Суворова Зоя Витальевна

From Воршуд
Revision as of 14:42, 6 February 2015 by Admin (talk | contribs) (1 версия импортирована)
(diff) ← Older revision | Latest revision (diff) | Newer revision → (diff)
Jump to navigationJump to search

Ужаны дышид ке, улонын пырпотод[edit]

Suvorova.png

«Удмурт дуннелэн» шыкысысьтыз: Зоя Витальевна Суворова

Вордӥськиз: 1959-тӥ арын 17-тӥ мартэ Ува ёросысь Косоево гуртын.

Дышетскиз: Можгалась педучилищеын, Москваысь дышетӥсьёсты дасянъя кун институтын.

Ужаз: Ижевскысь 72 номеро школаын, татысь ик педучилищеын, дышетӥсьёслэсь тодон-валанзэс будэтонъя институтын, Удмурт Республикаысь дышетон удысысь ужпумъёсъя йӧскалык институтын, Калыкез дышетонъя министерствоын.

Кизилиез: Чорыг.

Буёлэз: югыт-вож (али ӝужась турын выллем).

Сяськаез: Роза, дыдыксин («сыӵе со мусо, пичи, кызьы инкуазь сое кылдытэм?»)

Кырӟанэз: «Лулы мынам» (А. Оки).

Сиёнэз: Пельнянь, лыменыз ӵош ик… Шыдтэк улыны уг быгаты.

* * *

- Зоя Витальевна, адямилэн вань улонэз пичи дыр котыраз берга, шуо.

- Мон гуртысь потэмын. Анае скал кыскись вал, атае – бригадир. Вань улонзэс колхозын тыршизы. Семьяямы вить пинал. Мон бадӟымез. Соин ик, дыр, али но вань шуг-секытэз ас вылам басьтыны тыршисько, ас азям чурыт куронъёс пуктӥсько.

Анай-атае кытчы ке куное кошко ке, мон кузё интые кылисько. Гур эстоно, пудо сюдоно, утялсконо, сиён пӧрано, пиосты сюдоно. Сыӵе дыръёс мыным кельшо вал. Мон кузё: шыд но, ӝук но пӧзьтэмын, корка утялтэмын, нокин уг бӧрды. Уин ваньзы изё ни, койкае доры пичи тыл ӝуатӥсько, лыдӟиськыса пукисько.

Вань сузэр-вынъёсы витьёслы гинэ дышетскизы. Школаысь бертӥськом, урокъёсмес лэсьтӥськом, фермае мыныса, анаймылы юрттӥськом. Собере бертӥськом но сиськыса шудыны потӥськом на. Тямыс-дас часозь туп ӵыжаськом. Ульчаын лымы пуктэмъёс ик кылдыса уг вуо. Дас часын корка пыриськом ини. Каллен гинэ ӧсэз усьтӥсько. Котмыса пыреме понна медаз куаретэ - лушкем вырисько. Корк, корк – вазе йӧӟем гын сапеге… Нош гужем ке вуэ! Кыӵе шумпотоно вал гуждорлы! Тодам лыктэ на: 7-тӥ класс бере турнаны потӥм, бригадир шер сётӥз, ӧд ке дыше - кидэс вандоды, шуиз. Собере радэн пуктылӥз, туннэ, пе, турынэз погмалоды ни но, ярам-а, мар-а… Ужаса жадем бере кыӵе ческыт потыса ӝук, шыд сииськом, сутэр куарен парем чай юиськом.

Нуназеям бере одно ик пыласькиськом. Мӧйыос ярдурын пуко, милям лӧптылэммы, шудэммы шоры учкыса серекъяло.

Ю куасьтонын нуназе анай-атайёс ужало, уин - пиналъёс, ай собере эмезяны кошкиськом на вал. Озьы вить арзэ рос-прос колхозын ужай. Анай шуылоз вал:

- Дышетскы ужаны, дышид ке - улонын пырпотод…

- Можга педучилищеын тӥледыз дышетӥз Р. И. Данилова – тодмо но дано методист. Тӥ сярысь тодаз вайыса, со шуиз: визьмо, сётэм кылзэ быдэстӥсь, но укыр ненег, вӧсь луись. Та верамлы али оскыны но уг луы кадь…

- (Серекъя). Мӧзмон, возьдаськон сямы туж бадӟым вал. Можга педучилищеез горд дипломен йылпумъяме бере Москвае дышетскыны лэзизы. Общежитие интыязы. Комнатаямы кык эшъёс – ӟучъёс. Мурт дунне вуи кадь, тодмоосы вӧзам ӧвӧл. Со нылъёсын но малы ке ӧй эшъяськы. Документъёсме басьтыса бертӥ. Дорам ӧй, Можгала мынӥ, Римма Ивановна доры. Ачим бӧрдӥсько. Дышетӥсе шуиз: мар карод на, школаын кык арзэ ужалод но нош ик мынод… Ижевскысь школаын ужаме бере дышетскыны кышкатэк мынӥ ни. Экзаменъёсме но капчиен сётъяй.

- Кызьы бен дӥсьтӥсьтэм, возьдаськись луон сямдылэсь мозмытскиды?

- Аръёс ортчыса, ужамедлэсь емышъёссэ адӟыса, возьдаськон, дӥсьтӥсьтэм луон пумен кошке. Асьмемыз будэтӥзы – ужаны. Анае но шуылоз вал: дышетскы, аслыд дышетскиськод. Уж бордысь кужым басьтоно, отысь ик – дӥсьтонлык.

- Аслам улонэлы ачим кузё. Та кылъёс тӥледлы тупало-а кадь?

- Психологъёс шуо: адямилэн улонэз котькуд вить-сизьым ар ортчыса воштӥськыны кулэ. Та верамын уж ласянь. Мынам улонам озьыгес ик пӧрме. Котькуд вить-сизьым ар улыса, пичильтык воштӥськонъёс ортчо.

Педучилищеын ужаны кутски вал, Р. Н. Березин институтэ ӧте, отын кӧня ке ар ужаса, со монэ кафедрае поттэ, бӧрысьгес педагогикая кафедра нимаз люкиське но мон соин кивалтыны кутскисько. Кӧня ке ар ортчыса, Березин шуэ:

- Этнопедагогикая, этнопсихологияя лекциос лыдӟоно вал.

Таиз ини мукет ӧр: калыкез дышетон. 90-тӥ аръёсы со быдэс Россиын сайканы кутскиз, анай кылэз дышетонъя нимысьтыз школаос усьтӥськыны ӧдъязы. Соку ик ВЦИК (временный учебно-исследовательский коллектив) кылдӥз. Азяз сылӥсь ужпум: дышетонэз калык культура вылэ пыкиськыса радъян.

Уж борды кыским Алнаш, Пурга, Можга, Завьялово, Балезино школаосысь дышетӥсьёсты. Соос туж юрттӥзы краеведениея тодон-валан люканы, дышетскон книгаос гожтыны. Озьы, кылсярысь, кылдӥзы дышетскон пособиос: «Писатели Малопургинского района», «География Малопургинского района».

Кӧня ке ар ортче но, нош ик шуо: институт кылдытоно. Инъетмы вал ни бере, монэ калыкез дышетонъя азьвыл министр А. В. Ерёменко ӧтиз. Соку мон осконо ныпъетэз нуыны дась ни вал.

- Озьы кылдӥз Удмурт Республикаысь дышетон удысысь ужпумъёсъя национальной институт. Кыӵе ужпумъёс бордын со ужа?

- Институт 1997-тӥ арын 5-тӥ январе кылдӥз. Ужаськомы удмурт школаослы дышетскон книгаос дасян бордын. Азьвыл учебникъёсты огшоры дышетӥсьёс дасяло ке вал, али котькуд книга кылдытон научной эскеронъёс вылэ пыкъяське.

Мукетыз уж: республикаысьтымы пиналъёслэсь тодон-валанзэс эскерон. Со понна школаосын пӧртэм ужрадъёс ортчытъясько. Кылсярысь, удмурт но ӟуч кылын гожъяськонын ӵемгес пумиськылӥсь янгышъёсты шараян. Валаны тыршиськом: малы озьы луиз? Кулэ луись ужрадъёс кутӥськом, эскеронъёсты лыдэ басьтыса дышетскон книгаос дасяськом.

Дорамы тодосчиос, методистъёс тыршо. Котькудӥз соос пӧлысь 10-15 ар ӵоже ачиз но школаын ужамын, бӧрысьгес наукае выжемын.

Институтын лэсьтэм эскеронъёсты пичиен-пичиен улонэ пыӵатыны тыршиськом. Нырысь ик чакласьком кӧня ке интыосын, кылсярысь, Варзи-Ятчиын, Шарканын, Шабердыысь но Миндеровоысь нылпи садъёсын.

- Институтады ваньзы сямен ужасьёсты - кышномуртъёс. Соосын кивалтыны секыт ӧвӧл-а?

- Милям туж шунытэсь кусыпъёмы. Малы? Нырысь ик: коллективмы бадӟым ӧвӧл, 18 адями.

Институтмы выль. Ужасьёсты но, быгатонлыксэс чакласа, ачим бырйи. Кин ке бӧрсьы мурт коллективе вуысал ке, шуг-секытъёс кылдысалзы, дыр. Но, мукет ласянь, мон уг шуиськы, ми чылкак ваче вуылытэк улӥськомы шуыса. Ваньмы малпаськись адямиос ук. Споръяськонъёсысь зэмлык потэ. Бен, сямыя мон ачим но керетыны уг яратӥськы. Вераськонэз берлолы кельтыны быгато, мае ке сое «ньыло», пушкам вато.

Нош пиосмуртъёсмы чылкак ӧвӧл шуыны уг луы, одӥгез вань ик – Алексей Николаевич Петров – история удысъя ужа. Трос вераськыны уг яраты, но ымзэ усьтэ ке – ӵапак интыяз. Кышноос укыр кема вераськыны ярато уга.

- Зоя Витальевна, тросэз тӥледыз психология удысъя кема аръёс ӵоже ужамдыя тодо. Кин бен со – психолог? Сокем-а со туала улонын кулэ?

- Та юанлы вакчияк гинэ уд вера. Вань адямиос, кудъёсыз дышетскемзыя психолог луо, нош вань сыӵеосыз, кинлы быгатонлык инкуазен кузьмамын. Соиз но таиз но ӟеч психолог. Инкуазен сётэм быгатонлыко мурт мукет адямиез туж ӟеч шӧдыны но валаны быгатэ, сыӵе адями капчиенгес вӧсь луыны но шеде. Соин ик со аслэсьтыз кусыпъёссэ мукет адямиосын мултэс вӧсь каронтэм вылысь радъя, эсэпсэ шӧдэ.

Психологъёс – теоретикъёс дышетскыса тодон-валан басьто. Люкам визьзы мукет адямиез валаны юрттэ. Тужгес но устоез психолог – адями, кудӥз инкуазен сётэм быгатонлыксэ дышетскыса муромытэ на.

Психолог-теоретик лекциос лыдӟе, психолог-практик туж кулэ школаосы. Пиналъёсын нимысьтыз тренингъёс ортчытъяно.

- Нош малы психология тодос берло дыре сыӵе юн азинскыны ӧдъяз?

- Адями кусыпъёс азьвыл лякытэсьгес вал. Али ог-огеныд одӥг кыл шедьтыны секыт. Воштӥсько дунлыкъёс. Валтӥсь интые потэ коньдон, узырлык. Политикаын но озьы ик.

Адями адямиен ӵош улыны кулэ. Тужгес но Россиын, тужгес но Удмуртиын. Психология трос могӟетъёсты палэнтыны юрттэ.

- Но, асьмеос тодӥськом: психологиез валамез кырсь ужъёсты быдэясъянэ но куто. Тужгес но политикаын…

- Со - калыкен шудон – манипуляция. Зэмос адямилыко психология уродзэ уз лэсьты, адямиез уз зӥбы, юрттыны тыршоз.

- Кивалтӥсь, психолог, нылкышно, анай…Ку ваньзэ лэсьтыса вуиськоды?

- Пиналъёсы ӟечесь, кузпалы валась. Соос – мынам осконэ но, кужым сётӥсьёсы но.

- Нылкышно кивалтӥсьёслэн картъёссы «зарниесь» шуо. Кызьы вуоно кузпалэныды тодматскиды?

- Уд но оске, но ми соин одӥг классын дышетским. Со куиньёслы, ньыльёслы. Мон – витьёслы. Шораз рос-прос ӧй ик учкылы. Нош нырысьсэ адӟи но синмаськи армиысь бертэм бераз.

Шулдыр гужем куазь. Куинь кузя солдат дӥсен пинал пиос Косой гуртэ мыно. Ми но куинь кузя вамышъяськом. Ваче пумиськимы. Тӥни соку кыӵе чебер луэм ук шуыса шораз учки. Келяз но, мар но…

Дышетскемезъя картэ – инженер-строитель. Сяммыя милям тросэз тупа. Мон понна со аслам, дуно адямие.

- Зоя Витальевна, шуысалзы ке: та улонысь куштэ ваньзэ, басьтэ тужгес но дунозэ гинэ. Мае бордады карысалды?

- Семьяме. Тужгес но дуно – пиналъёсы (пие университетын дышетске, нылы – школаын), уката ик пичиез.

- Кыӵе адями сямъёсты тужгес но дунъяськоды?

- Эсэпез валан, ас уждэ умой тодэмез но лэсьтыны быгатэмез, зэмос интеллигент луонэз.

- Удмурт музъем выламы улон капчи ик ӧвӧл. Ялан ӟечлы оскиськом ке но, аръёс ортчо ук. Таӵе секыт вакытэ мар дэмласалды удмурт калыкмылы?

- Ӵемысь шуо удмуртъёс дӥсьтӥсьтэмесь, кивалтыны но уг быгато, чебер вераны но гожтыны но уг пишмыто. Юри талы пумит быгатӥсь, дӥсьтӥсь но рос-прос кивалтӥсь но луэм потэ.

Мукет ласянь, ми шоры учко озьы, кызьы асьмеос асьмеды дунъяськом. Мон ялан шуисько: ми быгатӥськом! Уродэсь но лябесь но ӧвӧл. Вылтусмы, лулмы трослы чебергес. Лэсьтэм ужедлэсь ӟечлыксэ адӟиськод ке, возьдаськон но дӥсьтӥсьтэм луон но пумен ышо.

Милям выжымы сыӵе ни шуыса верамъёслы осконо ӧвӧл. Генъёсамы луысал ке – ноку ӧз воштӥськысал ни. Нош со озьы ӧвӧл ук. Ужамъя уж пӧрме ке – дӥсьтӥсь луоно. Соин ик, асьтэос асьтэдыз дунъялэ, гажалэ, яратэ.


Источник:

Суворова З. В. Ужаны дышид ке, улонын пырпотод / З. В. Суворова ; записала Елена Миннигараева // Удмурт дунне. - 2001. - 5 окт. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"