Эмырова Екатерина

Материал из Воршуда
Версия от 11:23, 9 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Эмырова Екатерина Павловна - егит удмурт кылбурчи.

На дне города Ижевска.jpg

Улон сюресэз[править]

Эмырова Екатерина Павловна (Эрина Чачабей) вордӥськиз Пичи Пурга ёросысь Алганча-Игра гуртын 1988-тӥ арын 28-тӥ шуркынмонэ. [1] 1995-тӥ арын Катя эшъёсыныз ӵош мынӥз школае вордскем гуртаз ик. Школалэсь начальной ёзэтсэ дышетскиз Алганча-Игра школаын. 1999-2003-тӥ аръёсы артысь Гожня школае ветлӥз. Татын дышетскыкуз, Пургае «Пурга кизилиос» огазеяськонлэн литературной кружоказ ветлыны кутскиз. Пиналъёсын соку Никвлад Самсонов ужаз. Нош бӧрысьгес нылаш Пётр Захаровен но тодматскиз. Отын пинал гожъяськисьёс зэмос писательёсын, кылбурчиосын пумиськылӥзы… Со адямиосын вераськыса, соослэсь адӟем карыса, асьсэос но мукетэсь луизы. [2]

Семьяязы соос куинь кузя нылпиос. Катя сяна, Женя но Серёжа кык вынъёсыз будо. Анай-атаез нылзы понна туж шумпото, данъясько. Уката ик, пе, анаез шумпотэ нылыз понна. Со ачиз но пинал дыръяз котькытчы пыриськись, ваньзэ адӟыны но валаны тыршись вылэм. [3]

Катя котькытчы вуыны но котьма выленыз тодматскыны тырше. Тямысэтӥ классын дышетскыкуз ик, пиналъёс пӧлын «Пионерии - 80» конкурсын вормыса, Сьӧд зарезь дурысь «Орлёнок» лагере вуылӥз, собере трос пол пыриськылӥз «Шундыкар» лагерьлэн но «Вуюись» гужем студилэн ужъёсазы, «Родники» огазеяськонлэн ужрадъёсаз.

Али ке но нылаш шумпотэмзэ вера «Орлёноке» ветлэмез ласянь. Угось, отын трос эшъёс шедьтӥз. «Со мынам нырысетӥез бадӟым вормонэ вал», – шуэ Катя. [3]

2003-тӥ арын Катя Пичи Пурга ёросысь Гожня шор ёзо школаын 8-тӥ классэз йылпумъяса, Ижысь Кузебай Герд нимо гимназие выжиз. Татын со уката но воштӥськиз. Керпотӥсь, дӥсьтӥсьтэм нылаш котькинлы адӟем карымон луиз: я со сцена вылын «Дыдыксин» ансамбльын кырӟа-вера, я гимназиын потӥсь «Муш» газетын перозэ волятэ. Нош урокъёс бӧрсьы ӝог бызе Удмурт кун университетэ «Вуюись» литературно-творческой кружоке. Кивалтӥз кружокен со вакытэ А. А. Клементьев. [4]

Римын, 2010-тӥ ар

Катя туж мыло-кыдо гимназиын «Дыдыксин», нош университетын «Чипчирган» ансамбльёсы ветлӥз. Ансамблен удалтӥз вуылыны Кингисеппе, Саранске, Нижний Новгородэ фестивальёсы. [5]

2006-тӥ арын Екатерина Удмурт Кун университетысь удмурт филология факультетысь мадьяр кылэз дышетонъя ёзаз дышетскыны пыриз. Нылаш кыказ ик дышетсконниын удмурт литератураез валамзэ но гажамзэ усто возьматӥз, олимпиадаосын вормисе потылӥз. 2008-тӥ арын вуылӥз Венгрие. Отын радъям «Гужем университетын» со толэзь ӵоже мадьяр кылэз дышетӥз. Татын пӧртэм кунъёсысь студентъёсын кусыпъёс радъяз, мургес тодматскиз соослэн культураенызы, улон-вылон сямъёсынызы. [3]

Катя туж мыло-кыдо пыриськиз финн-угор егитъёслэн но студентъёслэн ужрадъёсазы. Студентъёслэн «IFUSCO» нимо калыккуспо конференциосы пыриськылэ: 2007-тӥ ар – Саранскын, 2008-тӥ ар – Хельсинкиын, 2009-тӥ ар – Петрозаводскын. [1] 2009-2010-тӥ аръёсы удалтӥз Будапештэ Балашши Балинт нимо институтэ мадьяр кылэз дышетонъя курсъёсы стажировкае вуылыны. Соку ик Петер Рацлэн кылысь кылэ берыктонъя курсъёсаз но ветлӥз. Катя чеберлыко литератураысь текстэз мадьяр кылысь анай кылэ берыктонъя ӵошатсконын (конкурсын) куинетӥ инты басьтӥз. [2] 2011-2012-тӥ аръёсы Катя нош та тодмо мадьяр кылысь кылэ берыктӥсь доры курсъёсы шеде. 2011-тӥ арын Удмурт кун университетысь удмурт филологи кылосбурлэн мадьяр люкетсэ йылпумъяз. [1]

Гожъямъёсыз сярысь[править]

Нырысь кылбурез Катялэн сӥземын вал яратонлы. Уго, туж синмаськиз вал одӥг пияшлы… Собере школаязы «Чагыр тылы» кружок усьтӥськиз. Отчы ветлӥз. Нош одӥг гужеме «зориз» – «Шундыкар» лагере вуылӥз, отын нош ик Пётр Захаровен пумиськиз. Со туж трос выльзэ сётӥз нылашлы творчество ласянь. [3] Пумен егит гожъясьлэн кылбуръёсыз печатласькыны кутскизы «Маяк», «Ӟечбур!», «Удмурт дунне» газетъёсын но «Кенеш» но «Инвожо» журналъёсын.

Туала егит удмурт ныл... Дӥсьтӥсь но, востэм но; яркыт но, пурысь шыр но; аслаз йыг-йыг куараеныз но, шыпытак, кыл вераны дӥсьтӥсьтэм луэменыз но... Сыӵе пӧртэм-пӧртэм син азяз пуктэм Эрина Чачабейлэсь творчествое лёгем сюрессэ мукет пинал гожъяськись, эшез – Оля Тронина. [6]

Егит кылбурчилэсь гожъямъёссэ куинь бадӟым люкетлы висъяны луэ:

1. Кылбуръёс-малпаськонъёс. Яратон сярысь-а, улон сярысь-а, лэсьтымтэ ужъёс сярысь-а – ваньзэ Катя сюлэмыз но визьмыз пыр лэзе.

2. Фольклор мотивъёсын герӟаськем кылбуръёс. Юн шӧдӥсько калык образъёс, фольклор кырӟанъя тупатскон, стилизация.

3. Глобализация вакытэ ас ымнырдэ утчан, выль туала образъёсты, формаосты, тунсыко рифмаосты утчан.

Озьыен, Катялэн творчествояз бадӟым инты басьтэ малпаськон-шӧдон. Сыӵе кылбуръёслэн шорсюлэмзы – адямилэн адӟонъёсыз, улонлэн пуштросэз сярысь малпаськон. Таӵе гожъямъёсаз адӟыны луэ дуннелэсь куинь ёзлы люкиськемзэ: вылӥ ёз – инбам, улӥ ёз – дунне пыдэс, нош шораз – огшоры адямиос.

"Чипчирган" ансамблен Люк черкогуртын

Мон ачим – лудӵӧж,

Лобасько турлы.


Куддыръя нош тӧлэн но

Кожасько мон асме.

(инбам, омыр)


Тон монэ эн сьӧдма,

Мон – тӧдьы лымы.

(музъем) [6]

Лирической героиня таӵе кылбуръёсаз кепыра кадь, кышка кадь: кудпала берытскозы кужымъёс, тырмоз-а солэн ӟигарыз пумитъяськыны, кеӵевыл усьытэк возиськыны.

Писпуос вампирлы укшало,

Лулпуэ горд вирзэс зырало.

Зарезез тулкымъя ву лешак,

By пыдсэз бергатъя но сура.

Мылкыдыз кир-пазь луыса, лирической героиня куре кадь вылӥ кужымъёслэсь шуд-дэлет, оске, куке но инӧс усьтӥськоз шуыса, со понна дӥсьтэ курбонлы яратонзэ но сӥзьыны.

Курбонлы сёто тыныд

Сюлэмме-яратонме...

Лирической кырзанъёслы тупатскемъёсыз ӵемысь яратонлы сӥземын. Яратон таӵе дыръя – ву тулкым кадь. Валтӥсь малпан – ог-огедлы весяк оскыса улон – самой бадӟымез шуд. [6] 2008-тӥ арын Удмурт ПЕН-клублэн но Пичи Пурга муниципал кылдытэтлэн юрттэменызы «Гӧгӧрсин» нимо кылбур бичетэз потӥз. Эрина Чачабей кушем ним кутӥз.

Эрина Чачабейлэн кылбуръёсыз соку ик син азе йӧто. Аслаз огъёзо гожъяськись эшъёсызлэсь со висъяське кылбурет удысын пӧртэм туала формаосты кутыны тыршемезъя. Аслэсьтыд дуннедэ паськытатыны тыршон, аслэсьтыд шӧдонъёстэ пӧртэм ласянь эскерон, глобализация вакытлэн нюртэтэзлы пумит луыса кесяськон – со зэмзэ но туала литературалэн сюресэз. (П. Захаров) Екатерина Эмыровалэн куд-ог кылбуръёсыз кырӟанлы пӧрмизы. Тросэзлы соос пӧлысь крезьгур гожтӥз Марина Галичанина. Со сяна, Эльвира Панченко "Chupai Eli" группаеныз кырӟан гожъяку кылбуръёссэ но берыктэмъёссэ уже кутэ.

Библиография[править]

Книгаосыз[править]

Гӧгӧрсин : кылбуръёс. – Ижкар : Инвожо, 2008. – 62 с.

Статьяосыз[править]

«Бадӟым вамышен мынӥсько…» // Первые строки : поэтическое творчество студентов Удмуртского государственного университета. – Ижевск, 2009. – С. 45.

«Будапешт вадьсын уг адско кизилиос...» ; «Татын, дыр, кылбур гожъяны туж усто...» ; «Сьӧд уй пушкын...» ; «Кыдёке ке но кошкид...» ; «Мар мон татын карисько?.» : кылбуръёс // Инвожо = Альманах удмуртского ПЕН-клуба. – 2012. – № 4/5. – С. 91.

Ведӥн : верос // Ӟечбур! – 2005. – 29 сент. – С. 6.

Вожалэс-буртчин синъёс : верос // Ӟечбур! – 2005. – 24 февр.

Лэйка тулкымъёс вылтӥм... : новелла // Ӟечбур! – 2006. – 23 марта. – С. 4.

«Мон – берпуметӥ фараон...» ; «Тон монэ эн йӧты...» ; «Мон тонэ миськи...» ; «Лиралэн тулкым вылаз...» ; «Муш бичаз, бичаз чечы...» : кылбуръёс // Инвожо = Альманах удмуртского ПЕН-клуба. – 2011. – № 5/6. – С. 59.

«Мон – берпуметӥ фараон...» ; «Шоколад куэд...» ; «Иземе уг луы...» ; «Туннэ Музае сьӧлыка...» ; «Тон монэ эн йӧты...» : кылбуръёс // Удмурт дунне. – 2011. – 16 февр. – С. 5. – (Dart : удмурт егитъёслэн газетсы ; № 2).

Мон но адями ; Кӧшкеман ; Губи-кунокуа ; Одӥг но ӝыны... Куинь... : тэшкыли веросъёс // Кенеш. – 2009. – № 7. – С. 18–21 : фот.

«Мон ӧвӧл тон кадь...» ; «Шоколад куэд...» : кылбуръёс // Инвожо. – 2006. – № 2/3. – С. 5.

«Мон тонэ миськи...» : кылбур // Инвожо. – 2011. – № 9/10 : Ижевск межкультурный город. – С. 36. – (Специальный выпуск газеты «Известия Удмуртской Республики» и журнала «Инвожо»).

«Пеймыт инбамысь-а...» ; «Синмыным кыскисько улонэз...» ; «Кызьпулы сёто бабля йырсиме...» ; «Мон тонэ миськи...» ; «Мон ӧвӧл тон кадь...» : кылбуръёс // Инвожо. – 2008. – № 5/6. – С. 154.

Суред пӧрай : кылбур // Удмурт дунне. – 2007. – 25 сент. – С. 7.

«Тетрадь вылам суредай... Кинэ?.» ; «Толон гинэ тон вал ай кадь егит, анай...» ; «Огнам...» ; «Тон монэ ӧд жаля...» ; «Мон ӧвӧл тон кадь...» ; «Кырмышъя синмыныз...» : кылбуръёс // Вордскем кыл. – 2009. – № 10. – С. 37. – Вакчияк авторез сярысь гожтэмын.

«Тон ӧвӧл ни вӧзам...» ; «Тон монэ эн йӧты...» ; «Тон – сюлэмтэм...» ; «Шоколад куэд...» ; «Эн мӧзмы, огнад шуыса...» ; «Зарезьысь тулкымъёс...» ; «Мон тонэ миськи...» ; «Синмыным кыскисько улонэз...» : кылбуръёс // Удмурт дунне. – 2007. – 29 мая. – С. 7.

«Тон уд тодӥськы...» ; «Тон ӧд жингырты...» ; «Сое тодӥсько, син шорад учкыса...» ; «Потӥз ке верамед...» ; «Каньыл сыӵе – аслад пушкад гинэ улыны...» ; «Бакакуарсяська вылын...» : кылбуръёс // Инвожо. – 2009. – № 5/6. – С. 131.

Тыбырам – мамык бурдъёсы : кылбуръёс // Кенеш. – 2009. – № 3. – С. 49–52. – (Будӥсь куараос). – Пуштросэз: Анайлы сӥзьыса ; «Зарезьысь тулкымъёс...» ; «Тик-так, тик-так!.» ; «Тон монэ эн йӧты...» ; «Мон тонэ миськи...» ; «Пеймыт инбамысь-а...» ; Мед вӧлмоз дуннее яратон ; «Киосам кутӥсько бискыли...» ; «Кырӟамед – уӵы ӧвӧл со...» ; «Мон ӧвӧл тон кадь...» ; «Огнам...» ; «Киысьтым гожъёсы...» ; «Тон дорысь кошки ке мон...» ; «Кышкасько усьыны...» ; «Тон – сюлэмтэм...» ; «Тон – кактус...» ; «Питыра, питыра...». – Вакчияк авторез сярысь гожтэмын.

Уз быр ; «Яратон сяська кадь...» ; «Тон монэ ӧд жаля...» ; «Берытски но кошки, ӧй шуы: «Вуо»...» ; «Ӧд вазьы...» // Ӟечбур! – 2005. – 10 февр. – С. 8.

Берыктэмъёсыз[править]

Бенэдэк Э. Питырес из : мадьяр выжыкыл / берыктӥз Е. Эмырова // Кенеш. – 2009. – № 8. – С. 23–26. – Вакчияк авторез сярысь гожтэмын.

Кырӟанъёсыз[править]

Галичанина М. Выль ар: «Вамыштӥм сюрестӥ, тӧдь-тӧдьы азетӥ ...» / кылъёссэ гожтӥз Е. Эмырова // Даур. – 2011. – 16 дек. – С. 4.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]