Шутов Александр Фёдорович

From Воршуд
Revision as of 14:41, 6 February 2015 by Admin (talk | contribs) (1 версия импортирована)
(diff) ← Older revision | Latest revision (diff) | Newer revision → (diff)
Jump to navigationJump to search

Пыд азьзэ учкытэк уз вамышты[edit]

А. Ф. Шутов

Туннэ тӥ дорын куноын кылтодон наукаосъя доктор, Удмурт кун университетысь профессор, наукая 70-лэсь ятыр ужъёслэн авторзы, Калыкез дышетон удысысь дано ужась, Удмурт Правительстволэн но Ижевскысь мэрилэн грамотаосынызы пусъем мурт Александр Фёдорович Шутов.

- Тынад котьку «серметэд кортнамын», номыр мултэссэ уд пызьырты. Чакласькод, дыр, ӟучъёслэсь «кылы – мынам тушмонэ» шуэмзэс, соин-а кыл шырыпед юн возиське?

- Котькыӵе дыры луэ, дыр. Кытӥяз кулэтэмзэ но зулисько, капчиям дыръям, мылкыды ке пальккаське.

- Кин бен со Шутов? Кин вордӥз-будэтӥз та дано пиез?

- Асме даноен уг лыдъяськы. Тырмымтэосы вань. Нош юаськод бере, мадё.

Кызьы тодӥськод, вордӥськи Можга районысь Бадӟым Сибы гуртын. Со дырысен май толэзе тани 57 ар луоз ни. Дядяен нэнэ колхозын ужазы. Семьяямы мон бере эшшо 5 нылпи вордӥськиз. Колямы сяна, ваньзы институтъёсыз йылпумъязы. Нэнэ улэп на. Можгалан улэ.

Гуртмы милям тодмо, Можга палъёс сое «кыкетӥ Китай» но шуо - уно улӥсез понна. Татын вордскизы, будӥзы гожъясьёс Игнатий Гаврилов, Михаил Покчи-Петров, Анатолий Григорьев, артист Василий Гаврилов, тодосчиос Михаил Шишкин, Лидия Долганова.

Ньыль арзэ Сибыын дышетски, самой со юртын, кудаз дышетӥз Вера Васильевна Толстая, али отын музей. Тодэ лыктэ нырысетӥ дышетӥсе Нина Николаевна Медведева. Со туж сюлмаське вал, чебер мед гожъяськомы шуыса. Чылкыт гожъяськонъя урокъёсын мынэсьтым тетрадьме ӵемысь ушъяса возьматъялляз.

- Витетӥ классысен асьмеос пумиським Можга селоын. Куинь арзэ ӵош одӥг классын дышетским…

- Дышетскон аръёсме тодӥськод ук, ачид ик вера.

Классын Саша висъяськылӥз ӝужыт мугорыныз но котькуд уроклы пыр-поч дасяськеменыз. Дышетскиз со ваньмызлэсь умой. Тужгес но паймытъя вал монэ со удмурт кылъя урокын. Укыр вольыт вераськылӥз, янгышъёстэк гожъяз. Мон, со сьӧры уйиськись мурт, удмурт кылъя урокъёсын бездыт адӟиськылӥ. Малпалляз-а соку Шутов, вордскем кылыз бордын ужано луоз шуыса? Ӧз. Со малпалляз суредась луон яке немец кылэз вольыт тодон сярысь. Со вакытэ уноез дышетскисьёс ГДР-ысь нылъёсын-пиосын гожъяськылӥзы. Ми но Шутовен «эшъяськон выж» усьтӥмы. Малы тае пусйисько. Зол дышетӥсьёсмы вал немец кылъя. Нырысез ож бусыын немец кылысь ӟуче берыктӥсь вылэм. Кыкетӥез 7-тӥ классын кружок радъяз, театр выллем кылдытӥз, отын выжыкылысь рольёсты ми немец кылын шудылӥм.

- Нош маин вунонтэм кылиз Можга педучилище?

- Педучилищеын сибыос дышетско ни вал. Ас ёзъёссылэсь соос туж висъяськылӥзы визьзыя но, пӧртэм быгатонлыксыя но. Соин ик вал кинлэсь адӟем карыны. Экзаменъёсме мон умой сётӥ, удмуртъёс пӧлын люкам баллъя азьпала потӥськем. Со сярысь райгазетын но ивортӥзы. Педучилище сярысь трос вераны луысал. Номырин воштонтэм вакыт. Тодон-валан басьтэм сяна, малы гинэ ӧз дышетэ: кырӟаны но вуриськыны, куно пумитаны но арганэн шудыны, сад-бакчаын ужаны но кино возьматыны. Оломалы но визьнодазы, но ӧм дыше уродэзлы. Куамын мурт пӧлысь одӥгез но тамак ӧз кыскы, жоб кылъёсын ӧз вераськы. Нош кыӵе тунсыко ӝытъёс ортчытъяллям. Татын ортчытэм аръёсты нокызьы йырысь-сюлмысь уд ишкалты.

- Асьмелы, война бере вордскемъёслы, гурт ужъёсыз быдэсъяно луылӥз. Тынад но улонэд пӧртэм ӧй вал, дыр?

- 50-тӥ но 60-тӥ аръёслэн кутсконазы улон секыт на вал. Гужемзэ весь ужаллям. Трудодень люкам. Уриським, кыед кисьтам, картофка чуръёсты гожъям-усыям, етӥн ишким. Валэн ужан понна вожмаськылӥм. Кин кемагес изе – уроботэк кыле. Соин ик ӝыт, клубын шудыса, вал гид вӧзысь уробоын но кӧламе вань. Турнан вакытэ кыдёкысь Вало возь вылъёсын арняосын улӥм-кӧлам. Ӝытъёсы вӧзысь гуртъёсы шудыны потам, чорыгам. Кема зорытэк улыку, куазьлэсь зорзэ курыса, вуэн пазяськиськом вал. Собере ми, шекера пиналъёс, шур дурын кеньырен ӝук пӧзьтыса сиылӥм. Сибыослэн таӵе йылолзы вашкала дырысен возиське.

Мукет йылолмы но вал – веме лэсьтон. Дэмен люкаськыса, 14-17 аресъем пиос кинлэн ке огезлэн дораз люкаськылӥм но пузэ вандылӥм-пильылӥм. Мукет дыръя – мукетыз дорын.

- Армие кошконэдлэсь азьло тон школаын но ужад на, лэся.

- Ужай Можга ёросысь Кватчи школаын. Отысь математикая егит дышетӥсьсэс армие нуизы. Мон со интые кыли. Нылпиос егит каро на вал. Урокъёсам кузёяськыны вырылӥзы шаян ӟуч пиос. Ярам, кема ӧз курадӟытэ, аслам но армие кошкон дыры вуиз.

- Бӧрдыса келясь дыдыосыд трос-а вал?

- Чик ӧй вал. Шулдыръяськизы но тӥни. Ӝожомем мылкыдзэ ватытэк синвузэ нэнэе гинэ поттӥз.

- Армиын вӧен нянен уг пумитало. Школаын тон кузёяськид, армиын тонэн. Каньылэн-а дышид кезьыт кылъёслы, сурон сапеглы но чурыт валеслы?

- Шуг-секытъёсын асьмеос вамышлы быдэ пумиськылӥмы. Дас арескысен нуналлы быдэ 5 иськемзэ школае, сомында ик дор пала пыдын я куасэн ортчылӥм. 14-15 аресысен патерын улӥм. Таиз но куноын кадь ӧй вал. Гуртын будэм муртлы армилэсь кышканэз ӧй вал. Монэ десантэ басьтӥзы. Сюри Литвае «учебкае» – покчи командиръёсты дасян школае. 7 толэзь ортчыса келязы Белоруссие. Тросаз «пӧсь» интыосы сюрылӥ.

- Мон тодэмъя тон Чехословакиын ортчем бугыръяськонэ но пыриськид?

- Югдур ӟырдыт вал. Патронъёс ожмаськон вылысь сётъязы. Самолётэн Брно городэ вуттӥзы. Кӧня ке минут куспын городысь туж кулэ интыосы юнматсконо вал. Мон эшъёсыным «Руде Право» газетлэн редакциезлэсь юртсэ возьмай. Татын улӥсьёс ми шоры кырыж учкылӥзы, мыжыкъёссэс возьматъязы, выламы урдскылӥсьёс но вал. Секытгес вал Прагаын. Татын югдурез чакланы выризы Псков дивизиысь десантникъёс. Соос пӧлын быремъёс но вал. «Вынлыко калыклы юрттэме» понна монэ Слава орденэн пусъён вылысь кагаз дасязы. Дивизиысьтымы кыкез солдат Германие пегӟыны турттэмен, награда шупчиз. Собере «За отвагу» медаль курыса вазиськизы. Таиз но ӧз вуы. Сӧсырмыны шедем солдатлы гинэ сётӥзы сыӵе медалез.

- Озьыен, армия улонад пытьы кельтӥз?

- Эшшо кыӵе! Солдат дӥсьме воштыса, Можга ёросысь Вуж Юбера школае вамыштӥ. Сётӥзы физкультура, суредан но кырӟан урокъёсты. Ожысь бертэм командир выллем луи соослы. Пӧлысьтызы одӥгез, Вячеслав Осипов, бератаз генерал луиз, Владимир Михайлов – тодмо радиожурналист.

Юбераын ужакум ортчиз пинал армеецъёслэн ӵошатсконзы. Со районын нырысьсэ вал кадь. Возьматӥм строен ветлыны, шонер ыбылӥськыны, сиён пӧраны быгатэммес. Нырысетӥ интые потӥм. Дышетэм пиосыз пумитасько ке, тае али но тодазы возё.

- Армия бере асьмеос огпол пумиським. Тон туж мур малпаськонэ усемын вал. Азьлань сюресэд пумысен. Армие но кыскемзы потэ, шуид, милиция но маза уг сёт, кытчы ке дышетскыны келяны туртто. Наука сярысь соку кылпум ӧд поттылы.

- Малпанэ вал историез яке немец кылэз дышетыны. Суредасе ӧй малпа ни, вож но курень буёлъёсты сурасько. «Погонэн адямиос» но йырын кема бергазы. Кин ке тодмое дэмласал-ӝуткасал ке, оло, мукет сюресэ луысал.

- Бадӟым кизилиё погонэн ветлысалыд.

- Бадӟымзэ нуллыны секытгес луысал. Мугоры восьтэт.

- Профессорлэн уждунэныз, дыр, восьтэт.

- Ортчемзэ жаляно ӧвӧл, шуо. Ӝожтӥськыны муге ӧвӧл. Наука сярысь оглом малпанэ ӧй вал. Но педучилище аръёсы удмурт кылъя дышетӥсьмы Дмитрий Лукьянов мыным кузьмаз Георгий Архиповлэсь книгазэ. Отысь мон нырысьсэ валай удмурт но коми кылъёслэн ог-огзылы матын луэмзэс. Малы мыным кузьмамын вал, созэ уг тодӥськы.

- Университетысь студент Шутов ваньмызлэн кыл йылазы вал. Уно сюрс дышетскись пӧлын Ленин стипендиат луон - со огшоры удалтон-а, уй-нунал тыршон-а?

- Тыршем бордысь потэ вал ваньмыз. Собере ини шуд но ватсаськылӥз. Куд-ог предметъя «ньыльлы» вераськод ке, «витёзь» вуттылӥзы. Мон мукетъёсыз сярысь арлыдогес вал. Егитъёс шулдыръяськыны ярато, нош тон пукиськод, книга «йырйыса».

- Иське, книга чуръёс сьӧрысь номыр мукетыз ӧз адскылы?

- Студент аръёс – со вунонтэм вакыт. Вал шулдыръяськонъёс но, улонме радъяны сюлмаськисьёс но шедьылӥзы. Пӧртэм ужрадъёс соку ортчылӥзы, поталлям концертъёсын но. Валя Ившина гитараен шудылӥз, Аля Алашеева баянэн, мон арганэн, пӧртэм сценкаос пуктылӥм. Гужемъёссэ стройотрядъёсын ужай. Алнашысь Шор Утчанын скал гид лэсьтӥм, Кизнерысь Короленко посёлокын школа ӝутӥм.

- Тӥляд группады кужмо вылэм. Тросэз эшъёсыд табере тодмо адямиос.

- Михаил Атаманов, Татьяна Владыкина но мон доктор ним басьтӥм. Лидия Долганова, Валентина Ившина наукая кандидатъёс луизы, Федя Березин но Сергей Антонов газет редакциосын кивалто, Алевтина Алашеева университетын ик ужа, доцент.

- Нош кызьы наукае кыстӥськид? Сыӵе малпан шуак лыктӥз яке аръёсын гыбдаса кисьмаз?

- Университет аръёс кисьматӥзы. Наукаен милям зол выре вал Атаманов. Ньылетӥ курсын милемды Тартуэ студентъёслэн научной конференциязы ысъязы. Отын мон лымшор диалектъёсъя доклад лэсьтӥ. Диплом уже сӥземын вал ӵыжы-выжы кылъёсты ӵошатыса, синтаксис ласянь эскеронлы. Рефератме келяй Москвае. Соин тодматскыса, академик Б. А. Серебренников дэмлаз аспирантурае пырыны. Куинь ар дышетски СССР-ысь Наукаосъя академилэн кылтодонъя институтаз. Кандидат луон диссертацие сӥземын вал удмурт, ӵыжы-выжы но мукет кылъёсысь абсолютной оборотъёсты эскеронлы.

- Маке валантэм.

- Вераськон мынэ деепричастной оборотъёс сярысь, кудаз вань асьсэлэн подлежащейзы яке действиез быдэсъясь муртсы.

Кылсярысь, Коля гуртэ вуыку, куазь пеймыт луэ ни вал.

Кандидат диссертациме ути 1980-тӥ арын, нош доктор луон диссертациме йылпумъяй 2002-тӥ арлы гинэ.

- Кема гинэ дасяськемед!

- Нырысь уг малпаськы вал. Тазалыке но куддыр керӟегъятэ. Собере ужамен, лекциослы дасяськемен, тодон-валанэ муромиз. Кузпалы но ӝутказ-лӧпкытъяз, со ачиз педагогика наукаосъя кандидат.

- Нылкышнолэн данъяськемез потӥз, луоз, профессор кузпалыныз.

- Соиз но, оло, вань, но мон али шумпотэмме но тау каремме солы верасько.

- Александр Фёдорович (табере тазьы мон тыныд вазисько), доктор луон диссертациед пумысен но вакчияк валэкты вал.

- Аспирантураын дышетски туж тодмо учёнойёс бордын, Б. А. Серебренниковез верай ни. Визь-кенеш сётӥсьёсы пӧлы пыро вал профессоръёс К. Е. Майтинская, В. И. Лыткин но удмурт тодосчи Т. И. Тепляшина. Доктор диссертациме утён ортчиз Йошкар-Олаысь Мари кун университетын 2002-тӥ арын. Темазэ ачим ик бырйи вал, Серебренниковен кенешыса. Нимыз таӵе: «Пути развития гипотактических отношений в удмуртском языке». Та паськыт тема. Учкемын сложноподчинённой предложениослэн, пӧртэм пумо оборотъёслэн историзы но мукет пӧртэм пумо переходной учыръёс. Огласянь, удмурт кылъёсын но матысь ӵыжы-выжы кылъёсын синтаксис удысын трос огкадь тодметъёс пумисько.

- Озьыен, трос кылъёс пӧлын бугыръяськоно луид?

- Ачим ӧй лыдъя. Но диссертациме утьыку, одӥгез оппонентэ профессор А. Н. Куклин ужам кутэм 23 пала пӧртэм кылъёсты лыдъяз. Валасько коми, финн, мадьяр, пор, бигер, чуваш кылъёсты. Вераськыны вольыт уг быгаты, но ужея соосты кутыны пӧрмыто.

- Ой-ёй-ёй! кылдэ-йырдэ тӥялод со гипотактической кусыпъёсад. Шутэтскон дыръя адсконтэм азе пыдлогес ватӥськод, дыр, наукаен герӟаськем ужъёстэ?

- Быръем ужез яратыны кулэ. Сотэк кызьы. Ваньмон дыръя мон пӧртэм гожъямъёсысь примеръёс утчасько-люкасько.

- Тон шуид, ортчем улондэ уд жаляськы. Нош вал-а кыӵе ке учыр, кудзэ тон сюлэмад возиськод, янгыш лэсьтэмед сярысь малпаськод?

- Армия бере Можга районысь дышетӥсьёслэн командаенызы Якшур-Бодьяла куасэн ӵошатсконъёсы ветлӥмы. Кыкетӥ нуналаз эстафета ортчиз. Финишозь 400 метръёс гинэ кылемын на вал, куасэ чигиз. Мон куасъёсме куштӥ но луть-лать пыдын вамыштӥ. Унолы азьпалтыса мынӥсь командамы нырысетӥ интые ӧз поты ни. Пал куасэн донгаськыса но, нырысетӥ интые потӥськом вал. Мар малпазы эшъёсы соку, тодэ вайыны ик возьыт.

- Нош азьланез сярысь кыӵе малпанъёсын улэ профессор Шутов?

- Малпанъёс вань. Быдэсъяно ук ай соосты. Кивоштӥсьёс кулэ. Али кык аспирантэ дышетске. Соосты будэтоно-ӝутоно. Кулэ вылэм наукая грант утыны. Книгаос но поттоно. Школаын ортчись олимпиадаослы материалъёс дасяно. Ваньмыз со вуоно дырын.

Источник:

Шутов А. Ф. Пыд азьзэ учкытэк уз вамышты / А. Ф. Шутов ; записал Г. Юсаев // Удмурт дунне. - 2004. - 23 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"