Стрелков Николай Сергеевич

From Воршуд
Revision as of 14:41, 6 February 2015 by Admin (talk | contribs) (1 версия импортирована)
(diff) ← Older revision | Latest revision (diff) | Newer revision → (diff)
Jump to navigationJump to search

Профессор Стрелков тодэ адями шудлэсь рецептсэ[edit]

Н. С. Стрелков


Николай Сергеевич Стрелков - медицина наукаосъя доктор, профессор, Ижысь Медициная академилэн ректорез. Республикаысьтымы одӥгеныз дано вузэн 1993-тӥ арысен кивалтэ.

Кин со ректор - кивалтӥсь яке дышетӥсь, тодосчи яке эмъясь? Кудӥз удыс Николай Стрелков понна дуногес луэ? Кыӵе азинсконъёсын вамыштӥз 21-тӥ дауре Ижысь Медициная академия? Кызьы дунъя соосты ректор?

- Николай Сергеевич, вань дауръёсы адями валэктон утчаз, ма со сыӵе шуд? Тӥледлы, воргоронлы, таӵе юан, оло, огшорыгес потоз?

- Шуд сярысь юанэз огшоры ӧй шуысал. Со философиен но герӟаськемын ук. Кызьы мон валасько, адями шудо, солэн ужез но, семья улонэз но, байлыкез но тупало ке мылкыдызлы, малпанъёсызлы, куронъёсызлы. Шудо адями сюлмо ужа, утчаське, азинскыны тырше.

- Арлыд воштӥськемъя, адямилэн мылкыдыз но, малпанъёсыз но, куронъёсыз но мукетэсьгес луо ук.

- Бен. Асьмеос пӧртэм вакытъёсты ортчиськом. Шуом, школаез йылпумъяськом, озьы та дыр понна бадӟым ужпумез быдэстӥськом - киямы аттестат. Шумпотӥськом солы. Нош лулын-сюлмын буш кыле кадь. Ма каром азьланьын? Азямы выль ужпум пуктӥськом - институт. Нош ик сое быдэстон борды кутскиськом, ужаны дышетскиськом, специальность басьтӥськом. Озьы тӥни, арысь аре вакытлы быдэ выль тодон-валан люкаса будӥськом но кыдаськом.

Тани аслэсьтым улон сюресме чакласько ке, мон вузлэн кивалтӥсезлы одӥг нуналскын ӧй пӧрмы. Со понна трос пӧсяно луиз. Институтэн кивалтонлэсь вань тубатъёссэ ортчи. Вал деканлэн воштӥсез, декан, дышетон ужъя проректор.

1993-тӥ арын ректоре бырйизы. Мон понна со тодмотэм удыс вал. Та ужлы нокин но нокытын но ӧз дышеты ук. Нош вылӥ дышетон заведениен кивалтыны туж секыт. Бадӟым, кужмо коллектив, визьмо, трос дышетскем, асьсэды дунъяны быгатӥсь адямиос. Соосын котькудӥныз одӥг кыл шедьтоно. Выль кивалтӥсьлы тае валан понна гинэ но дыр кулэ вал.

Собере, асьтэос тодӥськоды, кыӵе югдур кылдӥз кунамы 90-тӥ аръёсы. Коньдон уждунлы гинэ но ӧз тырмылы.

- Куашканлэсь утиськон вакыт, шуыны луоз, дыр, со аръёс сярысь.

- Тазьы верам мыным уггес кельшы. Быронлэсь кышкаса улон, мон сямен, - со ог интыын лёгаськон. Со аръёсы но утчаськыны кулэ вал азинскон понна. Академимы сярысь верано ке, берлось сизьым ар ӵоже ми азьпала шӧдскымон вырӟим. Чаклалэ ай, азьвылгес араз наукаосъя доктор 1-3 мурт луэ ке вал, берло аръёсы - 6-9 мурт; наукаосъя кандидатъёс сярысь верано ке, кемалась ик ӧвӧл диссертациез утён институтмы понна аспӧртэм рекорд выллем вал, 2000-тӥ арын 40 мурт таӵе дунъет басьтӥз. 1993-тӥ арын институтамы 3 вуж компьютер ужаз, та вакытэ - 200-лэсь уно. Со аръёсы ӧм ик тодылэ на, ма со сыӵе факс, электрон почта, Интернет. Табере таӵе техникалы чик ум паймиське. Нош сое басьтон понна кунлэн кисыысьтыз одӥг копейка но ӧм кыске. Тани кылем арез учконо ке, коньдонмылэн 32,4 процентэз гинэ кун бюджетысь вуэмын.

- Кыӵеесь амалъёсын бен коньдон поттыны быгатӥськоды?

- Пӧртэм амалъёс утчано луэ. Шуом, мултэс юртъеръёсмес арендае сётӥськом, ог люкетсэ студентъёсты, вузэ одно ик пырыны мылкыд карисьёсты, дунэн дышетӥськом, дипломен специалистъёслы выль тодон-валан люканы юрттӥськом, та ужен мукет улосъёсы но потаськом. Уг ватӥськы, преподавательёсмылы секыт йӧтэ. Ватсаса люкам коньдонмес кир-пазь ум кариське, уждунлы ум быдтӥське. Со мынэ дышетон удысэз кужмоятонэ, наукаез азинтонэ, юртъёсмес но техникамес юнматонэ.

- Николай Сергеевич, вералэ вал, туала студент - кыӵе со?

- Азьвылъёсыныз ӵошатыса, чылкак мукет. Утчаськись, тодон-валан сьӧры уйиськись. Данакез студентъёс дасьсэ возьмаса уг пуко, ма соослы академия сётоз, асьсэос тодон-валан люканы тыршо, шуом, кунсьӧр кылъёсты дышетон ласянь ик.

Собере, милям куронъёсмы туж чурытэсь, шуиськом, зэмос специалист луэмед потэ ке - дышетскы, врач луыса но ялан визь люкано луод. Угось наука нуналысь нуналэ азьлань кошке. Врач но нуналаз одӥг книга бам коть лыдӟыны кулэ. Сотэк зэмос специалистозь уг буды. Нош кинэ дышетскыны анай-атаез кыскыса ваё, солэсь ӟеч ужась уз пӧрмы. Сыӵе муртъёсты ачиз улон сӥсъя.

- Тӥледды анай-атайды, китӥды кутыса, институтэ ӧз вуттэ, дыр?

- Мон ачим лыктӥ. Зура школаын 6-тӥ-7-тӥ классъёсын дышетскыкум, врач луон мылкыды ӝутскиз. Анае акушерка вал, нуны ваён юртын ужаз. Улӥмы но больницаен артэ. Мон, куинь нылпиос пӧлысь бадӟымез, ялан анай сьӧры ветлӥсько, учкисько-чакласько вал. Врачъёслы синмаськылӥ. Соос мыным макем чебересь, йӧноесь потылӥзы. Зура больницаын со вакытэ туж усто коллектив ужаз. Дас классэз йылпумъяме бере тунаса-мараса ӧй ни улы, институтэ пыри.

- Студент аръёс - шудо вакыт. Озьы-а?

- Со аръёс весяклы вунонтэм кылизы. Куать ар общежитиын улӥ. Анаен атай бадӟым уждун уг басьто вал. Озьы кыкетӥ курсысен ужаны кутски. Ма, со вакытэ тросэз дышетскись егитъёс ужало вал. Интыяськи соку лэсьтӥськись автозаводэ стороже. Ӝыт 6 часысен ӵукна 7 часозь возьмаськиськом вал. Уждун - 90 манет, макем бадӟым уксё потылӥз соку. Куинетӥ курс бере практикамы луыны кулэ вал, сестринской нимаське. Нырысетӥ республиканской больницаысь висисьёсты кутон люкетэн, приёмной покоен кивалтэ вал хирург, ас вакытаз Зураын ужам мурт Иван Степанович Кузнецов. Со ик ӵектӥз, ойдо, пе, дорамы практикадэ ортчыты, валтӥсь медсестрамы толэзьлы шутэтскыны кошкиз. Мон соглаш луи. Толэзьзэ ужай но - ӧй кошкы ни, пырак, институтэз йылпумъятозь, отын фельдшер вал. Ӵапак соку трос выльзэ тодӥ, тросэзлы дышетски. Операциос но ачим лэсьтӥсько вал ини. Тодмо хирургъёсы шуылӥзы, тон, пе, дась хирург ини, мын ай, дышетскондэ йылпумъяса Киясае, отчы хирург кулэ. Лӧптӥ вал. Нош распределение дыръя куинетӥ республиканской больницае (али со ӧвӧл ни) ыстӥзы, отын нылпи хирургияя люкет кылдытӥллям. Мон со сярысь уг но тодӥськы вал. Интернатураме та удысъя ортчоно луи.

Та аръёсы ик институтын кылдӥз педиатрияя (нылпи висёнъёсъя) кафедра, собере - факультет. Монэ отчы ассистентэ басьтӥзы.

- Озьыен, эмъян удысэн люкиськоно луиды?

- Ӧй, эмъян удысэн ӧй люкиськы. Али но котькуд нуналме 8 часысен ӵукна нылпи хирургияя клиникаын кутскисько. Отын мон - огшоры врач, операциос лэсьтӥсько, висисьёсты чакласько, дежурствоос нуисько. Висисьёс азьын ми ваньмы огкадесь - профессоръёс но, огшоры эмъясьёс но. Нош мон вылӥ категориен врач. Бен, академилэн ректорез луисько бере, кыӵе ке муг шедьтыса, эмъян ужлэсь мозмытскыны быгатысал. Но астэ пушласянь кырмыны кулэ, дыр. Кызьы мон мукет преподавательёсын кивалтом, ачим эмъян ужен ӧй выры ке, кызьы соослэн синмазы учком?

- Нош ваньмызлы дыр кызьы шедьтӥськоды?

- Яратоно ужедлы дыр шедьтыны шуг шат?! Котьма ке но лул-сюлэмыя мон эмъясь, хирург. Та удысэн ноку но уг люкиськы.

Таӵе муген ик наукаосъя кандидат но бер луи, 1987-тӥ арын гинэ. Тодам ваисько 1974-тӥ арез, нырысьсэ лыктӥ нылпи хирургияя отделение. Туж уно покчиос остеомиелитэн висё вал. Али но син азям пуктӥсько: мусоесь, чебересь пиналъёс аръёсын койка вылын кыллё, дас мурт пӧлысь кыкез кулэ, котькудӥз куинетӥез весяклы инвалид кыле.

Остеомиелит - туж вашкала висён, Гиппократ дырысен тодмо маке. Нош эмъян амалъёс шедьтэмын ӧй вал. Бен, огвакытэ, антибиотик кылдытэм бере, кӧня ке азинсконъёс вал ик. Собере нош ик кышкыт эзель вормыны кутскиз.

Висёнэз кортнан понна странаямы но, быдэс дуннеын но котькинлэсь трос лэсьтӥз асьмелэн дано удмурт хирургмы Семен Иванович Ворончихин. Мон сое туж умо тодӥсько вал. Жаляса верано, Семен Иванович улонысь вазь кошкиз. Солэсь ужзэ азьланьтон борды басьтӥськи. Озьы остеомиелитэз шараянъя но эмъянъя амалъёс кылдытӥ.

1987-тӥ арын нимысьтыз инструмент лэсьтӥ. Сое уже кутыса, огшоры больницаын гинэ но висёнэз шараяны луэ. Та вакытэ шаерамы гинэ ӧвӧл, азьвыл СССР-лэн быдэс улосвылаз но эмъян амалъёсме уже куто ни. Берло дас вить ар ӵоже республикаямы остеомиелитлэсь одӥг пинал но ӧз кулы. Бадӟым вормон ук со. Та ласянь асьмеос азьпалтӥськом данаксэ улосъёсты но Музъем вылысь троссэ кунъёсты.

Теория ласянь верано ке, ми дуннеын котькинлэсь азьло возьматыны быгатӥм, кызьы кылдэ но аля остеомиелит, лэсьтӥм туспуктэмъёс. Дано хирург Илизаров соосты кунгож сьӧрын эмъясьёслэн ужрадазы возьматэм. Кытын лэсьтэмын таӵе суредъёс? - паймиллям люкаськемъёс. Россиын, шуэм академик. Остеомиелитэз эмъянлы сӥземын доктор диссертацие но. Та удысэз азинтон бордын али но ужасько. Ужпум туж паськыт но лэчыт бере, соя кандидат но доктор диссертациос дасяськом. Нош ректорлэсь ныпъетсэ пельпум вылам понӥз улон.

- Кема-а бен та пукон вылын пукыны малпаськоды?

- Кызьы коллектив шуоз. Академиямы вить арлы быдэ быръён ортче. Монэ кыкетӥзэ бырйизы ни. Шонерак верасько, та пукон борды уг кырмиськиськы. Али кадь уждунэн мултэс сюлмаськонъёстэк гань-гань уж шедьтыны быгатысал, дыр. Но, коллектив оскиз бере, ужано.

Тодам ваисько нырысетӥ быръёнэз. 1992-тӥ ар институтамы огыр-бугыр ортчиз. Со вакытэ йӧназ ужась ик ӧй вал, кожалод. Керетон, ог-огдэ йыръён, керӟегъяськон. Ректормы ужысьтыз кошконо луиз. Собере быръён ортчиз. Кыкез нюръяськисьёс, профессоръёс Данилов но Вахрушев, мыным дурбасьтэмзэс веразы но кандидатураоссэс куштӥзы. Быръёнын ворми. Но выль ректорез Россиысь Тазалыкез утёнъя министерствоын юнматыны кулэ на вал.

Документъёсты кутыса, Москвае мынӥ. Министерствоын соку ик ӧз кутэ, нуналзэ возьмано луиз на. Собере гинэ монэн пумиськиз министр, генерал-полковник Нечаев (азьвылгес со армиысь санитарияя управлениен кивалтэм). Кагазъёсын тодматскемез бере, папкаме военной сямыныз, воксё сэрпалтӥз. Кытысь-марысь, пе, 41 аресъем ректорез адӟылэмды вань? Зэмзэ верано ке, со дыре ректоръёсмылэн шор арлыдзы 68 арес вал. Озьы тӥни Иже берытсконо луи.

Нечаев сьӧрам ик комиссизэ ыстэм, институтамы ортчем быръёнъёсты эскерон понна. Москваысь эшъёс ваньзэ чаклазы, данак муртэн кенешизы. Кошкемзы бере ӵуказеяз ик ректоре юнматон сярысь приказ поттэмын вал. Бен, Нечаев министрез вунэтыны уг луы ни. Сямыз укыр секыт вал, мынэсьтым гинэ вирме со ӧз сюпсьы. Тани, шуом, ректоръёс кенеше люкасько. Ужрад мынэмъя кин ке Нечаевлы пумит вераны дӥсьтӥз ке, тод ини, ӵуказеяз ик сое куштозы. Мар шуод, министръёс вошъясько, нош ми кылиськом. Тодӥськоды-а, ректорын ужатозям, мон лыдзэ ыштӥ ни, кӧня мурт Россиысь тазалыкез утисьёсын кивалтӥз. Рекорд но вань: одӥгез министр 100 нунал ужаз. 101-тӥяз мозмытӥзы.

- Тодады вае ай, ректор Стрелков 1993-тӥ арын но ректор Стрелков туннэ - соос пӧртэм адямиос-а?

- Чылкак мукетэсь. Кин со 41 аресъем ректор? Уката ик пурысьтам йырсиё йӧно ректоръёс вӧзын? Пияш но тӥни. Унозэ уг тодӥськы, уг валаськы, уг быгатӥськы вал. Трос ужано луиз академимылэсь данзэ ӝутон понна. Керетонъёсты выжытэм быдтӥм. Соос угось ужлы люкето. Собере урод иворъёс палэнэ ӝог вӧлмо, мукет интыосын но коллектив сярысь начар малпаны кутско. Ваньмыз со пумтэм ыштон гинэ вае. Табере коллективмы зэмос ужен выре.

- Нош Москваоскваысь Нечаев выллем эшъёс уг пачкато ни-а?

- Уг. Шумпотӥсько, академимес дунъяны кутскизы. Тани кӧня ке нунал талэсь азьло Минздравысь жингыртӥзы, тӥ, пе, Россиысь Медициная университетлэсь ужзэ эскеронъя комиссилы тӧрое юнматэмын. Ноку таӵеез ӧй вал на, кыӵе ке кыдёкысь комиссия Москваысь валтӥсь вузэз мед эскероз шуыса. Бадӟым дан ук со ми понна. Табере профессоръёсмылэсь команда кылдытоно. Кык арня ӵоже Москваын ужалом, университетэз котыр ласянь пыр-поч эскером, ужезлы дунъет сётом. Со ик возьматоз ини, ортчиз-а дышетон заведение аттестациез яке ӧз-а, улоз-а со азьланьын яке уз-а. Шонерзэ верано ке, та уж ми понна выль ӧвӧл. Азьвылгес эскерылӥм ни Екатеринбургысь, Красноярскысь, Кировысь вузъёсты.

- Нош кунгож сьӧры ӵем-а поталляськоды?

- Бен, ветлоно луэ араз 1-2 пол командировкаосы яке кин ке ӧтемъя, шуом, ужея Венгрие вуылӥ, стажировкаын США-ын вал. Академимы кунсьӧрын ужзэ пумен паськытгес но паськытгес ӧръя. Тани сӥзьыл ӧтё Германие Кёльн университетэн огкыл гожтыны. Сыӵе огкылъёс юнматӥм ни Сириысь, Венгриысь, Финляндиысь дышетон учреждениосын.

- Та вӧзы ватсаны луоз на, дыр, мукет кунъёсысь студентъёсты дышетэмдэс но.

- Шонер. Кунсьӧрысь егитъёсты дышетыса, ми коньдон поттӥськом. Мукетсэ но вератэк кельтыны уг луы: дуннелэн уногес сэрегъёсаз тодыны кутско Удмуртимы, Ижмы, академимы сярысь. Куддыръя кылоно луэ, Россиын басьтэм диплом, пе, уг дунъяськы. Пӧяськон со. Дорамы дасям специалистъёсты эшшо кыӵе дунъяло! Доразы бертыса, соос ӵошатсконо луо Англиын, Германиын, США-ын, Франциын дышетскем ёзъёсынызы. Мар шуоды, лябесь уг адӟисько номыр ласянь. Тани Шри-Ланкаысь нырысьёсыз 8 студентъёсмы ньыль ар талэсь азьло дышетсконзэс йылпумъязы. Одӥгез странаысьтызы тазалыкез утёнъя министрлэн воштӥсез луэм ни.

Мукетсэ ӟеч иворез но алигес тодӥ. Африкаысь Западной Сахараысь нылашлы куинь ар талэсь азьло диплом сётӥм. Сое озьы ик тазалыкез утёнъя министрлы воштӥсе юнматӥллям. Мон юри картаез учки. Чылкак пайми, макем бадӟым кун вылэм со - Западной Сахара.

- Кунгож сьӧртӥ ветлыса, атай музъеммес яратон мылкыдды уг сӥя-а?

- Мукет странаосысь студентъёсмы ӵемысь шуо, тӥ, пе, Николай Сергеевич, ӟеч специалист, мукет интыын кемалась узырмысалды ни, юало, малы, пе, Россиысь уд кошкиське. Пумитазы юанэн ик вазиськисько: нош тӥ Россие кыльысалды-а? Ум, шуо. Озьы тӥни, асьмеос мукетэсь, палэнын котькыӵе рай улон мед сӥзёзы, ум дыше.

- Финн-угоръёслэн берлояз конгрессазы тӥледды Консультативной кенеше бырйизы.

- Бен. Конгрессын мон экологияя но тазалыкез утёнъя секцилэн ужаз пыриськи. Отын удмурт калыклэн тазалыкезлы сӥзем доклад лэсьтӥ. Ми эскерим калыкмылэсь тазалыксэ, 21-тӥ даурлэн пумысеныз кутскыса. Мае бен адӟим? Котьма мед шуозы, но Совето власть аръёсы удмуртъёслэн тазалыксы шӧдскымон юнмам. Эскеронъёсмы сое умой возьматӥзы. Докладам озьы ик пусйи, академиямы финн-угор выжыослэсь тазалыксэс эскеронъя лаборатория ужа шуыса. Озьы секцимылэн резолюцияз пыртэмын вал лабораторимес НИИ-лы пӧрмытон сярысь нимысьтыз люкет. Та малпанэз одно ик улонэ пыӵатоно вылэм, угось Россиын финн-угор выжыослэн люкрак улон интыосазы Удмуртиын гинэ медициная вылӥ заведение вань. Матысь дыре чакласьком экологилы но тазалыкез утёнлы сӥзем конференция ортчытыны. Интызэ быръём, дыр, Консультативной кенешлэн вуоно пумиськоназ.

- Финн-угор огазеяськонэ мур-мур пыриськемды уг-а возьматы политикае мыныны мылкыддэс?

- Зэмзэ верано ке, одӥг зэмос кивалтӥсь но политикалэсь палэнскыны уг быгаты. Нош мон та удысэз ӟеч тодӥсько. 90-тӥ аръёсы Вылӥ Кенешлэн депутатэз вал ук. Соку 200 депутат пӧлысь 20-ез эмъясьёс вал. Ми ваньмаз ик комиссиосын ужамы. Туннэ чакласькод но валаськод, туж умой, со аръёсы шаерысьтымы тазалыкез утён удыслэсь радлыксэ утьыны быгатӥм, медицина страхованиея фонд усьтӥм шуыса. Со секыт вакытэ но номыре но ӧм куашкатэ, выльзэ кылдытыны тыршим.

Бен, политикае пырон сярысь малпаськылӥсько. Адӟисько: туала быръем муртъёсмы выро кулэтэм ужъёсын, ялан палэнэ кылё калыклэсь тазалыксэ утёнэн герӟаськем ужпумъёс.

- Николай Сергеевич, эмъясьёслэсь Стрелковъёслэсь династизэс азинтӥсьёс вань-а?

- Вань. Нылы йылпумъя ни син висёнъёсъя клинической ординатураез. Бадӟымез пие дышетске Техникая университетын. Пичиез пиелы 6 арес гинэ ай, нош шуэ ни, папае сямен ик, пе, одно врач луо.

- Кенешонмес йылсаса вералэ вал: тӥ шудо-а адями?

- Та вакытэ мон шудо, угось азьвыл лэсьтэм вамышъёсы понна возьыт ӧвӧл, коллективен одӥг кыл шедьтӥсько, ужме яратӥсько.

Источник:

Стрелков Н. С. Профессор Стрелков тодэ адями шудлэсь рецептсэ / Н. С. Стрелков ; записала Юлия Александрова // Удмурт дунне. - 2001. - 26 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"