Стрелков Алексей Владимирович

From Воршуд
Revision as of 14:42, 6 February 2015 by Admin (talk | contribs) (1 версия импортирована)
(diff) ← Older revision | Latest revision (diff) | Newer revision → (diff)
Jump to navigationJump to search

Калля выжыысь министр[edit]

Стрелков А.В.

Алексей Владимирович Стрелков – гурт удысъя но сиён-юонъя министр. Пусъемын Удмуртиысь Кун Кенешлэн но Правительстволэн Данъян грамотаосынызы, 2006-тӥ арын гурт удысын лыдъян-чотанэз радъяны юрттэм понна медален.

- Туж но туж тракторист луэме потэ вал, нош луи экономист, – шуэ ачиз сярысь Алексей Владимирович. – Вордски мон 1972-тӥ арын Шаркан ёросысь Баки гуртын, вашкала калля выжыысь луисько. Но Бакиын кема ӧй улы, пичи дыръям ик семьямы выжиз Шаркан черкогуртэ. Отысь «Идеал» колхозын мама скал кыскись вал, папа валъёсты сюдӥз. Ми, пиналъёс, куинь кузя. Сузэръёсы Ирина но Вера. Огез дышетӥсьын ужа, мукетыз -медсестра. Пичи дыръямы эшъёсыным йыртэмаськомы но, урокъёсысь но пегаськомы вал. Шудон понна дышетскон но вунылӥз. Дышетски котькыӵе, но аттестатам «ньыльёс» но «витьёс» гинэ сюризы.

- Нош экономист луон сярысь малпан кытысь вордскиз?

- Котьку вожъяськыса учкылӥ механизаторъёс, шофёръёс шоры. Но школаез быдтон азям йыре пыӵаз: дышетсконэз, пӧй, азьланьтоно, гурт удысъя институтэ пыроно. Эшъёс пӧлысь кин ке мынӥз агрономе, кин ке зоотехнике, нош мон экономистэ. Малызэ уг валаськы, шӧдон-а, мар-а сипыртӥз. Институтын отличник ноку ӧй вал, но колхоз ыстӥз бере, ватсам стипендия басьтылӥ. Огшоры стипендия 40 манет ке вал, мынам 60 луылӥз. Со вакытлы ӟеч уксё вал со. Соин ик умой дышетскыны турттӥ. «Куинь» басьтыны шедьтӥсько ке, кыкетӥзэ экзамен сётӥсько ни. Куд-огез «яралоз ни» шуысалзы, нош кин вала, уксёен умойгес шуыса, со сыӵе луонлыкез уз палэнты.

- Дышетскемды бӧрсьы кытчы шедиды?

- Мон «Идеал» колхозлэн стипендиатэз луыса дышетски бере, отчы ик берытскыны кулэ вал. Но вуи Пичи Пургала. Озьы луиз: студент дыръям ик кышнояськи. Пичи Пургае вуыса, нырысь интыяськи Удмуртавтодорлэн участоказ. Отын 4 ар экономист луыса ужай. Нош 1998-тӥ арын пуктӥзы Пичи Пурга ёрос администрациысь коньдон ужпумъёсъя ёзэн кивалтыны. Бӧрысь со ёз пыриз шаерысьтымы Коньдон ужпумъёсъя министерствое. Озьы нош ик мукет ведомствое шеди, шуыны луоз. Отын ужай 8 ар. Собере дэмлазы гурт хозяйствоя но сиён-юонъя министрлы воштӥсе кариськыны.

- Сыӵе бадӟым министерствое ёросысь лыктыса, нырысетӥ вамышъёсты секытэн сётскизы, дыр?

- Валамон ни, куронъёс туж бадӟымесь, ваньмыз коньдон ужпумъёсын герӟаськемын. Нош мон ӵапак министрлэн со юанъёсъя воштӥсез. Кышкай нырысь, быгато-а собыдӟа ужын шуыса. Коллектив умой татын, юалляськиськод – ваньмыз юртто. Со понна бадӟым тау соослы. Туж капчи вал ужаны Александр Георгиевич Коробейников министр луэм бере. Со гурт хозяйствоен но кивалтэмын, ёросын но кивалтӥсьын ужамын. Озьы ӧраз пыри, шуыны луоз.

- Нош малы Удмурт кун университетэз йылпумъяно кариськиды на?

- Улон кыӵе ке но суро-пожо кошкиз. Котькытын маке но воштӥське, выльдӥсько законъёс. Валай: мукет тодон-валанъёс но кулэ. Озьы юристлэсь специальностьсэ басьтон понна университетэз заочно амалэн йылпумъяй. Али юрист луытэк экономикаын туж секыт ужаны. Со дышетскеме юрттэ мыным.

- Министре пуктон сярысь ивор тӥледлы малпамтэ шорысь-а луиз?

- Сокем ик ӧз. Александр Коробейниковез Правительстволэн Тӧроезлы воштӥсе юнматэмзы бере мон ӝыны ар ӵоже министрлэсь ужзэ быдэсъяй. Ар талэсь азьло Россиысь гурт хозяйствоя министр Елена Скрынник Удмуртие вуылыку, Президент Александр Волков юалляськиз, тупасько-а та интые шуыса. Соку дэмлазы министр кариськыны. Мон уг тодӥськы, вал, дыр, мукет но кандидатъёс. Но министр луи мон.

- Тани ар ужаськоды ни. Тӥ сюриды пӧртэм тунсыко проектъёсты улонэ пыӵатон вакытэ: етӥн, чорыг, курка, кеч будэтон. Огласянь со умой но, дыр, но сюлмаськонъёс но трос люкасько. Соос ваньзы бадӟым коньдонэн герӟаськемын ук.

- Удмуртия понна нырысь интыын йӧл поттон. Но тӥ шонер вераськоды, вань ай мукет тунсыко удысъёс но. Тани етӥн будэтон ик. Асьме республика та удысъя Россиын котьку азьветлӥсьёс пӧлын вал. Али но озьы ик, нош туэ ар понна эшшо но шумпотоно – етӥн удалтӥз асьмелэн. Та вунэтыны кутскем удыс борды басьтӥськыны ӧдъязы мукет улосъёс но. Огдыре соос 10-лэсь но ичи кыльылӥзы, нош али 15 ни. Куд-огез та культураен рос-прос ужаны медо. Соин асьмелы ыштоно ӧвӧл данмес.

Москваен огкыл шедьтыса, Эгра ёросын усьтӥськемын «Удмуртский лён» предприятие. Отын пуктэмын Россиысь учёнойёсын кылдытэм выль оборудование. Со вакчи етӥн куролэсь котонин поттоз. Котонин хлопокез воштэ но кутӥське ожгар тӥрлык дасян промышленностьын. Нош хлопок Россиын али уг будэто, сое басьто Шор Азиысь. Соин ик етӥн будэтонэз али тросэз тодазы вайыны кутскизы.

Чорыг сярысь верано ке, Удмуртия та дырлы сое араз 900 тонна поттэ. Со пӧлысь данакез – тыметъёсын будӥсь карп. Нош республикаысь калыклэн кулэяськонэз та сиёнлы 22,5 сюрс тонна. Озьыен, удысэз паськытатоно.

Али улонэ пыӵа туж бадӟым проект: Вотка ёросын Кам шурын «Аквафонд» огазеяськон будэтыны медэ форель, стерлядь но мукет дуно чорыгъёс. Та проектэз быдэсак вуттыны чакламын 7 ар ӵоже, инвестициослэн лыдзы 3 миллиард манет котырын. Озьы шаерамы 1 сюрс 200 тонналы тросгес чорыг поттэммын луоз. Алилэсь 2 поллы тросгес.

Кемалась ӧвӧл Вотка ёросысь «Пихтовка» хозяйствоын ортчиз Россиысь чорыг будэтӥсьёслэн кенешсы. Соослы возьматӥм лэсьтӥськись выль предприятиез но. Палэнысь лыктэм учёнойёс но специалистъёс чылкак паймизы, кытын ке кыдёкын Удмуртиын, пе, форель будэто.

Ужзэ азьланьтэ Каракулино ёросысь «Прикамье» чорыг хозяйство но. Шумпотоно: али гурт хозяйствоос но, фермеръёс но чорыг будэто ни.

Эшшо одӥгез тунсыко проект – Каракулино ёросысь кеч вордон ферма. Татчыозь Удмуртиын ас хозяйствозэс возисьёс гинэ та пудоен выризы. Табере аналтэм «Арзамасовский» пудо вордонъя комплекс тупатъямын, татын кеч но вордо ни, йӧл но кыско. Соослэн али ӝутскон вакытсы.

Ӧжытак ӝега курка будэтонъя проект. Но со вунэтэмын ӧвӧл. Коньдонэн юрттӥсь утчаськомы.

- Азьло аръёсы уно колхозъёс ыжъёсты будэтылӥзы. Али ӧжыт кылемын.

- Зэм но, вир висёнэн сэрен уно пудо быриз, тросэз хозяйствоос дугдӥзы сое вордэмысь. Пичи Пурга ёросын ӟеч выжыё ыж вордӥсь «Молния» хозяйство кылемын. Отын удмурт выжы ыж кылдытэмын. Вань ни али ыж вордӥсь хозяйствоос Вотка, Вавож, Можга, Якшур-Бӧдья, Юкаменск ёросъёсын. Ыж возё фермеръёс но.

- Гурт удысысь кыӵе азинсконъёслы тӥ тужгес но шумпотӥськоды?

- Нырысь ик пудо вордон удыслы. Кема аръёс ӵоже сюро таза пудо уллё ялан кулэсмылӥз, нош туэ нырысьсэ солэсь лыдзэ будэтонъя планмес быдэстом. Азьланяз но, малпасько, пудо йылоз. Со понна луонлыкъёс вань. Арлы быдэ пуктӥсько туала куронъёслы тупась фермаос. Трос юрттэт сётӥськом со понна. Но ас хозяйствозэс нуисьёс пудозэс кулэсто. Со валамон: умойгес улыны кутскеменызы, пудо воземзы уг поты ни, тужгес но егитъёслэн, нош мӧйыослы секыт йӧтэ. Собере, йӧл, сӥль, вӧй басьтыны луэ ни гурт магазинысь.

Таин ӵош ик гурт хозяйствоос арысь аре йылэто йӧл поттонэз. Тани туэ котькуд скаллэсь 5 сюрс килограмм пала кыскомы. Нош огъя йӧл 700 сюрс тонна люкаськоз. Та лыдпусъёсъя туэ нырысьсэ ортчим 1990-тӥ арез. Сыӵе улосъёс Россиын 5 гинэ.

Азьпалан но йӧл поттонлы асьме республикаын бадӟым саклык висъяськоз. Туэ гинэ та удыслы Удмуртилэн бюджетысьтыз висъямын 787 миллион манет, со сяна, Россилэн казнаысьтыз 500 миллион пала. Али Правительствоен кутэмын ни скал уллёез умоятонъя но йӧл поттонэз йылэтонъя 2013-тӥ-2015-тӥ аръёслы чаклам программалэн концепциез. Соя куинь ар ӵоже йӧл поттонэз 704 сюрс тоннаысен 732,5 сюрс тоннаозь будэтоно. Та дыр ӵоже Удмуртия гинэ гурт удыслы 1 миллиард 945 миллион манет висъялоз.

- Нош туэ музъем ужъёслы кыӵе дунъет сётысалды?

- Котьма ке но асьмеос куазь борды кыткемын на. Тулыс быдэс арнялы бусые вазьгес потыса но, зоръёсын сэрен кизёнэн беромим, юосты кутсан вакыт нош ик зор люкетӥз. Ваньмыз со урожай вылын шӧдӥськиз – котькуд гектарысь 15,2 центнер люкаськиз. Оглом 530 сюрс тонна луиз, нош миым 700 сюрс тонна кутсамы вал. Нырысь секыт югдур кылдылӥз кизер эстӥськон басьтонэн. Но Россиысь Правительство гуртоослы дизель топливолэсь дунзэ капчиятэмен но асьме бюджетысь субсидия висъямен, эстӥськон 40 процентлы дунтэмгес каремын вал. Озьы одӥг литр соляркалэн дуныз 27 манетысь 12,8 манетозь лэзькиз.

- Йӧл дун мындагес ик, озьы-а?

- Озьы луиз. Таӵеез но берло аръёсы нырысьсэ. Совето Союз аръёсты вератэк, кизер эстӥськон котьку йӧллэсь дуно сылӥз, нош туэ гуртоос понна дунъёс озьы капчиятэмын вал. Озьы ке но вань бусы ужъёсты быдэстонлы дунтэматэмез кизер эстӥськон ӧзгес тырмы. Мукетыз туж сюлмаськытӥсь ужпум – ю куасьтон-чылкытатон тӥрлык. Солэн начармемез ваньмызлы тодмо. Туэ гужем эшшо одӥг пол возьматӥз, КЗС-ъёсты тупатон-выльдон борды матысь дыре ик рос-прос басьтӥськоно шуыса. Миым кӧс нуналъёсы ю тысь бусыысь ик итымъёсы пыриз, шуыны луоз, нош туэ котэныз ю шертон комплексъёс куасьтыны ӧз вуылэ.

- Бадӟым саклык висъяське ӟеч кидысъёсын ужанлы. Солэн пайдаез шӧдӥське ни-а?

- Туж зол. Сыӵе кидыстэк туэ асьмеос няньтэк кыльысалмы. Азьвыл аръёсы та ужлы 10-15 миллион манет висъяськылӥз ке, берло кык арзэ – 38-40 миллион манет. Туэ вань кидыс пӧлысь 82 процентэз ӟечлыко вал. Таӵеез но асьмелэн ӧй вал на.

- Берло кӧс аръёсын сэрен музъем ужын маке воштӥське-а?

- Нырысь ик, ӟеч кидысъёсты быръён. Тросэз соос чакламын кӧс но кот аръёслы. Собере, али тросгес саклык висъяськом пудо сиён культураосты кизёнлы. Кылсярысь, шӧдскымон йылэтӥм кукуруза бусыосты. Куд-ог хозяйствоос али но соосты утялто на. Туж бадӟым вамыш лэсьтэмын техникаез выльдон понна.

- Республика толэз потыны дась-а?

- Дась. Зэм, ю тысь но пудо сиёнъёс ӧжытгес дасямын, но асьмелэн трос сиён кылиз миымлэсь. Туэ котькуд пудо йырлы дасямын шорлыдын 20 центнер сиён. Толэз умой ортчытом, йӧл, сӥль уз кулэсме.

- Алексей Владимирович, кенешъёсын тӥ ӵем поттылӥськоды, гурт удысын ужасьёс уг тырмо шуыса. Зэм ик-а асьме шаерын та ужпум сокем лэчыт сылэ?

- Зэм. Арлыдоос пенсие пото, нош егитъёслэн гуртэ кылемзы уг поты. Гурт удысъя дышетон заведениосты быдтэм специалистъёс олокыӵе но амалъёсын палэнскыны туртто музъем ужлэсь. Соин ик егитъёсты гуртэ кыскон понна нырысь юрттоно улон сэреген, радъяно шутэтсконзэс, будӥсь пиналъёссэс интыяно. Гурт улонэз азинтонъя программа асьме республикаын 2003-тӥ арысен быдэсъяське ини. Та дыр ӵоже улон интызэ умоятӥз 2 сюрс 100 егит мурт. Лэсьтӥсько нылпи садъёс, школаос, эмъяськон, культура юртъёс, спортзалъёс но стадионъёс. Бадӟым саклык висъяськыны кутскиз сюресъёсты тупатонлы, улон интыосы газ но ву кысконлы. Но со тырмыт ӧвӧл ай, соин ик та бордын но уж азинтӥськоз.

- Вань-а асьме республикаын хозяйствоос, кудъёсыз сярысь вожъяськыса шуыны луэ: мон татын улысал!

- Котькуд ёросын вань. Макем ӟеч кузё, сокем ӟеч отын улон. Тани Можга ёросысь «Россия» хозяйствоен кивалтӥсь Аркадий Вершинин Можга ёрослэн йырыз луиз. Нош гурт предприятиен кивалтыны кутскиз солэн пиез Юрий. Соос котыр ласянь юртто ужасьёссылэсь улон-вылонзэс умоятыны, ӟеч уждун тырыны. Трос сыӵе хозяйствоос Вавож, Шаркан но мукет ёросъёсын.

- Удмуртиын дасясько-а проектъёс, кудъёсыз коньдонэз шыръяны юрттысалзы? Тани куд-ог улосъёсын тӧллэсь электрокужым потто. Асьмелэн кыедлэсь шуныт поттон борды кутскизы.

- Скал кыскись роботъёс вань. Специалистъёс куто ни ГЛОНАСС сӧзнэтэз: космосысен валаны луэ, кыӵе соиз яке таиз бусы, кыӵе удобрение отын уг тырмы, маин висе будос но трос мукетсэ. Ма, туала механизаторез пуктод шат вуж тракторе, кытысь со сьӧд-сьӧд вӧяськыса потоз? Медло солэн джойстикен рулез, мед луоз отын кондиционер, толалтэ шуныт, гужемзэ ыркыт. Сыӵе техникаен котькудӥз ужалоз.

- Нош робот трактор вуоз-а асьме бусыосы?

- Соос кылдытэмын бере, куке но вуозы. Ваньмыз азьпалан.

Источник:

Стрелков А. В. Калля выжыысь министр / А. В. Стрелков ; записал Иван Аркашев // Удмурт дунне. - 2011. - 12 окт. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"