Шибанов Виктор

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Виктор Леонидович Шибанов – кылбурчи, литературной критик, тодосчи, Удмурт Элькунысь лулчеберет удысысь сӥё-дано ужась, Россиысь гожъяськисьёслэн огазеяськонзылэн ёзчиез.

Виктор Шибанов

Улон сюресэз

Виктор Шибанов вордӥськиз Глаз ёросысь Котгуртын 1962-тӥ арын 7-тӥ южтолэзе. [1]

Ваньмыз пичиысен кутске, куке тынад вӧзад анаед но атаед, нош Виктор понна – песянаез но. Анна Федотовна, кудӥз вордскиз 1891-тӥ арын, бадӟым но секыт улонэз адӟиз. Пересь муртлэн веранэз-даурез – со вашкала мадёсъёсты, пӧртэм выжыкылъёсты, ишанъёсты тодэ ваён; черсны пуксе ке, вашкала уйпал крезьёсты «маде», губияны яке ӵемгес эмъюм турын-куар, пыштурын люканы мынэ ке, вӧзысьтыз пияшлы будосъёс сярысь мар ке но со маде, азьвылзэ тодаз вае. Ваньмыз та Викторлэн йырвизьмаз пыӵатэк ӧз кыльы. Анаез но атаез – Людмила Григорьевна но Леонид Павлович – вазь ӵукнаысен бер ӝытозь колхоз луд вылын тыршизы. Шибановъёслэн семьязы бадӟым гинэ вал: ньыль пи (Виктор куинетӥез) но ныл. Бадӟым агайёсыз вӧзын пияш пичи дырысеныз гурт котырысь ужлы дышиз, бадӟымъёсыз вӧзын чупрес тыршылӥз: турнан яке пу дасян-а, бакча копан яке картошка октон-а. Сотэк одӥг уж но ӧз ортчылы. Азьланяз но ужез яратон солэн вираз ик пыӵаз, лэся: тыршыса дышетскиз, стройбатын службазэ ортчиз. [2]

6–7 классын дышетскыкуз, Виктор арлы быдэ Ижкаре егитъёслэн семинаразы ветлӥз, гожъяськон удыссэ, валанзэ будэтӥз. 1979-тӥ арын школазэ йылпумъяса, пыриз дышетскыны Удмурт кун университетысь кылосбур факультетлэн удмурт ёзэтаз. Удмурт кун университетэ пыремез бере, Д. А. Яшинэн тодматскиз, солэн литературно-творческой кружоказ гожтӥськиз. Татын чурысь чуре, кылысь кылэ эскерылӥзы студентъёслэсь чуръёссэс.

Университетэ дышетскыны пырыкуз Викторлэн литература-кылбурет удысэ сюлмыз золгес кыскылӥз. Владимир Романовлэн бурдъямезъя, кыкетӥ курс бере Москвае выжыны малпа вал, кытын оглом писательёсты дасяло. Но ӧз удалты… Берло тодмо профессор Б. О. Корман (Д. А. Яшинлэн ӵектэмезъя) Викторлы наукае мыныны сюрес сӥзиз. [3]

Shvl2.jpg

1984-тӥ арын витьёсын гинэ йылпумъяз университетэз.

19841985-тӥ аръёсы Ленинградысь госуниверситетын стажировка ортчиз, нош 19851990-тӥ аръёсы отын ик очно дышетскиз аспирантураын. Бронез ӧвӧлэн, Викторез армие басьто. Ар но ӝыны со Уфа котырын горд сюй гудӥз (службазэ стройбатын ортчиз). [4]

1990-тӥ арын Виктор Леонидович Шибанов филологи наукаосъя кандидат луэ. 1992-тӥ арын – старший преподаватель, нош 1997-тӥ арын – доцент. 1996-1997, 1997-1998-тӥ аръёсы Хельсинкиын стажировка ортче. [1]

Виктор Леонидовичлэн, аслаз верамезъя, улонэз осьминоглэн теориезъя ортче. Ужъёсыз пӧртэм-пӧртэм ӧръёсын бызё. Одӥгез университетысь ужен герӟаськемын, лекциос, диплом ужъёс. Административной уж но нуэ – 2000-тӥ арысен тодос удысъя деканлэн юрттӥсез. Озьы ик тырше Дышетӥсьёслэсь тодон-валанзэс будэтонъя институтын. Со дыре ик 5–6 классъёслы литератураен книгаосты выльдон бордын ужа. «Вордскем кыл», «Инвожо» но «Кенеш» изданиослэн – редколлегиязы. Со ик Удмуртиысь писательёслэн огазеяськоназы кивалтэтлэн ёзчиез, отын кыл кутэ финн-угор литературной дуннеен кусыпъёс понна. 1996-тӥ арысен Виктор Леонидович финн-угор писательёслэн Калыккуспо ассоциацизылэн кивалтэтаз ёзчиез луэ. Таиз ласянь ваньмаз сямен финн-угор писательёслэн ортчись конгрессъёслэн ужазы пыриське.

Кунгожсьӧр литератураен тунсыкъяськонэз, кудӥз кутскиз аспирантураын, Виктор Леонидовичез 19972001-тӥ аръёсы бадӟым проект борды кутскытэ: солы дэмлазы радиоэфирын ӝынычасъем «Дунне кизилиос» передача нуыны, кытын удмурт кылын дунне вылысь кизилиос сярысь верасал. Дасямын вал сюлэсь ятыр тунсыко радиопередачаос. [3]

Виктор Шибанов пинал дырысеныз эшъяське спортэн, уката тунсыкъяське шахматэн, пӧртэм турниръёсы пыриське. 2009-тӥ арын спортъя мастере кандидат луиз.

Виктор Леонидович кусыпъёс возе кунгожсьӧр тодосчиосын. Кылъёсты тодэмез – финн, немец, англи (ӟучсэ но удмуртсэ вератэк) – солы пӧртэм шаеръёсысь тодосчиосын кусыпъёс юнматыны юрттэ.

Берло вакытэ но Виктор Леонидович Шибанов выль кивоштӥсьёсты, вуоно филологъёсты дася, доктор диссертациез бордын азинлыко тырше, но кылбурет удыс но кылбур гожъян азьло сямен ик солэн улонэзлэн шорсюлмыз луо. [4]

Гожъямъёсыз сярысь

Вуоно кылбурчилэн пинал пушдуннеяз (литератураез, поэзиез яратон ласянь) аслэсьтыз пытьызэ кельтӥз Аркадий Павлович Шибанов дядяез, атаезлэн агаез, «Сталинград ожчи», журналист, Глаз ёросын потӥсь «Горд знамя»-ысь газетчи. Со кӧня ке кылбур но гожтӥз, нош «Гурт пумын арама» кылбурезъя кырӟан туж тодмо луиз калык пӧлын. [4]

Виктор Леонидович верамъя, со «кизили висёнэн» висиз 11–12 арес дыръяз. Ньылетӥ классын дышетскыкуз тулыс великысь туж зол усьса, пыдзэ чигтӥз. Быдэс толэзь дорын кыллёно луиз… «Озьыен кыллисько валес вылын, нош ульчаын лымы шуна, липет йылысь шапыкъёс усьыло. Сюлэмын огдыре ик югыт но, секыт но! Кутски суредъёс бордысен, кылбуръёс ӧжытак бергес ӧръяськизы», – тодаз вае Виктор Леонидович. [5]

Огпол Коӵышгурт (Кочишево) школае, кытын Виктор дышетске вал, «Дась лу!» газетысь корреспондент, тодмо кылбурчи Владимир Романов вуэ. Солэн син шораз йӧто кибашлы пионерлэн, ньылетӥ классын дышетскисьлэн Шибановлэн суредъёсыз, ӝоген соос пӧлысь огез газетлэн бамаз печатлаське. Со вал 1973-тӥ арын. Ар ортчыса, В. Романов кие тодмо покчи эшезлэн кылбуръёсын тетрадез вуиз, отын вал кык сю пала кылбур, дас поэма но выжыкыл. Гожъямъёсты В. Романов Флор Васильевлы возьматӥз. Викторлы, 6-тӥ классын дышетскисьлы, Флор Ивановичлэсь вакчи гинэ гожтэт вуиз, но макем зол бурдъяз со гожъяськыны кутскисез. Собере кылбуръёсыз «Дась лу!»-ын но «Молот» журналын потаны кутскизы. Газетъёсысь гонорар сётъязы, пияш ас коньдонэныз выль велосипед басьтӥз. Ӝоген дас кык аресъем пияшез Ижкарын ортчись творческой семинаре ӧтизы. Та ужрадын со нырысьсэ пумиськиз удмурт писательёсын: А. Клабуковен, Ф. Васильевен, А. Ермолаевен, О. Поскрёбышевен но мукетъёсыныз. Та вал пияшлэн бадӟын карын нырысетӥ пумиськонэз. Со сюриз В. Романовлэн секцияз. Владимир Васильевич егит талантэз син азьысьтыз ӧз ышты, Ижевске ӧтьылэм сяна, огпол Сьӧд зарезь дурысь «Орлёнок» пионер лагере но ветлыны юрттӥз. Озьы Виктор Шибановлэн улоназ, адӟоназ, дуннешӧдоназ мур-мур пыриз бадӟым таланто поэт, дышетӥсь, валтӥсь, эш. [2]

Тыршемез юнме ӧз луы. 1982-тӥ арын «Выль ужъёсы ӧте» нырысетӥ кылбур бичетэз «Удмуртия» книгапоттониын печатлаське. Авторезлы соку 20 арес гинэ вал. Та книгалы вылӥ дунъет сётыса вазиськиз удмурт литературая критикмы Л. Кутянова. [6] (10) Виктор Шибановлы витетӥ курсысен умой дышетскемез но литературной кружокен кибашлы кивалтэмез понна Ленин нимо стипендия сёто. Озьыен, егит кылбурчи но кылосчи азьын бадӟым литературае паськыт но чебер сюресъёс усьтӥсько. [2]

Армиын служить карон вакытаз потэ кылбурчилэн кыкетӥ «Сюлэмам шунды» (1988) кылбуръёсын бичетэз.

Кылбуръёсаз поэт языческо-мифологической мотивъёсты возьматэ. В. Шибановлэн кылбуръёсаз миф меӵак «син азьын», со лирической

Этнофутуристикая калыккуспо конференция. Тарту, 2002

сюжетэз герӟась инъет луэ. Пӧртэм кыл чеберман амалъёсты - ӵошатонэз, витьымтэ шорысь артэ пуктонэз, метафораез, гиперболаез – уже кутыса выль утчанъёслы сӥзе, тросаз учыръёсы «азвесь даурысь» ӟуч футуристъёслы матэктэ:

Быдӟалаос воштӥсько; пукись ву луэ – ты,

Кыз пӧрме Дунне писпулы.

Ягмульы адӟиське ни пужым кадь,

Солэн горд мульыяз чиля на пуксем шунды;

Со вылэ усем лыс мон вылэ някырске –

Куасьмем пуӵ кадь со.

Тӥни эшшо но эшшо…

Мон огнам.

Кылбуръёсыз потӥзы на «Бертӥсько уйшоре» (1991) но «Ӧс» (2003) бичетъёсын. Нош 2006-тӥ арын Таллиннын (Эстония) эстон кылын «Toominga vari» («Льӧмпулэн вужерез») кылбур бичетэз.

Виктор Шибановлэн кылбуръёсызлы рос-прос дунъет сётэ З. А. Богомолова. [2]

2001-тӥ арын Финляндиысь Кастрен огазеяськонлэн юрттэмезъя Виктор Шибанов дася «Удмурт литературая антология». Со чакламын 8 – 11-тӥ классъёсын дышетскись пиналъёслы.

Литературатодос удысын нимысьтыз авторъёслэсь творчествозэс эскере, туала удмурт литература сярысь малпанъёссэ гожтэ. Виктор Шибанов, 1997-тӥ арын Финляндие ветлэмез бере, дас арлэсь ятыр выре ини этнофутуризм направлениын. Трос литературоведческой статьяос гожтӥз. Со ужъёсыз Москваын, Сыктывкарын, Саранскын, Финляндиын, Эстонин, США-ын печатласькизы. [1]

Виктор Шибанов удмуртъёс пӧлын нырысетӥез адями, кин удмурт литература пумысен аслаз чаклан-эскеронъёсаз «этнофутуризм», «постмодернизм» валатонъёсыз пыртӥз. Со оглом удмурт литератураез но нимысьтыз удмурт кылбуретэз огъя дуннелы возьматыны тырше. [7]

Наградаосыз но премиосыз

Владимир Романов нимо премилэн лауреатэз, 1993.

Удмурт Элькунлэн Правительствоезлэн Данъян грамотаез, 2002.

Удмурт Элькунлэн Кун премилэн лауреатэз, 2007.

Библиография

Книгаосыз

Бертӥсько уйшоре : кылбуръёс. – Ижевск : Удмуртия, 1991. – 71 с.

Выль ужъёсы ӧте : кылбуръёс / суредаз В. П. Любарец. – Ижевск : Удмуртия, 1982. – 28 с.

Романова Г. В. Шепасько юос / Г. В. Романова. Альжан / В. В. Котков. Сюлэмам - шунды / В. Л. Шибанов. – Ижевск : Удмуртия, 1988. – 158 с.

Ӧс : кылбуръёс. – Ижкар : Инвожо, 2003. – 69 с. : ил.

Статьяосыз

Асьмелэн адӟонмы ; Таула Вуж Мултан ; Сӧриськиз ; Иж тымет дурысь учыр ; Возьытлык ; Кызьпу туй вылысь шедьтэм гожтос // Инвожо = Альманах удмурсткого ПЕН-клуба. – 2010. – № 5/6. – С. 69–70 ; Инвожо. – 2008. – № 11/12. – С. 74–76.

"Возьдаськем, возъяськем но дӥсьтэм..." : кылбур // Удмурт дунне. - 2014. - 16 сент. - С. 5. - (инГОЖ)

"Выльысь вуи Иже..." ; Фрейдъя ; "Мон ӵын..." ; Пож ву ; "Ньыль этажъем пачкес юртъер азьын..." ; "Мар-о луиз?.." ; "Сыӵе со яратон..." ; Уртъёс ; Огъякорка ; "Мон вити тонэ дасозь..." ; "Тон монэ сайкатӥд, инмаре, бер уйин..." ; Ӝуй пыртӥ : М. Федотовлы : кылбуръёс // Инвожо. - 2013. - № 8/9. - С. 114-117.

Гурысь тыл шоры учкыса... : кылбуръёс // Кенеш. – 2005. – N 3. – С. 31-34. – Содерж.: "Тон дӥсьтысал-а..." ; "Улон сӥньысъёсы сыӵе сураськизы..." ; "Туннэ братэ мунчо кулэ вал эстыны..." ; Укно рамаосысь тусъёс ; "Тырттэм коркан уйин маке но ӵаштыртэ..." ; "Бадӟым мылкыд монэ вормиз..." ; Матысьёсылы сонет ; "Туннэ уг улӟыты компьютерме..."

Зайди на огонек : стихи // Луч. – 2012. – № 1/2. – С. 62-63. – Содерж.: "Окно для бабочки открыл..." ; "Вдоль дороги проселочной - провода и столбы..." ; "Вновь стужа... В инее кусты..." ; "Мы с тобой разминулись. Я двигаюсь в прошлое..." ; Тень ; Дверь ; Урты ; Вниз головой

Ӟигояськем сюрес : кылбуръёс // Инвожо. – 2012. – № 2. – С. 22-25 : фот. – Содерж.: Ӟигояськем сюрес ; "Уг тодскы, кин тон. Но умой тодско..." ; "Уйин иземед ке уг лу..." ; Огинъюртын дыръя ; Кузь черодын вераськон, 1990 ; Толэзьысь ныл ; Пӧртмаськись куакъёс ; "Мон синмаськи югыт ныллы..." ; "Тырттэм-тырттэм..." ; Атилла Йожефез берыктыса

Из кар... Иж кар... : рифматэм но рифмаё чуръёслэн вожвылъяськемзы // Кенеш. – 2009. – № 1. – С. 5–9.

Июньская бабочка ; Урты ; "Мы с тобой разминулись. Я двигаюсь в прошлое..." ; "Вновь стужа. В инее кусты..." : стихи / пер. с удмурт. Владимир Емельянов // Инвожо. - 2014. - № 7/8. - С. 50-51.

Мон йыруллань будӥсь писпу : кылбуръёс // Кенеш. – 2012. – № 2. – С. 3-9 : фот. – Пуштросэз: Владимир Романовлы ; Уртъёс ; Ӝуй пыртӥ ; "Ӟырт кезьыт кырын..." ; "Калевалаез" берыктон дыръям ; Укно рамаосысь тусъёс ; Куашкатэм юртъер ; Иж тымет дорысь учыр ; Мерт ; Гужем шутэтскыку

"Мы с тобой разминулись. Я двигаюсь в прошлое..." : стихотворение // Удмуртский университет. - 2014. - 6 мая. - С. 11.

Раскололась чашка : стихотворение / пер. В. Емельянова // Удмуртский университет. - 2014. - 6 мая. - С. 11.

Сквозь стекло ; По следам сказок / пер. Ю. Разиной // Италмас. – 2009. – № 1. – С. 60.

Сонет : стихотворение / перевод Юлии Разиной // Италмас. - 2012. - № 4. - С. 105.

Сӧриськиз = Purunes ; "Выльысь вуи Иже..." = "Ižkari sõitsin taas..." ; "Мон ӵын..." = "Ma olen suits..." ; Ашальчи Окия = AšaltšiOkit lugedes ; Адӟонэ мынам – огъякорка = Mu saatuseks on ühiselamu ; "Выж тон миськиськод вал..." = Pesed põrandat... // Kuum ӧӧ : soome-ugri rahvaste tänapäeva luulet. – Tallinn, 2006. – С. 392–403.

Тень черемухи ; Инвожо (июнь) ; Дверь ; Урты (злые духи) ; Дерево вниз головой : (подстрочники) // Инвожо. – 2005. – № 9 (сент.-окт.). – С. 43.

Узыян // Зарни дэремен шунды : семьяын лыдӟон книга. – Ижевск, 2006. – С. 115.

Уйпал ӵушконысь пужыос ; "Сюрес кузя – ез юбоос..." ; Фрейдъя ; Пож ву // Инвожо. – 2008. – № 5/6. – С. 145–146.

Шахматэн шудон : кылбуръёс / худож. И. Н. Лопатина ; ред. И. М. Байметов // Вордскем кыл = Родное слово. - 2012. - № 2. - Вкл. л. : цв. ил. - ("Вордскем кыллэн" книжкаез). - Пуштросэз: Пешка ; "Куас сяна, футбол сяна..." ; Шудонлэн ёзъёсыз ; Вал ; Слон ; Ладья ; Ферзь ; Эксэй ; Флор Васильевъя

Asalcsi Okinak = Ашальчи Окия // Komatál : ünnepi kӧnyv Domokos Péter professzor 70. születésnapjára. – Budapest, 2006. – Old. 66–67. – На венг. и удмурт. яз.

Берыктэмъёсыз

Лейно Эйно. Кинъёс бен асьмеос? // Кенеш. – 2010. – № 7. – С. 56–58.

Лейно Эйно. Шулдыр ширтыны куас вылэ султыса ; Туно нылмуртъёс ; Юмала (Инмар) ; "Эрико луыса вордӥськиз финн шаер...". Тылэз данъян : кылбуръёс / Эйно Лейно ; финн кылысь берыктӥз Виктор Шибанов // Вордскем кыл. – 2008. – N 5. – С. 17.

Лённрот Элиас. Калевала : финн эпосысь люкетъёс // Кенеш. – 2010. – № 7. – С. 10–16.

Салламаа Кари. Дыр-даур чузъяське / финн кылысь берыктӥзы В. Данилов но В. Шибанов // Кенеш. – 2010. – № 7. – С. 68–73 : фот.

Тоссавайнен, Йоуни. Сьӧд мунчоын ; Пинал льӧмпу сяськая ; Сьӧд мульылэн тӧдьы сяськаез ; Питере нуись сюрес кузя : кылбуръёс / Йоуни Тоссавайнен ; финн кылысь берыктӥз Виктор Шибанов // Инвожо. – 2007. – N 5/6. – С. 193.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 1,2 Зверева Т. Виктор Шибанов (1962) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 123–124.
  2. 2,0 2,1 2,2 2,3 Богомолова З. «Усточиез жильыяны кулэ…» // Вордскем кыл. – 2004. – № 4. – С. 78–85 ; № 5–6. – С. 63–73.
  3. 3,0 3,1 Абазашвили Л. Виктор Шибанов // Инвожо. – 2010. – № 7–8. – С. 102–104.
  4. 4,0 4,1 4,2 Рябинина З. Солы керемет но сётэ берекет // Удмурт кизилиос : очерки, зарисовки, интервью (2001-2007). – Ижевск, 2007. – С. 12–13.
  5. Шкляев А. Шибанов Виктор Леонидович // Удмуртская Республика : энцикл. – Изд. 2-е, испр. и доп. – Ижевск, 2008. – С. 728.
  6. Кутянова Л. Нюръяськон пыр – азьлань // Советской Удмуртия. – 1983. – 14 янв.
  7. Матвеев С. Кылбурчи но кылбур // Кенеш – 2003. – № 1. - С. 65–72.