Редактирование: Туктарева Ольга Николаевна

== Ӟеч муртъёс ӵукна ик кырӟало ==

[[Файл:Tuktareva.jpg|thumb|left|Туктарева О. Н.]]
'''Элькун Кивалтэтын ортчем огаз кенешын погонъёсын генералъёс кема вераськизы будӥсь пиналъёслы Атыкай музъеммес гажан мылкыд пыӵатон сярысь. 

'''Мар но ӧз малпалэ ни кивалтӥсьёс со понна, но армие мыныны мылкыд карисьёслэн лыдзы уг йылы. Шӧдске, табере сыӵе амал сюриз. Туэ Вормон Нуналлы сӥзем ужрадъёс бере Удмуртиысь валтӥсь федерал инспектор, генерал Александр Кобзев военкоматъёсын шуиз: дышетске Брангуртысь песянайёслэсь!''' 

'''…Ижын улӥсь егитъёс азьвыл коштанъяськизы – ӧз ветлылэ удмурт концертъёсы. Мар, пе, отын тунсыкоез – ваньмыз вашкала кырӟанъёс. Но «вашкалаослэсь» рокез удмурт сямен кырӟамзэс кылыса, вуоно концертэ билет юаны кутскизы. Табере Пичи Пурга ёросысь Брангуртысь песянайёсты ӧтчало дискотекаосы но (соос егитъёслэсь шукрес позыръясько туала крезьгуръя), сӥё-дано ужрадъёсы но. Кивалтӥсьсы – Удмурт Республикаысь культура удысысь дано ужась Ольга Николаевна Туктарева.''' 

'''Гуртэ лыктэ… режиссёр!''' 

Школазэ быдтыкуз, Оля Коровина шуак луиз: кытчы мыноно? Филфаке шат – лыдӟиськыны яратэ, чылкыт гожъяське. История но тунсыко, таиз дышетӥсь истфаке пырыса утча, шуэ. Математик но уг ӝожтӥськы, но Олялы логарифмьёс мылкыдызъя ӧвӧл. Мар соосын азьланяз карод? Соку кин ке но ӵектӥз: тынад сюлэмыд кырӟан бордын ук, герӟа астэ культураен. Шонер! Пичи Пурга ёрос администрациысь культура отделэ Оля туж керпотыса пыриз. Клубын ужасал, востэмак шуиз со. Отделэн кивалтӥсь номыр вераса ӧз вутты, телефонэз жингыртӥз. Ой, ма тани азям сылэ, шуиз со трубкае. Кӧня ке вераськемзы бере, Оля пала берытскиз: тон туж шудо, дыр. Пермьысь культурая институтэ республикамы егитъёсты келя, кык инты кылемын на, пе.

Культурая министерствоысь специалист юаз: кытчы мынод: хореографе-а, вокалистэ-а, режиссёре-а? Нылмурт воксё ыштӥськиз. Вокалэз вала ик, нош отӥосыз мар меда сыӵе, кылылэмез но адӟылэмез но ӧвӧл. Бырйиз тужгес тодмотэм кылэз – режиссура. Солэсь пуштроссэ, институтэ вуыса но, кема-кема валаны выриз на. 

Удмурт нылашез яратӥзы дышетскисьёс но, дышетӥсьёс но: лякыт, сюлмо, тыршись. Дышетскыны секыт вал: анаез ньыль ар больницаосын кыллиз. Соин адӟиськон вылысь Оля ӵукна Иже лыктэ, нэнэез доры вуылэ но нош дышетсконтӥяз кошке. Кондон понна сёросъёсты но миськиз, кинотеатръёсын уйбытэн сторожен но пукылӥз. Юрттӥзы братъёсыз. Чидась нылаш ваньзэ вормиз, востэмлыксэ гинэ но. Диплом ужез дырья сыӵе спектакль пуктӥз – вань дышетӥсьёс паймизы. Соин распределение дыръя гуртэ куриськемзэ кылыса, тросэз ӧз оске. Нош Олялэн сюлэмыз зэмзэ но кемалась Пуро-Можгалаз вал ни. Вылаз ик сое отын витиз ни Лёшкаез. Ӝоген со Туктарева луиз.

'''Кызьы генерал синмаськиз, нош Цой удмурт луиз'''

Пичи Пурга ёросысь Брангуртын ансамбль, отчы ветлӥсьёс верамъя, котьку вал. Но Ольга Николаевна кивалтыны кутскемен, со выль сямен шокчиз, инвисъёс усьтӥськизы. Юрттӥзы Пичи Пурга «Зарни шепъёс» но. Шоркарын ортчоно «Воршуд» празднике соосты ӧтиллям, но яке мылзы потымтэ, яке кытчы ке сьӧрло мыноно луиллям, соин ӵектӥллям брангуртъёсты. Таосыз, палэнэ поталлямтэос, Иже шумпотыса вуизы. Июль, пӧсь, нош соос дэра дэремъёсын. Чидамзы бадӟым данэн берытскиз – со бӧрсьы песянайёсты котькытчы ӧтчаны ӧдъязы.

Улон воштӥськиз! Табере таостэ дорысьтыд туж ик уд шедьты ни, ӧтизы ке, коть картош мерттон-копан, коть турнан дыр медло – султозы но кошкозы, кузпалъёссы йырзэс сэзъяса гинэ кылё.
Со дырысен кытчы но ӧз вуылэ ни: Москвае, Свердловск улосэ, Эстоние… Нош кин но кунояськыны ӧз вуылы ни Брангуртэ! Ваньзэс пумитаны мылкыд но, перепеч но тырме.

Кылем сӥзьыл Туктаревалы жингыртӥз Ижысь режиссёр Павел Поздеев: рокез удмурт сямен кырӟасьёс кулэ. Ма, удмурт рок вань шат? – паймиз Ольга. Толэзь ӵоже удмурт кылэ берыктод, шуиз Паша. Ольга соку ик мазэ-созэ ӧз вала, но чутрак пумит ӧз кариськы – та выль вамыш луыны кулэ. Бырйиз В. Цойлэсь но Б. Гребенщиковлэсь кырӟанъёссэс. Песянайёсыз сое нырысь ӧз валалэ – гурез дышымтэ, кылъёсыз валантэм, олокыӵе. Но кивалтӥсьсы буйгатӥз: удмурт сямен кырӟалом. Озьы ноку кылбур гожъямтэ мурт уже мынон-ветлон сяменыз ӟуч кырӟанъёсты удмуртэ берыктӥз. Пӧрмиз кадь – куараос улӟизы. Ма, табере валаськом ук ини мар кырӟаммес, – шуизы кенакъёс. Ижын соос ваньзэс паймытӥзы. Вожъяськизы егитъёс но.

Тулыс выль ӵектон вуиз: город пиосты солдатэ келяно. Ачиз генерал Александр Кобзев, пе, возьма. Со вал Вормон нуналлы сӥзем ужрад. Тросэз песянайёс война вакытэз но тодо ай, кӧня муртэ армие келязы, кӧнязэ пумитазы, но тамында солдатъёсты но офицеръёсты ӵош адӟылэмзы ӧй вал. Соос паймыса учкизы ыбылӥськисьёс, нюрьяськисьёс шоры. Нош песянайёсты синйылтыса паймизы генералъёс. Брангуртъёсты возьматыны косӥзы солдат келян йылолэз. Рекрутъёс зэмосэсь – призывной пунктысь егит пиосты вайиллям.
Песянайёслэн кыласа-бураса кырӟамзы, пиослэн чыртыязы ӵушкон поныса, чупаса-ӟыгыръяса келямзы ваньмызлэсь сюлэмзэс вырӟытиз, нош пиослэн синкылиоссы пызьыразы. Ужрадэ пыриськизы культурая училищеысь пиос. Ваньзэ сое адӟыса, егитъёс военной азьын шуизы: ми армие мыном! Йылпумъянъёс лэсьтон кенешын Александр Кобзев ансамбльлы Тау карон гожтэт сётӥз, Брангуртысь коллективлы паймемзэ олокӧня пол вераз. От кыӵе песянайёс – генераллэсь йырзэ берыктыны быгато!

Зэм, вань «командировкаос» сыӵе мыло-кыдо уг ортчо. Вал одӥг ортчыт учыр но. Ӧтизы перформансъёсты яратӥсь Макс Верёвкинлэн ужрадаз – сюан йылолэз, пе, возьматоно. Тодысалмы ке, ӧй мынысалмы, шуо песянайёс. Ай эшшо пияно ыжзэс сьӧразы курадӟытыса нуллӥзы. Басьтом, пе, но уксёзэ берло сётом. Ӧз сётэ – возьма собере соослэсь узырмемзэс. Вуттӥзы Ижысь кыӵе ке нюк улэ, кезьыт, кот, кырсь. Авангардистъёслэн яратоно интызы, пе, та… Эмеспизы шайтан кадь: кечтака тушо, гольык пыд, мача… Выль кен но пӧртэм ӧвӧл: дэремез чильпыра, сокем вакчи, берпалыз адӟиське. Оломар дарманьто, шӧтэм кылъёсын верасько. Ольга Николаевна, песянайёсыз понна сюлмаськыса, кытчы пырыны уг тод ни вал. Берытскыса кошкы вал, но… Ӧвӧл – возьматоно, ми соослэсь вылынгес шуыса. Песянайёс сюан йылолэз возьматӥзы, выль кенэз выж ӵужытӥзы, келян гур кырӟазы, но одӥг ӝӧк сьӧрын пукыны, сиыны-юыны мылкыдзы ӧз сузьы.

Шайтанъяськисьёс асьсэос паймизы: кызьы озьы гуртысь пересьёс соосты улыны уг индыло, уг тышкасько? Арлыдо кышномуртьёс кизэс шонтӥзы: ми быдӟа будӥзы ке, визьмаськозы ай…

'''Кул, но… экты'''

Туннэ коллективын 12 песянай. Тросэз гуртоос соослы вожъясько, синмасько, но вань вожъяськисез, пыкылӥсез но. Со понна асьсэос артисткаос асьсэды тужгес шудо адямиосын лыдъяло, вань пинал даурмы понна сюлэммес кисьтӥськом, пе.

- Монэ пичи дырысен луло мунё шуо, – пальпотыса маде 73 аресъем Наталляпай – Наталья  Яковлевна Пугачёва. – Сютэм но улӥм ук, нош кырӟам весь потэ вал: ӵукна но, ӝыт но. Будыса фермаын ужай. Отын но силос пыртылон вискын вань ужме куштӥсько но эктыса-кырӟаса лэзисько вал – вань жадеме ортче. Огпол эшеным ӵош ферма шорын шулдыръяським. Озьы дауртэммес адӟыса, ветеринармы чабкиськиз: сазь йырын озьы экты ай! Клубе ветлӥсьёслы дото вожъяськылӥ, но ачим лыктыны кепырай-а, мар-а, ӧтемзэс возьмано ук. Огпол та эктӥсь выжыеным (эшеным – Надежда Семёновна Барминаен) магазин азыын сылком. Ӵап Ольга лыктэ: ансамбле, пе, уд-а мынэ. Ой, шумпотса отын ик тапыртыны кутским ук! Табере та эшъёсытэк, кырӟаса ветлытэк улэм ик уг пот ни, пыдъёс гинэ кема мед мынозы.

Надежда Семёновна, кизилияськон вакытсэс тодаз вайыкуз, одӥг учырлэсь али ке но юзырске. Ӵап нырысьсэ Ижын асьсэды возьматыкузы вал со. «Воршуд» праздникын ваньмыз кырын, Иж тымет дурысь памятник дорын эктӥзы. Вуиз брангуртъёслэн но черодзы. Оломаиз оломар луиз, ньылен эктонзэс чисто суразы. Учкисьёс, оло, ӧй но валасалзы ай, но асьсэос ог-огзэс суйтӥзы кысканы ӧдъязы. Эктонззс йылаз-пумаз вуттӥзы ик, но Надёжапай, керпотэменыз кытчы пырыны валатак, тымет дуре васыкыны дасяськиз. Таӵе возьытэз чидатозь выйтӥсько, пе. Эшъёсыз кызыы ке буйгатӥзы ик. Но Ольга Николаевна куаретысал ке, чик малпаськытэк, тыметэ тэтчысал, пе.

Семёновнаез ансамблязы Губи мумы шуо. Со кадь губиясь та котырын ӧвӧл. – Лулы потэ ин губи возьмаса, нуналлы быдэ губи учкыны ветлисько, – шуэ. – Гужем-сӥзьыл одӥг нуналэ губиятэк кыписько ке, юнме улӥ кадь потэ. Нюлэсъёстӥ но весь кырӟаса ветлӥсько. Со понна мынам котьку «деликатесэ» вань.

Галина Ивановна Байсарова 59 арес сяна ӧвӧл ай, но со пересь песянай ни. Пӧлысытызы со тужгес узырез: 6 нылпиез, 9 внукез, одӥг правнукез. Кырӟаны яратэ пичи дырысен, но азьло соин йырин ӧй вал – фермае-а бызёд, пиналъёсты-а учкод. Соин пенсие потэмез бере ансамбле ӧтемысьтызы со но туж шумпотӥз. 
Екатерина Семёновна Шкляева самодеятельностьын – пинал дырысеныз. Татысь клубе кыӵе арысен ветлэмзэ ик уг тоды ни. Учконо ке, со туж шып, дыртӥсьтэм кадь, но кӧня ке ар талэсь азьло вань гуртооссэ паймытӥз: мӧйы кышномурт ас кожаз корка ӝутыны быгатӥз. 

Валентина Семёновна Пятченко – азывыл дышетӥсь. Пинал дырьяз йыраз ыштытозь синмаськиз Дон палась казаклы. Чик кӧбератэк, военной картэз сьӧры кошкиз Туркменистанэ. Отын соин ӵош 21 ар улӥз. Вожась карт вӧзын кырӟаса ветлонэн йырин ӧй вал, ма, со огпол кырӟамме но ӧз кылылы, дыр, тодаз вайыны выре Валентина Семеновна. Пиналъёсыз будыса ни, картэныз люкиське, дор палаз берытске. Гуртоосыз мурт ӧз каре, пӧлазы чортӥзы. Кышномурт нырысь квартира басьтӥз, собере корка пуктӥз – улон выльысь радьяськиз кадь, кырӟам потыны ӧдъяз. Но азыпалан эшшо одӥг адӟон вань на вылэм. Циркуляркаен пул вӧлыкуз, бур китэк кылем. Улон кысӥз кадь, кышномурт юскиськиз. Ансамбль сярысь ӧз ик малпа ни – ӧлексы артист шоры кинлэн учкемез потоз. Буйгатӥз бускелез – Галина Николаевна Конева. Та шаплы кышномурт кулэмзэ но улӟытоз. Трос кайгуос пыр потэм адями эшсэ куке лякытэн лӧпкытъяз, куке юн куараен шуылӥз: 
- Тынад котьмаид вань, огез гинэ киыд ӧвӧл, со понна табере выд но кул, иське. Котьмарлы дышод, эн чигиськы гинэ.

Озьы ик луиз: Валентина Семёновна бакчазэ но ваньмызлэсь вазь копа, мерттӥське но ачиз, пыжиське но, дэрем но вуре. Коллективе берытскемез бере кайгузэ воксе вунэтӥз, со сярысь малпаськыны, астэ жаляса улыны дыр уг тырмы ни.

Галина Николаевна Конева – ансамбльлэн кивалтӥсезлэн юрттӥсез, староста. Концертэн со ту-уж кемалась ветлэ ни. Огпол сьӧргуртэ ӧтизы. Клубе пыризы – мылкыдыз куашказ: кезьыт, сцена шакшы. Ма кызыы таӵе азьын эктод? Завклублэсь вуэн ведра куриз. Соиз номыре уг вала, сётӥз. Борддорысь кыӵе ке горд ӟустариез ишкалтыса, дэрем сӧзулъёссэ ӝутказ но сценаез миськыны ӧдъяз. Нош калык со вис тымиськиз ни. Галина Николаевна катанчиез со тусыныз ик усьтӥз: тани тӥледлы нырысетӥ отделение, шуиз со, выж миськонзэ йылпумъяса. Йӧтӥз, дыр, соку клублэн кивалтӥсезлы, но ма карод – кырсь сцена вылын уд ужа ук. Ансамбльын Галина Николаевна котьку воштонтэм вал, шуыны луоз. Огаз смотр азьын пыжиськыкуз, пыдаз ӵыжтэм вӧй кисьтӥськиз. Пыдыз ӝуаса висиз. Ӵап сыче дыръя ӵош эктӥсь эшез ӝутканы кутскиз: сыӵе ӟеч номермы, ойдо кызьы ке но эктом. Сюлмыз ӧз чида, мынӥз. Эшшо еркыт сапег сетӥзы. Сцена вылын тэтчакуз, вӧсь луэмзэ нокин ӧз вала, но ӵуказеяз Галина Николаевнаез больницае келязы – пыдыз урӟектыны кутскем. Толэзь эмъяськоно луиз. Визь ӧз пыры, выльысяз спектакльын валтӥсь ролез шудӥз операция бере куасьмымтэ вурысъёсын. Огласянь, оло, со ик сётэ улон кужым, шуэ староста. 

Аръёсын кырӟаса, калыкез маин паймытод на кадь – котькытын огвыллем гуръёс чузъясько. Огпол озьы малпаськыса пуконъязы Елизавета Филипповна Зарбатова востэмак шуиз: мон тодмотэм гур тодӥсько. Кӧня ке улыса, нош ик выль кырӟан ӵектиз, собере – эшшо. Бӧрысь тодмо луиз ни – мӧйы кышномурт ачиз кырӟанъёс малпа вылэм. Озыы брангурт песянайёс Елизавета Филипповналэсь данаксэ кырӟанъёссэ калыке волмытӥзы ни.

Ансамбльысь тужгес егитэз «песянай» – Алевтина Геннадьевна Бегишева. Со ай пенсиын но ӧвӧл на, кен но ӧз басьты на, но пересьёс сое кемалась бордазы каризы. Алевтина Геннадьевна хозяйствоын бухгалтер луыса ужа. Вань эшшо одӥг ужез – куно пумитан.  Бегишевъёслэн корказы туж огшоры кадь, но сьӧрлось куноос лыкто ке, ваньзэс пырто Алевтина Геннадьевна доры. Куноос кӧло… выж вылын, но выльысь тапала вуыкузы, нош курисько со корка ик.

- Ваньзэс йырам по уг возиськы ни, – кунооссэ тодаз вайыны выре Алевтина Геннадьевна. – Эстонъёс 8 партия кунояськизы, голландецъёс, американецъёс – куинь пол, англичанъёс – 4 пол, вал Индиысь, Франциысь, Испаниысь куноос… Ваньзэс табанен-перепечен сюдӥсько, уг юрдо, ӟеч кыл вераса кошко. 

'''Наполеон'''

Дышетсконзэ йылпумъяку, распределение дыръя комиссиын пукисьёс Ольгалэсь серекъяса юало: ну, мар-о, гуртэ бертэмед потэ на-а? – Потэ! – ӝот-ӝот вазиз нылмурт. Ваньмыз паймизы. Кызьы? Культурая институт бере? Сыӵе спектакль дасяса? Сыӵе куараен?

Ольга удмурт калыкез доры берытскиз. Гуртэ кылемысьтым огпол но ӧй жаля на, шуэ со. Кин мон городын луысал – трос сюрс калык пӧлысь огез кибы, нош татын мон – Наполеон! Семьяе ӟеч: Лёшкаез яратӥсько, нэнэзы туж каньыл, куспамы тупаськом, пиналъёсы будо, корка пуктӥм, уже сюлэмъям, гурт калык гажа – мар кулэ на?! Ай ми та песянайёсыным куд-ог городскойёслэсь ӵемгес калыке потаськом. Мон туж шумпотӥсько та пересьёсы понна – арлыдазы вуыса ке но, соос асьсэлэсь мылкыдзэс шараязы, тымиськем сюлэмзэс усьтӥзы. Учке ай, кыӵе соос визьмоесь, сабырлыесь, быгатӥсесь. Шоразы учкыса, соосты эшшо юнгес шумпоттэм потэ. Соос шоры учкыса, нюжыоссэс, кылзэс дунъяны кутско внукъёссы. Милям песянайёсмы крутоесь – Цоез кырӟало! – ушъясько городын улӥсь пиналъёссылэн пиналъёссы. Асьмелэн малы арлыдоос но пиналъёс куспын керетонъёс, валамтэос пото? Малы ке шуоно бадӟымъёс асьсэды визьмо каро, индыло, пыкыло, нош уж вылын уг возьмато. Кинлэсь-марлэсь адӟем карозы?

***
Котькуд ужрад, котькуд концерт трос кужымез кулэ каре. Улӟон понна Ольга Николаевна мынэ вордскем гуртаз, Пуро-Можала. Отын солэн яратоно интыез вань. Мӧзме ке, толалтэ но куасэн кошке. Шур дурын пукыса, сюлэмыз нясь-нясь луэ, йыраз выль малпанъёс лыкто. Тани али гужем, бакча ужъёс лачак кадь, нош пересьёсыз шутэтскыны маза уг сёто. Собере выль дышетскон арлы пиналъёсын сцена вылын пуктыны выль пьеса кулэ. Кытысь соосты шедьтод? Паймыса куддыр ачиз гожтэ. Тодмо авторъёслэн кылбуръёссыя. Озьы Брангуртысь нылпи театр сцена вылын улӟытӥз ни А. Ахматовалась, М. Цветаевалэсь, Ф. Васильевлэсь, Э. Батуевлэсь кылбуръёссэс. Малпаз вал, гуртоос уз валалэ. Валазы, поэзиен тунсыкъяськыны ӧдъязы. Ачиз Ольга Николаевна туж яратэ Азвесь даурысь кылбурчиосты. Егит дыръяз малпа вал: малы со кылбуръёс кулэ, валантэм кыӵе ке… Соос дорозь будоно вылэм, шуэ кышномурт. Табере, пе, кылбур лыдӟисько но выль син усьтӥське кадь. 

Вань Ольга Николаевналэн эшшо одӥг «ляб» интыез: со туж-туж яратэ сяськаосты. Ачиз кизем-будэтэм сяна, мукетъёссэ но лӧпкытъя. Котькуд гужем со видеокамераен укноос ултӥ ветлэ, сяськаосъя фильм дася. Бер сӥзьыл калык люкаське клубе гужем суредъёсты тодазы вайыны, нош вуоно тулысаз гурт выльысь вые сяськаос пӧлы.

'''Источник:'''

[https://elibrary.unatlib.ru/handle/123456789/8810 Ӟеч муртъёс ӵукна ик кырӟало / Зинаида Рябинина. // Удмурт дунне. – 2008. – 6 июня. – С. 6, 11. – (Удмурт кизилиос)].

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]