Редактирование: Ӟечкыланъёс

'''Выль арен!'''

Нылпиос, егитъёс, бадӟымъёс – 

Вань калык, дыр, возьма Выль арез.

Пиналъёс, вазь ӵукна султыса,

Утчало кыз улысь кузьымез.

Мӧйыос шумпото понназы,

Ӵуказе нуналлы оскыса: 

Азьланяз улон мед тупатскоз,

Уродэз вуж аре мед кылёз.

Кузь куко рюмкаысь винаен

Шуккиськом, умойзэ сӥзьыса.

Инмарлэсь куроме ӟечлыксэ,

Мед будоз ю-няньмы, емышмы.

Ог-огмес гажалом, шумпоттом

Ӟеч кылын, ӟеч ужъёс лэсьтыса.

Выль арен, эшъёсы, Выль арен!

Тазалыкен, выль шудбурен! 


'''Бочкарёва Александра Леонидовна. Выль арен! // Вань мынам но пичи сэреге : [кылбуръёс] / Александра Бочкарёва. - Ижевск : Йӧскалык прессалэн юртэз, 2022. – 60-тӥ б.''' 


'''Выль арлы сӥзён'''

Ортче ни, лэся, армы,

Вылез ӧсэ йыгаське.

Нош «будӥм» одӥг арлы 

Нунокъёсын ӵош-валче.

Ортчись армы ваньместы 

Маин ке но шумпоттӥз.

Азьланяз улонамы

Ӟечез гинэ мед луоз.

Бӧрдонэз, куректонэз

Ноку но медам адӟе.

Мед ветлозы пыдъёсмы,

Ужалозы киосмы,

Ӝӧк вылмы луоз бусьтыр,

Кисымы нош – ялан тыр,

Мед луозы йыр вадьсын

Яркыт шунды, чылкыт ин.


'''Бочкарёва Александра Леонидовна. Выль арлы сӥзён // Вань мынам но пичи сэреге : [кылбуръёс] / Александра Бочкарёва. - Ижевск : Йӧскалык прессалэн юртэз, 2022. – 61-тӥ б.''' 


'''Ымусьтонлы'''

Жингыр-жингыр, жин-жон-жон…

Гырлы куара шуккиське,

Быдэс улосэз вӧлске,

Шумпотон ивор вае.

Иисус туннэ вордскем,

Вань калыкез шумпоттэм.

Огазе люкаськыса,

Вӧсяськомы данъяса.

Ог-огмылы йыбырттом,

Тазалыко ӟеч улон

Пӧртэм пумо калыклы

Инмармылэсь ми куром.


'''Бочкарёва Александра Леонидовна. Ымусьтонлы // Вань мынам но пичи сэреге : [кылбуръёс] / Александра Бочкарёва. - Ижевск : Йӧскалык прессалэн юртэз, 2022. – 62-тӥ б.''' 

23-тӥ февральлы

Вордскиз пичи пи дуннее.

«Айизлы юрттӥськись мед луод», – 

Шыпыртӥз шумпотэм анаез,

Гадь бордаз ӝиптыса нунызэ.

«Мыным кивоштӥсь, дыр, луод, –

Мыньпотӥз атаез ас понназ, –

Визьмо но кужмо мед будод, 

Кунгожмес утьыны яралод».


Пияшмы юн тыпы кадь кыдаз

Солдатэ мыныны но яраз:

Данъяське атаез пиеныз,

Анаез учкылэ синву пыр.

Тыршыса со уте кунгожмес,

Асьмелэсь туж бадӟым шаермес.

Йыр вадьсын чылкыт ин мед луоз,

Калыкмы тупаса мед улоз!


'''Бочкарёва Александра Леонидовна. 23-тӥ февральлы // Вань мынам но пичи сэреге : [кылбуръёс] / Александра Бочкарёва. – Ижевск : Йӧскалык прессалэн юртэз, 2022. – 63-тӥ б.''' 

'''Коркатуйлы''' 

Сӥлы-данлы кариськом коркаез, 

Ӝутӥськомы тыро сюмыкъёсмес! 

Та коркамы мед сылоз юн, кема. 

Сильтӧлъёслы сётскытэк, йӧно. 

Шунды зарни сиосыныз мед пыроз, 

Толэзь азвесь синмыныз мед учкоз, 

Шудо улӥсез гинэ со мед адӟоз. 

Тыр улонэн гинэ мед шулдырскоз. 

Ортчись сюресчи сое синйылтоз, 

Синйылтоз но одно ик пусъёз: 

«Кыӵе тон чебер, синмаськымон, усто!»

'''Васильева Любовь Николаевна. Коркатуйлы // Сяська дыр малпанъёс = Цветы моей души : [сборник стихов и песен / Любовь Васильева]. – Ижкар : [б. и.], 2018. – 16-тӥ б.'''

'''Табань сиёнлы'''

Арня нунал вордӥськиз, 

Табань сиён дыр вуиз. 

Куноос, туклячиос,

Бӧлякъёс но бускельёс, 

Сиёме ческыт табань. 

Курегпузэн, сугонэн, 

Губиен, кубистаен, 

Чорыген, нӧкы воен, 

Зыретэн но йблвылэн – 

Маин но уг лу табань. 

Мон тӥлед, сезьы тысез 

Изыса сое котӥ. 

Вӧлдыса нап зыретэз 

Сие, дуно куноос. 

Кылдэс гинэ эн ньылэ. 

Мед луоз арня нунал, 

Дан тыныд, пыжем табань!

'''Васильева Любовь Николаевна. Табань сиёнлы // Сяська дыр малпанъёс = Цветы моей души : [сборник стихов и песен / Любовь Васильева]. – Ижкар : [б. и.], 2018. – 16-тӥ б.'''

[[Вордӥськем нуналэн ӟечкыланъёс]]

[[Категория:Ӟечкыланъёс]]
[[Категория:Поздравления на удмуртском языке]]