Смагин Леонид Александрович

From Воршуд
Revision as of 14:42, 6 February 2015 by Admin (talk | contribs) (1 версия импортирована)
(diff) ← Older revision | Latest revision (diff) | Newer revision → (diff)
Jump to navigationJump to search

Пыдъёсы - утисьёсы[edit]

Смагин.jpg

Леонид Александрович Смагин - Удмурт Республикаысь дано артист. Калык эшъяськон орденэн пусъем академической «Италмас» ансамбльысь нырысетӥез удмурт эктӥсь. 28 ар ӵоже сцена вылын кылдытэмын трос образъёс «Пересьёс но казакпиос», «Удмурт рапсодия», «Чингылиен эктон», «Ӟус», «Кадриль» но трос мукет эктонъёсын. Капчи мылкыдыныз но задор такмакъёсыныз со бордаз кыске учкисьёсты. «Италмасысь» нылъёсты эктон куспетӥзы частушкаен лӧпкытъя. «Оп-па, Марпа, мар-о меда малпа» шуыса куальтыръяськон кырӟанэз пыраклы пыриз ансамбльлэн репертуараз.

- Семьяын 11 нылпи пӧлын мон 7-тӥез. Пичи дырысен артист шуизы. Кытын кырӟан-эктон - мон отын ини. Та быгатонлык мемейлэсь паласькем, дыр. Со котькыӵе юон дырын ваньмызлэсь зол тапыртӥз но кырӟалляз. Тятяе но вынъёсы арганэн шудӥзы на, мыным таиз малы ке паласькымтэ. Школаын но пинал дыръям тросгес кырӟалляй, нош улонэ весяклы герӟаськиз эктонэн. Ижысь культпросветучилищее дышетскыны мынӥ хореографияя люкетаз. Татчы келязы районлэн направлениеныз. Соин, диплом басьтыса, ужаны берытски Дэри ёросысь Постолйыл гуртам. Татын кылдытӥм кырӟанъя коллектив, эктонъя ансамбль, йӧспӧртэм луиз шумовой оркестрмы. Но, гуртын ужаса, кӧт ӧз тыры. Тодон-валан люкан вылысь арняяз огпол вуылӥ дышетскем училищеям. Татысь «Зангари» ансамбльын мон студент дырысеным эктӥ. Соин кивалтӥз Семён Борисович Сухенький. Татчы, оло, ӧй но кутысалзы. Лыктыкум Сухенькийлэн кузпалыз Сария Ибрагимовна йырзэ сэзъям: таӵе пурысь ӟольгыриез, пе, малы басьтӥськод? Малпасько, «Зангари» - улонам туж бадӟым школа луиз. Но гурт администрациысьтымы огез кивалтӥсь нергелы тазьы дышетскеме ӧз кельшы. Ужме куштӥськем шуыса, интыысьтым мозмытӥзы. Толэзь-кык ортчыса, выльысь ужаны куризы, со толэзьёс понна уждун тыризы ке но, кӧты ӧз берытскы: таӵе вырон-дауртон мыным выль улонэ билет сётӥз.

- Тӥ дорозь гуртысь потэм удмурт эктӥсьёссы «Италмасын» ӧй вал. Инты понна зол-а нюръяськиды?

- Лыктӥ но возьматӥськи. Соку ансамбльын балетмейстер вал Лев Бородулин. Соин ӵош монэ дунъязы на Леонора Викторовна но Анатолий Васильевич Мамонтовъёс. Бородулин классика манеръягес ужаз, соин йырзэ шоназ. Малпасько, талэн басьтэмез уггес поты. Уго гуртын будэм пияшлэн кытысь ай классической балетлы тупась выросъёс. Кутӥзы - тупалод, пе, серемес эктонъёсы. Озьы «Италмасысь» балетъя группаын нырысетӥез удмурт пи луи. Ансамбле шедьыны секыт ӧвӧл, шуггес пырыны творческой коллективе, ужаны, аслэсьтыд аспӧртэмлыктэ ыштытэк. Кутӥзы бере, иське, нуналмысь ачид бордын ужано. Ӵемысь верасько: Терпсихора (грек мифологияя со эктонлэн музаез луэ - авт.) мон вылын шутэтскем. Студент дыръямы Саша Алалыкин эше кузь кукъёссэ пельдораз куасалтэ но быдэс уйзэ озьы изе вал. Мыным таӵе пластика бордын кема ужано луиз на. Нуналмысь тыршоно но пӧсяно.

- Эктӥсьёслэсь секталазэс чакласа возисьёс вань-а? Тани балетъя школаын дышетскисьёсты, пе, ӵемысь вес вылэ султытъяло.

- «Италмасысь» балетъя группаын сыӵеез ӧвӧл. Озьы ке но удыссэ дунъясь артист кӧтсэ будэтонлэсь возиськоз. Мултэс килограммъёс люкето эктонын, собере сюлэмлы но соос кышкытлык кылдыто. 28 ар эктытозям, ог 10 кило люкай ни, дыр. Пинал дыръям туж чиед вал. Соку чик ӧй сюлмаськы, тазамо шуыса. Али тыршисько ни чакласькыны, концертъёс азьын ӧжытгес сиськисько, ичигес ву юисько. Берло дыре адямиос шузимемын диетаосын, соин амалтэк кылзоно луэ пӧртэм ӵектонъёсты. Шуо, пичи тэркыысь сиёно, пӧрамез отчы гурезь мында тырид ке, сиён трос адскоз, ӝуш мултэссэ уз куры. Куддыръя сыӵе амалъёсты вылам эскероно кожасько. Быгатӥсько няньтэк но сиськыны. Нош мылкыды луиз ке, юмал булкаен шыд ӟузьыло. Яратӥсько макарон но пельнянь.

- Ужан нуналды кӧня час кыстӥське?

- 4 час. Нырысь ик луэ тренаж. Час ӵоже котькуд быгытмес шунтӥськом: кутскиськом пыдчиньыысен, йылпумъяськом йырын.

- Озьы котькуд нунал куасалляськоно-а? Шутэтскон нуналъёсы коть со сярысь вунэтыны луэ-а?

- Ужаны малпаськод ке, мугордэ одно ик куасаллялод отпускад но, шутэтскон нуналъёсы но. Эктӥсь мурт нуналмысь ӝутыны тырше аслэсьтыз быгатонлыксэ.

- Репетиция дыръя пӧсям вуды трос-а ваське?

- Котмем дӥсе тыбырам лякиське ке, аслым туж зол ужай потӥсько. Соин пиналъёслэн студиязы ветлӥсьёслы шуисько: кот тыбырын потӥськоды ке, ӵушконды пызьыртымон луэ ке, шумпотэ, таӵе ужаны быгатӥды шуыса.

- «Италмасысь» нылпи студиын кема аръёс ужаськоды ни. Татчы лыктӥсьёс тросгес-а, ӧжытгес-а луо?

- Куриськисьёс котьку тачак. Но улонзэ ансамблен герӟасьёс трос уг луо. Уго культура удысэ лыктон азязы ик тодо ни: уждун ичи, квартира уз сётэ. Али ансамбльын секыт югдур: гастрольёс ӧжыт, репертуар шер выльдӥське.

- Кылэм вань, тӥ, пе, укыр нюръяськиськоды зэмлык понна. Соин чурыт кылдэс вераны быгатӥськоды кивалтӥсьёстылы но… Дӥсьтӥсь луэмды улонын юрттэ-а?

- Ту-уж люкетэ. Шара верам кинлы кельше? Дӥсьтыса вераськон пачкатэ, вылӥе ӝутӥськыны уг сёты. Уг яратӥськы тодӥсьяськисьёсты, ас удыссэс тодытэк но, туртто вылэ тубыны, карьера лэсьтыны. Уг кельшы ке, пырак синмазы верасько. Куддыръя, оло, быгатысал котыръяны, пыриськыны, но мыным зэмлык дуногес потэ.

- Ужан коллективады критикаез дунъяло-а?

- Уг. Но 28 ар ини эктӥсько бере, кыл вераны быгатӥсько. «Кутэн эктон» пуктӥм. Дэра дэрем дӥсяса, пыдамы кутэн потӥськомы но кукъёсмес 90 градус выллане ӝуткаськомы. Мар шуоз удмурт учкись? Ку ини удмурт нылъёс но пиос, штан пыдэсъёссэс возьматыса, кукъёссэс выллань ӝутъяло? Кытын удмурт кышномуртлэн кепыран сямыз? Таӵе учыръёсы мон шып улыны уг быгатӥськы. Верамме пелязы понӥзы ик. Коть 30 ар, коть 50 ар тапырты, но эктӥсьлэсь балетмейстер уг пӧрмы. Инмар чупаны кулэ тазэ но, созэ но. Соин куректӥсько, ансамбль удмурт калыклы кыдёкын луиз шуыса. Ум быгатӥське ни вырӟытыны учкисьлэсь сюлэмзэ. Озьы ке но оскем потэ: «Италмаслэн» сяськаян вакытэз луоз на.

- Кема эктӥськоды ни шуыса, шутэтскыны келямзы уг-а поты? Оло, куддыръя постановкаосын рольёс но уггес шедё ни?

- Аслам интые та коллективын вань. Нокин но монэ кыкетӥ роле уг на кельты. Но 60 артистэн коллективлы шуг кырӟаны-вераны пичи залын. Соин концертъёсы потало покчигес группаен. Мон пыриськисько бадӟым концертъёсы гинэ. Кема эктэменым валче тумошо учыръёс но луо. Балезино ёросын Гербер дыръя дорам лыктӥзы ӵош дышетскем эшъёсы. Концертэз, пе, паймыса учкимы: таиз эктӥсьсы Смагинлы кельше, учкы ай, кудбыдӟа будэм ни Лёнямылэн пиез. Нош тон весь ачид эктӥськод ай вылэм…

- «Италмаслэн» бадӟым гастрольёсыз берло дыре ӧвӧл…

- Берлозэ 2004-тӥ арын потамы Италие. Мӧзмыт луиз. Азьло кытчы гинэ ӧм вуылэ: Уйпал Корея, Франция, Уйпал Америка, Таиланд... Али но тодам США-ысь Флорида штатын улэммы. Мынонмы Выль ар уе тупаз. Самолётэн лобытозямы, вань час поясъёсын вуись арез пумитамы. Майями паймытӥз куазеныз - толалтэысь гужеме вуим. Удмурт шаерын - лымы. Татын син шоры вӧлскиз лыз-лыз Атлантика зарезь. Америкаын артистъёсмы нырысьсэ шӧдӥзы эрикез. Котькыӵе магазинэ пыр, котькинэн вераськы - алӥсь ӧвӧл. Кылсярысь, Кореяе потакумы ик, сьӧрамы вужер кадь ветлӥзы КГБ-ын ужасьёс. Азьло гастрольёслэсь кылем уг поты вал. Огполаз кузпалэным 9 толэзьем Танямес кык толэзьлы куштӥм Светалэн анаез доры. Варманай али но со дырез бӧрдыса вера. Гужем, турнан вакыт. Нуныез, пе, возь вылэ мотоцикл доры кельто. Кыдёке медам кошкы шуыса, пыдтӥз думо. Пӧсь, кутъёс, лузьёс. Турнанысь бертыса, ваньзы нош ик уже кошко, анай - фермае, нуныез чаклась ӧвӧл. Али тодам вайисько ке нунымес озьы куштэммес, сюлмы вирен кисьтӥське. Малы меда пиналмес сокем жаляськымтэмы? Али нылпиез котьмалэсь вылӥ дунъясько. Соин, оло, мон сокем уг куректӥськы, гастрольёс ӧвӧл шуыса. Уго семьяез учконо, нылпиосты будэтоно.

- Тодмо ансамбльысь «лушкасьёс» но зарни гурезь сӥзисьёс вал-а?

- Дась вал кошкыны «айкайёсын» ӵош. Дунъязы кадь эктэмме но, тенор куараме но. Малпаськи но, жаль потӥз балет эктонлы 10 ар сӥземе. Кошкысал ке, эктон стаже отын ӧй ни мынысал. Нош «Италмасын» 20 ар ужаса, пенсия тыриське. Мукет городэ кошкыны но луысал. Огполаз Иже вуылӥз «Владимирская Русь» коллектив. Татысь кивалтӥсьёслы возьматски. Кӧня ке улыса, ӧтён гожтэт вуиз. Пумитаз номыр ӧй ысты. Бӧрысь отчы-татчы кыстаськыса ӧй ни выры. Ансамбльысь нылпи студиын ужаны ӧдъяй. Огвакытэ «Италмасын» ик репетитор вал. Дорамы лыктӥсь егит эктӥсьёсты репертуарен тодматылӥ. Но татын но пыд пуктӥсьёс шедизы: мылкыдыд вань ке, уксётэк ужа, шуизы. Кошки. Интыям мукетсэ шедьтӥзы, уждун но сётӥзы.

- Учкисьёслэсь задор мылкыд басьтӥськоды-а?

- Соос милям арысь аре кулэсмо. Мугез огвыллем репертуар бордын, улон шоры вуж синмын учкон, «Италмасэ» вылез мырдэм пыӵа. Мукет коллективъёс кемалась вузало дискъёс, видеофильмъёс, видеоклипъёс. Милям номырмы ӧвӧл.

- Кылем арын та удысын вамыш лэсьтэмын ук - диск потӥз.

- Отчы пыризы 20 ар талэсь азьло гожтэм кырӟанъёс. Соосты «Айкае» кошкем артистъёс но быдэсто. Улон воштӥське, куронъёс мукетэсь. Огинтыын сылыны уг яра. Нош ми ум дыртӥське. Артистъёсты яратэмез дунъяны луэ сяська керттэтъёсын но. «Айкайлэсь» но «Италмаслэсь» туэ ноябре ортчем концертъёссэс верасько мон. Соос вискын кӧня ке арня вал. Радъяськизы одӥг культурая дворецын. «Италмас» кык час кырӟатозь-эктытозь, сцена вылэ одӥг сяська но ӧз вуы. «Айкайёслы» вылысьтыз вылаз кадь кузьмазы. Тӥни кыӵе ярато учкисьёс! Озьы ке но таяз радэ «Италмас» но устогес концерт возьматӥз. Тодамы вайим но выльдӥм Александр Исупов балетмейстерлэсь эктонъёссэ. Лыдъясько, «Италмаслэн» сяськаян вакытэз со ужаку вал. Эктонъёс крезьгурен валаса биняськемын вал. «Куинен эктонэз» пуктыкумы, Александр Дмитриевичлы возьматӥ, кызьы экто постолйыл палъёс. Табере со тапыртон весяклы кылемын ансамбльлэн зарни фондаз.

- Ужысь тырмымтэосты тодӥськоды бере, коллективе кыӵе мылкыдын пыриськоды?

- Котькыӵе кӧтӝож, валамтэос мед луозы, но эктон классэ вамыштӥсько капчи мылкыдын. Вань висёнъёсме но урод мылкыдме ӧс сьӧры кельтӥсько. Пыр, ужа, пӧся. Артистъёсты быдтэ кизили висён. Котькыӵе егит кырӟась-эктӥсь но ассэ кизилиен шӧдыны кутске. Соин ӵемысь ог-огзылы пыд пукто. Уг кышкаськы, мынам улонам сыӵеос тупало ке. Усё, султо, тузонме куртко но бурдъёсме вӧлъяло.

- Уд ӝожомиське-а, кышнодылэн вужерез сайя шуыса? Уго Светлана Смагина кырӟасез тросгес тодо, дыр, Леонид Смагин эктӥсез сярысь.

- Огназ кырӟасьлы вылӥе ӝутскыны капчигес, коллективен эктӥсьлы сярысь. Малпасько, огласянь умой но со, кышноезлэн тыбыр сьӧраз воргорон юн борддор кылдытыны пӧрмытэ ке. Мултэс ушъяськытэк верано ке, монэ ӟеч специалистэз сямен тодо асьме республикаын но, палэнысь кырӟась-эктӥсь коллективъёсын но. Ӟеч кылъёс вераме потэ учкисьлы. Тани залын тыл кысэ, артистъёс сцена вылэ пото. Учкисьёслэн осконэн но гажан мылкыдын ӝуась синъёссы милесьтым мылкыдмес бурдъяло. Тау карисько ас пал адямиосылы. Уго соослэн дунъямзы но данъямзы юрттӥз асме вылӥ возьыны, дышетскыны но будыны. «Италмасэ» ужаны лыктэме бере кыӵе синмаськыса учкизы. Мон огшоры эктӥсь, номыр ӧй на лэсьты, нош соос быдэс гуртэн концертэ лыкто, синъёсазы гажан мылкыд, оскон. Кызьы осконзэс уд быдэсты? Уг вунэто али но. Ёросын ортчылӥсь пӧртэм конкурсъёсы жюрие ӧтё, визь-кенешме юало.

- Кышнодылэсь ужамзэ дунъян понна «Айкайлэн» концертъёсаз ветлӥськоды-а?

- Берлояз мыныны мылкыд ӧй вал, кызон йӧтӥз. Концертэ вуи но висёнме ик вунэтӥ. Сомында ӟеч мылкыд басьтӥ. Котькуд кырӟан-эктон номер бере сяська сёто, артистъёслы сцена вылысь кошкыны уг сёто, кичабонъёс куаш вазё. Доре бертӥ - изем уг луы.

- Чебер кышнодэс вожаськоды-а?

- Пинал дыръя вал, но али визьмаськи, уг ни вожаськы.

- Нош мар муген кемагес ик казакпиын ветлӥды?

- Тятямы улонысь вазь кошкиз. Мемейлы огназ секыт. Соин нырысь малпай вынъёсме кышноян сярысь. Соин ачим 29 аресам гинэ семья кылдытӥ. Алигес ӵош дышетскем эшъёсы тодазы вайизы: тынад, пе, куронъёсыд укыр вылӥын вал. Студент дыръяд шуылӥд: кышное луоз Алнаш районысь, Света нимо, кузь сьӧд йырсиё. Сыӵе нылаш ансамбле вуиз но - быриськиз…

- Кыкетӥ пинал сярысь Смагинъёс кемагес ик малпаськизы…

- Владикмы вордскыку, Таня нылмылы 16 арес вал ни. Малпасько, та дыр ӵоже Света вуттӥз артист сямен усьтӥськыны. Пие вордскем бере шумпотонэ нокытчы тэронтэм вал. Солы луыса-а, мар-а мылкыдме шара усьтыны ӧй дӥсьты. Огполаз кузпалы кӧтӝожзэ но вераз: маке, пе, шумпотэмдэ уг шӧдӥськы. Валэктӥ: ма, егит атай ӧвӧл ни ук мон йыр йылам ветлыны - малпаськоно, кызьы пиез будэтыны.

- Культура удысын вӧйын нянь сётӥсь ӧвӧл ке но, нылпиостэс крезьгур дуннее валтӥськоды.

- Таня крезьгуръя школаез йылпумъяз, собере Ижысь крезьгуръя колледжез, али дышетске Удмурт кун университетын. Владикмес но крезьгурлэсь ум люкиське. Эшшо нуллӥськом на школа азьын тодон-валан люканъя нимысьтыз дышетсконэ. Эктонлы матэгес карон понна гимнастикае сётӥмы на. Улонзэс крезьгурен герӟалозы-а, уз-а - тодозы асьсэос. Мон нылпиосылы сюрес гинэ возьматӥсько. Но искусствоез валамзы но шӧдэмзы улонын уз люкеты, малпасько.

- Смагинъёс сярысь таӵезэ но кылэм вань. Светлана Николаевнаез, пе, пӧраськон доры уд лэзиське. Соин кышноды квартираетӥды, шуныт шален шобырскыса, лёгаське, кырӟан нёжъя но куаразэ уте. Нош Леонид Александрович губи, кияр сылалтэ, шыд пӧзьтэ...

- Пӧраськонэз туж яратӥсько. Туэ гужем ӵоже 60 черык компот лэсьтӥ. Сю банкалэсь трос луизы салатъёс. Губи но кубиста сылалтӥ. Толлы рос-прос дасяським. Пӧраськемелы тодмоосы но паймо: быгатӥськод шат? Кызьы уд! Кузпалы гастроле кошкиз ке, пиньёсты, ӝажые тырыса, уд возьы, уката пиналъёсты сюдоно. Светалы но гур вӧзын инты шеде - пӧраськыны но, кырӟаны но.

- Эшшо верало, та сиёнъёсты вӧзы, пе, пӧртэм емышъёслэсь вина пукетӥськоды на.

- Таиныз но кемалась вырисько ни. Эшъёсынымы пумиськон дыръя яратӥсько аслэсьтым винаме поттыны. Уго мынамез магазинысь басьтэмын ӧвӧл. Котькуд банка борды гожтӥсько: таиз эмезьлэсь, таиз льӧмлэсь. Куддыръя Света «ой, акыльтӥсько, та банкаосыд котькытын» шуэ. Куноос пыро но, ачиз юа: Лёни, кытын ай ческыт винаед? Кин лыктэ, соосты ик куноятӥсько. Азьло эшъёс трос вал. Али улонлэн куронэз сыӵе, вылды, кылемын на матысьёсыз гинэ.

- Сомында емыш асьтэ бакчаын будэтӥськоды, дыр...

- Кузпалылэн Алнашысь Кузьыли гуртаз. Анаймылы мерттӥськыны юрттӥськом ик. Со утялтэ, вуэмзэ ми нуиськом. Гастрольёстӥ ветлыса, бакча басьтыны но сое возьыны дыр ӧвӧл.

- Улонады мае тужгес вылӥ дунъяськоды?

- Пыдъёсме. Котькыӵе артистлы ассэ туж зол кырмоно. Уго котыраз - юон, кыскон, вылтӥяськон. Таӵе выжыкыл верало.

- Синъёсы, куное вуыса, кызьы учкиды?

- Пальпотыса.

- Пельёсы, тӥ мар кариды?

- Сак кылзӥм.

- Ымы, тон мар шуид?

- Ойдо кылём, ойдо кылём юыны!

- Пыдъёсы, тӥ мар кариды?

- Резь гинэ доре бертӥмы.

Тау пыдъёсылы, утисьёсылы. Соос монэ улонын валто, азьлане сюрес возьмато.

Источник:

Смагин Л. А. Пыдъёсы - утисьёсы / Л. Смагин ; записала А. Ионина // Удмурт дунне. - 2009. - 27 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"