Христолюбова Людмила Степановна

From Воршуд
Revision as of 14:41, 6 February 2015 by Admin (talk | contribs) (1 версия импортирована)
(diff) ← Older revision | Latest revision (diff) | Newer revision → (diff)
Jump to navigationJump to search

Кытчы ышид, пичи дыр зыбынэ?[edit]

Л. С. Христолюбова


Людмила Степановна Христолюбова – этнограф, история наукаосъя кандидат. Удмурт Республикаысь наукая дано ужась. Быдэс улонзэ сӥзиз удмурт калыклы, солэсь сямъёссэ но йылолъёссэ эскеронлы. Сизьымдонэтӥ аръёсысен кутскыса, ужа Историяя, кылъя но литературая Удмурт институтын. Сизьымдонлэсь ятыр научной ужъёсыз печатламын республикаын, странаын, кунсьӧрын потӥсь изданиосын. Нош туэ лыдӟисьёс кие вуиз солэн вылез тунсыко ужез – «Удмуртские женщины» книгаез.

- Кӧня ке ар талэсь азьло адӟыны кылдӥз вал Удмурт телевиденилэсь далайгес лэсьтэм кадръёссэ. Отысь тӥледды но синйылтӥ, кыӵе ке делегациен сюрес вылэ потыны дасяськиськоды.

- 1966-тӥ арын комсомоллэн ХV съездаз ветлыны шуд усиз. Соку Удмурт пединститутын ужасько ни вал. Общественной уже мылысь-кыдысь пыриськылӥ. Бырйизы комсомоллэн институтысь комитетаз, собере Индустриальной райкомлэн пленумаз, обкомлэн бюрояз. Соку ик делегатэ бырйизы.

Егитъёслэн бадӟым ужрадазы ветлэмме ноку но уг вунэты. Со вал май толэзе Кремльысь съездъёс ортчылон дворецын. Туж синмаськи солэн быдӟалаезлы но чылкытэзлы.

Ӧтчаме быдэс СССР-ысь егитъёс люкаськизы. Со сяна, 80-лэсь трос кунъёсысь егитъёслэн азьветлӥсьёссы, куд-ог капиталистической кунъёсысь лушкем лыктэмъёсыз но вал. Огеныз сыӵе делегациен гостиницаямы тодматскон ӝыт ортчиз.

Тани съезд кутскытозь кӧня ке минут кылиз на. Шӧдтэк шорысь ваньмыз гурак султӥзы. Учкисько но, залэ Ворошилов пырем. Собере вуизы Политбюроысь адямиос, Брежнев… Съездын туж уно вал тодмо адямиос. Со аръёсы туж тодмо вал ни композитор Александра Пахмутова. Солы вераськыны кыл сётӥське шуыса веразы гинэ, нокин косытэк-маратэк, берпуметӥ радысен кутскыса, адямиос сяськаоссэс сцена доры ыстыны ӧдъязы – со нуналэ котькуд делегатлы Болгариысь вуэм егитъёслэсь кузьым - гвоздика сётъязы вал. Сцена доры сяськаос ӟыгыртэтэн люкаськизы, Пахмутова кызьы кутыны но ӧз вала ни. Дано спортсмен Валерий Попенченко сое сяськаосыныз валче ик ӟыгыртыса сцена вылысь нуиз. Нош зал султыса «Главное, ребята, сердцем не стареть» кырӟанзэ мытӥз.

Со нуналъёсы предприятиосын но пумиськонъёс ортчылӥзы. Ми Композиторъёслэн юртазы тодмо крезьгурчиосын Ян Френкелен, Оскар Фельцманэн, Эдуард Колмановскиен пумиськонэ ветлӥм, куиськон фабрикае, Горкие вулим. 1966-тӥ арын космонавтъёс трос ӧй вал на. Соос ваньзы съездэ лыктӥзы. Делегатъёс, кинюртэмъёссэс курыса, сьӧразы уллёен бызьылӥзы. Ми космонавтъёслы сӥзем буклетъёсмес дэмен люкам но президиумын пукись Юрий Гагаринлы но Валентина Терешковалы гожтӥськыны сётӥм. Тӥни озьы соослэсь автографъёссэс басьтӥм. 19-тӥ мае пионеръёслэсь Красной площадьын парадзэс учким. Съезд йылпумъяськем бере Лужникиын спортэз данъян бадӟым праздник вал.

- Комсомол ужен, иське, мылысь-кыдысь выриськоды вал. Нош улон сюреслы наукаез бырйиды. Малы?

- Мон понна комсомол общественной уж вал. Комсомоллэн обкомысьтыз бюролэн членэз луыса но озьы ик ужай.

Бен, комсомол уже ӧтьылӥзы вал. Огвакытэ вордскем гуртам, Завьялово ёросысь Кион гуртын, отпускын шутэтскисько вал. ВЛКСМ-лэн Индустриальной райкомысьтыз ужась пырак дорам вуиз. Секретаре, пе, юнматыны чакласьком. Ижевске ветлоно луиз. Уг, уг мыны шуисько, мынам наукаен выреме потэ. Пединститутысь парткомлэн секретарез И. З. Заболотских мон понна дурбасьтэм. Со бере кык ар ортчыса, партийной уже ӵектыса, партилэн обкомысьтыз пропагандая отделлэн кивалтӥсез Максим Петрович Емельянов дораз кык пол ӧтчаз. Тӥ, пе, милемлы тупаськоды. Шуисько, мынам наукае мынэме потэ. Нош со: «2-3 ар ужаса, Общественной наукаосъя академие пыроды, отысь нокин но наукаосъя кандидат луытэк уг поты". Мынам этнографиен выреме потэ шуыса, соглаш ӧй луы.

- Со вакытэ партилэн, комсомоллэн ёзъёсаз ужан вылӥ дунъяське вал ук. Аръёс ортчыса, ӧд жалялэ-а, сыӵе ӵектонъёслы пумит луиды, наукае мынӥды шуыса?

- Огпол но ӧй жаля. Мыным история но литература туж кельшылӥзы. Можга педучилищеез йылпумъяме бере ик институтэ пырыны мылкыды вал, но факультетэз – историяя яке кылтодонъя – бырйыны ӧй быгаты. Озьы ужаны мынӥ Завьялово ёросысь Сентег начальной школае.

Институтэ пырон понна кунсьӧр кылъя экзамен сётоно вал. Нош педучилищеын сое рос-прос ӧз сётэ. Тодон-валанме будэтыны шуыса Шаберды бускель гуртэ англи кыллы дышетӥсь доры ветлыны кутски. Кӧня ке дыр ортчыса, со монэ лӧпкытъяны кутскиз: давай, пе, пыр кунсьӧр кылъёсъя факультетэ. Кылзӥськи солэсь. Шузи йырыным документъёсме та факультетэ ваи. Валамон ини, англи кылъя экзаменэз сётыны ӧй быгаты. Ма, чуртнаськонэз но ӧй вал. Ар куспын дас класслэсь программазэ вормыны быгатоз шат. Тупаны но кулэ ведь. Ӵапак со аре историяя но филологияя факультетъёсты огазеязы. Отчы ик документъёсме выжтӥ. Али со вакыт сярысь тазьы малпасько: иностранной кылъёсъя факультетэ пырысал ке, озьы ик дышетскысал, дыр, собере школаын ужасал. Но удмурт культуралы али кадь матын оло ӧй луысал. Уг жаляськы, тазьы пӧрмиз шуыса. Бен, кунсьӧр кылъёсты тодымтэен шуггес йӧтэ мукет кунъёсын потэм научной ужъёсын тодматскыны.

Пединститутын умой дышетски, студентъёслэн научной конференциосазы историен герӟаськем темаосъя докладъёс лэсьтылӥ. Пединститутын сяна, мединститутэ но, Мордовиысь университетэ но ысъязы.

- Нош этнография борды кызьы кыстӥськиды?

- Иван Васильевич Тараканов юрттӥз. Али кадь тодӥсько на. Ньылетӥ курсын дышетскыкумы, педагогикая практикамес Якшур-Бодья школаын ортчиськом вал. Мон малы ке но Ижевске ветлоно луи. Берлань берытскыкум, Иван Васильевичен одӥг автобусэ шеди. Сюрес вылын автобусмы тӥяськиз. Ма карод, Иван Васильевичен солань-талань вамышъяськом но вераськиськом. Со шуэ: республикаямы одӥг но этнограф ӧвӧл, тон умой, пе, дышетскиськод, институтэз быдтыса, мын аспирантурае. Мон гор-гор серекъясько, шуисько, этнография кылэз но, оло, нырысьсэ кылӥсько ай, нош тӥ аспирантура сярысь вераськиськоды. Нош Иван Васильевич уг сётскы: лыдӟы, пе, литература.

Дышетсконме йылпумъян вакытэ этнографияя книгаосын тодматскыны дыр ӧз шедьы. Диплом басьтэме бере монэ кельтӥзы пединститутэ марксизмъя-ленинизмъя кафедрае ужаны. Мыным, егит муртлы, соку ик кык пӧртэм удысъёсты – диаматэз но истматэз – сётӥзы. Занятиослы дасяськыны ялан библиотекае ветлӥсько вал. Огаз учыре юай: этнографияя литературады вань-а? Возьматӥзы: тани, пе, ӝажы. Учкисько: ог витьтон книга но ӧвӧл, кӧня ке монографиос, журналъёс, сборникъёс. Соосын каллен-каллен тодматскыны кутски. Соку этнографияя учебникъёс воксё ӧй вал на.

Иван Васильевич ик ӵектӥз: гожты, пе, Москвае Этнографияя институтэ, кур программазэс. Озьы ик лэсьтӥ. Ыстӥзы. Ӵапак со программая рос-прос дасяськи но аспирантурае пыри.

- Озьыен, тӥ нырысетӥез удмурт этнограф луиды?

- Ӧй. Этнографилы нырысетӥез дышетскем муртмы, мон тодэмъя, Лекомцев Игорь Михайлович вылэм, ужам Ленинградын. Кандидат луыса вуттымтэ, 1941-тӥ арын бырем. Собере МГУ-ын этнографилы дышетскиз Гурий Николаевич Трефилов, но этнографияя ӧз ужа. Элькунамы нырысетӥез этнограф – Владимир Емельянович Владыкин. Москваын ми Валентин Кельмакович Кельмаковен огвакытэ дышетским. Валентин ик вераз Владыкин сярысь. Ӝоген соин тодматским.

Владимир Емельянович Можга педучилище бере МГУ-э пырем. Сое йылпумъяса, отчы ик этнографияя аспирантурае кельтӥллям. Ӵекто вылэм Африкаысь калыкъёслы сӥзем кандидат уж гожтыны, но со пумит луэм: монэ, пе, удмурт калык дышетӥз, тема но удмурт калыкъя ик кулэ. Наукаосъя кандидат со луиз 1969-тӥ арын толсуре, нош мон – 1971-тӥ арын кионсюантолэзе. Уже удмурт калыклэн семья обрядъёсызлы сӥземын вал.

- Этнографлэн синмыныз учкыса, вералэ вал, маин висъяське удмурт калык мукетъёсызлэсь, кыӵе солэн аспӧртэмлыкъёсыз?

- Калык сямъёсты, йылолъёсты эскерыкум, огвакытэ воксё ӟудӥ ук: асьме сямъёсты мордваослэнэн, поръёслэнэн, ӟучъёслэнэн ӵошатӥсько но, соос огкадесь пото. Артэ уло бере, зэмзэ но трос огкадез. Но котькуд калык сое аслазэн лыдъя. Сямъёсысь аспӧртэмлыкъёс, диськут сямен, соку ик син шоры уг йӧто, соос мукетъёсын ӵошатыса, кыӵе ке элементъёс, тодметъёс вылын гинэ адӟисько. Тодмо этнограф Лев Штенберг кылдытӥз этнографлэсь 10 заповедьзэ. Одӥгаз шуэмын: «Не делай кумира из одного народа». Одӥг гинэ калыкез тодӥськод ке, иське, нокудзэ но уд тодӥськы. Одӥг калыкез гинэ вылӥе ӝутыны, данъяны уг яра.

Удмурт адями сярысь верано ке, со востэм, либыт сямо, мукетъёсыныз олокыӵе уз даллашы, верамзэс кылзоз но малпанзэ пушказ кельтоз.

- Таӵе сямыз ик, оло, удмурт калыклы дауръёс ӵоже утиськыны юрттӥз?

- Бен, удмуртъёс нокин вылэ но ӧз урдскылэ, бускель калыкъёсын одӥг кыл шедьтыны тыршылӥзы. Улон идеологизы сыӵе вал – тупаса ул, эн кереты, гурт калыкен ваче эн вуы. Со ведь бадӟым искусство. Наполеон но шуэм вылэм: калыкез пыӵалэн вормыны луэ, но пыӵал вылын пукыны уг луы. Тупаса улыны быгатэмез понна удмурт калыкеным данъяськисько. Но туж уг кельшы "Милемлы озьы но яралоз" шуэмез. Туж жаль, куке дунне вылын ворме лекъяськон, таӵе калыкъёслы туж секыт йӧтэ.

- Асьмелэн, удмуртъёслэн, выжыосмы гуртын. Пичи дырдэс кыӵеен тодады ваиськоды?

- Вордскем Кион гуртэ удмурто-ӟучо суро вал, но гуртоосы оглом верано ке, тупаса улӥзы. Ми удмурт пиналъёс пичиысен ӟуч кыллы дышылӥм, соин школаын ӟуч кылын вераськыны туж ӧм ёрмылэ, родъёсты сураллям ке но. Тодӥсько на, нимаз колхоз дыръя гуртамы тулыслы быдэ «Колхоз табань» праздник ортчылӥз. Колхоз пызь сётэ вал. Гуртоос бӧлякен люкасько но зыретэн табань сиё. Ӝӧк сьӧры нырысь ик пукто пиналъёсты. Собере ини мӧйыос сиё-юо, кырӟало-экто, коркась корка юмшаса та празднике уг ветло вал. Колхозъёсты огазеямзы бере та сям ышиз-быриз.

Зэмзэ верано ке, гуртъёсты одӥг бадӟым колхозэ люкан гурт культураез туж зол начармытӥз. Пичи гуртъёсын ӵош этнографияя трос узыр материал тус-тас луыса быриз. Тодам ваисько таӵе учырез. 7 арес дыръям тятяелэн апаезлы куиськыны юрттӥ. Шаплы писъяськеме понна со мыным зыбын вуриз. Шумпотыса нуллӥ сое. Этнограф луо шуыса тодысал ке, утьысал, со нокытчы ке но утиле кошкиз, дыр.

Колхозъёс огазеяськемен, духовной культура но лябӟиз. Чаклалэ ай, калык педагогика макем зол вал. Гуртын ваньмыз син шорын ук. Кинлэн ке но пиналыз маке уродзэ лэсьтэ ке, котькудӥз вераны быгатэ вал, озьы дауртыны уг яра шуыса. Анай-атаез тау каро вал визьмась муртлы. Али мурт нылпилы маке верамед понна ачид ик уродэ кылёд.

Гуртъёсты огазеяса, калыклы ӟеч лэсьтом, малпазы. Но озьы ӧз пӧрмы. Сюресъёс лэсьтыны кулэ вал, соку гуртъёс ӧй бырысалзы. Мынам Кион гуртэ но ӧвӧл ни.

- Выжыосты, анай-атайды сярысь вакчияк вералэ вал.

- Мынам песятае Изосим Викторович гуртамы туж гажано адями вал, солэсь котькин кылзӥське вал. Тятяе но, Степан Изосимович Христолюбов, туж рос-прос, чебер воргорон вал. Ӝужыт мугоро, чильк-чильк сьӧд йырсиё, лыз синмо. Гурт котырын ваньзэ ачиз валаса, тыро-пыдо лэсьтылӥз. Юн сямо, но адямиез юнме уз обидьы. Конюхын но, бригадирын но ужаз, пенсие потыкуз, фермалэн заведущиез вал. Нэнэе, Мария Михайловна, Пироггуртын будэмын. Колхозын рядовойын ужаз. Тятяелэн дышетскемез 2 класс вал, нэнэелэн – ликбез. Туж сюлмаськылӥзы нылпиоссэс дышетыны.

Библиотекаысь книга ваиськом ке, ӝытазе одно ик лыдӟыны косозы ни вал. Тятя кут кута, нэнэй черсэ, ми книга лыдӟиськом. Шумпотыса кылзӥсько, собере малпанзэс верало ини. Кин тодэ, кылзыны мылкыдзы ӧй луысал ке, оло, лыдӟем но ӧй потысал.

- Узыр улон опытсы юрттылӥз, дыр, соослы котыр ласянь.

- Бен, улон анай-атайме «жугиз». Тятяе оже ветлӥз, отысь сӧсырмыса берытскиз. Одӥгез киыз уг ужа вал. Берло йӧназ ик.

Нэнэе улонысь 55 арескын кошкиз. Секыт йӧтӥз со ёзъёслы, уката ик война аръёсы. Нылпиосты сюдоно, колхозын ужано. Война дыръя огпол ӵукна сайкай, нэнэйлэсь бӧрдэмзэ кылыса.

- Нэнэй, малы-о бӧрдкод? – юасько.

- Уг бӧрдкы, нылы, уг бӧрдкы, - шуиз со, нюромем синъёссэ ватыса.

Берло ини, со аръёсты тодаз вайылыкуз, вералляз нылпиоссэ маин сюдыны ёрмыса бӧрдылэмъёссэ. Ма, война вакытэ вань кышноос трос синвузэс кисьтӥзы.

Пединститут бере кыкетӥ арзэ гинэ ужасько вал ай. Занятиысь лыктӥсько кафедрае. Ӵап со вакытэ жингыртӥсь луиз. Тятяелэн сузэрез ивортӥз: нэнэед, пе, секыт висе, берт, шуэ. Мон соку ик шӧдӥ: нэнэйме улэпен уг адӟы ни. Азьло но со висьылӥз, но ӧз жингыртылэ. Озьы ик луиз. Ӝыт пал гуртэ вуи но нэнэйме улэпен ӧй шедьты. Озьы тӥни, ӟеч лу шуыны но ӧй вутты.

Али туж зол жалясько, нэнэелы юрттыны но ӧм быгатэ. Весь дышетским но дышетским. Студент дыръямы сӥзьыл, картофка октон вакытэ, колхозэ келяло вал, гуртэ ӧм шедьылэ. Та ӝож мылкыды ноку но уз быры. Тятяе 3 ар огназ улӥз. Асьмеос ик курим кышно вайыны. Секыт ук огназ воргоронлы гуртын. Ужаны кутскем бере ялан бертылӥм ни юрттӥськыны.

- Семьяды бадӟым-а вал?

- Вить кузя пиналъёс будӥм. Бадӟымез Оля педучилищее пырем вал, но война кутскыса, дышетсконзэ куштоно луэм. Бӧрысь Казаньысь финансово-экономической техникумлэн заочной люкетаз дышетскиз. Тайзэ но йылаз-пумаз вуттыны ӧз кылды. Пенсие потытозяз бухгалтер луыса тыршиз. Огез агае Ижевскысь коммунально-строительной техникумез, собере лётной училищеез йылпумъяз. Лейтенант званиен службае Крыме ыстэмын вал. 1955-тӥ арын Октябрь праздник азьын доре ивор ыстэм, кузпал луонэныз ӵош бертоз шуыса. Тятяен нэнэй туж шумпотӥллям. Нош ӵуказеяз телеграмма вуэм: Федя самолётэн лобыкуз пазьгиськем. 21 арес вал солы. Бырем пизы понна пенсия сярысь юамзылы тятялы "тӥляд эшшо пиды вань на, пенсия уз тыриськы", пе, шуизы. Гриша индустриальной техникумез быдтӥз, собере – механикая институтэз. Инженер луыса заводын ужаз. Со но улонысь кошкиз ни. Ира сузэре – врач. Воткинскын ужа.

- Людмила Степановна, наука удысын бадӟымесь азинсконъёс басьтӥды, нош семья кылдытон сярысь ӧд малпаськылэ-а?

- Котьмалэн аслаз дырыз. Студент дыръям ик курасьёс вал, но мон малпай: бызьыны вуо ай, институтэз умой йылпумъяно, семьяен дышетскон уз лу ни. Нош куке мон семья кылдытыны пӧрми, дыр ортчем: ёзъёсы ваньмыз кузпало ни. Асме ачим серекъяй но, кылдэмез озьы, дыр, шуи. Мукет ласянь учконо ке, сюлэмъя воргорон ӧз шедьы, дыр.

- Нош пидылэн атаез?

- Антонлэн атаез электроника удысын инженер, космосэн герӟаськем научно-производственной организациын ужаз. Солэн огазеяськыны мылкыдыз вал, но ӝоген инфаркт луиз. Кузпалъяськыны ӵектӥсьёс берло но вал на. Но адями сюлэмъя ӧвӧл ке, малы кузпалъяськонэз. Пие Удмурт университетысь кунсьӧр кылъёсъя факультетэз йылпумъяз. Но быръем удысэзъя уг ужа, компьютер бордын тырше. Улэ кузпалыныз нимаз. Дорам нуналлы быдэ вуылэ.

Мынам улонэ – со мынам улонэ, кызьы быгатӥ, озьы пӧрмиз. Уг ӧпкелиськы. Уже туж кельше, ӧз акыльты на. Книгаосме кулэ карисьёс вань бере, иське, та дырозь юнме ӧй улы.

- Бадӟым тау, Людмила Степановна, пыр-поч вераськемды понна. Ми тӥледды ӟечкыласьком Выль арен. Сӥзиськом бадӟым шуд но юн тазалык.

Источник:

Христолюбова Л. С. Кытчы ышид, пичи дыр зыбынэ? / Л. С. Христолюбова ; записала Юлия Александрова // Удмурт дунне. - 2002. - 31 дек. - С. 8-9. - (Удмурт кизилиос).

За предоставление материала выражаем огромную благодарность редакции газеты "Удмурт дунне"