэз, льӧмпуэз. Тулыс вордӥськи, оло, соин но арлэн та вакытэз дуно. Кезьыт тол бере улон, инкуазь но адями сайкало кадь. Берло дыре инкуазез уногес пуктӥсько дэра вылэ, арлыд вуэмъя уката но дунъяськод, валаськод но шӧдӥськод кадь солэсь пӧртэм тусо луэмзэ. Нош азьло мон уно суредалляй портретъёсты но натюрмортъёсты. Кылсярысь, шудӥсь нылпиосме. Яке семьяе изе, нош мон уйшорозь буяськисько на. Шутэтскон сямен учкисько шоразы, макем мусо адско, ки улам кагаз вань ке, набросокъёс лэсьтӥсько. Соин ик нылпиосын суредъёсы трос. Эшшо ик армия бере интыяськи Ижысь искусствоосъя нылпи школае.

- Искусствоосъя школаын ужакуды ик, «Удмуртия» издательствоен но эшъяськиды.

- 1976-тӥ арын вал со. Ӵош ужась эше Александр Балтин куронэн вазиськиз аслам, пе, дыры ӧвӧл, ӧй быгатысалыд-а Никвлад Самсоновлэн «Чингыли гуръёс» книгаезлы выл бам дасяны. Мон соглаш кариськи, но книгалэсь вылзэ сяна, веросъёсызлы но суредъёс дасяно луиз. Солы быдэс отпуске кошкиз. Собере Михаил Ивановлэн «Улон вирсэръёс» повестьёсызлы суредъёс дасяй. Озьы ик Николай Никифоровлэн «Толэзен вераськон» но Алла Кузнецовалэн «Лушкем яратон. Интим», Лев Лещинскийлэн «Берегите сердце» книгаоссылы вылбамъёс дасяй. Азьло аръёсы книга суредам понна бадӟым гонорар тыро ке но вал, мон та удыслэсь куштӥськи. Малы ке шуоно со туж трос дырез басьтэ, аслад творчествоедлы виссэ уд шедьтӥськы ни. Нош мон инкуазь суредъёстэк, буёлъёстэк улыны уг быгатӥськы.

- Кияды кисточка кутыкуды ик, тодӥськоды ни-а, мае суредалоды?

- Пӧртэм сямен луэ. Кутскиськод огез борды, нош суред воксё мукет луэ. Яке выриськод-выриськод но, сюлмыдъя уг луы, озьы но тазьы бергатӥськод йырад, малпаськод: пайдаез луоз-а, аналтоно-а яке йылаз-пумаз вуттоно.

1984-тӥ арын вал со, ужъёсы уг пӧрмо, мылкыды урод, малпасько, оло, мон воксё мыдлань ужен вырисько, художник но огшоры. Соку тодӥ Совето Союзысь художникъёслэн мастерскойёссы сярысь. Шаерысьтымы Художникъёслэн огазеяськонэнызы со вакытэ кивалтэ вал Анатолий Аникин. Суро-пожо мылкыдме шӧдыса, дэмлаз мыным Тверь улосысь Вышний Волочёкысь дачаосы мыныны. Отчы люкаськылӥзы быдэс странаысьтымы художникъёс. Ӵапак татчы Илья Репин вайылӥз Санкт-Петербургысь художествоосъя академиысь ёрмись студентъёсты. Соос, сиён, уждун но мастерскойёс сярысь сюлмаськытэк, творчествоен мед вырозы шуыса. Отчы вуыса, мынам кыкетӥ шоканэ усьтӥськиз кадь, кык толэзь ӵоже котькуд нунал суредаськи. Комиссия но мукет улосысь усточиос ужъёсме умоен пусйизы. 1988-тӥ арын нош отчы ик ветлӥ. Куинетӥяз отчы мыныкум, потокмылэн кивалтӥсез, Россиысь тодмо суредась Иван Торохов мынэсьтым ужъёсме ушъяз но эшъёсызлы паймыса ивортӥз: Батыршин Художникъёслэн союзазы пыртэмын ӧвӧл, со ик дэмлаз монэ кутыны. Удмуртие бертэме бере татысь Суредасьёслэн огазеяськонэнызы кивалтӥсь Валерий Кононов шуиз, та дырозь нокинэ но тонэ сямен ӧз на дэмлалэ вал. Озьы мон 1991-тӥ арын Россиысь Суредасьёслэн союзазы пыри. Тверь улосысь дачае мон 6 пол вуылӥ, отчы ке ӧй ветлысал, зэмос художник ӧй луысал, дыр.

- Творчество пӧлы выем адямиосын одӥг кыл шедьтыны секыт-а?

- Удмуртиысь Художникъёслэн огазеяськонэнызы кивалтэме пумысен озьы юаськоды, дыр? Солы тӧрое монэ 2003-тӥ арын бырйизы. Кема ой ужа – кошки. Но визьмы, малпанъёсы, суредаськыны быгатонэ мынам сьӧрам ик кошкизы. Шуг-секытъёс азьын мон ӧй пыдесъяськы. Озьы ик суредаськисько, выставкаос радъясько. 2009-тӥ арын тодмо художникъёс, мон, Сергей Орлов, Юрий Лобанов, Татьяна Михайлова, Валентина Гартиг, Энвиль Касимов, Вячеслав Михайлов, но мукетъёс огазеяським «Ижкаре», соин кивалтэ Юрий Лобанов. Озьы ми пӧртэм ужрадъёс, презентациос, фестивальёс ортчытъяськом, берлоез ужрадмы вал Сьӧлталан, отын ортчиз «Кынар кабон» симпозиум.

- Озьыен, мылкыдды урод дыръя тӥ уж пӧлы выйиськоды?

- Уж, творчество тужгес устоез эмъюм шуг-секытъёсты, урод мылкыдэз вормыны, аслыд но мукетъёслы возьматыны, мар тон быгатӥськод. Суредаськыкум мыным нокин но кулэ ӧвӧл. Вань мон но дэра (холст) гинэ, куинетӥез татын мултэс ини. Озьы ик зол юрттэ инкуазь, солэн чеберлыкез, узырлыкен тырмытэм колодчаез пыдэстэм. Сое адӟыны гинэ быгатоно. Тани ми кӧня ке арзэ ини Валентин Белыхен инкуазе потаськом. Басьтӥськом палаткаосмес, буёлъёсмес, сиён но мынӥськом Кам кузя. Валентин Белых туж трос чебер интыосты тодэ. Алигес тани Каракулино ёросэ вуылӥм. Отын вань кылъёсын вераны луонтэм чебер инты, нимаське Яратон шормуӵ. Со интыяськемын меӵ ярдурын, улаз тулкымъяське йӧно Кам, котырак паймымон инкуазь. Татчы вуиськод но ваньзэ вунэтӥськод: городэз, калыкез, астэ.

- Кыӵе художникъёслэн ужъёссы тӥледлы кельшо?

- Кунгож сьӧрысь классикъёслэн ужъёссы. Сюлэмъям Голландиысь художникъёс: Франс Халс, Ян ван Гойен но мукетъёсыз. Ӟучъёссэ верано ке, пусйысал Сергей но Алексей Ткачёвъёсты, Виктор Попковез («Суровый стиль» нимаськись течение пырисьёс). Удмуртиысь усточиосты верано ке, буёлэн шудыны быгатэмзэ пусйысал Анатолий Русскихлэсь, портретъёссэ но крестьян темаез усьтэмзэ Алексей Холмогоровлэсь, Валентин Белых кужмо луэ батыръёсыныз но историез возьматэменыз, Вячеслав Михайлов удмурт калыкез тодэмзэ, гурт улонлэсь шӧмзэ шарая. Семён Виноградовез аксакал шуыны луоз, калык творчествоез, сям-йылолъёсты солэсь умой нокин уг тоды, дыр, ужъёсаз но со умой адӟиське. Шонерзэ вераса, суредъёс сярысь удмурт сямен вераны туж секыт, кылъёс уг сюро. Соосты адӟыны кулэ, малы ке шуоно котькудӥз отысь аслыз гинэ тупасьсэ шедьтоз.

- Тӥ али студентъёсты дышетӥськоды. Соос шоры учкыса, валаськоды-а, кудзы суредась луозы?

- Монэ УдГУ-э ужаны кык пол ӧтиз ни вал Сергей Орлов, Дизайнъя но искусствоосъя институтысь живописья кафедраен кивалтӥсь, куинетӥ ӧтемзэ ӧй возьма ни. 2007-тӥ арысен студентъёсты визьнодасько. Куд-ог дыръя мыным потэ, соос университетэз суредаськонъя кружокен сурало. Малы ке шуоно мон уг валаськы, кызьы вуоно художник парае буёлъёссэ но холстсэ вайыны вунэтэ. Бен, вань туж сюлмоосыз но. Шоразы учкыса, оскон кылдэ, таослэсь одно ик маке пӧрмоз.

- Кызьы тӥ малпаськоды, искусствоез коньдонэн мертаны луэ-а?

- Та юанлы огласянь гинэ валэктон уд сёты. Малы ке шуоно суредаськыны мылкыдыд но талантэд вань ке, тон узыр-а, начар-а улод, но суредаськод, уго со нянь гинэ ӧвӧл, художниклэн ужез – творчество. Бен, уксётэк уд улы, тросэз усточиос ужъёссэс вузало, кузьмало, мон отысь номыр уродзэ уг адӟиськы. Озьы художниклэн творчествоеныз тросгес адями тодматскыны быгатэ. Но со медаз луы вылэм уксё сьӧры уйиськон, соку со искусство уг луы ни. Нош мукет ласянь учконо ке, быдэс дуннелы тодмо итальян художникъёс Сандро Боттичелли, Леонардо да Винчи, Рафаэль Санти заказъёсын ужазы. Узыръёслэн но эксэйёслэн мылкыд каремзыя ик кылдытэмын вал Боттичеллилэн «Рождение Венеры» суредэз, Леонардолэн «Джокондаез» (со ик «Мона Лиза») но Рафаэльлэн «Сикстинская Мадоннаез». Но уждун понна гожтэмын ке но, учке ай, соос зэмос шедевръёс луэмын.

- Туж огшоры юан, мар со шуд, тӥ сямен?

- Туж секыт юан. Художник понна шуд – со ужа, маке кылдытэ, творчествоез азинске ке. Нош адями шудо луэ, дыр, аслэсьтыз интызэ но ассэ та улонын шедьтэ ке. Мынам соиз но, таиз но вань кадь, озьыен, мон котыр ласянь шудо.

Источник:

Батыршин Р. З. Дэра но мон / Р. З. Батыршин ; записала Г. Семенова // Удмурт дунне. - 2011. - 9 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"