Байметов Ильтимир Минтимирович

Оскон сётэ кужым

Байметов И. М.

Республикаямы Ильтимир Минтимирович Байметовез тодӥсьтэмез туж ичи, дыр. Со – Удмурт Республикаысь сӥё-дано журналист, «Вордскем кыл» журналлэн валтӥсь редакторез, Ижкарысь «Удмурт кенеш» огазеяськонлэн тӧроез. Луэ на писатель. Потӥз «Сюлэмам тон гинэ» веросъёсын сборникез, печатласькиз «Быльырам синкыли» веросъёсын огъя сборникын, «Кенеш», «Инвожо», «Кизили», «Вордскем кыл» журналъёсын. Кыкез веросэз пыртэмын внеклассной лыдӟиськонъя школьной программае. Со сяна, со – тодмо политик. Вань улонзэ герӟаз удмурт калыклэсь Конституциен сётэм правооссэ утёнлы. Али но со чырмыт нюръяське кылмес, культурамес утён но азинтон понна. Сэзь, кышкасьтэм, ӟеч лэсьтыны тыршись адями.

- Мон тӥледыз тодӥсько Илья Михайлович нимын. Паспорттыя мукет вылэм. Калыкын шуо, ним, пе, адямилэсь адӟонзэ кылдытэ…

- Вордски но будӥ Башкириысь Калтаси ёросысь Чиндэр (М-Качак) удмурт гуртын. Мыным ним сётэмзы туж тунсыко. Ӵектэм сое 99 аресъем песятай: атаез, пе Минтимир, пиез, пе, Ильтимир мед луоз. Озьы ик кариллям. Нош быдэ вуэмъям валай, со мынам энергетикаелы уг тупа, мон сьӧры уг вуы. Нимме дыгаса-могаса вераллязы, эшшо ке мыдланьтыса. Соку малпай, мед луо Илья Михайлович – вакчи, пукыӵ ньӧлэз ыбем кадь мед кылӥськоз. Дас классэз йылпумъяме бере, монэ тодмо удмурт писательлэн Роман Валишинлэн гуртаз дышетыны ыстӥзы. Оскизы 2-4 классъёсты. Ар ортчыса, Бадӟым Качак восьмилетней школае удмурт кылъя но литературая дышетӥсе ыстӥзы.

1971-тӥ арын дышетскыны пыри Удмурт кун университетэ удмурт кылъя но литературая факультетэ. Тӥни со дырысен вань улонме Удмуртиен герӟай.

- Удмуртие вуэмды бере ма нырысь ик паймытӥз?

- Кык удмурт пиослэн куспазы ӟуч сямен вераськемзы. 19 аресозям мон сыӵезэ ӧй адӟылы на вал. Милям удмуртъёсмы бигер, пор, ӟуч кылъёсты тодыса будылӥзы ке но, куспазы анай кылын гинэ вераськылӥзы. Мукет калыкъёс азьын но ас кылзэс ӧз ватылэ. Сямъёсмы но трослы висъясько кадь потӥз. Аръёс ортчемъя валай ни, менталитетмы но пӧртэмгес шуыса.

- Маин со герӟаськемын?

- Улон условиосын. Ми палась удмуртъёс кык пӧртэм зӥбетэз чидано луизы: одӥг ласянь - бигеръёс-башкиръёс. Мукет ласянь –ӟучъёс. Асьсэлэсь инмарлы осконзэс, музъемзэс утён понна йыг-йыг сылоно вал. Мӧйыослэн мадемысьтызы кылэме вань, вашкала дыръя удмуртъёс но бигеръёс куспын музъем понна жугиськонъёс туж ӵем потылӥзы, пе. Соин ик гурт калык аслэсьтыз егит выжыоссэ кышкасьтэм, сэзь, ас понназ, гуртэз, калыкез понна сылыны быгатӥсь сямъёс пыӵатыса будэтыны тыршылӥз.

- Кыӵе сямез умоен лыдъяськоды?

- Оскон. Аслад кужымедлы оскон сямез. Оскон уг луы ке, суй-пыд юскиське. Сыӵе мурт шуг-секытъёсын но нюръяськыны уг быгаты ни. Улон тулкым сое шелепез кадь зӥръя. Озьы капчизэ гинэ утчаны кутске. Мурт шӧлкын аслыз пайда поттэ, ӵыжы-выжыоссэ, котырысь эшъёссэ, ас калыкысэ чик жалятэк вуза.

Ас кужымедлы оскон сям сярысь мон школаын дышетскыкум ик малпаськыны ӧдъяй. Атае Инмарлы юн оскись адями вал. Витетӥ классын дышетскыкум ик, Инмарлы йыбыртъянэн сям-йылолъёсты ортчытъякуз, ас бордаз басьтылӥз. Со «инмысь атайлэсь» бусыын ю-нянь мед удалтоз, гид тыр пудоос мед луозы шуыса курылӥз. Куддыр мынам но визьмам «Инмар-атай» юрттоз шуыса малпан кылдылӥз. Нош ялан номыр ӧз воштӥськылы. Кызьы ӝӧк выламы тӧдьы нянь ӧй вал, озьы ик ӧз луылы, ческыт сиёнэз ӧм адӟылэ, шуныт дӥськут выламы ӧз шедьылы. Соку, атайме пыкылыса, шуылӥ: куриськод-куриськод, малы вылысь Инмармы номыр уг сёты. Со мур лулӟыса шуоз вал: «Э-э, пие, ачид ке ӧд тыршы, нокыӵе Инмар уз юртты». Палэнысь юрттэтлы осконэ быриз, витетӥ классын анае кулэм бере но укмысэтӥ классын атай улонысь кошкем бере. Мон сяна, мынэсьтым пичиесь куинь сузэръёсы кылизы на.

- Кыӵе сямез уродэн лыдъяськоды?

- Жалян. Жалян сям осконэз быдтэ, сюлэмез чигтэ. Анай-атай улонысь кошкемзы бере, бускельёс, милемыз жаляса, ӵем пыраллязы, жалян кылъёс вераллязы. Сыӵе дыръя со адямиослы йыркур, вожпотон бугырскылӥз. Чидатскылӥ, номыр ӧй куаретылы. Аслым осконме гинэ юнматыны тыршылӥ. Одӥгзэ ӟеч валай, шуге-леке шедем адямиез ас поннад юн жаляськод ке но, эн возьматы сое. Быгатэмедъя юрттыны тыршы. Со юрттэтэд адямилы азьланяз нюръяськыны кужым мед сётоз.

- Ку улон шоры учконды юнманы ӧдъяз?

- Университетын дышетскыкум. КПСС-лэсь историзэ ортчыку, политэкономия, научной коммунизм предметъёсъя занятиосын улонмес туж чеберен возьматӥзы. Нош учконо ке, со чик озьы ӧй вал. Паймыса кылзылӥ дышетӥсьмылэсь Роза Ивановна Яшиналэсь мадемъёссэ. Национальной политикалэн мыдлань мыныны кутскемез сярысь чик кышкатэк, шара вералляз. Паймылӥ егит кышномуртлэн дӥсьтӥсь луэмезлы. Со вакытэ чакласькытэк верам кыл понна пӧртэм интыосы кыскаллязы уго. Партиысь но куштылӥзы. Ваньмыз со официальной политикалэсь мукетгес малпаны, калык пӧлын вераськыны дӥсьтэмзы понна. Университет ми понна ас калыктэ, солэсь кулэяськонъёссэ валаны, удмуртлыкез вире пыӵатыны бадӟым школа вал. Али ке но татысь дышетӥсьёслы тау карисько.

- Озьыен, дышетӥсь луон сярысь малпанды быдэсмиз?

- Быдэсмиз но, ӧз но шуысал. Зэм, дышетӥсь луон понна диплом басьтӥ. Нош улон мыным мукетгес ӧрзэ дасям: кыстӥськи журналистикае. Улон сюрес вылэ пазьгиськемлэсь азьвыл одӥгез дышетӥсьмы милем лад-лад валэктӥз на: «Тӥ кие туж кужмо «ож тӥрлык» сётэмын. Соин чакласькыса нюръяське. Нырысь ик зэмлык понна тырше, янгыштэм адямиез вӧсь эн каре». Дэбес ёросысь «Выль сюрес» газетлэн редакцияз ужаны кутскыса, со кылъёсты выльысь тодам ваи. Мыным юнматӥзы гурт хозяйствоез возьматон удысэз. Нырысь-валысь ӧй валалля, ма люкетэ колхозъёслы экономиказэс юнматыны. Кунмы соослы уксёен но юрттэ кадь, техника но висъя. Мургес бугыръяськыны ӧдъяме бере шӧдыны кутски, хозяйствоослы, соослэн кивалтӥсьёссылы ужзэс ас валамзыя радъяны эрик уг сёто шуыса. Со сярысь валанэ эшшо но юнмаз газетлы редакторе юнматэмзы но партилэн райкомезлэн бюрояз быръемзы бере.

- Газет бамъёсын материалъёсты потылэм бере маке воштӥськылӥз-а?

- Ӧз. Валай, из борддорез уд пильы шуыса. Соку мылкыды ӝутскиз, республикаысьтымы Вылӥ Кенеше депутатэ бырйиськыса, гурт хозяйствоос понна, удмурт калык понна маке но ӟечсэ, пайдаёзэ лэсьтыны. Дэбесъёс мыным оскизы депутат луыны.

- Ваньмыз-а малпанъёсты быдэсмизы?

- Ӧз. 90-тӥ аръёсы Совето Союз куашказ, политической система воштӥськиз, национальной республикаосты быдтыса, губерниос кылдытон сярысь малпанъёс нырысетӥ интые потӥзы. Соку депутатъёс азьын сылӥсь ужпумъёс но воштӥськизы. Ӝегатскытэк басьтӥськимы асьме калыкмылэсь кунлыксэ утён борды. Выль Конституция кутӥмы, юнматэмын вал кунлыклэн пусъёсыз-тодметъёсыз: гимн, флаг, герб. Со капчиен ӧз сётскы, асьсэды демократ шуись адямиосын нюръяськыса ортчиз.

- Кызьы мон тодӥсько, тӥ вить ар ӵоже Дэбес райгазетлэн редакторез луыса ужады. Кивалтӥсьёс азьын кыӵе ужпумъёс сылӥзы?

- Зэм но, мон понна со самой секыт аръёс вал, дыр. Туж егитысен редактор луыса ужаны кутски бере, кивалтон удысын нокыӵе опытэ ӧй вал на. Со аръёсы огез бӧрсьы мукетыз ужасьёсмы пенсие кошкыны кутскизы. Республикаямы журналистъёсты уг дасяло вал бере, туж секыт югдуре шедёно луиз. Утчаны ӧдъяй гожъяськон ужез валась адямиосты. Школаез йылпумъясь егитъёсын тунсыкъяськыны кутски. Куиньзэ нылъёсты но пиосты Свердловске, Казане но Ижысь Удмурт университетэ дышетскыны ыстӥ, тодӥсько ке но вал, соос вить арлэсь азьвыл дорамы уз берытске шуыса. Газетэз арняяз куинь пол поттоно бере, ужасьёстэк сое дасяны уг луы. Тани син шорам йӧтӥз Дэбесысь одӥгез пияш. Со «Сельхозхимия» огазеяськонын тракторист луыса тырше вал. Быгатонлыкезлы нырысь ӧй оскы ке но, малпасько, оло пӧрмытоз. Бӧрысь сое университетэ дышетскыны келямы. Аслэсьтыз ӧрзэ шедьтӥз кадь. Собере Дэбес педучилищеез йылпумъям пияшез кутӥ, университетэз йылпумъям кузпалъёсты ӧти, Башкириысь тодмоме ас дорам басьтӥ. Табере ваньмыз соос республикаямы туж тодмо журналистъёс луизы. Нокудзы ласянь но янгышаськымтэ, кыӵе ке шӧдонэ вылэм, лэся.

- Коллектив сярысь сюлмаськон – со одӥгез ужпум. Нош тӥляд кыкетӥ ныпъетты но вань на кадь?

- Бен, озьы. Кык пӧртэм ним нуллэме ик, оло, пельпум вылам мукет но ныпъет ватса на. Луисько на Ижкарысь «Удмурт кенеш» огазеяськонлэн тӧроез. Таиз уж журналистлэн ужезлэсь но оло секытгес. Кыӵе гинэ юанъёсын дорам вазиськисьёс уг луо! Тани кык удмурт пиос-офицеръёс, армиын кема служить каремзы бере, пенсие потон дырзэс возьматэк, семьяосынызы дор палазы бертоно луиллям. Улон сэрег но, уж но шедьтэмзы уг луы. Юрттэт куризы. Соослы уд вера ук, «Удмурт кенеш» – со мерлыко огазеяськон, соин ик солэн уж утчаны но, улон сэрег шедьтыны но луонлыкез ӧвӧл шуыса. Кызьы но озьы нырысетӥезлы юрттӥм, нош кыкетӥезлы ӧм быгатэ. Яке мукетыз учыр. «Ижсталь» завод Ижевскысь Ленин ёросэ интыяськем библиотекаезлэсь куштӥськем. Библиотекарьёс, удмурт нылкышноос, ужтэк кылиллям. Нош ик дорам вазисько. Уждун но ум басьтӥське, кузётэм кылем книгаосмы но пазяськозы, библиотекалэн юртэз но олокин кие кошкоз. Мыноно луисько Культурая министерствое. Отын шуо, со милям сюлмаськонмы ӧвӧл. Вазиське, пе, город администрацие. Одӥгаз ӧсэ, мукетаз оло дас пол но йыгаськоно луиськод, бумага вылэ бумага «пӧраськод». Йӧ интыысьтыз вырӟе кадь. Я, шуом, юрттыны быгатӥм. Капчигес луиз. Нош ӵуказеяз мукетыз адями выль куронэн вазиське ни. Юрттэ, пе, вал, общежитиысь комнатаме огнам вылэ кельтыны. Котыр сюресэз выльысь ортчоно луэ. Сэп пӧсьтымон вожпотэ, куке та ужпумез быдэсъяны пуктэм муртъёс, бумага вылысьтызы йырзэс ӝутытэк, пумитам вазё: «Милям сыӵе адямиос туж трос, ваньмызлы юрттыны ум быгатӥське». Сыӵе дыръя суй-пыд ик юскиське. Соку одӥгез ним шуэ: «Марлы со тыныд кулэ? Таӵе ужен вырыны уд быгатӥськы шу но тӥни». Мукетыз нимы пумитъяське: «Тон ке удмуртлы ӟеч лэсьтыны ӧд басьтӥськы, кин-о басьтӥськоз?»

- Котырады трос-а тӥляд кадь сюлмаськонъёсын улӥсь муртъёс?

- Ичи ӧвӧл. «Удмурт кенеше» пырисьёс пӧлысь тросэз сыӵеесь. «Удмурт кенеш» быдэс удмурт калык понна кылдытэмын уго, кинлэн-о йырыз висёз асьме понна, асьмелэн ке ӧз? Мукет выжыысь муртлэн шат? Уг оскиськы. Асьме Удмурт кунмы удмурт калык понна кылдытэмын ке но, асьмеос-а отын кузё? Вылӥ кивалтон удысъёсын кӧня удмуртъёс лыдъясько? Со бордысь ик курадӟонмы уг поты меда? «Удмурт кенеше» огазеяськемъёс сое туж ӟеч валало. 90-тӥ аръёсысен кутскыса, «Удмурт кенеш» та ужпумъёсты лэчыт ӝутылэ удмурт калыклэн съездъёсаз, калыккуспо финн-угор конгрессъёсын, ичи лыдъем калыкъёслэн ООН-ын кылдытэм огазеяськоназы, Москваысь кивалтон органъёсын, асьме республикаысьтымы ёзъёсын.

- Ма тӥледлы нюръяськыны кужым сётэ?

- Оскон. Кужымелы оскон, эшъёсылэн юрттэмзылы оскон. Собере кышкасьтэм но луыны кулэ на, дыр. Ас интызы понна кырмиськыса возиськись кивалтӥсьёслэсь пыдпыдэссэс нюлыны дась улӥсь адямиосты каньылэн куасалто, кулэзы бырем бере, сюрес урдсы сэрпалто.

- Матысь дыре Кун Кенеше депутатъёсты быръёнъёс ортчозы. Мон кылӥ, тӥ но кандидат луыны дасяськиськоды шуыса? Марлы со тӥледлы кулэ?

- Нырысетӥез муг тани ма бордын. Мынам киям шедиз Удмуртиын потӥсь «Репутация» журналлэн одӥгез номерез. Отын сётэмын депутатэ кандидатъёслэн списоксы. Соос пала дурбасьтозы республикаысьтымы вылӥ кивалтӥсьёс. Отчы пыртэмын чылкак вить удмуртъёслэн гинэ нимъёссы. Нош со дыре ик 25 пала бигеръёслэн, кылемез ӟучъёслэн но мукет выжыысь калыкъёслэн. Удмуртъёсты мыскыллям ӧвӧл-а со? Кыкетӥез муг. Депутатэ кандидат мед луозы шуыса, кӧня тодмо удмуртъёслы вазиськи, нокудзы но соглаш ӧз луэ: уксёмы ӧвӧл, шуо. Шат ваньзэ уксёен гинэ мерталод? Куинетӥез. Улонамы умой пала нокыӵе воштӥськонъёс уг ортчо. Тужгес но гуртын. Отын улэ асьме удмурт калык. Гуртъёс быризы ке, выжыосмы но бырозы. Тӥни ваньзэ сое лыдэ басьтыса мыноно кариськи.

Источник:

Байметов И. М. Оскон сётэ кужым / И. М.Байметов ; записала О. Максимова // Удмурт дунне. - 2003. - 24 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"