Шкляев Алексей

Материал из Воршуда
Перейти к навигацииПерейти к поиску

Алексей Петрович Шкляев - удмурт драматург, публицист.

595.jpg

Улон сюресэз[править]

Шкляев Алексей Петрович вордӥськиз Шаркан ёросысь Вукогуртын 1949-тӥ арын 28-тӥ куарусёнэ (сентябре). [1]

Алёша дышетскыны мынӥз Урдогурт школае. Куинетӥ классозь, дышетӥсьёс вошъяськемен, пияш лябгес дышетскиз. Ньылетӥ классысен соос доры вуиз Нина Александровна Шкляева. Тӥни соку Алёша дышетсконлэсь «шӧмзэ» валаны кутскиз, лэся. Оценкаосыз но умоязы. 7-тӥ классозь отын дышетскиз, собере выжиз Балтач школае. 8-тӥ класс бере 1964-тӥ арын Дэбесысь педучилищее пыриз. [2]

Пичи дырысеныз тазалыкез лябенгес-а мар-а, Алексей ӧзгес яратылы физкультура урокъёсты. Педучилищеын дышетскыкуз но, суббота вуытозь, быдэс арня кайгырыса улылӥз: Анатолий Константинович Сунцов нош ик куас сюрес вылын курадӟытоз-а? Турникын берганын но кузьдалае тэтчанын нылъёс азьын возьытэ усьылылӥз.

Берпуметӥ курслэн пумаз кыкетӥ шоканэз усьтӥськиз кадь. Барьеръёс вамен бызьылонэз пӧрмыны ӧдъяз. Иже вуэмез бере шуак яратӥз каргам куасэз. Кызьы уд гажа, тынад азбарад уло ке дуннелэн, СССР-лэн, Удмуртилэн чемпионъёссы Галина Кулакова, Владимир Никитин, Тамара Тихонова, Нина Парамонова, Юлия Шамшурина? Юля ик солы ас вакытаз кузьмаз аслыз кулэтэм куассэ.

Педучилище вань даурлы пыӵатӥз физкультураез гажан сям. Соин ик ӵукналы быдэ – тол коть гужем – Алексей Петрович али но бызьылыны пота. Уже ветлыкуз ай ог ньыль иськем вамышъялляз пыдын. Отпуск басьтылӥз ар пумын. Куддыръя нуналаз кык пол но ветлӥз куасэн. [3]

15-3.jpg

Дэбес педучилищеез йылпумъяса, 1968-тӥ арын Алексей Шкляев ужаны интыяськиз «Советской Удмуртия» газетэ. Нырысь литсотрудник, собере ёзэтэн кивалтӥсь, бӧрысь валтӥсь редакторлэн воштӥсез (1986–1994) луыса тыршиз. Нош 1994-тӥ арын Алексей Петрович Шкляев «Удмурт дунне» газетэ валтӥсь редакторе пуктэмын вал. Со луиз газетлэн 25-тӥез кивалтӥсез. Ужан висказ ик дышетскиз Компартилэн Иж горкомысьтыз марксизмъя-ленинизмъя университетын (1971), журналистэ Казаньысь университетын (1977), Свердловскысь партшколаын (1984).

Озьы 42 ар ӵоже Алексей Петрович одӥг интыын тыршиз, берло 16 арзэ со кузё вал. Мӧзмыт ӧвӧл-а ӝыны даур пала огинын ужаны, шуыса юанлы, А. П. Шкляев ӝотрак вера – ӧвӧл, пе: «Малы ке шуоно мон укыр яратӥсько газет удысэз». Та вакыт ӵоже кытчы но вуылэмын ӧвол, кинэн но ӧвӧл пумиськылэмын, мар но ӧвол гожъямын! Нош кӧня пол пумиськылэмын меда лыдӟисьёсын! Кыллы усто муртэ котькытын артистэз музэн кылзо, нош но нош доразы куное ӧтё. [4] 19921996-тӥ аръёсы Алексей Петрович Шкляев Удмуртиысь журналистъёслэн Огазеяськонэнызы кивалтӥз.

А. Шкляевлэн нимыз ӟеч тодмо фин-угор дуннеын – со Россиысь Фин-угор журналистъёслэн огазеяськонзылэн ёзчиез луэ. Алексей Петрович ужаку но, мукет улосъёсысь ӵыжы-выжыосынымы ӵошатыса, удмурт газет котыр ласянь азьмынӥсез, синмаськымонэз луылӥз. 2010-тӥ арын А. П. Шкляев пенсие потӥз.

Алексей Петрович Шкляевлэн ужез пусъемын лыдъянтэм грамотаосын, со – Печатьысь отличник, Россиысь культура удысысь дано ужась нимъёсын данъямын. [4]

Гожъямъёсыз сярысь[править]

Гожъяськыны Алексей Шкляев 2-тӥ классысен кутскиз. Но ужъёссэ нокытын но ӧз печатла, малы ке шуоно «Дась лу!» со вакытэ ӧз поты, ёросысьтызы «Шаркан коммуна» газет солы, Инмар кадь, туж вылӥын потылӥз. 7-тӥ классын ини «Советской Удмуртия» газетысь «Пинал куараос» бам син шораз йӧтӥз. Пияш отчы гожтӥз котыр гуртъёстӥ концертэн ветлэмзы сярысь. Нылпиослы бамез дасясьёс, С. Перевощиков но А. Вотяков, сое поттоно кожаллям. Со ик луиз, лэся, гожъяськыны кутсконэз. Нош Дэбес педучилищеын дышетскыкуз, Степан Широбоков доры, пичиесь иворъёс но веросъёс пыртылӥз ини. [2]

Пумен Алексей Шкляевлэн ёрос газетын сяна, очеркъёсыз, веросъёсыз, юморескаосыз «Дась лу!», «Советской Удмуртия» газетъёслэн но «Молот» журналлэн бамъёсаз печатласькыны кутскизы. 1986-тӥ арын юонлэн изъян ваемез сярысь журналистлэн гожтэмъёсыныз «Вож кыйлэн кыӵесаз» очеркъёсын книга поттӥз. Нош 1988-тӥ арын куинь авторъёсын ӵош «Колӟо» огъя бичетэ ас ужъёсыныз пыриськиз. Та книгалэн куинез ик авторъёсыз «Советской Удмуртия» газетын ужало вал. Командировкаосы потаса, соос синйылтылӥзы улонысь тырмымтэосты, урод сямъёсты. Серемес веросъёсазы юн каргазы бюрократъёсты, калык ваньбурез тус-тас карисьёсты, юисьёсты. [1]

Тодмо журналист ас кужымзэ утчаз драматургия удысын но. 1992-тӥ арын Удмурт кун театрын А. Шкляевлэн «Сьӧлыктэм сьӧлык» пьесаез пуктэмын вал. Учкисьёс та пьесаез шуныт пумитаз. Репрессиос сярысь со вакытэ трос гинэ ке но гожъямын вал ини, но удмурт драмтеатрлэн сцена вылаз та секыт тема нырысьсэ усьтэмын вал. 1993-тӥ арын ик пуктэмын вал авторлэн кыкетӥез пьесаез «Майбыр-макмыр». Спектакль пуктэмын вал егитъёслэн «Дарт» театрен. Таиз пьеса сярысь трос пӧртэм мылкыдъёс вал (лыдӟыны луоз газет статьяосысь) [5] ; [6] ; [7]

1995-тӥ арын Алексей Шкляевлэн Удмурт Йӧскалык театрын «Дор» спектаклез ортчиз. Та пьесаез учкисьёс пӧлын синвуаськытэк кылемъёс ӧй вал, дыр. Пьесалэн валтӥсь темаез - ӧпкелён. Автор пыр-поч усьтэ сое Митрей героез пыр. [8]

«Ужъёсме дунъяны кепырасько. Пиналгес дыръям ик сюбег пельпумы вылэ туж секыт ныпъет ошыны выри. А. Шкляев гожтэмез адӟыса, адямиос мед шуысалзы: таид маин ке но абдратоз – лыдӟоно. Жаляса пусъёно луэ: котьку ик озьы уг пишмы», – шуэ Алексей Петрович. Весяк но ассэ индылыны вырылӥз: мадь озьы – тон сямен нокин медаз пӧрмыты, гожты озьы – А. Шкляев кылэз адӟытэк, мед ятвылтозы ки бервылзэ», – сыӵе «девизэн» ужа но гожъяське А. П. Шкляев.

Та ласянь пусйыны кулэ, вылды, Казахстанысь, Армениысь, Крымысь, Венгриысь, Эстониысь, Финляндиысь, Египетысь вуттэм чуръёссэ. «Отын Америкаез ӧй усьты. Но удмуртъёс кунгож вамен уггес выжыло бере, соослы маке но выльзэ сётыны выри кадь», – вера журналист. «Шӧкыч» сэреге гожъяны ӧдъямез бере мемиез алӥз: ужась муртэ вӧсь эн кары, пие. Жалямез потӥз, вылды, огшоры калыкез – нянь будэтӥсез но пудо вордӥсез.

«Меӵак шараяло: ӧй быдэсты куронзэ. Коммунизм вакытэ но, али но кинэ бышкалтод, огшоры адямиез ке ӧд? Сыӵе ни улон-вылонмы: 300 манет лушкам понна пукто пытсэт сьӧры, 300 миллион доллар капыртэм понна – вылӥ кивалтӥсе», – ужез сярысь тодэ вае А. Шкляев. [3] Ӝыны даур редакциын ужатозяз мар но гожъяно ӧз лу.

Премиосыз[править]

Печатьысь отличник, 1978

Удмурт Элькунысь культура удысысь дано ужась, 1988

СНГ-ысь умоез журналист, 1991

Библиография[править]

Книгаосыз[править]

«Вож кыйлэн» кыӵесаз : юонлэн изъян ваемез сярысь журналистлэн гожтэмъёсыз. – Ижевск : Удмуртия, 1986. – 61 с.

Статьяосыз[править]

Арлыдо узыри лопырске : улонысь учыръёс // Удмурт дунне. – 2008. – 15, 22, 29 февр., 14, 21, 28 марта, 4, 11, 18, 25 апр., 4, 8, 16, 23, 30 мая, 6, 11, 20, 27 июня, 4, 11, 18, 25 июля, 1, 8 15, 22, 29 авг., 5, 12, 19, 26 сент., 3, 10, 17, 24, 31 окт., 7, 14, 21, 28 нояб., 5, 12, 19, 26 дек. – С. 15.

Арлыдо узыри лопырске : улонысь учыръёс // Удмурт дунне. – 2009. – 16, 23, 30 янв., 6, 13, 20, 27 февр., 13, 20 марта, 3, 10, 17, 24, 30 апр., 8, 15, 22, 29, 31 мая, 5, 11, 19, 26 июня, 3, 10, 17, 24 июля, 7, 14, 21, 28 авг., 4, 11, 18, 25 сент., 2, 9, 16, 23, 30 окт., 6, 13, 20, 27 нояб., 4, 11, 18, 25, 31 дек. – С. 15.

Арлыдо узыри лопырске : улонысь учыръёс // Удмурт дунне. – 2010. – 15, 22, 29 янв., 5, 12, 19, 26 февр., 5, 12, 19, 26 марта, 2, 9, 16, 23, 30 апр. – С. 15.

Арлыдо узыри лопырске : улонысь учыръёс // Удмурт дунне. – 2010. – 7, 14, 21, 28 мая, 4, 11, 18, 25 июня, 2, 9, 16, 23, 30 июля, 6, 13, 20, 27 авг., 3, 10, 17, 24 сент., 1, 8, 15, 22, 29 окт., 3, 12, 19, 26 нояб., 3, 10, 17, 24, 30 дек.

Быроно мурт : очерклы инъет // Удмурт дунне. – 2005. – 29 марта.

Горд кирос : улонысь учыръёс // Удмурт дунне. – 2009. – 11 авг. – С. 6.

Етӥз вырон : улонысь учыр // Удмурт дунне. – 2005. – 20 июля. – С. 8.

Кенеш : сценка // Удмурт дунне. – 2008. – 27 мая. – С. 6.

Кык учыр : сценка // Удмурт дунне. – 2008. – 20 авг. – С. 6 ; Удмурт дунне. – 2009. – 28 июля. – С. 7.

Кылзы мынэ, удыс бабе : сценка // Удмурт дунне. – 2009. – 26 авг. – С. 7.

Мӧйы узыри лопыръяське : серемес вакчи веранъёс // Удмурт дунне. – 2008. – 1 февр. – С. 15.

Пӧлыпум : скетч // Удмурт дунне. – 2007. – 26 июля. – С. 7.

Тӧро но йыр : скетч ; Марымъёс : сценка // Удмурт дунне. – 2008. – 23 янв. – С. 7.

Тяпайтӥсьёс : сценка // Удмурт дунне. – 2007. – 19 сент. – С. 7.

Чильтэр дыды : верос // Удмурт дунне. – 2009. – 23 июня. – С. 6–7.

Чурок : верос // Удмурт дунне. – 2009. – 26 мая. – С. 6–7.

Вакчи веросъёс // Инвожо. – 2009. – № 8/9. – С. 47–51.

«Удмурт дунне» газетлэн «Вордскем кыл» эшезлы верано кылъёсыз : кылбур // Вордскем кыл = Родное слово. – 2010. – № 11/12. – С. 2 обл.

Улонысь суредъёс // Инвожо. – 2009. – № 8/9. – С. 47–49.

Суворов Ф. Пырак – матично : сценка / Ф. Суворов, А. Шкляев, Р. Хайдар // Удмурт дунне. – 2007. – 24 окт. – С. 7.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 Яшина Р. Алексей Шкляев (1949) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 185–186.
  2. 2,0 2,1 Шкляева Н. Арлыдо узыри, лопырске? Уг, чырткем муш утчаське // Ӟечбур! – 2009. – 24 сент., 1 нояб. – С. 3-4, 3.
  3. 3,0 3,1 Сидоров А. Миллиард ар куспын кезьыт тузон но ӟырда // Удмурт кизилиос : очерки, зарисовки, интервью (2001-2007). – Ижевск, 2007. – С. 126–127.
  4. 4,0 4,1 Кытчы лыктӥд – отын ярад // Удмурт дунне. – 2009. – 25 сент. – С. 4.
  5. Банникова Т. Астэ вузан дуно усе // Удмурт дунне. – 1993. – 14 июль. – С. 3.
  6. Никитина Л. Паймод но бырод // Удмурт дунне. – 2010. – 5 февр. – С. 3.
  7. Сапожникова А. Дӥсьтӥллям ик… // Удмурт дунне. – 2010. – 5 февр. – С. 3.
  8. Сапожникова А., Михайлов В., Старкова И., Ломагин К. Синвуаськымтэос ӧй вал // Удмурт дунне. – 1995. – 19 май. – С. 3.