Редактирование: Швецова Татьяна Виссарионовна

== Мынам интые — пиналъёсын артэ ==

[[Файл:Швецова.jpg|thumb|left|Файл:Швецова Т. В.]]

5-тӥ октябре быдэс дуннеын пусъё Дышетӥсьлэсь нуналзэ. Удмуртиысь огез адӟем карымон визьнодась — Татьяна Швецова, Ижысь Кузебай Герд нимо гимназиысь директорлэн воспитательной ужъя воштӥсез, ӟуч кылъя но литературая дышетӥсь. Дышетон ужын со 22 арлэсь ятыр ини. Татьяна Виссарионовналэн тыршемез дунъямын Удмуртиысь Дышетонъя но наукая министерстволэн Данъян грамотаеныз, Кун Кенешлэн Данъян грамотаеныз. 2010-тӥ арын «Дышетон» нацпроектъя устоез дышетӥсь луиз.

'''«Таня, тон — лирик»'''

— Дышетӥсь луон мылкыд мыным палазы Ува ёросысь Косой гуртысьтымы аслэсьтым бадӟымгес нылъёс: Зоя Витальевна Суворова, Светлана Тимофеевна Арекеева, Надежда Васильевна Кабанова, апае Арекеева Ирина Виссарионовна. Соос Удмурт кун университетысь филология факультетын дышетскизы, собере тодмо дышетӥсьёс, учёнойёс луизы. Озьы мон но пичиысен, Иже мыно шуыса, малпалляй.

Та мылкыдме юнматӥзы Жужгес школаямы. Отын дышетӥсьёсмы дыбыр поттыса ужазы. Косоямы начальной школамы но ӧй вал ни — ми 1-тӥ классысен дышетским Жужгесын, улӥмы интернатын.

Школаын ик кутски гожъяськыны — кылбуръёс, веросъёс кылдытъяй. 10-тӥ классын уйёсы ог 2 час гинэ изьылӥ. Малпай, кызьы токма кӧлыса улод, сомында тунсыко книгаос лыдӟымтэ на. Со вакытэ синмаськи У. Шекспирлы — вань гожъямъёссэ лыдӟи, кельшиз Д. Байрон но. Али школаын гожъям кылбуръёсы аслым сыӵе мудронэсь пото.

Но школалэн директорез, шаерысьтымы удмурт кылъя огез тодмо дышетӥсь Василий Владимирович Татаркин, шуылӥз: «Таня, тон — лирик, веросъёсын ӵошатыса, кылбуръёс тыныд золгес тупало». Гожъямъёсы Таня Арекеева нимтулын потӥзы «Дась лу!» (али «Ӟечбур!») газетын, собере «Инвожо» журналын. «Дась лу!»-ын литературалы сӥзем конкурсын ворми. Озьы журналист луон мылкыд пыӵаны кутскиз. Матысез факультет — Екатеринбургысь университетын. Но мамае палэнэ мыныны ӧз лэзьы: кызьы ай, пе, пичи нылме (бӧрсям эшшо сузэре вань ке но) кыдёке лэзём. Дышетскод Ижын, арнялы быдэ гуртэ берталод.

Озьы пыри Удмурт кун университетысь удмурт филологияя факультетэ. Дышетскон мыным капчиен сётӥськиз. Но часъёсын-уйёсын книга бордын ӧй пукылы ни. Университетын кыӵе ке мылкыды мукет луиз. 18 аресам секытэн луи. Мар кароно? Мамалы верано.

Мамае — гуртын сое Тася кенак шуо вал — огшоры нылкышно, вань улонзэ фермаын ужамын. 4 нылпиен огназ кылемын. Мыным 5 толэзь дыръя буби кулэм. Собере мама 7 ар милемыз огназ будэтӥз. Капчи ӧй вал, дыр, солы. Гурт котырысь секыт ужез быдэсъям сяна, чидано луиз вожась кышноослэсь кыл вӧлдэмзэс, йыркуръяськемзэс. Уката ик мама туж чебер вал. Пичи дыръям синмаськыса учкылӥ солэн вӧлэм кадь чебер пыдъёсыз но сюсьтыл выллем мугорыз шоры. Мама гужем ветлэ вал ӟуч дэремен. Со мугораз ӝик-ӝик пуке, вылтырзэ сыӵе чебер возьматэ. Валамон, сыӵе чебер муртлы синмаськись луиз — мама аслэсьтыз егит пилы бызиз, эшшо сузэрмы вордскиз на.

'''Мон тодӥсько, макем секыт…'''

— Мамаен кусыпъёсмы матысь вал бере, со юа:

— Нуныедлэн атай луонэз тонэ кышно басьтоз-а?

— Мон солы «уг бызьы» шуи, — верасько пумитаз.

Гуртын, конечно, дэймизы. Кытысь 18 аресъем ныллэн йыраз сыӵе пумитъяськон пырем. «Шузи» шуыны гинэ луэ кадь. Мыным но верантэм секыт вал: синмаськи кадь, бӧрысь валай уг яратӥськы. Мынам соку пушкам сыӵе шӧдонэ вал: та адямиен ӵош улыны мыным кылдымтэ. Улонам мукет яратонэ луоз на. Капчи ӧй вал соку, кӧня бӧрдӥ. Мон тодӥсько, макем секыт адямилы, куке со котырысь палэнско, куке суйёс юскисько.

Мама ик юрттӥз. Инмар нылпи сётэ ке, маин сое сюдыны но сётоз, шуиз. Озьы Саша нылы вордскиз. Дышетсконме 1 арлы вис карылӥ, собере нош ик университетэ берытски.

Куд-огез нылъёс диплом басьтыса но ежесь на, нош мон 2-тӥ-3-тӥ курсын аслым рос-прос, улонэз адӟем нылкышно кадь потылӥ ни. Дышетскем сяна, ӵошатски республикаысь тужгес чебер нылъёсын — пыриськи нырысетӥ «Чеберина» конкурсэ. Татын жюрие ӧтемын вал кырӟась Надежда Уткина. Чик кӧбератэк солы кылбурме сётӥ: оло, кырӟан гожтоз. Надежда Эдуардовна лыдӟиз, азям ик кыӵе ке гур кырӟаз.

— Мар ке но кылдытом, — шуиз Н. Уткина. Собере ватсаз: — Удмурт нылкышноослэн ӵемысь луо бӧрдӥсь кылбуръёссы. Тынад темпераментэд мукет. Ноку но эн гожъя «бӧрдӥсь» кылбуръёс. Валад-а?

— Валай, — шуисько.

Озьы Н. Уткина «Вуныл» кырӟан гожтӥз, сое кема аръёс ӵоже радио пыр сётъязы. Нош мон, Н. Уткинаен тодматскыса, вуи удмурт егитъёслэн «Шунды» огазеяськоназы. Татын трос ужрадъёс, пумиськонъёс. Валаса но ӧй вуы кадь, кызьы аръёс ортчизы.

Тани диплом но басьтӥ. Зэм, горд дипломозь ӧйгес кыскы — но со понна мон ӧй но тыршы. Ӵектӥзы аспирантурае кыльыны — улонам кыкетӥзэ «уг» шуи. Мыным нылме сюдоно, анайлэн чырты сьӧраз весь уд возьы. Диплом басьтыса, гуртэ бертӥсько, нош аслам тодам но ӧвӧл, кытын мон ужаны кулэ. Йырыным валасько: общественной уж, удмуртлык уз сюды. Ӵош дышетскем эшъёсы школае уг вамышто. Уго 1996-тӥ ар. Та вакытэ данын вал вуз карон. Мыным кытчы кариськоно?

'''Предметэ — яратон'''о

— Сюресме ачиз улон кызьы ке радъяз-а, мар-а. Эше ӧтиз: ойдо, пе, мыным уж утчаны мыном. Озьы вуим Ижысь 22 номеро радиотехнической лицее (али В. Шутов нимо радиотехнической техникум). Кыкнамы но ужаны пырим. Татчыозь уг валаськы: оло потэ мынам дышетӥсь луэме, оло уг. Студентъёсын ужакум, возьматэме потӥз: ӟуч кыл но литература — тунсыко предмет. Пиналъёс — вуоно токарьёс, регулировщикъёс, фрезеровщикъёс. Соослэн улоназы ӟуч кыл но литература сокем кулэ но уз луэ, дыр. Нош мон соослы маке выльзэ вераны тыршисько, паймытэме потэ. Студентъёсы аслэсьтым кӧня ке ареслы гинэ пичиесь. Нош собере соос монэ паймытӥзы. Шуо: тынад предметэд — тужгес яратоноез. Иське, юнме дыр быдтыны мон татчы уг ветлӥськы. Туж яратӥ удысме. Туж тупаз коллектив. Татын туж золэсь специалистъёс вал педагогика ласянь. Арлыдо эшъёсы шоры учкыса, валай, кин луисько пиналъёс понна, кыӵе пытьы кельтӥсько соослэн улоназы.

Аслам интыям ужасько шуыса валай одӥг учыр бере. Лицейын студентъёс госэкзамен сётӥзы — сочинение гожтӥзы. Ужъёссы 5-6 бамен. Эскероно 6 группалэсь сочинениоссэ. Котькуд ужез кӧня ке пол но лыдӟыса потӥсько. Озьы кӧня ке нунал пуки бер ӝытозь. Берпуметӥяз ог 3-5 уж кылемын вал на. Час дасэ мынэ. Мынам ӝоггес бертэме потэ — ӵуказеяз нылы кошке «Чебеляй» ансамблен Одессае фестивале. Соос сьӧры мон но мынӥсько, нырысьсэ зарезез адӟо.

Таӵе малпанъёсме уретыса, кабинетэ лицейысь нылаш пыриз. Со котьку урокъёс бере кыльылэ вал, дораз бертыны уггес дырты. Атаез юылӥсьгес, анайзэс рос-прос уг но адӟыло. Нылаш шуэ: мон асме мар ке но каро, йырме быдто. Мон валасько: оло, солэн улоназ мон берпуметӥ мурт, кинэн со вераське. Нош мынам сыӵе адями луэме уг поты. Иське, кыӵе ке но либатӥсь кылъёс шедьтоно. Оло, сюлвороно, озьы эн кары шуыса.

Мынам йырам Одесса, фестиваль. Соин, дыр, юай:

— Тон зарезь дуре ветлӥд-а ни?

— Ӧй, — шуэ нылаш.

— Огпол но?

— Ноку но.

— Нош синмаськылэмед вань-а? Тодӥськод-а, мар со яратон?

— Пиос кельшо, но так, огшоры…

— Нош уждун басьяд-а ни? Кафеын аслад уксёеныд мар потэ сое сиид-а ни?

— Ӧй, — посӥське «йыр быдтӥсе».

— Куке зарезьын кӧт тырмонад жомбылляськод, куке йырдэ ыштымон синмаськод, куке нырысетӥ уждундэ сиёд-юод, соку котьма кар, — шуисько.

Озьы ми ог 3 час пуким, дыр. Нылашелэн ассэ быдтон мылкыдыз басылаз. Мон-а солэсь мылкыдзэ бералтӥ, оло, со ӝытэ ик синмаськиз? Но нылаш улэ, ужа, семья кылдытӥз, нылпи вайиз. Нош мон со уе ӵукнаозь пуки, сочинениосты эскери. Ӵуказеяз Одессае кошки. Со учыр бере, дыр, йырам малпан пыӵаз: мынэсьтым кылзо, юало, иське, пиналъёсын ужаны толыке вань.

'''Удмурт гимназие сюрес'''

— Кузебай Герд нимо гимназие мынэсьтым вазьгес вуиз нылы. Ваньмыз сяменгес ик, 1-тӥ классэ со мынӥз вал улон коркамылы матысь школае. Озьы начальной классъёсты йылпумъяз. Удмурт гимназия сярысь мон тодытэк ӧй улы, но кышкалляй: мынэсьтым нылме отчы басьтозы меда? Соку директор Ольга Константиновна Шилова вал ай, шумпотыса кутӥз. Туж кужмо класс люкаськиз. Кивалтӥсьсы — туж ӟеч дышетӥсь, быдэс республикалы тодмо педагог Галина Дмитриевна Чушъялова. Пиналъёсмы бордысен кутскиз «Чебеляй» ансамбль. Коллективлы ним малпаса но, анай-атайёсын ӵош пукимы. Совето Союзын будэмын бере, милемлы валамонгес вал «Солнышко», «Забава», «Ласточка» выллем нимъёс. Нош татын «Чебеляй». Табере озьы ик луыны кулэ кадь — коллективлы мукет ним но уг тупа. Со дырысен ик эшъяським кивалтӥсеныз Наталья Чирковаен. Нылы гимназиын дышетскиз бере, пумен мон тодӥ отын ужасьёсты.

Собере яратоно адямиме пумитай, бызи, выйи семьяям. Данилмы вордскиз. Пиелы 1 арес вал — Татьяна Ишматова жингыртэ. Соку со Кузебай Герд нимо гимназиын директорлэн воштӥсез луыса ужаз. Гимназие, пе, лыктод-а? Малпасько, удмурт кылъя дышетӥсьёссы вань, ӟуч кылъя педагогъёссы но люкамын. Директорлы воспитательной ужъя воштӥсь утчало вылэм. Мон пайми. Малы ке шуоно декретэ потэмелэсь азьло малпаськи ни вал ужме воштон сярысь. Соин, дыр, лицейысь кошки, вань котыръёсме бичаса, татчы уг берытскы ни шуыса. Гимназие ӧтемзы пумысен йырме кема тӥяса ӧй улы — толэзь ортчыса, ужаны потӥ. Данилмес песянаен но, няняосын но келляса выримы. Соку малпай вал: 3-тӥзэ вайи ке, гань-гань декретын пуко ни. Но 3 ар ортчыса, Марусяен но дорын кема ӧй ӝега. Нылылы 1,5 арес дыръя ужаны потӥ.

'''Семьяын кадь'''

— Мон шӧдӥсько, интыям шуыса. Туж кельше пиналъёсты конкурсъёсы бурдъяны. Улон огдышем ӧръя мынэ ке 1 арня, 1 толэзь ӵоже, мыным мӧзмыт потыны кутске.

Кузебай Герд нимо гимназие дышетскыны лыкто быдэс республикаысь нылпиос. Городысь эшъёсынызы ӵошатыса, гуртысь пиналъёс нырысь дӥсьтӥсьтэм луо, малпанзэс вераны уг дырто. Но ми юрттӥськом соослы усьтӥськыны. Тани Можга ёросысь Пазял гуртысь Стёпа Черепанов туж востэм вал. Нош табере со Удмуртиысь Егитъёслэн парламентазы быръемын ни. Котькыӵе йӧспӧртэм пинал но ассэ шедьтэ гимназиын. Ми доры озьы вуиз вал Ижысь Ленин ёросысь Роман Соловьёв. Со песянаеныз удмурт кылэз дышетэм, арганэн шудэ, математикаез яратэ. Ас сяменыз туж мур пияш. Гимназиын солы туж тупаз огъя омыр — ми дорын уг ултӥяло, семьяын кадь валало но ярато.

Али тросаз школаосын туж лэчыт югдур: урок, перемена, смена быриз, ӟеч луэ. Мар нылпи каре школа бере, мар солэн пушказ пӧзе — тодыны дыр уг тырмы. Ми тыршиськом пиналъёсын ужан радлыкез возьыны. Со понна милям соос котьку 1-тӥ сменаын дышетско. Гимназиысь пиналъёс понна ужало 50 пала кружокъёс, со пӧлысь ӝыныез дунтэк луэ.

Шумпотӥсько, огъя собраниосын анай-атайёс, ог-огзэс тодмаса, ӟечбуръясько ке, пальпото ке. Тросэз ог-огзэс нимын-тулын тодо. Со но туж ӟеч — мумы-бубыосын огъя команда кылдытыны. Соос быгато тыныд меӵак кыӵе ке мылкыдзэс но вераны. Куддыръя со уг кельшы. Но мон лыдъямъя, котькудӥз адями учке аслаз каланчаысьтыз. Туж тыршиськомы анай-атайёсын огъя малпанэ вуыны.

Тазьы ужамлэн емышъёсыз кисьмало ке, мон уката бурдъяськисько. Тани 3 ар талэсь азьло гимназимы республикаысь вань дышетон организациос пӧлын 1-тӥ луиз «Устоез визьнодан система» номинациын. Туэ ми вормисьёс пӧлы шедим Россиысь дышетон организациослэн 5-тӥ адӟытоназы. Таяз вожвылъяськонын возьматыны быгатӥмы, кызьы радъямын гимназиын визьнодан но, дышетон но, удмурт культураез утён но.

Сюлмаськисько, гимназиын дышетскись нылпиос улонын асьсэды мед шедьтозы шуыса. Пиналъёслы та дыре туж секыт. Тани бадӟымъёс но социальной сетьёсы зымо, часъёсын отын пуко. Нош нылпиосты макем гочатэ Интернет. Соослы сомында кужым кулэ отчы выёнтэм вылысь. Эшшо зыгато на телефон, компьютер шудонъёс. Соин тросэз анай-атайёс тышкасько пиналъёссэс: тон азьтэм, кияд книга уд кутылӥськы. Тодады вае ай, асьмеос но шудонэ зымиськомы вал, анайлэсь сётэм ужъёссэ ик вунэтылӥм. Валамон: уг луы вешаськыса гинэ улыны, теплицаын сямен но нылпиез уд будэты. Соин анай-атайёсын, дышетӥсьёсын, ватсаса тодон-валан сётӥсь специалистъёсын ӵош утчаськомы сыӵе визэ, кытын пинал шораз луоз, кытын ми солы будыны сюрес сётом.

Уг танӥськы, тазэ но верало. Дышетӥсьёс уг вутто саклык висъяны асьсэлэн пиналъёссылы. Тани 3-тӥ классын дышетскись Машае фигурной катанилы синмаськемын, но мон сое тренировкаосы келяны-вайыны уг вутскиськы, весь ачиз мынэ-бертэ.

Данил 7-тӥ классын дышетске. Со вала: анаез завуч ке но, номыр дасьсэ солы вайыса уз сёты. Сюлмаськоно аслыз олимпиадае пыриськон вылысь но, мукетыз пумысен но.

Алигес песянай луи — 3 толэзьем внуке вань. Саша нылы дорам кунояны бертӥз. Мон ӟеч песянай сямен кулэ вал, дыр, солы юрттӥськыны, коляскаен ульчаын калтыртыны, Сашалы шутэтскыны сётыны. Нош милям мукет сямен пӧрме: мон ӵукна 5 минут но ӝыт 5 минут вешаськисько. Мукет дыры гимназиын ортче.

Туала школаын ужасьлы уката удалтэ, сое аслаз семьяяз валало ке. Тани картэлы мон уж дурысь нокыӵе ужпумъёсты-сюлмаськонъёсты уг вераськы. Кыдёкын командировкаын дыръяз но со шӧдэ, кызьы ке озьы тупа: мыным секыт вакытэ жингыртэ. Соин таӵе оскымон адями вань ке тыбыр сьӧрын, котькыӵе ужез вормыны кужым кылдэ.

'''Источник:'''

Швецова Т. В. Мынам интые - пиналъёсын артэ / Татьяна Швецова ; [вераськиз] Елена Скворцова // Удмурт дунне. - 2019. - 3 окт. - С. 10, 15 : фот. - (Тӧр шорын)

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]