Тимерханова Алёна Геннадьевна

From Воршуд
Revision as of 10:04, 22 April 2015 by Sveta.Bat (talk | contribs) (→‎Башкырт италмас)
(diff) ← Older revision | Latest revision (diff) | Newer revision → (diff)
Jump to navigationJump to search

Башкырт италмас[edit]

Снимок3.JPG

Калыклэн гажамезлэсь бадӟым дан ӧвӧл ни. Бускель Башкортостанын быдэ вуэм удмурт кырӟась Алёна ТИМЕРХАНОВА куинь ар талэсь азьло гинэ Удмуртиысь сцена вылэ потӥз. Со дырысен пыраклы лякиськиз удмурт калыклэн сюлмаз - жингрес куараеныз, кельышлы выросъёсыныз, пуш дуннеез бугыртӥсь кырӟанъёсыныз.

- Кытын, кыӵе музъем вылын ӝужало таӵе артистъёс?

- Вордӥськи мон Екатеринбургын. Но анай-атаелэн выжызы Башкортостанысь Татышлы ёросысь Вязовка удмурт гуртысь потэмын. Отын соос вордскемын, будэмын. Специальность басьтэмзы бере, уно егитъёс сямен ик, ӟечгес улон утчаса, Свердловск палъёсы кошкиллям. Мон тӥни ӵапак со вакытэ вордӥськи.

Мыным 10 арес тырмиз вал ни, анае но агае Башкортостанэ берытскыны ӝуткаськизы. Татышлы - Башкортостанысь удмурт ёрос, нырысь учкемъя гинэ та кыл бигер шӧмо кадь йӧтэ. Ёросмылы ним сётӥллям вашкала ѵдмуртъёс. Калык пӧлын вӧлмемын таӵе мадёс: кык адямиос сюрес вылэ потӥллям. Одӥгез уксёзэ ыштэм, мукетыз, пе, отын ик индылэ: татчы ыштӥд, дыр, татысь утча, татысь, татысь! Озьы ёросмылэн нимыз кылдэм.

Вязовкае вуимы но, мынам шок луиз! Удмурт кылын вераськемзэс чик уг валаськы. Эшшо гуртын улӥсьёс куэм удмурт дэремъёсын ветло! Малпасько, машина времени шуонэн вашкала вакытэ вуи шат? Но паймоно кадь: одӥг толэзь куспын мон воксё удмурт луи.

- Камсьӧр удмуртъёс кырӟаны-вераны устоесь, табере валамон, кинлэсь пыӵам тыныд таӵе быгатонлык...

Ма, вань ӵыжы-выжыосы кырӟаны яратӥсесь. Пичи дырме тодам вайисько ке, соку ик син азям пуксё дорамы кырӟаса пырись куноос. Туж тунсыко потэ вал соосты кылзыны. Мыным, Свердловскысь вуэм макелы, таиз воксё но экзотика выллем потылӥз. Озьы ик, вылды, пичиен-пичиен вирам-сюлмам пыӵазы калык гуръёс. Но нырысь ик соосты гажаны дышетӥзы анай-атае. Мамае - Анифа Тимерханова, удмурт ке но, шатыр! поттыса вераське бигер кылын. Мамаелэсь зэмос нимзэ тодӥ ай Вязовкае берытскеммы бере гинэ. Солы отын Анифа нимын вазиськыны кутскизы. Мон шуисько, кыӵе Анифа? Свердловскын тон Анна вал ук! Куараез солэн туж жингрес, выросъёсыз артистлэн кадесь. Школазэ йылпумъяса, со дышетскыны пыриз Стерлитамак городысь театральной училищее. Отын тодон-валан люкамын Россиысь тодмо бигер артистэн Салават Фатхутдиновен ӵош. Дышетсконзэ йылпумъятозяз, одӥг ар кылемын на вылэм, мамаме папкалы лушкаллям. Озьы со дышетсконзэ куштэм. Бӧрысь лавкачилы (вуз карисьлы) дышетскиз, быдэс улонзэ вуз карон удысын тыршиз. Папкае куное шуыса пырем но гур вылэ пегӟем мамаме лушкаса поттэм. Тазьы пӧяськемез понна песяе сое тыбыр кузяз турскоен (гур суранэн) но васькытэм. Калык сямъя угось, выль кен лушкаку, анай-атайёс нылзэс соку ик сётыны уг дырто, пумитъяськыны кулэ.

Мамае мынам туж визьмо но лыдӟиськыны яратӥсь. Солы та сям пыӵаз, луоз, атаезлэсь - со колхозлэн председателез вылэм. Мамае лыдӟиськыны корка сигазы тубаллям. Нош отын, политической книгаос сяна, номыр ӧвӧл. Озьы со пичи дырысеныз таӵе книгаос вылын будэм ни. Та сямыз солэн ӧз ышы аръёс ортчемъя но. Маке лыдӟыны кутске ке, котькӧня «мама» шуыса вазиськы, номыре уз кылы - быдэсак книгае вые.

Папае Геннадий Тимерханов дышетскемезъя сварщик-слесарь, али водитель луыса тырше. Арганэн но шудэ, пыдвыл но керттыны быгатэ. Котькуд юанлы, эсьмаса, кырӟаса валэктон сётоз. Кызьы со шуак но интыяз кылъёс шедьтэ - мон чылкак паймисько. Таӵе ик сямыз ӵош кырӟась эшелэн Коля Анисимовлэн. Кияса палъёсын но тазьы ик кырӟаса кадь вазисько. Тае кылыса, сюлмы ик нясь-нясь луэ.

- Озьыен, Николай Анисимов - ӵош кырӟась эшед гинэ? Оло, мае ке ватӥськод? Учкисьёс тӥледыз кемалась кузпалъязы ни. Тӥ шоры учкыса, ваньзы чабкисько: кыӵе чебер пар!

- Шуо тазьы: Коля Анисимовтэк ӧй луысал Алёна Тимерханова. Калык азе угось со монэ поттӥз. Ог 3 ар талэсь азьло вал со: эшъёсыным пумиськи, пӧлазы Анисимов но тупаз. Пукон-кенешон сямен кырӟаса но лэзимы. Коля дорам лыктӥз но шуэ: тыныд кырӟано. Озьы Электроники диджейёс юрттэмъя гожтӥмы «Эмезе» кырӟанэз. Та калык кырӟанэз туж ярато ми палъёсын, туж чебер быдэсто. Со вакытэгес ик «Шунды» огазеяськонлэн кивалтӥсез Ольга Тронина Шаркан ёросысь Пороз гуртын концерт радъяны чаклам, кырӟаны Анисимовез но ӧтем. Нош соиз аслэсьтыз куронзэ пуктэм: Тимерхановатэк концертэ уг пыриськы. Озьы Коляен ӵош дуэтэн нырысьсэ кырӟамы Шаркан палъёсын. Бӧрысьгес гожтӥ «Италмас» кырӟанме. Таиз но калыкысь - мамаелэн яратоно кырӟанэз, гур азьын бергакуз, одно ик сое мытоз. Бӧрысьгес Коляен гожтӥмы «Нырысетӥ яратон» кырӟанмес. Таиз бигер калык кырӟан, мон сое удмуртэ берыктӥ. Озьы тӥни Электроники диджейёсын радъям концертъёсы котькудаз сямен пыриськыны кутскимы. Озьы кылдӥз Коляен дуэтмы.

- Валтӥсь юанэлы валэктон ӧд сёты кадь, Анисимов но тон куспын - яратон-а?

- Коляен мыным туж капчи ужаны, огкыл шедьтыны. Ми соин - творческой семья. Но калык милемыз кемалась паръяз ни. Коля Эстониын дыръя концертъёсы Иван Котельников кырӟасен ӵош поталляськом. Ужрад йылпумъяськем бере учкисьёс дорам лыкто но пелям лушкем шипырто: «...Колядэ Ваняен эн вошты вал...» Зэмзэ вераса, Ваняен куараосмы но, стильмы но уг тупало. Солэн кырӟанъёсаз армиын служба нуэмез - кавказ гуръёс - шӧдӥсько, вылаз ик, со фольклорен вылтӥз гинэ тунсыкъяське. Мыным калык кырӟанъёсты гинэ сёт! Соос пуш дуннеез бугырто, котыр улонэз валаны но соос пыр дышетскисько. Зэм, егитъёслэн калык кырӟанъёсты туж ик кылзэмзы уг поты. Но соосты туала кариськод ке, ваньзылы кельше.

Яратон мылкыд вылэ берытсконо ке, сюлэмам мукет пияш. Со мон сямен ик башкырт удмурт, та вакытэ армиын службазэ нуэ. Мон сое армие келяй. Вуи ке, монэ лушкало, шуэ. Мыным со кемалась синмаськемын вылэм ни, но дорам лыктыны но сюлэмзэ усьтыны дӥсьтымтэ. Чиданэз чигем ик: одӥг но ӝыны ар талэсь азьло яратэмзэ шараяз.

Творчествое сярысь верано ке, выль кырӟанъёс кылдытон бордын тыршисько. Апреле потоз Электроники диджейёсын ӵош дасям кырӟанъёсын диске.

- Иське, тон ачид кырӟанъёс гожъяськод?

Таиз папкаелэсь пыӵаз, дыр, мыным. Со ук милям кыллы усточи. Мынам йырам гур лыктэ ке, ас поннам нёжъяса ветлӥсько, гуръя кылъёсты бырйисько. Нырысь-валысь асме эскери, бигер калык кырӟанъёсты удмуртэ берыктыса, озьы ик туж тунсыкъяськисько бигер гурен удмурт калык кырӟанъёсын. Таиз вирам пыӵамын ни пичи дырысеным. Свердловскын улыкумы ай, Татышлые адӟиськыны бертӥськомы ке, сак кылзӥсько ни вал куноослэсь удмурт кылын но бигер гурен кырӟамъёссэс. Собере огнам кылисько но, скакалка кутыса, сое микрофон порма карыса, ну! кырӟаны вырисько ук. Удмурт кылэз ӧй тоды бере, бигер гуръя ӟуч кылъёсты пуктылӥ...

Кырӟан кылдытыны, мылкыд сяна, шыпытын оген пукон но ваньмон дыр кулэ. Куд-ог дыръя гур шеде, нош кылъёс лыктыны уг дырто. Озьы нуналэн-уйин, ас поннад нёжъяса, ветлӥськод, тупась кылъёс утчаськод, соос эшшо ке мылкыдъя но мед луозы!

Кылем арын, машина руль сьӧрын пукыкум, сюрес вылын шудтэм учыре шеди, зол сӧсырми. Эмъясьёс нырысь валаллямтэ пушкам вирлэсь люкаськемзэ. Инмар быронлэсь утиз, йӧнай. Тӥни соку малпамтэ шорысь - озьы но луэ вылэм! - «Синъёсме усьтӥсько» кырӟанэ кылдӥз. Солы гур гожтӥз Иван Котельников. Шудтэм учыре шедеме бере братъёсы шуизы: всё, руль сьӧры уд пуксьы ни, кытчы кулэ, асьмеос нуом-ваём. Озьы соос мыным туж юртто ни. Башкириысь монэ Удмуртие вутто, татысь гуртъёстӥ нулло. Ма, концертлы чаклам костюмъёсын автобусэн удгес ветлы: сцена вылэ потэмедлэсь азьло ик кужымед быроз. Экеосы юрттӥсько концертъёсам билет вӧлмытыны но. Ма, собере концертъёсы шӧмаськыса вуэмъёс но луыло: соос монэ керетонъёслэсь утё.

Братъёсы мынам казакпиос ай. Верай вал соослы: тазьы монэ нуллонъяды ик асьтэлы пар но шедьтоды ни. Быдэсмиз ведь веранэ! Одӥгез синмаськиз Москваысь М. Щепкин нимо училищеез ӥылпумъям но Удмурт театре ужаны лыктэм Надя Наговицыналы. Со лушкамын ни. Озьыен, Балезино палъёсын ӵош кариськыса, сюаназы шулдыръяськом ӝоген.

Удысме, мылкыдме валамзы понна нимысьтыз тау кареме потэ анай-атаелы. Соос мыным котыр ласянь юрттыны дасесь. Данила пиме но тани мон концертъёсын дыръя шуныт бурд улазы возё-будэто.

- Уг ваты: ноку ӧй малпалля, пиед будэ ни шуыса...

- Озьы, индэ: со мынам 7 аресъем визь поге - уен-нуналэн лыдӟиськыса пукысалыз. Синъёсыз лябӟозы шуыса, книгаоссэ но ваткаськомы, но со, шобрет улаз пегӟыса, фонарикеныз югдытыса, лыдӟиське. Таӵе сям солы пыӵаз, луоз, мамаелэсь. Ма, пӧяськыны но быгатэ: аслыз маке кулэ ке, син куспын алдаса куштоз! Кытчы концертэн потэмме бумага вылэ гожъясько, почерке икыр-кукыр ке но, пие сое но лыдӟыны быгатэ: мама, пе, нош ик сюрес вылэ дасяське ни.

Солэн агаеныз ӵош улыны кема ӧз кылды, люкиськимы. Ма, пинал визен бызем маке вал ай мон. Куспамы кылдӥсь валамтэос шоры но чиньы пыртӥгес учкылӥ кадь: ма, бызид ке, улоно ни ук. Собере ӧй чида ни, дорысьтыз, пиме кутыса, кошки.

Мамае шуылоз вал: удмурт адямилы удмуртэзлы ик бызёно - шӧдӥз, луоз, ми бордысь ӟеч семья уз кылды шуыса. Нош мон синмаськи бигерезлы... Ортчем аръёс пумысен тазьы малпасько: ваньмызлэн аслаз дырыз - янгышанлэн но, валатсконлэн но. Соку яратонэз укыр бурдо, капчи мылкыдэн лыдъясько вал. Нош туннэ нуналлы со шоры такем капчи уг учкиськы ни. Нырысетӥ яратонэным янгышай ке но, яратонлы оскемысь уг дугдӥськы. Кызьы яратытэк улод?

- Удмурт шаерын концертъёсы пыриськиськод но дыртӥськод пиед доры, вордскем палъёсад? Кудӥз элькун тыныд матынгес?

- Отын но, татын но мон удмуртъёс, аслам калыке пӧлын. Но Башкириын асме уг адӟиськы ни кадь, азьлань улонме Удмуртиын син шорам пуктӥсько. Татысь пӧртэм ёросъёсы концертэн вуылыса, дор палъёсам бертӥсько ке, Удмурт шаерлэсь мӧзмыны кутскисько. Ӵыжы-выжыосы но тазэ синйылтӥзы ни: мӧзмыт синъёсме адӟо но шуо - тон ӟак (копак) ведь сопалан. Анай-атае, Аделина сузэре но - со ай 11-тӥ классын дышетске - сямме ӟеч тодо ни. Удмуртиысь вуисько ке, шып-шып огнам пукылэме потэ, озьы концертъёслэсь шутэтскисько. Мама но сузэре киынызы шонто: валамон - ас пушказ выемын, пе.

Пичи дыръям шуисько вал: «Певица луо!» Котькулы тодам кылёз Вилияна Борисовна дышетӥсе: со монэ дышетӥз куараме пуктыны, сцена вылын йоно возиськыны. Школаез йылпумъяса, ас азям юан пуктӥ: ма мынам сюлэмыя? Конечно, кырӟан! Мамаеным та пумысен кенешимы, со шуиз: мылкыдыдлы тупа Удмуртиысь культурая училище. Мон отчы ик шонтӥ. Улон сюресме шонер бырйи, угось котькуд адями тыршыны кулэ сюлэмызлы, мылкыдызлы тупась удысын. Культурая училищеын дышетскон аръёсы - кыдан вакытэ. Мон соку быдэсак выйи крезьгур дуннее. Училищеысь «Зангари» ансамбле пыриськи. Концертъёсын пӧртэм интыосы вуылӥмы. Озьы мон калыкен кусып тупатыны дышетски, концертъёс радъяны опыт люкай.

Баян, крезь, флейта, балалайка но уно мукетыз - ваньмыныз ведь шудыны дышетскимы. Но ӵем дыръя валтӥсь интые потылӥз ӟеч оценка, тамында инструментъёсын шудонлэсь кулэлыксэ сокем ик ӧй адӟылы соку. Берыктыны луысал ке со вакытэз! Дышетӥсьёслэсь вань верамъёссэс пелям понысал, крезьгуро арбериосты киысьтым ӧй куясал.

Культурая училищеын дышетсконме, малпасько, йылпумъяло но азьлань вамышто: пыро Пермьысь искусствоосъя но культурая институтэ. Но малпанме быдэстыны люкетӥз... яратон. Озьы Башкирие берытски. Ужаны интыяськи Вылӥ Татышлы райцентрысь культурая юртэ. Табере 9 ар луоз ни. Клубын ӵош ужан эшъёсыным пӧртэм ужрадъёс ортчытъяськомы, гуртъёсы концертъёсын потаськомы. Но таос пӧлын, валамон, тросгес бигеръёс.

Кужымме мертасько пӧртэм фестивальёсын, конкурсъёсын. «Молодые голоса-2006» фестивальын гран-при утӥ, та нимен-кузьымен ик Альфира Камалтдиноваен «Гербер» дуэтмес пусйизы Санкт-Петербургын ортчем «На крыльях таланта» ӵошатсконын. Тэк пукон монъя ӧвӧл, ялан маке утчаськисько, аслэсьтым быгатонлыкъёсме эскерисько.

Улон интые Удмуртиын, меӵак вераса, ӧвӧл. Но концертъёс бере кытчы изьыны интыяськон пумысен шуг-секытъёс уг кылдо. Мынам сомында эшъёсы, котькудӥз бурд улаз пыртоз. Вераме потэ Пичи Пурга ёросысь Вуж Монья гуртын улӥсь Ирина Филимонова сярысь - учкисьёс сое тодо Ори-Бери нимтулын. Удмурт филармониын ортчись ужрадъёсы но пыриське, пӧртэм гуртъёсын ортчись концертъёсты но быгатыса нуэ, калыклэсь мылкыдзэ син куспын ӝутэ - возьдаськонэз уг тоды. Озьы соин ӵош концертъёсы пыриськиськом.

- Тон сярысь калык тазьы вера: мунё кадь ик чебер та Тимерханова. Зэм но, шорад учкыса, 18 аресъем нылаш но тӥни! Дӥсь быръён, йырси пуктон но сцена вылын образ кылдытон ласянь юрттӥсьёсыд вань, дыр...

- Та пумысен мынам тазьы вераме потэ: мыным котьку но удалтэ адямиосын. Творчество ласянь-а со яке сценалы дӥсь кылдытонын-а - котьку. Тани удалтӥз мыным Коля Анисимовен - кылдӥз дуэт, творческой пар. Дӥськут пумысен йырме тӥяны кутски но, кылдӥз Надя Сапожникова. Со туж ӟеч шӧдэ мылкыдме, сюлэмылы тупась дӥськут вуре. Эшъёс ке вань, ноку уд быры!

Источник:

Тимерханова А.Г. Башкырт италмас / А.Г. Тимерханова; записала Е. Никитина // Удмурт дунне. – 2014. – 14 февраля – №12 - С. 10, 15. - (Удмурт кизилос).

За предоставление материала выражаем огромную благодарность редакции газеты "Удмурт дунне"